Yezu ye tile fila kɛ Samari. O kɔ, a kɔsegira a ka mara la. A ye waajuli baara kanpaɲiba dɔ kɛ Zude mara la. Nka, a tɛ kɔsegira Galile walisa ka lafiɲɛ dɛ! A yɛrɛ ye waajuli baaraba le daminɛ a lamɔdugu la. N’a sɔrɔ, a jigi t’a la ko n’a sera yen mɔgɔw bena ale bisimila koɲuman sabu a yɛrɛ tun y’a fɔ ka kɔrɔ ko: “Kira si te boɲa sɔrɔ a yɛrɛ ka dugu la.” (Zan 4:44). Nka sanni Yezu ka kalandenw ka to n’a ye, u kɔsegira u ka denbayaw kɔnɔ ani u tun be baara min kɛ ka kɔrɔ, u y’o daminɛ tugun.

Yezu y’a daminɛ ka waajuli kɛ mun lo koo la? A ko: “Ala ka masaya waati surunyana. Aw ye nimisa ka faran aw ka kojuguw la ka la kibaru diman na.” (Mariki 1:15). Galilekaw ye mun lo kɛ do? Tiɲɛn na, u caaman ye Yezu bisimila koɲuman ani u ye bonya la a kan. A ka kumaw dɔrɔn kosɔn tɛ. Kalo damanin ka kɔn o ɲɛ, Galileka dɔw tun tagara Tɛmɛnkan seli kɛ Zeruzalɛmu ani u ɲɛɛ lara Yezu ka kabako koow kan.—Zan 2:23.

Yezu y’a ka waajuli baara daminɛ yɔrɔ juman na? N’a sɔrɔ Kana lo. O yɔrɔ la le, a ye jii yɛlɛma k’a kɛ diwɛn ye furu dɔ la. A siɲɛ filanan ye nin ye Yezu tagara yen. A y’a mɛn ko kanbelenin dɔ man kɛnɛ, a be ɲini ka sa. Kanbelenin facɛ ye masacɛ Erɔdi Antipasi ka lasigiden dɔ ye. O masacɛ lo ben’a to u be Zan Batizelikɛla kuun tigɛ. Kanbelenin facɛ y’a mɛn ko Yezu bɔra Zude ka na Kana dugu la. O kama, a bɔra Kapɛrnaum ka taga Yezu kɔ Kana. A dusu kasininba y’a fɔ Yezu ye ko: “Matigi, na ne ka so, sani ne den ka sa.”—Zan 4:49, ABM.

Yezu ye min fɔ a ye, n’a sɔrɔ o y’a kabakoya. Yezu ko: “Taga, i deen kɛnɛyara.” (Zan 4:50). Cɛɛ lara Yezu ka kumaw na ani a kɔsegira. A ka baaradenw y’a kunbɛn sira kan. U tun be teliyara ka na kibaro diiman dɔ lo fɔ a ye: a dencɛ ma sa, a kɛnɛyara! A y’u ɲininga ko: ‘A nɔgɔyara wagati jumɛn?’ A tun b’a fɛ k’a lɔn n’a kɛnɛyara tuma min na Yezu y’a fɔ a ye ko a ka kɔsegi.

U y’a jaabi ko: “Kunun tilefɛ lo, a ka farigwan banna.”—Zan 4:52.

Cɛɛ y’a faamu k’o wagati yɛrɛ lo la Yezu y’a fɔ a ye ko: “I deen kɛnɛyara.” Cɛɛ tun ye nafolotigi ye fɔɔ baaradenw tun b’a fɛ. Ale n’a sokɔnɔmɔgɔw bɛɛ kɛra Krista ka kalandenw ye.

O cogo la, Yezu ye kabako fila lo kɛ Kana: a ye jii yɛlɛma k’a kɛ diwɛn ye ani kɔfɛ, a ye kanbelenin dɔ kɛnɛya k’a sɔrɔ o kanbelenin yɔrɔ tun ka jan a la fɔɔ kilomɛtɛrɛ 26 ɲɔgɔn. Tiɲɛn tiɲɛn na, o dɔrɔn lo tun tɛ a ka kabakow ye. Nka o kabako filanan kɔrɔtanin lo sabu o b’a yira ko a kɔsegira Galile ani ko a ye Ala ka kira ye. Nka, yala a tun bena “boɲa sɔrɔ a yɛrɛ ka dugu la” wa?

An bena o lɔn yanni dɔɔni sabu Yezu be tagara Nazarɛti. Mun lo b’a kɔnɔna o yɔrɔ la?