Dimansilon, Nisankalo tile 16nan na, kalandenw bele dusu tiɲɛnin lo. U m’a faamu fɛɛn min kama kaburu lakolon lo (Matiyo 28:9, 10; Luka 24:11). O loon wulafɛ, Kilewopasi ni kalanden wɛrɛ bɔra Zeruzalɛmu ko u be taga Emayusi dugu la. Kilomɛtɛrɛ 11 lo b’o dugu fila cɛ.

Koo minw kɛra Yezu koo la, u tora ka baro kɛ o koo la sira kan. O kɔ, lonancɛ dɔ nana fara u kan. A y’u ɲininga ko: “Aw be mun baro la ɲɔgɔn fɛ?” Kilewopasi y’a jaabi ko: “Koo minw kɛra tile fila nin na, mɔgɔ si te Zeruzalɛmu min te o koow kala ma fɔɔ e dɔrɔn kɛ?” O lonan y’u ɲininga ko: “O ye mun ye?”—Luka 24:17-19.

U y’a fɔ ko: “Nazarɛtika Yezu ka koo kɛ! . . . An kɔni jigi tun b’a kan ko mɔgɔ min ka kan ka Isirayɛlidenw kunmabɔ, ko ale tun lo.”—Luka 24:19-21.

Koo minw kɛra o loon bɛɛ la, Kilewopasi n’a tɔɲɔgɔn y’o ɲɛfɔ a ye. U y’a fɔ a ye ko muso minw tun tagara Yezu ka kaburuda la, u y’a lakolon sɔrɔ ani k’o musow ye kabako dɔw ye. Mɛlɛkɛ dɔw y’u yɛrɛ yira u la k’a fɔ ko Yezu be niin na. U y’a fɔ ko u tɔɲɔgɔn dɔw tagara kaburuda la ani “musow y’a fɔ cogo min na, u tagar’a sɔrɔ ten.”—Luka 24:24.

A gwɛnin lo ko kalanden fila nunu m’o koow kɔrɔ faamu. U tun be tagamana ni lonancɛ min ye, a y’u dɛmɛ k’u ka miiriya latilen. A y’a fɔ u ye ko: “Aw ye hakilitanw ye dɛ! Aw te la kiraw ka kuma fɔnin na joona fana. Wajibi tun lo Ala ka Mɔgɔ wolomanin nin tun ka tɔɔrɔ ten ka sɔrɔ ka boɲa sɔrɔ Ala fɛ.” (Luka 24:25, 26). O kɔ, Yezu ye Ala ka Kuma yɔrɔ caaman ɲɛfɔ u ye Krista koo la.

A laban, o cɛɛ saba sera Emayusi dugu gɛrɛfɛ. Komi kalanden fila nunu b’a fɛ ka dɔ lɔn tugun, u ye lonancɛ “daali ko a ka to u fɛ bari tile be ɲini ka ban.” A sɔnna ani a sigira n’u ye dumuni na. Tuma min na a ye buru ta ka barika la Ala ye, k’a tilantilan k’a di u ma, u y’a lɔn ko Yezu lo. Nka, a tununa ka bɔ u ɲɛɛ kɔrɔ (Luka 24:29-31). Sisan kɔni, u y’a lɔn ko Yezu be niin na tiɲɛn na!

O kalanden fila nunu ninsɔndiyaninba y’a fɔ ɲɔgɔn ye Yezu ka kumaw tun be min kɛra u la. U ko: “A tun be kumana an fɛ sira kan tuma min na ka to ka Ala ka kuma ɲafɔ an ye ka gwɛ, an nisɔndiyanin tun tɛ wa?” (Luka 24:32). U teliyara ka kɔsegi Zeruzalɛmu ka taga cidenw ni tɔɔw sɔrɔ ɲɔgɔn fɛ. Sanni Kilewopasi n’a tɔɲɔgɔn yɛrɛ ka se k’o koo ɲɛfɔ u ye, kalanden tɔɔw y’a fɔ u ye ko: “Matigi kununna tiɲɛ na.” U y’a fara a kan ko: “A y’a yɛrɛ yira Simɔn na.” (Luka 24:34). O kɔ, kalanden fila nunu y’a fɔ Yezu y’a yɛrɛ yira olu la cogo min na.

Yezu barila k’a yɛrɛ yira u la boon kɔnɔ. U bɛɛ kabakoyara kosɔbɛ! U do tun ye daaw sɔgɔ sabu u tun be siranna Yahutuw ɲɛ. O n’a t’a bɛɛ Yezu nana lɔ u cɛma. A y’a fɔ ni dususuman ye ko: “Ala ka hɛrɛ kɛ aw ye.” Nka, u jaa tigɛra kosɔbɛ i ko a tun kɛra u la loon dɔ cogo min na: “U tun be miiri ko [mɛlɛkɛ] dɔ lo.”—Luka 24:36, 37; Matiyo 14:25-27.

Walisa k’a yira u la ko ale farisogolaman lo, nka ko ale tɛ yelifɛn dɔ ye wala fɛɛn wɛrɛ ye u be min miiri, Yezu y’a tɛgɛw n’a seenw yira u la k’a fɔ u ye ko: “Mun na aw be siran? Mun y’a to aw be sigasiga ten? Aw ka ne tigɛ ni n seenw filɛ, ne yɛrɛ lo tigitigi. Aw ye maga ne la k’a filɛ, aw ben’a ye ko farisogo ni kolo be ne la.” (Luka 24:36-39). U kabakoyara ani u ninsɔndiyara, nka u bele sigasigara dɔɔni.

Walisa k’u dɛmɛ tugun u k’a faamu ko ale lo tigitigi, a y’u ɲininga ko: “N be dumunifɛn dɔ sɔrɔ aw fɛ yan wa?” U ye jɛgɛwusunin dɔ di a ma a y’o dumu. O kɔ, a y’a fɔ u ye ko: “Tuma min  na ne tun ma sa ban, koo minw fɔra Musa ka sariya, ni kiraw ka kitabuw, ani Dɔnkiliw Ala ye kitabu la ne ka koo la, ne tun y’a fɔ aw ye ko wajibi lo o bɛɛ ka kɛ.”—Luka 24:41-44.

Yezu ye Kilewopasi n’a tɔɲɔgɔn dɛmɛ ka Ala ka Kuma faamu. Sisan, minw bɛɛ lajɛnin lo k’a lamini, a y’olu fana dɛmɛ ka faamuyali kɛ. A ko: “A fɔra Ala ka kuma na ko mɔgɔw bena Ala ka Mɔgɔ wolomanin tɔɔrɔ, k’a faga, a bena kunun a tile sabanan loon. A ka kibaru ka kan ka fɔ siyaw bɛɛ ye waasa u ka nimisa ka faran u ka kojuguw la, u ka hakɛw ka yafa. O ka kan ka daminɛ Zeruzalɛmu. Aw ka kan ka kɛ o koow lakalibagaw ye, bari aw y’o ye.”—Luka 24:46-48.

An m’a lɔn fɛɛn min kama, nka, ciden Toma tun tɛ yen n’u ye o loon na. O loon tɛmɛnin kɔ, kalanden tɔɔw ninsɔndiyanin y’a fɔ a ye “k’olu ye Matigi ye.” Nka, a y’u jaabi ko “n’ale ma puwɛnti nɔɔ ye a tigɛ la, k’a bolokunnaden don o woo la, k’a don a gɛrɛn ta la, ko ale tena la o la.”—Zan 20:25.

Tile seegi o kɔ, kalandenw ye ɲɔgɔn lajɛn tugun ka daaw sɔgɔ. Nka, nin sen fɛ, Toma tun be n’u ye. Yezu farisogolaman y’a yɛrɛ yira u la ani a y’u fo ko: “Hɛrɛ ka kɛ aw ye.” O kɔ, a y’a fɔ Toma ye ko: “N tigɛ mɔmɔ k’a filɛ, an’i bolo don n gɛrɛn na, i kana sigasiga tugu, nga i ka la ne la.” Toma y’a fɔ ko: “Ne Matigi ni n ka Ala!” (Zan 20:26-28). Sisan kɔni, a tɛ sigasiga ko Yezu be niin na ani ko a ye mɛlɛkɛ barikaman ye, o kɔrɔ, Jehova Ala ka lasigiden.

Yezu y’a fɔ a ye ko: “I ye ne ye, o le y’a to i lar’a la. Mɔgɔ minw ma ne ye, ani u fana be l’a la, olu dagamuna.”—Zan 20:29.