Ka Yezu to dumuni na Fariziɲɛw ka kuntigi dɔ ka soo, a ye mɔgɔw kalan koo nafamanbaw la. Yezu ye Zeruzalɛmu sira minɛ tugun ani jamaba dɔ tugura a kɔ. Mun na do? A mana kɛ cogo o cogo, yala u b’a fɛ tiɲɛn tiɲɛn na ka kɛ a ka kalandenw ye wa?

K’u to sira kan, Yezu ye kuma dɔ fɔ jama ye. N’a sɔrɔ o kumaw ye u dɔw kɔnɔ gwan. A ko: “Ni mɔgɔ dɔ nana ne nɔfɛ, ni o ma a fa koniya, ani a ba, ni a muso ni a denw, ni a balimakɛw ni a balimamusow, ani a yɛrɛkun fana, a tɛ se ka kɛ ne kalanden ye.” (Luka 14:26, ABM). Yezu b’a fɛ ka mun lo fɔ ten?

Yezu t’a fɛ k’a fɔ ko ale ka kalandenw ka ɲi k’u somɔgɔw kɔniya yɛrɛ yɛrɛ la dɛ! A b’a fɛ k’a fɔ k’u man kan k’u somɔgɔw kanu kojugu ka tɛmɛ ale Yezu yɛrɛ kan. U man kan ka kɛ i n’a fɔ cɛɛ min kofɔra Yezu ka ntalen dɔ la. O cɛɛ ma sɔn weeleli kɔrɔtanin dɔ la sabu a furutɔ tun lo (Luka 14:20). A fɔra ko Leya “koo tun man di” Yahutuw bɛnba Yakuba ye, ko a tun be Leya dɔgɔmuso Arasɛli lo kanu. O kuma kɔrɔ ko a tun be Arasɛli lo kanu ka tɛmɛ Leya kan.—Zɛnɛzi 29:31.

A kɔrɔsi ko Yezu y’a fɔ ko a ka kalanden ka ɲi k’a “yɛrɛkun fana” kɔniya. O kɔrɔ ko Yezu ka kalanden ka ɲi ka Yezu kanu ka tɛmɛ a yɛrɛ niin kan. Ni waajibi lo a ka bɔnɛ a niin yɛrɛ la, a ka kan ka sɔn k’o kɛ. A gwɛnnin lo ko ka kɛ Krista ka kalanden ye, o ye kunkanbaaraba yɛrɛ lo ye. O ye desizɔn ye mɔgɔ man kan ka min ta a kunfɛ.

Yezu y’a yira ko mɔgɔ be se ka gwɛlɛya ni kɔrɔbɔli sɔrɔ sabu a tigi kɛra ale ka kalanden ye. A ko: “Ni mɔgɔ min m’a ka gwengwenlɔgɔ ɲun ka tugu ne kɔ, o tigi te se ka kɛ ne ka kalanden ye.” (Luka 14:27). Tiɲɛn na, Yezu ka kalanden sɔbɛ ka ɲi ka sɔn tɔɔrɔ ma i ko Yezu y’a kɛ cogo min na. A yɛrɛ y’a fɔ ko ale bena sa a juguw bolo.

Jama min be tugura Yezu kɔ, u ka ɲi ka jatiminɛ kɛ koɲuman k’a filɛ Krista ka kalanden ka kunkanbaara ye min ye. Yezu y’o yira ka gwɛ ntalen dɔ fɛ. A ko: “Aw cɛma ni mɔgɔ dɔ b’a fɛ ka sangaso jamanjan lɔ, a te sigi fɔlɔ k’a lɔsɔngɔ jati k’a filɛ yala n’a ka wari bena se k’o baara laban wa? N’o tɛ, n’a y’o sangaso juu sigi, n’a ma se k’a laban” do? (Luka 14:28, 29). O kama, jamaba min be tugura Yezu kɔ Zeruzalɛmu sira kan, sanni u ka sɔn ka kɛ Yezu ka kalanden dɔw ye, u ka ɲi k’a latigɛ fɔlɔ k’o kunkanbaara dafa bɛrɛbɛrɛ. Yezu tɛmɛna ntalen wɛrɛ fɛ k’o miiriya walawala. A ko:

“Ni masacɛ dɔ b’a fɛ ka taga masacɛ dɔ wɛrɛ kɛlɛ, a be sigi fɔlɔ ka miiri k’a filɛ n’a be se ni mɔgɔ waa tan (10000) ye k’a jugu mɔgɔ waa mugan (20000) tigi kunbɛn. N’a te se, a be lasigidenw ci ka taga kɛlɛ bancogo ɲini a  jugu nin fɛ k’a to yɔrɔjan.” Yezu y’o ntalen ka miiriya jɔnjɔn bɔ kɛnɛ kan. A ko: “N’aw dɔ b’a fɛ ka kɛ ne ka kalanden ye fana, fɔɔ aw k’aw ka bololafɛn bɛɛ to yen.”—Luka 14:31-33.

Yezu ka kuma tun ma ɲɛsin jamaba nin dɔrɔn ma. Minw bɛɛ b’a ɲini ka Krista lɔn, olu fana ka ɲi ka sɔn ka tugu o kumaw kɔ. O kɔrɔ ko n’u b’a fɛ ka kɛ Yezu ka kalandenw ye, u ka ɲi ka sɔn ka fɛɛn bɛɛ saraka, hali u bololafɛnw ani u niin yɛrɛ. U ka ɲi ka miiri ani ka delili kɛ o koo la.

Sisan, Yezu segira a ka kalan dɔ kan a tun ye min kɛ kulu kan. A tun y’a fɔ ko a ka kalandenw “ye diɲɛ kɔgɔ ye.” (Matiyo 5:13). N’a sɔrɔ a tun b’a fɛ k’a fɔ ko komi kɔgɔ be fɛɛn mara a tɛ tiɲɛ, o cogo kelen na, a ka kalandenw be mɔgɔw tanga tolininya ma tagamacogo ani Alako ta fan fɛ. Sisan, k’a to Yezu ka cidenya baara be sera a laban na, a ko: “Kɔgɔ ye fɛnɲuman ye, nga ni kɔgɔ ka timiya bɔra a la, mun bena se k’a timiya tugu?” (Luka 14:34). A lamɛnbagaw b’a lɔn ko mɔgɔw be kɔgɔ min feere, tuma dɔw la a saniyanin tɛ, bɔgɔ b’a la. O kama, nafa bɛrɛ t’a la.

Yezu y’a yira o cogo la ko hali minw yɛrɛ y’ale ka kalandenw ye kabi wagatijan, u man kan k’u fari faga. N’o tɛ, u bena kɛ nafantanw ye i ko kɔgɔ min ka timiya bɔra a la. O kama, u bena sababu di duniɲamɔgɔw ma u k’u lɔgɔbɔ. Min yɛrɛ ka jugu, u koo tɛna diya Ala ye ani u bena a tɔgɔ tiɲɛ yɛrɛ. Yezu ye kuma dɔ fɔ k’a yira ko a kɔrɔtanin lo u k’u yɛrɛ tanga o koo ma. A ko: “Tulo be min fɛ ka mɛnni kɛ, o ka mɛnni kɛ.”—Luka 14:35.