Yezu be mɔgɔw kalanna Sezare Filipu mara la. Kilomɛtɛrɛ 25 ɲɔgɔn lo b’o yɔrɔ ni Ɛrɛmɔn kulu cɛ. O yɔrɔ la le Yezu ye kuma kabakoman dɔw fɔ a ka cidenw ye. A ko: “Tiɲɛ na, ne b’a fɔ aw ye ko aw minw be yan, aw dɔw tena sa n’u ma Mɔgɔ Dencɛ natɔ ye n’a ka masaya ye.”—Matiyo 16:28.

N’a sɔrɔ cidenw y’u yɛrɛ ɲininga ko Yezu b’a fɛ ka mun lo fɔ. Lɔgɔkun kelen ɲɔgɔn o kɔ, Yezu n’a ka ciden saba nunu tagara kulujan dɔ kan: Piyɛri, Zaki ani Zan. N’a sɔrɔ suu tun kora sabu ciden saba nunu y’a daminɛ ka sinɔgɔ. Ka Yezu to delili la, a cogoya yɛlɛmana a ka cidenw ɲɛɛ na. Cidenw y’a ye ko a ɲɛda be manamanana i n’a fɔ tile ani a ka faniw gwɛra parapara fɔɔ u be manamana.

O kɔ, mɔgɔ fila y’u yɛrɛ yira: a fɔra k’u ye “Musa ni Eli” ye. Yezu tun “bena taga Zeruzalɛmu ka sa cogo min na,” u y’a daminɛ ka kuma n’a ye o koo la (Luka 9:30, 31). Yezu yɛrɛ tun kumana a ka saya n’a suu kununi koo la a ma mɛɛn (Matiyo 16:21). Piyɛri tun b’a miiri ko Yezu man ɲi ka tɔɔrɔ ani ka sa. Nka, Yezu ni Musa ni Eli kumana min koo la, o y’a yira ko waajibi tun lo o ka kɛ.

Sinɔgɔ bɔra ciden saba ɲɛɛw na sisan, u kabakoyanin be filɛri kɛra ani ka mɛnni kɛ. Yelifɛn tun lo, nka a tun be komi a be kɛra yɛrɛ yɛrɛ le. O kama, Piyɛri y’a ɲini k’a niin don o koo la. A ko: “Karamɔgɔ, a ka ɲi an ka to yan. Anw bena bugu saba lɔ, e ta kelen, Musa ta kelen, Eli ta kelen.” (Mariki 9:5). N’a sɔrɔ Piyɛri b’a fɛ k’o bugu saba lɔ walisa o yelifɛn ka mɛɛn.

Ka Piyɛri to kuma na, sankaba manamananin dɔ jigira k’u datugu. Kumakan dɔ bɔra o sankaba kɔnɔ k’a fɔ ko: “Nin ye ne Dencɛ kanunin ye. Ne sagoladen lo, aw ka mɛnni kɛ a fɛ.” Cidenw ye Ala kumakan mɛn minkɛ, u benna k’u ɲɛɛ biri duguma, bari u tun siranna kosɔbɛ. Nka, Yezu y’a fɔ u ye ko: “Aw kana siran, aw ye wili.” (Matiyo 17:5-7). U wulila tuma min na, u y’a ko Yezu dɔrɔn lo tun be yen. O yelifɛn tun banna. Dugu gwɛra tuma min na, u jigitɔ ka bɔ kulu kan, Yezu ye kangari la u ye ko: “Aw ye koo minw ye kulu kan, aw kana o lakali mɔgɔ si ye, fɔɔ ni Mɔgɔ Dencɛ kununna a sanin kɔ.”—Matiyo 17:9.

Eli yera o yelifɛn na minkɛ, o y’a to cidenw ye Yezu ɲininga ko: “Mun na sariya karamɔgɔw ko Eli ka kan ka na kisibaga ɲa?” Yezu y’u jaabi ko: “Eli nana ka ban, nga u m’a lɔn.” (Matiyo 17:10-12). Yezu tun be kumana Zan Batizelikɛla koo lo la, ale min ka cidenya baara tun be i n’a fɔ Eli ta. Eli tun ye sira labɛn Elize ye cogo min na, Zan Batizelikɛla ye sira labɛn Krista ye o cogo kelen na.

Siga t’a la, o yelifɛn ye dɔ fara Yezu ni cidenw barika kan! O yelifɛn tun be Krista ka Masaya nɔɔrɔ yira. O cogo la, kalandenw ye “Mɔgɔ Dencɛ natɔ ye n’a ka masaya ye” i ko Yezu tun y’a fɔ u ye cogo min na (Matiyo 16:28). K’u to kulu kan, u “ɲaa lara a ka nɔɔrɔ kan.” Fariziɲɛw tun y’a ɲini Yezu fɛ ko a ka kabako dɔ kɛ k’a yira ko Ala y’ale lo sugandi k’a kɛ Masacɛ ye. Yezu tun ma sɔn ka kabako si kɛ u ye. Nka, a y’a to a ka kalandenw k’a ye a ka nɔɔrɔ la. O y’a to u lara kiraya kumaw na minw ɲɛsinna Ala ka Masaya koo ma. Kɔfɛ, ciden Piyɛri y’a sɛbɛ ko: “O kow bɛɛ y’a jira an na k’a jɛya ko kiraw ka kuma ye tiɲɛ de ye.”—2 Piyɛri 1:16-19, ABM.