U ye Yezu siri i n’a fɔ kojugukɛla ani u tagara n’a ye Anɛ fɛ. Anɛ lo tun ye sarakalasebagaw kuntigiba ye tuma min na Yezu ye sariya karamɔgɔw kabakoya a denmisɛn tuma (Luka 2:42, 47). Anɛ dencɛ caaman kɛra sarakalasebagaw kuntigibaw ye. Sisan, a burancɛ Kayifu lo ye sarakalasebagaw kuntigiba ye.

Tuma min na Yezu be Anɛ ka soo, Kayifu ye kititigɛlaw jɛnkulu mɔgɔw lajɛn. U hakɛ ye mɔgɔ 71 lo ye. O mɔgɔ 71 cɛ, sarakalasebagaw kuntigiba be yen, minw tun ye sarakalasebagaw kuntigibaw ye ka kɔrɔ, olu ni mɔgɔ wɛrɛw fana tun be yen.

Anɛ ye Yezu ɲininga “a ka kalandenw ka koo la ani a ka kalan la.” Yezu y’a jaabi ko: “Ne kumana mɔgɔw fɛ kɛnɛ kan, ne ye mɔgɔw kalan kalansow kɔnɔ ani Alabatosoba kɔnɔ, zuwifu bɛɛ be ɲɔgɔn lajɛn yɔrɔ minw na, ne ma foyi fɔ dogo la. Mun na i be ne ɲininga o la? Mɔgɔ minw tun ye ne lamɛn i ka olu ɲininga.”—Zan 18:19-21.

Sɔrɔdasi minw lɔnin be yen, u la kelen ye Yezu tulo ci ani k’a fɔ a ye ko: “E be sarakalasebagaw kuntigiba le jaabi ten wa?” Nka, komi Yezu y’a lɔn ko a ma kojugu si kɛ, a y’o sɔrɔdasi jaabi ko: “Ni ne ye kumajugu fɔ, i ka ne ka kuma nin juguyayɔrɔ fɔ. N’o tɛ, mun na i be ne bugɔ?”  (Zan 18:22, 23). O kɔ, Anɛ ko u ka taga ni Yezu ye a burancɛ Kayifu fɛ.

Kititigɛlaw jɛnkulu, o kɔrɔ, sarakalasebagaw kuntigiba ani Yahutuw ka cɛkɔrɔbaw ni sariya karamɔgɔw ye ɲɔgɔn lajɛn Kayifu ka soo. Sariya sira fɛ, a daganin tɛ k’o kiti ɲɔgɔn tigɛ Tɛmɛnkan seli sufɛ. Nka, o ma u bali k’u ka laɲinita jugu dafa.

U ka laɲinita tɛ ka kiti tigɛ ni tilenninya ye. Yezu ye Lazari kunu ka bɔ saya la tuma min na, u tun y’a latigɛ ko Yezu ka kan ka faga (Zan 11:47-53). Tile damanin ka kɔn o ɲɛ, diinan kuntigiw tun ye labɛn kɛ ka Yezu minɛ k’a faga (Matiyo 26:3, 4). O la, sanni kiti yɛrɛ ka daminɛ, u tun y’a latigɛ ka ban ko Yezu ka ɲi ka faga.

Ka fara o kiti tilenbali kan, sarakalasebagaw kuntigiw ani kititigɛla wɛrɛw ye seere ngalontigɛlaw ɲini walisa ka se ka jalaki ben Yezu kan. U ye seereya caaman kɛ, nka u ka seereya kumaw ye ɲɔgɔn sɔsɔ. A laban, seere ngalontigɛla fila nana k’a fɔ ko: “An y’a mɛn a daa la ko mɔgɔw ye nin Alabatosoba min lɔ, ko ale bena o ci ka dɔ wɛrɛ lɔ tile saba kɔnɔ, ko mɔgɔw tena o lɔ.” (Mariki 14:58). O n’a ta bɛɛ, seere fila nunu tun bɛnnin tɛ.

Kayifu ye Yezu ɲininga ko: “Mɔgɔ nunu be kuma min fɔra i ka koo la, i te foyi fɔ o la wa?” (Mariki 14:60). Nka, Yezu ma foyi fɔ k’o seere ngalontigɛlaw jaabi. U ka seereya kumaw yɛrɛ tun tɛ kelen ye. O kosɔn, sarakalasebagaw kuntigiba Kayifu ye fɛɛrɛ wɛrɛ ɲini.

Kayifu b’a lɔn ko Yahutuw ka teli ka dimi ni mɔgɔ dɔ y’a fɔ ko ale ye Ala Dencɛ lo ye. Tuma min na Yezu ye Ala weele ko a Faa, Yahutuw y’a ɲini k’a faga. Mun na do? Sabu olu fɛ, “a b’a yɛrɛ suma ni Ala ye.” (Zan 5:17, 18; 10:31-39). Kayifu ye nanbara kuma fɔ ka Yezu waajibiya ko: “Ni ele lo ye Ala ka Mɔgɔ wolomanin, ni Ala Dencɛ ye, a fɔ an ye Ala kosɔn.” (Matiyo 26:63). Tiɲɛn lo ko Yezu tun kɔnna k’a fɔ ko ale ye Ala Dencɛ ye (Zan 3:18; 5:25; 11:4). N’a m’o fɔ sisan, mɔgɔw be se k’a miiri ko a y’a daa yɛlɛma ko ale tɛ Ala Dencɛ ani Krista ye. O kama, Yezu y’a fɔ ko: “Ɔnhɔn. Ne lo. Aw bena Mɔgɔ Dencɛ siginin ye Setigi Ala kinibolo fɛ. O kɔ, aw ben’a natɔ ye sankabaw cɛma.”—Mariki 14:62.

Kayifu y’o mɛn minkɛ a y’a ka faniw faran faran ani a y’a fɔ ko: “A ye Ala tɔgɔ cɛn! An mako te mɔgɔ la tugu k’a jalaki. Aw ye Ala tɔgɔ cɛnkuma mɛn a daa la kɛ! Aw be mun le miiri o la?” Kititigɛlaw jɛnkulu mɔgɔw ye kiti ben Yezu kan ko: “A ka kan ka faga.”—Matiyo 26:65, 66.

Dɔw y’a daminɛ ka Yezu lɔgɔbɔ ani k’a bugɔ n’u bolokuruw ye. Dɔ wɛrɛw y’a tulo ci ani ka daji tu a ɲɛda la. O kɔ, u y’a ɲɛɛw siri k’a bugɔ, k’a lɔgɔbɔ ani k’a ɲininga ko: “Jɔn y’i bugɔ?” (Luka 22:64). U ye Ala Dencɛ minɛ o cogo lo la, ka kiti tilenbali tigɛ a kan sufɛ.