Yezu bele b’a ka suu laban na n’a cidenw ye. A tun y’u seenw ko walisa k’u kalan majigilenya koo la. Mun na o bɛnnin lo? O bɛnnin lo sabu fiɲɛ dɔ b’u la. U be kantigiya kɛ Ala ye. Nka lɔyɔrɔko bele b’u kɔnɔ (Mariki 9:33, 34; 10:35-37). U ka fiɲɛ bɔra kɛnɛ kan tugun o suu kelen na.

Cidenw y’a daminɛ “ka ɲɔgɔn sɔsɔ kosɔbɛ, bari u tun b’a fɛ k’a lɔn . . . min ye ɲamɔgɔ ye u cɛma.” (Luka 22:24). N’a sɔrɔ a ma diya Yezu ye k’a ye ko a ka kalandenw be ɲɔgɔn sɔsɔra. A bena mun lo kɛ do?

Sanni Yezu ka cidenw kɔrɔfɔ u ka kɛwale kosɔn, a muɲuna k’u dɛmɛ k’u hakili jagabɔ. A ko: “Siyaw ka masacɛw be kuntigiyakow kɛ tɔw la, ani fanga be minw bolo, olu b’a fɛ u k’u tɔgɔɲuman fɔ. Nga aw ta man kan ka kɛ ten. . . . Mɔgɔ min be dumuni labɛnna an’a be di min ma wo, jɔn le ye mɔgɔbaba ye u fila cɛma? Dumuni be di min ma, o tɛ wa?” O kɔ, Yezu y’a ka cidenw hakili jigi ale yɛrɛ ka ɲɛyirali koo la. A ko: “Ayiwa, ne be aw cɛma i n’a fɔ jɔɔn.”—Luka 22:25-27.

Cidenw ka fiɲɛw bɛɛ n’a ta, u tora ni Yezu ye a ka kɔrɔbɔliw la. O kama, Yezu ko: “Ne Faa ye [layidu ta ko a bena] masaya di ne ma cogo min na, ne fana [be layidu ta ko n’] b’a di aw ma ten.” (Luka 22:29). O cɛɛw be kantigiya kɛ Yezu ye. O kama, Yezu y’a fɔ u ye ko layidu min b’ale n’u cɛ, o sababu la, u bena kɛ ale ka marakɛɲɔgɔnw ye Ala ka Masaya la.

O ye jigiya ɲuman ye cidenw fɛ. Nka u bele ye adamaden dafabaliw ye. Yezu y’a fɔ u ye ko: “Sitanɛ y’a ɲini kosɛbɛ ko a bɛ aw tɛntɛn i n’a fɔ ɲɔ bɛ tɛntɛn cogo min na.” (Luka 22:31, ABM). A y’u lasɔmi tugun ko: “Bii suu nin na, aw bɛɛ bena boli ka ne to, bari a fɔra Ala ka kuma na ko: ‘[Ne] bena sagadɛndɛbaga bugɔ, sagaw be jɛnsɛn.’”—Matiyo 26:31; Zakari 13:7.

Piyɛri lanin b’a yɛrɛ la minkɛ, a ko: “Hali ni bɛɛ bolila k’i to, ne kɔni tena boli abada.” (Matiyo 26:33). Yezu y’a fɔ Piyɛri ye k’o loon suu yɛrɛ la, sanni dondo ka kasi siɲɛ fila, Piyɛri bena a fɔ ko a t’ale lɔn. A y’a fɔ tugun ko: “Nga, ne ye Ala daali i ye waasa i ka lanaya kana cɛn. N’i segira ne ma tuma min na, e k’i tɔɲɔgɔnw dɛmɛ.” (Luka 22:32). Nka Piyɛri y’a disi gosi k’a fɔ ko: “Hali ni ne ka kan ka sa n’i ye, ne kɔni ten’a fɔ ko n t’i lɔn fewu.” (Matiyo 26:35). Ciden tɔɔw fana y’o kuma kelen fɔ.

Yezu y’a fɔ a ka kalandenw ye ko: “Ne be n’aw ye yanni waati dɔɔni dɔrɔn. O kɔ, aw bena ne yɔrɔ ɲini. Ne tun kɔnna k’a fɔ zuwifuw ye cogo min na k’u tena se ka na ne taayɔrɔ la, ne b’o koo kelen le fɔ aw ye fana.” O kɔ, a y’a fɔ tugun ko: “Ne be cikura di aw ma ko: aw ka ɲɔgɔn kanu, ne y’aw kanu cogo min na, aw fana ka ɲɔgɔn kanu ten. Mɔgɔ bɛɛ ben’a lɔn o seen fɛ ko aw kɛra ne ka kalandenw ye, ni aw be ɲɔgɔn kanu.”—Zan 13:33-35.

Komi Yezu ko ale bena to n’u ye wagati dɔɔni dɔrɔn, Piyɛri y’a ɲininga ko: “Matigi, i be taga min?” Yezu y’a jaabi ko: “Ne be taga yɔrɔ min na, e te se ka tugu ne kɔ ka taga o yɔrɔ la fɔlɔ, nga yanni waati dɔ, e bena se ka tugu ne kɔ.” Piyɛri m’a faamu. A ko: “Mun na ne te se ka tugu i kɔ sisan? Ne bena n nii d’i kosɔn.”—Zan 13:36, 37.

Tuma min na Yezu tun y’a ka cidenw bila ka taga waajuli kɛ Galile, a tun ko u kana wari wala dumunifɛn ta u kun (Matiyo 10:5, 9, 10). Sisan, a segira o kuma kan ani a ye cidenw ɲininga ko: “Fɛɛn dɔ ye aw dɛsɛ wa?” U y’a jaabi ko foyi m’u dɛsɛ. Nka u ka ɲi ka mun lo kɛ loon nataw la? Yezu y’o fɔ u ye ko: “Ni wari be min fɛ, a k’a ta. O cogo kelen la fana, ni dugutagaminan be min fɛ, a k’a ta. Ni murujan te min fɛ, a k’a ka  nɛnɛdeleke feere ka dɔ san. Ne b’a fɔ aw ye, Ala ka kuma ye min fɔ ne ka koo la ko: ‘U y’a jati kojugukɛlaw dɔ ye,’ wajibi lo o ka kɛ. Ayiwa, o tuma surunyana.”—Luka 22:35-37.

U bena Yezu gwengwe lɔgɔ kan kojugukɛlaw cɛma tuma min na, Yezu kaan b’o wagati le ma. K’a ta o wagati ma, u bena a ka kalandenw tɔɔrɔ kosɔbɛ. Kalandenw y’a miiri k’u labɛnnin lo ka ban o kɔrɔbɔliw kama. O kama, u y’a fɔ ko: “Matigi, murujan fila filɛ.” Yezu y’u jaabi “k’o ka ɲi ten.” (Luka 22:38). Kalandenw ye min fɔ ten, o bena sababu di Yezu ma yanni dɔɔni k’u kalan kooba dɔ la.