1. Mun lo bena kɛ n’i ‘gɛrɛla Ala la’?

JEHOVA b’a ka baarakɛlaw kanu. N’i ye Jehova bato, a bena i duga sisan, ani wagati nata la. Bibulu b’a fɔ ko: “A’ ye gɛrɛ Ala la, ale fana na gɛrɛ aw la.”—Yakuba 4:8.

2. An be se k’an magwɛrɛ Ala la cogo di? Ani, o bena nɔɔ juman to an ka deliliw kan?

² N’i b’a fɛ ka magwɛrɛ Ala la, i ka kan k’a ka Kuma kalan ani k’a sira tagama. N’i ye delili kɛ ka kɛɲɛ ni Jehova sago ye, a bena i lamɛn ani a bena i jaabi. Ciden Yuhana y’a sɛbɛ ko: “Ja gɛlɛya min bɛ an fɛ Ala ɲɛ kɔrɔ, o filɛ nin ye, ko ni an ye fɛn dɔ deli a fɛ ka kɛɲɛ ni a sago ye, a bena an lamɛn. Ni an y’a dɔn ko a bɛ an lamɛn, an y’a dɔn ko an bɛ fɛn o fɛn deli a fɛ, an ye o sɔrɔ ka ban.”—1 Yuhana 5:14, 15.

3-7. Ala ka hakilitigiya be se ka sɔrɔ cogo di? Ani, a be se k’an dɛmɛ cogo di?

³ Ka fara o kan, n’i b’i magwɛrɛ Ala la, a bena hakilitigiya di i ma walisa i ka loon o loon ka koow ɲɛnabɔ. Bibulu b’a fɔ ko: “Ni hakilitigiya dɛsɛra aw dɔ la, o ka a deli Ala fɛ.”—Yakuba 1:5.

⁴ Ala ka hakilitigiya be se k’i dɛmɛ cogo di ? Faan dɔ fɛ, koo minw ka gwo Jehova ye, a be se k’i dɛmɛ k’u lɔn. A fana be se k’i dɛmɛ i k’a lɔn mun na o koow man ɲi, ani i be se ka min kɛ walisa i kana i seen don u la. O lɔnniya be se k’i tanga kunko caaman ma, minw be mɔgɔ caaman tɔɔrɔ. Ɲɛyirali fɛ, Ala be cikan di a ka mɔgɔw ma u ka saniya tagamacogo ta fan fɛ. Komi u be kolo o cikan ye, o b’u tanga gwɛlɛya ninw ma: ka kɔnɔ ta diyagoya la, jɛnbanaw, dusu kasi furu, wala furusa.

⁵ Ala ka hakilitigiya be se ka fɛɛn wɛrɛ juman kɛ i ye? I ka ɲɛnamaya be se k’i nafa cogo fisaman na. A be se k’i dɛmɛ ka hakili sɔrɔ ka koo nafaman dɔw latigɛ, i n’a fɔ wari maracogo. I bena se ka laɲinita nafamanw magwɛn. Ani i bena ban laɲinitaw la, nafa mɛɛnta tɛ minw na.

⁶ Ala ka hakilitigiya be se k’i dɛmɛ fana ka jɛnɲɔgɔnya kɛ ni mɔgɔ wɛrɛw ye. I be se ka hɛɛrɛ fisaman sɔrɔ i ka denbaya ɲɛnamaya kɔnɔ. I be se ka teriya sɔbɛ sigi ni mɔgɔ wɛrɛw ye, teriya min be mɛɛn. Mɔgɔw bena i bonya, hali minw tɛ Ala sagokɛlaw ye.

⁷ Ka fara o kan, Ala ka hakilitigiya sababu fɛ, i ka ɲɛnamaya filɛcogo bena fisaya. A bena i dɛmɛ ka gwɛlɛyaw ni jigitigɛ muɲu. I fana bena siniɲasigi koow filɛ cogo tilennen ni cogo ɲuman na. O bena dɔ fara i ka kɛnɛya kan farikolo ni miiriya ta fan fɛ.—Ntalenw 14:30; Esayi 48:17.

8. N’i ye baara kɛ Ala ye, i tɛna siran mun ɲɛ?

⁸ N’i ye baara kɛ tiɲɛn Ala ye, i bena hɔɔrɔnya ka bɔ siranya bolo: a tɛna i tɔɔrɔ i ko mɔgɔ minw tɛ baara kɛ Ala ye. I tɛna siran mɔgɔ salenw ɲɛ, sabu i b’a lɔn k’u tɛ niin na kaburu kɔnɔ. I tɛna siran ka sa, sabu i jigi b’a la ko Ala ye  lahidu ta ka suuw lakunu. Ani komi i b’a lɔn ko Ala ye sebagayabɛɛtigi ye, i tɛna siran subagaya koow ɲɛ.—Yuhana 8:32.

9-11. Jɔn lo bena ɲɛnamaya kɛ alijɛnɛ kɔnɔ, ani jɔn tɛna kɛ yen?

⁹ N’i ye i magwɛrɛ Ala la, i tɛna siran sini koow ɲɛ. I komi an y’a ye ka tɛmɛ, an ɲɛɛ be gwɛlɛya caaman minw na dugukolo kan bi, Bibulu tun kɔnna k’u caaman kofɔ. Jehova b’a fɔ an ye k’o koow tɛna mɛɛn. Sanni dɔɔni cɛ, Ala ka Masaya bena dugukolo nin kɛ alijɛnɛ ye.—Luka 21:10, 11, 31; 23:43.

¹⁰ Minw b’u magwɛrɛ Ala la ka baara kɛ a ye, olu dɔrɔn lo bena ɲɛnamaya kɛ alijɛnɛ kɔnɔ. Bibulu b’a fɔ ko: “Sɔɔni mɔgɔ jugu tɛna ye tun. I na a sigi yɔrɔ filɛ, i b’a sɔrɔ a tɛ yen tun. Nka dugukolo na kɛ mɔgɔ sabalilenw ciyɛn ye, u na jiidi kosɛbɛ.”—Zaburuw 37:10, 11.

¹¹ Mɔgɔ minw be tugubanciya kɛ ka ban ka kolo Ala ka sariya tilennenw ye, u bena bɔnɛ u niinw na fɔɔ abada (2 Tesalonikekaw 1:8, 9). U tɛna kɛ yen tugun. U bena taga fara Sitanɛ n’a ka jinɛw kan saya kɔnɔ fɔɔ abada (Jirali 20:10, 14). Nka mɔgɔ minw b’a ɲini ka Jehova lɔn, ani u be baara kɛ a ye, olu bena ɲagali diya bɔ alijɛnɛ kɔnɔ dugukolo kan.

12. Bibulu be mun fɔ siniɲasigi koo la?

¹² Mɔgɔ minw be Jehova kanu, a ye koo cɛɲumanbaw mara u ɲɛ! A filɛ, a ka Kuma be min fɔ ɲɛnamaya koo la alijɛnɛ kɔnɔ dugukolo kan:

• Domuni caaman kɛta: “Sɛnɛ fɛnw ka caya o jamana kɔnɔ fo ka se kuluw san fɛ.”—Zaburuw 72:16.

• Boon ɲumanw: “Ne ka mɔgɔw na sow jɔ ka sigi olu kɔnɔ.”—Esayi 65:21.

• Baara diiman: “Ne ka mɔgɔw na nisɔndiya u baara nɔw la. U tɛna sɛgɛn fuu tun.”—Esayi 65:22, 23.

• Bana tɛna kɛ tugun: “O dugu mɔgɔw si tɛna a fɔ ko ale man kɛnɛ.”—Esayi 33:24, ABU, 1961.

• Farikolodɛsɛ tɛna kɛ tugun: “O tuma la fiyentɔw na yeli kɛ, tulo gerenw na mɛnni kɛ. Sen kelenw na u panpan i ko minan. Bobo nɛnkun na ɲagali dɔnkili da.”—Esayi 35:5, 6.

• Dimi, ɲɛnasisi, ni saya tɛna kɛ tugun: “[Ala] na ɲɛji bɛɛ cɛ ka bɔ u ɲɛ la. Saya tɛna kɛ tun, su kasi fana tɛna kɛ tun, wala kasikan wala dimin, k’a masɔrɔ fɛn fɔlɔw tɛmɛnna.”—Jirali 21:4.

• Kɛlɛ tɛna kɛ tugun: “[Ala] be kɛlɛ ban fo ka taa se dugukolo dan na.”—Zaburuw 46:10.

• Ɲɛnamaya banbali: “Dugukolo na kɛ mɔgɔ tilennenw ciyɛn ye. U na sigi a kan badaa.”—Zaburuw 37:29.

13. Jɔn kelenpe lo be se ka dugukolo nin kɛ alijɛnɛ ye? Ani mun na?

¹³ Hadamadenw tɛ se k’o koo ɲɔgɔnw kɛ. Nka, Jehova mana a fɔ ko a be koo o koo kɛ, see b’a ye k’o dafa. Foyi si tɛ se k’a bali k’a sagonata dafa. Bibulu b’a fɔ ko: “Foyi tɛ Ala kɛɲɛ.”—Luka 1:37.

14. I be se ka ɲɛnamaya banbali sira ta cogo di?

¹⁴ A ka Seerew sababu fɛ, Jehova be sira dira mɔgɔ bɛɛ ma u ka “don da dɔgɔmanni fɛ”, ani u ka ɲɛnamaya banbali sira tagama. I ka kɛ mɔgɔw cɛ, minw b’o welekan jaabi ni ɲagali ye! I ka tagama tiɲɛn diinan sira kan, ani i ka Jehova ka duga sɔrɔ fɔɔ abada!—Matiyu 7:13, 14.