Balimacɛw, ani balimamuso kanulenw:

An be ni kanuya min ye Ala ani mɔgɔw koo la, o lo b’an lasun ka ‘taga siyaw bɛɛ kɛ Yezu ka kalandenw ye k’u batize.’ (Mat. 28:19, 20; Mariki 12:28-31). Kanuya min t’a yɛrɛ dɔrɔn nafa ɲini, o fanga ka bon. N’an be ni o kanuya ɲɔgɔn ye, ‘minw bɛɛ labɛnnin lo ka sɔn ɲɛnamaya banbali ma,’ an bena se k’olu dɛmɛ.—Kɛw. 13:48, NW.

Fɔlɔ la, an tun be to ka min kɛ, o ye ka baro dadoncogow degi an kunfɛ ani k’an ka sɛbɛw di di mɔgɔw ma. Nka sisan, an be baro kɛ ni mɔgɔw ye cogo min na, an mako b’a la k’o fisaya. An b’a fɛ k’an ka kanuya yira tɔɔw la, an kɛtɔ ka baro kɛ n’u ye u makoyakow kan. O kɔrɔ ko an b’an janto koɲuman mɔgɔ kelen kelen bɛɛ makoyaw n’a jɔrɔnankow la. O kɔ, an be sɔn k’an ka baro yɛlɛma ka kɛɲɛ n’o ye. Kitabunin nin bena an dɛmɛ cogo di k’o kɛ?

Kalansen 12 lo be kitabunin nin na. O kalansenw be kuma jogo dɔw lo koo la an ka ɲi k’a ɲini ka kɛ ni minw ye walisa k’a yira mɔgɔw la ko an b’u kanu ani k’u dɛmɛ u ka kɛ Krista ka kalandenw ye. Kalansen kelen kelen bɛɛ basiginin lo Bibulu ka maana dɔ lo kan, o min na Yezu wala kerecɛn fɔlɔ dɔ ye jogo tigitigi dɔ yira a ka waajuli baara la. An ka laɲinita ye min ye, o ye ko an t’a fɛ ka baro dadoncogow degi an kunfɛ, nka an b’a fɛ ka fɛɛrɛw ɲini walisa k’a yira mɔgɔw la ko an b’u kanu. Tiɲɛn lo ko an mako be o jogow bɛɛ la an ka waajuli baara faan bɛɛ la. Nka an bena kuma jogo tigitigi dɔw lo koo la, an mako be minw na n’an be baro daminɛna ni mɔgɔw ye, n’an be viziti kura kɛra wala n’an be bibulukalan kɛra ni mɔgɔw ye.

Kalansen kelen kelen bɛɛ lajɛtɔ, jogo min kofɔra yen, miiri koɲuman k’a filɛ i be se k’o yira cogo min na n’i be kumana ni mɔgɔw ye i ka mara la. I jija k’i ka kanuya barika bonya Jehova ani mɔgɔw koo la. O kanuya lo bena i dɛmɛ k’i ka laɲinita dafa, o min ye ka mɔgɔw kɛ Krista ka kalandenw ye. Fɛɛrɛ ɲuman si tɛ yen ka tɛmɛ o kan.

An be ni nɛɛmaba min ye ka jɛn ka baara kɛ n’aw ye, o ka di an ye yɛrɛ le (Sof. 3:9). Jehova k’aw duga kosɔbɛ sabu aw b’a yirala ko aw be mɔgɔw kanu ani aw be u dɛmɛna u ka kɛ Krista ka kalandenw ye!