Yezu tun ye cikan minw di delili koo la, a segira u kan a ma mɛɛn. A ka cidenya baara la, a tun be segi barokun dɔw kan tuma dɔw la. Tuma min na a tun be Galile, mɔgɔw ko a be kabakow kɛ jinaw kuntigi barika la. Sisan, a be Zude mara la ani o yɔrɔ mɔgɔw fana b’o lo fɔra.

Tuma min na Yezu ye cɛɛ dɔ kɛnɛya, jina tun ye min kɛ bobo ye, o ye jama kabakoya. Nka, o ma Yezu kɛlɛbagaw kabakoya. U y’a jalaki ko: “A be jinaw gwɛn jinaw kuntigi Belezebuli le barika la.” (Luka 11:15). Dɔ wɛrɛw b’a fɛ k’a lɔn Yezu ye mɔgɔ min ye. O kama, u b’a fɛ a ka kabako dɔ kɛ min bena kɛ tagamasiɲɛ ye k’a yira ko a ka sebagaya be bɔ Ala fɛ.

Yezu y’a faamu k’u b’a fɛ k’ale kɔrɔbɔ minkɛ, a y’u jaabi i ko a tun y’a kɛlɛbagaw jaabi cogo min na Galile. A ko ni masaya min mɔgɔw be ɲɔgɔn kɛlɛ, o masaya tɛ se ka sabati. A y’a fɔ tugun ko: “Sitanɛ fana, ni a wulila a yɛrɛ kama, a ka masaya na sigi cogo di?” O kɔ, a y’a fɔ ka gwɛ u ye ko: “Ni ne bɛ jinɛw gɛn ni Ala bolo ye, o b’a jira ko Ala ka masaya sera aw ma.”—Luka 11:18-20, ABM.

Yezu kumana “Ala bolo” koo la. O ka ɲi ka jama hakili jigi koo dɔ la min tun kɛra fɔlɔfɔlɔ la Israɛl. Musa ka kabako dɔ kɛnin kɔ, Farahuna ka lɔnnikɛla dɔw ko: “Nin ye Ala ka baara nɔɔ ye dɛ!” Sariya tan minw sɛbɛra walaka kabakurulamanw kan, “Ala yɛrɛ” lo tun y’u sɛbɛ fana (Ɛkizɔdi 8:15; 31:18). O cogo kelen na, “Ala bolo,” o kɔrɔ, Ala ka hakili senu wala Ala ka fanga barika la le Yezu be se ka jinaw gwɛn ani ka banabagatɔw kɛnɛya. O kama, Ala ka Masaya sera a kɛlɛbagaw ma tiɲɛn na sabu Yezu min y’o Masaya ka Masa ye, ale b’u cɛma ani a be kabakow kɛra.

Yezu be ni setigiya min ye ka jinaw gwɛn, o b’a yira ka gwɛ ko a fanga ka bon ni Sutana ta ye. Walisa k’a ka miiriya ɲɛfɔ, a kumana cɛɛ fangatigi dɔ koo la. O cɛɛ ye see sɔrɔ a tɔɲɔgɔn fangatigi dɔ kan, min be masaso dɔ kɔrɔsira ni kɛlɛkɛminan barikamanw ye. Yezu segira ka kuma fana jinatɔcɛ dɔ koo la. Jina bɔra o cɛɛ la nka cɛɛ m’o yɔrɔlakolon datugu ni koo ɲumanw ye. O kama, jina segira ka na ni jina wolonfila wɛrɛw ye ka cɛɛ ka koow juguya ka tɛmɛ fɔlɔ ta kan (Matiyo 12:22, 25-29, 43-45). O ɲɔgɔn le be Israɛldenw kan.

Yezu ka kumaw ye muso dɔ lasun k’a fɔ ko: “Muso min y’i wolo, o dagamunin lo.” Yahutu musow bɛɛ tun b’a fɛ ka kɛ kira dɔ bamuso ye, sanko Masiya bamuso. O kama, n’a sɔrɔ o muso fɛ, Mariyamu kɔni dagamunin lo ka kɛ karamɔgɔ nin ɲɔgɔn bamuso ye. Nka Yezu y’a ka miiriyaw latilen. A y’a yira hɛɛrɛ sɔbɛ be sɔrɔ cogo min na. A ko: “Mɔgɔ min be Ala ka kuma lamɛn, k’a bato, o le dagamunin lo.” (Luka 11:27, 28). Yezu m’a to abada mɔgɔw k’a miiri ko nɔɔrɔ ka ɲi ka la Mariyamu kan cogo kɛrɛnkɛrɛnnin dɔ la. I kɛra muso ye wo, i kɛra cɛɛ ye wo, fɛɛn min be na ni hɛɛrɛ sɔbɛ ye, o ye ka baara kɛ Ala ye kantigiya la. O tɛ sɔrɔ i ka somɔgɔ dɔ wala i ka baara dɔw kosɔn.

Minw tun ko Yezu ka tagamasiɲɛ dɔ kɛ ka bɔ sankolo la, a y’olu kɔrɔfɔ i ko a y’a kɛ Galilekaw la cogo min na. A ko tagamasiɲɛ si tɛna yira u la ni “Zonasi ta tɛ.” Zonasi ka koo kɛra tagamasiɲɛ ye sabu a ye tile saba kɛ jɛgɛba dɔ kɔnɔ ani a ye Ninivukaw waaju ni jagwɛlɛya ye, o y’u lasun ka nimisa. Yezu ko: “A filɛ, mɔgɔ be yan min ka bon ni Zonasi ye.” (Luka 11:29-32). Yezu ka bon fana ni Solomani ye, Seba masamuso nana min ka hakilitigiya lamɛn.

Yezu y’a fɔ tugun ko: “Mɔgɔ si te fitinɛ mana k’a bila yɔrɔdogonin na, walima gongo jukɔrɔ,  nga a b’a bila fɛɛn dɔ kan.” (Luka 11:33). N’a sɔrɔ a b’a fɛ k’a fɔ ko ka mɔgɔ nunu kalan ani ka kabakow kɛ u ɲɛɛ na, a kɛra i n’a fɔ ka lanpan ka yeelen dogo. Komi u ka miiriya tilennin tɛ, Yezu ka kabakow be min yira, u t’o faamu.

Yezu ye cɛɛ dɔ kɛnɛya, jina tun ye min kɛ bobo ye. O tun ka ɲi ka mɔgɔw lasun ka nɔɔrɔ la Jehova kan ani k’a ka kɛtaw fɔ mɔgɔ wɛrɛw ye. Nka Yezu kɛlɛbagaw m’o lo kɛ. O kama a y’u lasɔmi ko: “I ka kɔlɔsili kɛ k’a filɛ, yeelen min b’i la, n’o ma kɛ dibi ye. N’i yɔrɔ bɛɛ be yeelen na, ni dibi si te yen, a bena to yeelen na i n’a fɔ fitinɛ be yeelen bɔ cogo min na.”—Luka 11:35, 36.