Yezu tun y’a fɔ ko “sagakulufitini” lo bena sigi sankolo Masaya la (Luka 12:32). Nka u man kan k’o saraba ɲɔgɔn mafiɲɛya. A y’a fɔ tugun ko a kɔrɔtanin lo u ka koow kɛ cogo bɛnnin na walisa ka se ka Masaya sɔrɔ cɛɛn ye.

Ka kɛɲɛ n’o kuma ye, Yezu y’a ka kalandenw jija k’u labɛnnin ka to k’ale nali kɔnɔ. A ko: “Aw cɛsirilen ni aw ka lanpa manalenw ka to. Aw ka kɛ i ko baaraden minnu bɛ u kuntigi makɔnɔ, ni a bɛ na ka bɔ kɔɲɔ yɔrɔ la tuma min na, walisa ni a nana ka da kɔnkɔn, u ka da yɛlɛ a ye joona. Ni kuntigi nana ka baaraden minnu sɔrɔ a ɲɛnafilɛli la, olu ye dubadenw ye.”—Luka 12:35-37, ABM.

O ntalen fɛ, kalandenw y’a faamu u ka ɲi ka koow kɛ cogo min na. Yezu ye baaraden minw kofɔ, u labɛnnin lo n’u b’u kuntigi kɔnɔna. Yezu y’a fɔ tugun ko: “N’u kuntigi kɔsegira dugutilama, walima dondo kasituma na ka n’u sɔrɔ kɔnɔni na, u bena nisɔndiya.”—Luka 12:38.

Yezu tɛ kumana baaradenya gwansan koo le la. A ye min fɔ kɔfɛ o ntalen kɔnɔ ale yɛrɛ nali koo la, o le b’o yira. A y’a fɔ a ka kalandenw ye ko: “Aw fana labɛnnin ka kan ka to, bari aw te miiri waati min koo la, o waati la, Mɔgɔ Dencɛ bena na.” (Luka 12:40). O b’a yira ko Yezu bena kɔsegi ka na loon dɔ la, mɔgɔ tɛ min lɔn. A b’a fɛ a ka kalandenw labɛnnin ka to, sanko “sagakulufitini” mɔgɔw.

Komi Piyɛri b’a fɛ ka Yezu ka kuma faamu ka ɲɛ, a y’a ɲininga ko: “Matigi, i bɛ nin ntalen da an dama kosɔn wa, wala mɔgɔw bɛɛ kosɔn?” Sanni Yezu ka sin ka Piyɛri jaabi, a ye ntalen wɛrɛ la ko: “So kunna sigibaa dannamɔgɔ hakiliman min kuntigi b’a bila a ka jɔn tɔw kun na ka u ka dumuni ko ɲɛnabɔ a waati latigɛlen na, o ye jɔni ye? O jɔnkɛ min makɛ nalen y’a sɔrɔ a b’a kɛ a cogo la, o ye dubaden ye. Tiɲɛ la ne b’a fɔ aw ye ko o makɛ na o jɔnkɛ sigi a bolofɛn bɛɛ kun na.”—Luka 12:41-44, ABM.

Yezu ka ntalen fɔlɔ la, “kuntigi” ye Mɔgɔ Dencɛ Yezu yɛrɛ lo ye. “So kunna sigibaa dannamɔgɔ” ye “sagakulufitini” mɔgɔ dɔw ye, olu minw bena kuntigiya kɛ Ala ka Masaya la (Luka 12:32). Yezu ko o mɔgɔw bena ale ka jɔɔnw ka “dumuni ko ɲɛnabɔ a waati latigɛlen na.” O kumaw fɛ, Piyɛri be se k’a faamu ko wagati dɔ bena se Mɔgɔ Dencɛ bena kɔsegi ka na. Yezu be kalanden tɔɔ minw kalanna ani k’u balo Alako ta fan fɛ, olu fana be se k’o faamu. O wagati la, labɛn dɔ bena kɛ walisa Yezu ka kalandenw, olu minw ye Kuntigi ka “jɔn tɔw” ye, u ka balo Alako ta fan fɛ.

Yezu y’a ka kalandenw dɛmɛ cogo wɛrɛ la u k’a faamu mun na u ka kan ka to ɲɛɛ na ani k’u janto u ka koow kɛcogo la. O kuun ye ko n’a sɔrɔ u la dɔ be se k’a ka baara mafiɲɛya ani k’a daminɛ yɛrɛ k’a tɔɲɔgɔnw kɛlɛ. Yezu y’a fɔ ko: “Nga ni baaraden nin miirila ko a kuntigi tena kɔsegi joona, o la, n’a y’a daminɛ ka to ka baaraden tɔw bugɔ, ka to dumunibaba la, ani ka to dɔrɔbaba min na, o baaraden te miiri loon min, ni waati min koo la, o loon yɛrɛ le la, a kuntigi bena na. A bena o baaraden nin bɔ yen k’a tɔɔrɔ mɔgɔ tilenbaliw tɔɔrɔcogo la [o kɔrɔ, k’a sara dannabaliw saracogo la].”—Luka 12:45, 46.

Yezu ko ale “nana ni tasuma le ye diɲa na.” Tiɲɛn na, a ka kuma dɔw ye sɔsɔlibaw lawuli mɔgɔw cɛ. U fana ye ngalon kalanw ni landakow fanga ban pewu. Mɔgɔ minw yɛrɛ tun ka kan ka kɛ kaan kelen ye, o sɔsɔlibaw y’olu fana faran: ‘Faa be wili a dencɛ kama,  dencɛ be wili a faa kama. Baa be wili a denmuso kama, denmuso be wili a baa kama. Bamuso be wili a yɛrɛ dencɛ muso kama, dencɛ muso be wili a biranmuso kama.’—Luka 12:49, 53.

O kumaw ɲɛsinna tigitigi a ka kalandenw lo ma. O kumaw fɔnin kɔ, Yezu y’a ɲɛsin jama ma. U caamanba y’u dusu gwɛlɛya k’u ɲɛɛ tugu daliluw kan minw b’a yira ka gwɛ ko Yezu lo ye Masiya ye. O kama Yezu y’a fɔ u ye ko: “Ni aw bɛ sankaba wulitɔ ye tilebin yanfan fɛ tuma min na, aw b’a fɔ o yɔrɔnin bɛɛ ko sanji bɛ na, a bɛ kɛ ten. Ni fiɲɛ bɛ ci ka bɔ worodugu yanfan fɛ, aw b’a fɔ ko funteni na kɛ, a bɛ kɛ ten. Filankafow! Aw bɛ dugukolo ni sankolo ɲɛ faranfasi dɔn, mun y’a to aw tɛ nin waati kow faranfasi?” (Luka 12:54-56, ABM). A gwɛnin lo k’o mɔgɔw labɛnnin tɛ.