Yezu ye ladili di ko walisa ka bɛnbaliyako dɔ ɲɛnabɔ ni balima dɔ ye, an ka ɲi ka taga kuma a tigi fɛ an kelen n’an kelen. Piyɛri y’o mɛn, nka a be komi a b’a fɛ k’a lɔn an ka ɲi k’an jija k’o kɛ fɔɔ siɲɛ joli.

Piyɛri ye Yezu ɲininga ko: “Matigi, ni n balima be to ka ne hakɛ ta tuma bɛɛ, ne ka kan ka yafa a ma siɲɛ joli? Fɔɔ ka taga se siɲɛ wolonwula wa?” Diinan kuntigi dɔw b’a fɔ ko mɔgɔ ka ɲi ka yafa mɔgɔ ma fɔɔ siɲɛ saba. O kama, n’a sɔrɔ Piyɛri b’a jati ko n’a be yafa mɔgɔ ma “fɔɔ ka taga se siɲɛ wolonwula,” o ye mɔgɔ ɲumanya yɛrɛ lo ye.—Matiyo 18:21.

Nka, k’a jati i mɔgɔɲɔgɔn ye i hakɛw ta fɔɔ siɲɛ daa min na, o bɛnnin tɛ Yezu ka fɔta ma. O kama a ye Piyɛri jaabi ko: “Ayi, ne t’a fɔ i ye siɲɛ wolonwula dɛ, nga siɲɛ wolonwula sigiyɔrɔman bi wolonwula.” (Matiyo 18:22). O kɔrɔ ko ka yafa tuma bɛɛ. Siɲɛ daa min na Piyɛri ka ɲi ka yafa mɔgɔ ma, daan man kan ka kɛ o la.

O kɔ, Yezu ye ɲɛyirali dɔ fɔ walisa Piyɛri ani mɔgɔ wɛrɛw k’a faamu k’u ka kan ka yafa. O ye baaraden dɔ ye, min m’a kuntigi ka ɲumanya ladegi. Masacɛ dɔ tun b’a fɛ k’a ka nafolo jati minɛ n’a ka baaradenw ye. U nana ni baaraden dɔ ye ko masacɛ ka wari talan 10000 (wala warigwɛ miliyɔn 60) juruba b’a la. A tun tɛ se k’o juru sara cogo si la. O kama, masacɛ ko u ka baaraden n’a muso n’a deenw feere walisa o juru ka sara. Baaraden nin y’a kunbiri gwan a masacɛ kɔrɔ k’a deli ko “a ka muɲu ale kɔrɔ dɔɔni, ko ale bena juru nin bɛɛ sara.”—Matiyo 18:26.

Masacɛ makarila o cɛɛ la k’o juruba bɛɛ yafa a ma. Baaraden nin bɔra masacɛ ka soo tuma min na, a y’a tɔɲɔgɔn dɔ ye min tun ka kan ka warigwɛ deen 100 di a ma. A y’a tɔɲɔgɔn minɛ k’a kaan dɛrɛ kosɔbɛ k’a fɔ a ye ko: “N ka  wari sara.” Nka a tɔɲɔgɔn nin y’a kunbiri gwan a kɔrɔ k’a deli ko: “Muɲu ne kɔrɔ, ne ben’a sara.” (Matiyo 18:28, 29). Nka baaraden nin ma masacɛ ladegi. A y’a tɔɲɔgɔn don kaso la hali k’a sɔrɔ a ka juru tun man ca. A ko fɔɔ a k’ale ka juru sara.

Baaraden tɔɔw y’o ye minkɛ, u tagara o fɔ masacɛ ye. Masacɛ dimininba ko u ka taga o baaraden hinɛntan weele ka na. A y’a fɔ a ye ko: “Baaradenjugu, ne tun yafara i ma juru nin la, bari i ye ne daali. Ne makarila i la cogo min na, ele fana tun ka kan ka makari i tɔɲɔgɔn na ten.” Masacɛ dimina kosɔbɛ ani a ye baaradenjugu nin don kaso la k’a fɔ ko fɔɔ a k’ale ka juru bɛɛ sara. Yezu y’a ka kumaw kuncɛ ko: “Ne Faa min be sankolo la, o bena aw kɛ ten, n’aw te sɔn ka yafa aw tɔɲɔgɔn ma aw dusu bɛɛ la.”—Matiyo 18:32-35.

Nin ye kalan ɲuman ye yafali koo la dɛ! Jehova kɛtɔ k’an ka jurumu yafa, a ye juruba dɔ lo bɔ an kun. An kerecɛnɲɔgɔnw mana an hakɛ ta cogo o cogo, o tɛ suma ni an ka juruba ye Jehova ye min bɔ an kun. Nka Jehova tɛ yafa an ma siɲɛ kelen dɛ, a be yafa siɲɛ waa caaman. Anw do, an tɛ se ka yafa an balimaw ma siɲɛ caaman, hali n’an b’a miiri k’u y’an hakɛ ta wa? I ko Yezu y’a fɔ cogo min na a ka kalanba la kulu kan, Ala bena “an ka filiw yafa an ma i ko an fana be yafa tɔw ma cogo min na n’u filila anw ma.”—Matiyo 6:12.