Cɛdennin nin filɛ jaa kan. A be komi a b’a kelen, ani siranya b’a la, tiɲɛn tɛ wa? I delila k’a miiri ko i be i kelen, ani i siranna wa?— O koo be bɛɛ sɔrɔ. Bibulu be Jehova teri dɔw kofɔ minw fana tun b’a miiri ko u be u kelen, ani u siranna. U la dɔ tun ye Eli ye. An k’a ɲini ka Eli lɔn.

Eli tun be Israɛl jamana na. O wagati mɛɛnna kosɔbɛ, sanni Yezu yɛrɛ ka wolo. Israɛl masacɛ Akabu tun tɛ tiɲɛn Ala Jehova bato. Ale n’a muso Zezabɛli tun be ngalon ala Baali lo bato. O lo kama, Israɛldenw fanba y’a daminɛ ka Baali bato fana. Masamuso Zezabɛli tun ka jugu kosɔbɛ ani a tun b’a fɛ ka Jehova batobagaw bɛɛ faga, hali Eli yɛrɛ! I b’a lɔn Eli ye min kɛ wa?—

Eli bolila! A bolila ka taga fɔɔ kongokolon kɔnɔ ani a y’a yɛrɛ dogo kuluwo dɔ kɔnɔ. E ka miiri la, mun na a y’o kɛ do?— Tiɲɛn lo, a siranna le. Nka, Eli tun man kan ka siran. Mun na do? A tun b’a lɔn ko Jehova be se k’a dɛmɛ. Jehova tun kɔnna k’a ka fanga yira Eli la. A tun ye Eli ka delili jaabi a kɛtɔ ka tasuma jigi ka bɔ sankolo la. O cogo kelen na, Jehova tun be se ka Eli dɛmɛ sisan fana!

Ka Eli to kuluwo kɔnɔ, Jehova y’a ɲininga ko: “Eli, e be mun le kɛra yan?” Eli y’a jaabi ko: ‘Ne kelen dɔrɔn lo be i batora. Ne be n’ kelen ni n’ kelen ani n’ be siranna u kana n’ faga.’ Eli b’a miirila ko u ye Jehova batobaga tɔɔw bɛɛ faga. Nka, Jehova y’a fɔ a ye ko: ‘Ayi, o tɛ tiɲɛn ye. Mɔgɔ 7 000 wɛrɛ bele be yen minw be ne batora. I jaa gwɛlɛya. Baara caaman be ne fɛ k’a di i ma!’ E ka miiri la, a diyara Eli ye k’o kumaw mɛn wa?—

Eli ka koo be i dɛmɛ ka mun lo faamu?—⁠ I man kan k’a miiri abada ko i be i kelen, ani ka siran. Teriw be i fɛ minw be Jehova kanu ani u be i kanu fana. Ka fara o kan, Jehova fanga ka bon ani a bena i dɛmɛ tuma bɛɛ! A ka di i ye k’a lɔn ko tiɲɛn na, i tɛ i kelen n’i kelen ka ye wa?—