Ka Yezu to Zeruzalɛmu fan fɛ hali bi, Yahutu caaman nana a sɛgɛrɛ. Dɔw b’a fɛ a k’u kalan, dɔ wɛrɛw b’a fɛ k’a kɔrɔbɔ. Sariya karamɔgɔ dɔ b’a fɛ k’a kɔrɔbɔ. A y’a ɲininga ko: “Karamɔgɔ, ne ka mun kɛ walisa ne ka ɲɛnamaya banbali sɔrɔ?”—Luka 10:25, ABM.

Yezu b’a lɔn k’o cɛɛ t’a ɲinina dɔrɔn ka lɔnniya sɔrɔ. N’a sɔrɔ a b’a fɛ ka Yezu lasun a ka kuma dɔ fɔ min bena Yahutuw kɔnɔ gwan. Yezu y’a faamu k’o cɛɛ be n’a ka miiriya ye o ɲiningali koo la. O kama, a ye hakili sɔrɔ k’a jaabi cogo dɔ la min ye cɛɛ waajibiya k’a kɔnɔko fɔ.

Yezu y’a ɲininga ko: “Mun lo fɔra sariyasɛbɛ kɔnɔ? N’i b’a kalan, i b’o faamu cogo di?” Cɛɛ be Ala ka sariya lɔn minkɛ, a basigira Deteronɔmu 6:5 ani Levitiki 19:18 kan ka Yezu jaabi ko: “I ka Matigi i ka Ala kanu n’i dusu bɛɛ ye, an’i kɔnɔ bɛɛ ye, n’i fanga bɛɛ ye, an’i hakili bɛɛ ye. I k’i mɔgɔɲɔgɔn kanu i n’a fɔ i yɛrɛ.” (Luka 10:26, 27). Yala a ka jaabili ɲɛna wa?

Yezu y’a fɔ cɛɛ ye ko: “I ka jaabili ɲɛna. I ka o kɛ, i na ɲɛnamaya.” Nka yala o ye daan sigi baro la wa? Cɛɛ ka laɲinita tɛ ka jaabili ɲuman sɔrɔ dɔrɔn. A b’a fɛ “ka jo di a yɛrɛ ma.” A tun b’a fɛ u k’a fɔ ko ale ka miiriya ka ɲi ani ko a be tɔɔw minɛ cogo bɛnnin na. O kama, a ye Yezu ɲininga ko: “Jɔn dun ye ne mɔgɔ ɲɔgɔn ye?” (Luka 10:28, 29, ABM). O ɲiningali be komi a jaabi ka nɔgɔ, nka a kɔrɔ ka bon. Mun na do?

Yahutuw b’a miiri ko minw b’u ka landaw labato, olu dɔrɔn lo ye u “mɔgɔɲɔgɔn” ye. N’a sɔrɔ olu fɛ, Levitiki 19:18 b’o miiriya tiɲɛntigiya. U b’a miiri yɛrɛ ko ka jɛn ni siya wɛrɛ mɔgɔw ye, o “daganin tɛ” (Kɛw. 10:28). O kama, sariya karamɔgɔ nin b’a jati ko a bɛnnin lo a k’a Yahutu ɲɔgɔn minɛ ka ɲɛ, nka ko basi t’a la a ka siya wɛrɛ mɔgɔw mafiɲɛya sabu olu t’a “mɔgɔɲɔgɔn” ye. N’a sɔrɔ Yezu yɛrɛ ka kalanden dɔw fana b’o lo miiri.

Yezu bena o miiriya yɛlɛma cogo di walisa o kana cɛɛ ni Yahutu tɔɔw kɔnɔ gwan? A ye ntalen dɔ la ko: “Cɛɛ dɔ tun bɔra Zeruzalɛmu n’a be tagara Zeriko. Benkannikɛlaw girinn’a kan, k’a ka faniw n’a bololafɛnw bɛɛ bɔsi a la, ka tila k’a bugɔ fɔɔ k’a kirin ka taga k’a to sira kan. O y’a sɔrɔ sarakalasebaga dɔ tun b’o sira kelen kan ka na. A ye cɛɛ mandiminin ye tuma min na, a faranna ka tɛmɛ sira faan dɔ fɛ. Levi kɔmɔgɔw dɔ fana nana se o cɛɛ ma, a y’a ye ka tɛmɛ sira faan dɔ fɛ. Nga Samarika dɔ dugutagatɔ nana se cɛɛ nin ma, a y’a ye minkɛ, a hinɛ donn’a la kosɔbɛ.”—Luka 10:30-33.

Yezu be ntalen lara cɛɛ min ye, n’a sɔrɔ o cɛɛ b’a lɔn ko sarakalasebagaw ni Levite minw be baara kɛ batoso kɔnɔ, olu caaman siginin be Zeriko. Walisa ka bɔ Zeruzalɛmu ka kɔsegi u ka soow kɔnɔ, u ka kan ka kilomɛtɛrɛ 23 lo kɛ u kɛtɔ ka panti dɔ jigi. Farati tun b’o sira kan sabu benkannikɛlaw ka dogoyɔrɔ lo. Ni sarakalasebaga ani Levite dɔ y’u Yahutu ɲɔgɔn dɔ ye gwɛlɛya la, yala u tɛna a dɛmɛ wa? Yezu y’a yira a ka ntalen na ko u m’o kɛ. A y’a yira ko mɔgɔ min ye Yahutucɛ dɛmɛ, o ye Samarikacɛ dɔ ye. Yahutuw be mɔgɔ minw mafiɲɛya, u dɔ lo.—Zan 8:48.

Samarikacɛ ye Yahutucɛ mandiminin dɛmɛ cogo di? Yezu ko: “A gwɛrɛl’a la k’a ka jolidaw ko, ka fura kɛ u la, k’u siri. O kɔ, a y’a ta k’a la a ka fali kan ka taga n’a ye lonan jigiyɔrɔ dɔ la, k’a janto a la yen. O dugusagwɛ, a ye warigwɛ deen fila di jatigicɛ ma k’a fɔ a ye ko a k’a janto a la. Ko n’a ye musaka minw kɛ ka tɛmɛ wari hakɛ nin kan, ko n’ale kɔsegira tuma min na, ale bena o sara a ye.”—Luka 10:34, 35.

 Ntalen lakalinin kɔ, Karamɔgɔba Yezu ye ɲiningali dɔ kɛ cɛɛ ye min y’a lasun ka miiri: “Benkannikɛlaw ye cɛɛ min mandimi wo, e ka miiri la, mɔgɔ saba nunu na, jumɛn y’o cɛɛ mɔgɔɲɔgɔn ye?” N’a sɔrɔ a man di sariya karamɔgɔ ye k’a fɔ ko “Samarika” lo. O kama, a ye Yezu jaabi ko: “A hinɛ donna min na.” Yezu y’o ntalen miiriya jɔnjɔn bɔ kɛnɛ kan ko: “I fana ka taga o ɲɔgɔn kɛ.”—Luka 10:36, 37.

O ye mɔgɔ kalancogo barikaman ye dɛ! Ni Yezu tun sinna k’a fɔ cɛɛ ye dɔrɔn ko siya wɛrɛ mɔgɔw fana y’a mɔgɔɲɔgɔn ye, o cɛɛ ni Yahutu tɔɔ minw be lamɛnni kɛra, yala u tun bena sɔn o kuma ma wa? N’a sɔrɔ u tun tɛna sɔn. Nka Yezu ye ntalen min la, a ka nɔgɔ. A ye koo minw fɔ, a lamɛnbagaw b’a lɔn k’o koow be ten u ka mara la. O la do, a tun man gwɛlɛ u fɛ k’a lɔn mɔgɔ sifa min y’u mɔgɔɲɔgɔn ye. N’an be mɔgɔw kanu ani ka ɲumanya kɛ u ye i ko Ala ka Kuma b’a fɔ cogo min na, an b’a yira o cogo le la ko an ye u mɔgɔɲɔgɔn ye tiɲɛn tiɲɛn na.