Ka Yezu to Zude, Fariziɲɛ dɔ y’a ɲini a fɛ ko a ka na dumuni kɛ ale ka soo. N’a sɔrɔ tilera dumuni tun lo (Luka 11:37, 38). Ka kɛɲɛ n’u ka landa ye, Fariziɲɛw b’u tɛgɛ ko fɔɔ u nɔnkɔn na ka sɔrɔ ka dumuni kɛ. Nka Yezu m’o kɛ (Matiyo 15:1, 2). O landa tɛ Ala ka sariya kɛlɛ, nka a koo ma fɔ Ala ka sariya kɔnɔ.

O cɛɛ kabakoyara k’a ye ko Yezu ma o landako labato. Yezu y’o lɔn minkɛ, a ko: “Aw Fariziɲɛw kɔni be ten. Aw be jifilenw ni tasaw kɔfɛlaw ko k’u gwɛ, k’a sɔrɔ benkanni ani juguya le fanin be aw kɔnɔ. Naloman nunu! Ala min ye kɛnɛmala dilan, o tuma na, ale ma kɔnɔna fana dilan wa?”—Luka 11:39, 40.

Koo min ye Yezu kɔnɔ gwan, o tɛ tɛgɛko koo ye, nka filankafoya min b’o koo la. Fariziɲɛw ni mɔgɔ minw b’u tɛgɛ ko ka kɛɲɛ n’u ka landa ye, olu yɛrɛ dusukun saniyanin tɛ. O kama Yezu y’u ladi ko: “Fɛɛn min b’aw . . . kɔnɔ, aw y’o di dɛsɛbagatɔw ma, o la, aw ka koo bɛɛ bena saniya.” (Luka 11:41). Nin ye tiɲɛnko ye dɛ! Nili ka ɲi ka kɛ ni kanuya ye. O man kan ka kɛ ni wasoya ye.

A ma fɔ k’o cɛɛw tɛ nili kɛ dɛ! Yezu y’a fɔ ko: “Aw be jija ka nanaye ni nanfuraburu sifa bɛɛ jaka bɔ. Ala be tilenninya ni kanuya minw fɛ, aw b’olu to yen. Aw tun ka kan ka olu le kɛ ka dɔ nunu fara o kan.” (Luka 11:42). Ala ka sariya tun b’a ɲini u fɛ u ka jaka bɔ, o kɔrɔ, u be suman min sɔrɔ u ka foro kɔnɔ, u ka ɲi k’o tilan tannan di (Deteronɔmu 14:22). Nanaye ni nanfulaburuw fana niin b’o la. O fulaburuw tun be dumuni kasa diya. Fariziɲɛw tun b’o jaka bɔ koɲuman. Nka, u tun tɛ sariya ka koo kɔrɔtaninw kɛ, i n’a fɔ ka tilenninya ni yɛrɛmajigilenya kɛ Ala ɲɛɛ kɔrɔ.—Mise 6:8.

Yezu tagara ɲɛ n’a ka kumaw ye ko: “Aw, Fariziɲɛw, bɔnɛ ye aw ta ye, bari aw be sigiyɔrɔɲumanw le fɛ kalansow kɔnɔ, aw b’a fɛ mɔgɔw k’aw fo forobayɔrɔw la. Bɔnɛ ye aw ta ye, bari aw kɛra i n’a fɔ kaburuw, minw te ye, mɔgɔw be taama u kan n’u t’a kala ma.” (Luka 11:43, 44). O wagati la, mɔgɔw tun be se ka tagama o kaburu ɲɔgɔnw kan n’u t’a kala ma. O tun be kɛ sababu ye u be nɔgɔ landako ta fan fɛ. O kumaw fɛ, Yezu b’a yira ko Fariziɲɛw ka nɔgɔlenya tɛ ye joona.—Matiyo 23:27.

Sariya karamɔgɔ dɔ ko: “Karamɔgɔ, n’i kumana ten, i be don anw fana gasi la.” Nka o cɛɛw ka ɲi k’a faamu k’olu fana tɛ mɔgɔw dɛmɛna. Yezu y’o cɛɛ jaabi ko: “Bɔnɛ ye aw sariya karamɔgɔw fana ta ye, bari aw be mɔgɔw bila doni gwiliman ɲun na, k’a sɔrɔ aw t’u dɛmɛ hali dɔɔni yɛrɛ a ɲunni na. Aw faaw ye kira minw faga, aw minw be u ka kaburuw lalaga k’u lɔ sisan, bɔnɛ ye aw ta ye.”—Luka 11:45-47.

Yezu be doni gwiliman minw kofɔra, o ye Fariziɲɛw ka landakow ye ani u tun be Ala ka sariya kɔrɔ yɛlɛma cogo min na. U tɛ koow nɔgɔya mɔgɔw kun na fewu. U be mɔgɔw waajibiya k’u ka cikanw labato. O cogo la, o koow be kɛ doniba ye mɔgɔw kun na. U bɛnbaw ye Ala ka kiraw faga, k’a daminɛ ni Abɛli ye. Sisan, olu yɛrɛ b’a kɛ i n’a fɔ u be nɔɔrɔ lara kiraw kan, u kɛtɔ k’o kiraw ka kaburuw lɔ, k’a sɔrɔ u b’u bɛnbaw ka miiricogo n’u ka kɛwalew lo ladegira. U b’a ɲinina yɛrɛ ka Ala ka kiraw bɛɛ la belebeleba faga. Yezu y’a fɔ ko Ala bena o bɔnsɔn ɲininga u ka kɛtaw la. Saan 38 ɲɔgɔn tɛmɛnin kɔ, o le kɛra, saan 70 wagati la.

Yezu y’a fɔ tugun ko: “Aw sariya karamɔgɔw, bɔnɛ ye aw ta ye, bari aw b’aw yɛrɛ jati tiɲɛ lɔnbagaw ye k’a sɔrɔ aw t’a lɔn. Minw b’a fɛ ka tiɲɛ lɔn, aw t’a to olu fana k’a lɔn.” (Luka 11:52). O cɛɛw tun ka ɲi ka mɔgɔw dɛmɛ ka Ala  ka Kuma faamu, nka u t’o kɛ. Sababu min fana dira mɔgɔw ma ka Ala ka lɔnniya sɔrɔ, o cɛɛw b’a ɲini k’u bali.

Fariziɲɛw ni sariya karamɔgɔw ye mun lo kɛ do? Yezu b’a fɛ ka taga tuma min na, u dimina a kɔrɔ ani u y’a daminɛ ka ɲiningali caaman kɛ a ye. A ma kɛ komi u b’a fɛ ka koo dɔ lo faamu dɛ! U b’a fɛ ka Yezu lasun ka kuma dɔ fɔ min bena kɛ sababu ye u b’a minɛ.