1. An ka kan ka mun lo kɛ walisa ka diya Ala ye?

N’AN B’A FƐ ka jɛnɲɔgɔnya kɛ ni Ala ye teriya ni kanuya la, an ka kan k’an mabɔ ngalon diinan la. An ka kan ka tiɲɛn diinan sira tagama. Mɔgɔ miliyɔn caaman b’o lo kɛra duniɲa kɔnɔ bi.

2. Jehova Seerew be sɔrɔ min, ani u be baara juman kɛ?

² I komi Bibulu tun kɔnna k’a fɔ, batobaga sɔbɛw kɛra “jamaba [jamakuluba, NW]” ye min bɔra “siyaw bɛɛ ni bɔnsɔnw bɛɛ ni mɔgɔ sifaw bɛɛ ni kanw bɛɛ la” (Jirali 7:9). Jamana 235 na, Jehova Seere miliyɔn caaman be kisɛya kɛ ka mɔgɔw dɛmɛ ka Jehova ka kanuya siraw n’a ka koo waajibiyalenw lɔn.

3. Jehova Seerew b’u ka batoli lase jɔn ma, ani u be ban batoli sifa juman na?

³ Seerew fɛ, Jehova kelenpe ka kan ni batoli ye. U be ban ka biri boliw wala diinanw ka jaaw ɲɛ (1 Yuhana 5:21). U tɛ bato kɛ mɔgɔ salenw ye u kɛtɔ ka siɲɛna kɛ suu kɔrɔ, wala k’u sendon seli dɔw la minw be ngalon lannakow ni “jinɛw ka kalan” kɔrɔta (1 Timote 4:1). Nka, u be mɔgɔw dusu saalo, minw ka mɔgɔ sɔbɛ dɔ sara: U b’a ɲɛfɔ u ye ko Ala ye lahidu ta ka suuw lakunu alijɛnɛ kɔnɔ dugukolo kan.—Yuhana 5:28, 29; Kɛwalew 24:15.

4. Ala ka mɔgɔw be jinamoriya koow jate cogo di?

⁴ Jehova Seerew be ban ka jinamoriya ni yeli ni subagaya koow kɛ. U b’a lɔn k’o koow bɔra Sitanɛ yɔrɔ. U t’u bolo la jinamoriya koow kan walisa k’u yɛrɛw tanga. U jigi lanen be Jehova lo kan.—Ntalenw 18:10.

5. Cogo juman na Jehova Seerew tɛ “diɲɛ taw ye”?

⁵ Yesu tun y’a fɔ ko a ka kalandenw tɛna kɛ “diɲɛ taw ye” (Yuhana 17:16). Yesu yɛrɛ banna k’a seen don politiki koow la a ka wagati la (Yuhana 6:15). Ale cogo la, Jehova Seerew t’u seen don fewu politiki ni faso kanuya la. U fana t’u seen don sɔsɔliw la, minw be kɛ walisa ka duniɲa ka koow yɛlɛma. Nka, u b’u ka ninsɔngɔ sara. U sigilen be jamana min kɔnɔ, u be kolo o jamana ka sariyaw ye.—Yuhana 15:19; Romɛkaw 13:1, 7.

6. Ala sagokɛlaw be cikan jumanw sira tagama furu ni furusa koo la?

⁶ Komi u be kolo faamanw ye, Jehova Seerew b’u janto k’u ka furu siri sariya ɲɛ kɔrɔ (Tite 3:1). Komi u be kolo Ala ka cikanw ye u tɛ sɔn muso caaman furu la (1 Timote 3:2). Ka fara o kan, komi u be Bibulu ka kalan sira tagama u ka ɲɛnamaya kɔnɔ, Ala sagokɛlaw ka furu tɛ farati ka laban furusa fɛ joona.

7. Seerew be kanuya yira ɲɔgɔn na cogo di?

⁷ Jehova Seerew be ɲɔgɔn kanu. Ka fara o kan, u be Ala kanu fana. O kosɔn u kanbɛnnen be balimaya sɔbɛ kɔnɔ, hali n’u bɔra kaan ni siya caaman na. Balawo wala wagati gwɛlɛnw mana se u kan Seerew be dɛmɛ lase ɲɔgɔn ma joona joona. Jehova Seerew be kanuya yira u ka ɲɛnamaya kɛcogo fɛ.—Yuhana 13:35.

8. Ala ka mɔgɔw tɛ sɔn ka kɛwale jugu jumanw kɛ?

⁸ U ka ɲɛnamaya kɔnɔ, Jehova Seerew be jijali sɔbɛw kɛ walisa ka kɛ mɔgɔ tilennenw ni mɔgɔ kɔnɔgwɛw ye. U tɛ sɔn ka sonyali kɛ, ka ngalon tigɛ, ka jatɔya kɛ, ka dɔlɔtɔya kɛ, ka nanbara kɛ u ka koow la. Furucɛw t’u ka musow bugɔ. Sanni u ka kɛ Jehova Seerew ye, mɔgɔ dɔw tun b’o koow kɛ. Nka Jehova ka dɛmɛ sababu fɛ, u y’a dabila. Ala ɲɛ kɔrɔ, u “kora”.—1 Kɔrɛntekaw 6:9-11.

9. Gafe dɔ ye mun fɔ farafinna ka kerecɛnya egiliziw koo la?

⁹ Tiɲɛn lo, diinan caaman b’a fɔ k’olu be tiɲɛn sira kan. U be tɛmɛ u ka wale kabakomanw fɛ k’u ka darakan seereya. Ɲɛyirali fɛ, diinan minw be weele kerecɛnya egiliziw farafinna, gafe dɔ ye nin fɔ u koo la: “[Kerecɛnya jɛkulu kuraw] sigira Jinamori ni furakɛla nɔɔ na. U b’a fɔ k’u be siniɲasigi kofɔ, ani k’u be kabakow kɛ. U cɛma, ciraw be yeli kɛ, ani u be sikow kɔrɔ fɔ mɔgɔw ye. U be baara kɛ ni jii ni tulu senumanw ye, ani buguri gwɛ ni buziw ni wusulan ye walisa ka mɔgɔw fura kɛ ani ka mɔgɔw tanga bana ma.”

10, 11. Tɔgɔ lara kabako minw kan bi, mun na u t’a yira ko diinan dɔ ye Ala ka diyanye sɔrɔ?

¹⁰ O diinandenw b’a fɔ ko kabakow b’a yira ko Ala ka duga be u ka diinan kan. Nka tɔgɔ lo lara o kabakow kan. Ani, u t’a yira ko diinan dɔ ye Jehova ka diyanye sɔrɔ. Sitanɛ be see di ngalon diinanden dɔw ma walisa u ka ‘kabakow’ kɛ (2 Tesalonikekaw 2:9). Ka fara o kan, Bibulu kɔnna k’a fɔ ko Ala ka nili kabakomanw (i n’a fɔ ciraya kɛli, kaan wɛrɛw fɔli, lɔnni), tun “na ban.”—1 Kɔrɛntekaw 13:8.

¹¹ Yesu ye lasɔmini kɛ ko: “Mɔgɔ minw b’a fɔ ne ma, ‘Matigi, Matigi,’ olu bɛɛ tɛna don sankolo masaya la, fɔ ne sankolola Fa sago kɛbaaw. O don mana se, mɔgɔ caman n’a fɔ ne ye ko: ‘Matigi, Matigi, a fɔ, anw ma kiraya kɛ i tɔgɔ la, ka jinɛw gɛn ka bɔ mɔgɔw la, ka kabako caman kɛ i tɔgɔ la wa?’ O la, ne n’a fɔ u ye ko: Ne ma aw dɔn fewu. A’ ye bɔ ne kɔrɔ, aw kojugukɛlaw.”—Matiyu 7:21-23.

12. Jɔn lo bena don sankolola Masaya la?

¹² O tuma, jɔn lo bena don sankolola Masaya la? O ye mɔgɔ minw be Jehova sago kɛ.

13. Ala b’a ɲini a ka jama fɛ a ka baara juman lo kɛ bi? Ani, jɔn lo b’o baara kɛra?

¹³ Ala sagoya ye mun ye ka ɲɛsin a ka jama ma bi? Yesu y’a fɔ ko: “Nin Kibaru Duman waajuli na kɛ diɲɛ yɔrɔw bɛɛ la sankolo masaya ko la ka kɛ siyaw bɛɛ seere ye.” (Matiyu 24:14). Jehova Seerew b’o baara lo kɛra ni kisɛya ye.

14. Ala ka Masaya ye mun ye, ani jɔn lo bena o Masaya mara?

¹⁴ “Diɲɛ yɔrɔw bɛɛ la” Jehova Seerew be waajuli kɛ ko Ala ka Masaya ye sankolola gofɛrɛnɛman ye, min bena dugukolo bɛɛ mara ni tilennenya ye. U be kalan kɛ ko Jehova ye Yesu sigi k’a kɛ o Masaya Masacɛ ye. Ani ko, a ye mɔgɔ 144 000 ɲɛnatɔmɔ hadamadenw cɛ ka fara Yesu kan walisa u ka marali kɛ ɲɔgɔn fɛ.—Daniɛl 7:14, 18; Jirali 14:1, 4.

15. Ala ka Masaya bena mun halaki?

¹⁵ Jehova Seerew be tɛmɛ Bibulu fɛ k’a yira mɔgɔw la ko Ala ka Masaya bena Sitanɛ ka duniɲa bɛɛ halaki. Ngalon diinan n’a ka kalansiraw bena bɔ yen pewu sabu u be Ala tɔgɔ tiɲɛ, ani u be Sitanɛ bonya! (Jirali 18:8). Hadamadenw ka gofɛrɛnɛmanw bɛɛ minw be Ala kɛlɛ, u fana bena bɔ yen pewu!—Daniɛl 2:44.

16. Jɔn lo bena kɛ Yesu ka mara kɔnɔmɔgɔw ye, ani u bena ɲɛnamaya kɛ min?

¹⁶ Ka fara o kan, Jehova Seerew be mɔgɔ lalɔnniya ko mɔgɔ minw bɛɛ be Ala fɛta kɛ, Yesu bena koduman kabakomanw lase u ma. U bena kɛ a ka mara kɔnɔmɔgɔw ye dugukolo kan. Bibulu be lahidu ta ko: “K’a masɔrɔ a na mɔgɔ tɔɔrɔlen kasibaatɔ tila, ani dɛmɛbaa tɛ faantan minw na. A na hinɛ barika dɛsɛlenw ni ɲɛnibaatɔw la, ka mɔgɔ tɔɔrɔlenw ni kisi.”—Zaburuw 72:12, 13.

17. Jɔn dɔrɔn lo be Ala ka Masaya weleweledara?

¹⁷ Jɛkulu wɛrɛ si tɛ yen min be Ala sago kɛ, u kɛtɔ ka Masaya kibaro duman waajuli kɛ. Jehova Seerew dɔrɔn lo be mɔgɔw lalɔnniya Ala ka Masaya koo la dugukolo bɛɛ kan.