Yezu ye ntalen min la deen tununin koo la, o tun ka ɲi ka lanpominɛlaw, sariya karamɔgɔw ani Fariziɲɛw dɛmɛ u k’a faamu ko jurumukɛla minw be nimisa u ka jurumuw la, Ala labilanin lo ka yafa u ma (Luka 15:1-7, 11). Yezu be kuma a ka kalandenw fɛ sisan. A be ntalen dɔ la nafolotigi dɔ koo la. O cɛɛ y’a mɛn ko a ka soo kunnasigibaga tɛ baara ɲuman kɛra.

Yezu y’a fɔ k’u ye soo kunnasigibaga jalaki ko a b’a kuntigi ka nafolo tiɲɛna. O kama a kuntigi y’a fɔ a ye ko a bena a gwɛn baara la. Cɛɛ y’a fɔ a yɛrɛ ye ko: “Ne bena mun kɛ sa? Bari ne kuntigi bena n bɔ a ka nafolo kunna. Ne te se ka sɛnɛ kɛ. Ka daalili kɛ, o bena kɛ maloya ye ne ma.” Walisa k’a ka siniɲasigi labɛn, a ko: “Ni ne gwɛnna ka bɔ baara nin na tuma min na, ne bena min kɛ mɔgɔ dɔw ka se ka ne dɛmɛ, ne y’o lɔn.” Mɔgɔ minw ye juru ta a kuntigi fɛ, a sinna k’olu weele k’u ɲininga ko: “Ne kuntigi ka juru min b’i la, joli lo?”—Luka 16:3-5.

Mɔgɔ fɔlɔ y’a jaabi ko: “Tulu daga kɛmɛ.” O be bɛn tulu litiri 2200 ma. N’a sɔrɔ oliviyeyiri foroba lo b’o cɛɛ fɛ wala tulu feerela lo. Soo kunnasigibaga y’a fɔ a ye ko: “I ka juru sɛbɛ filɛ nin ye, sigi ka tulu daga bi duuru sɛbɛn joona joona [wala tulu litiri 1100].”—Luka 16:6.

A ye dɔ wɛrɛ ɲininga ko: “E do, joli b’i la?” O cɛɛ y’a jaabi ko: “Bile bɔɔrɔ kɛmɛ.” Soo kunnasigibaga y’a fɔ a ye ko: “I ka juru sɛbɛ filɛ nin ye, bɔɔrɔ bi seegi sɛbɛn.” A ye caaman bɔ o cɛɛ ka juru la.—Luka 16:7.

Komi cɛɛ bele be a kuntigi ka nafoloko kun na, a kuntigi ka juru be minw na, joo b’a fɛ cogo dɔ la ka dɔ bɔ o juruw hakɛ la. O cogo la, a be teriya ɲini n’o mɔgɔw ye. O la, n’a gwɛnna baara la, o mɔgɔw bena se k’a dɛmɛ.

A kuntigi labanna ka bɔ o koo kala ma. Hali n’o kɛra sababu ye dɔ bɔra kuntigi ka nafolo la, a kabakoyara ani a ye cɛɛ “tilenbali” tando “a ka keguya kosɔn.” Yezu y’a fɔ tugun ko: “Nin diɲɛ mɔgɔw be koow kɛ ni keguya ye u ni ɲɔgɔn cɛ ka tɛmɛ kɛnɛyeelendenw kan.”—Luka 16:8, ABM.

Yezu t’a fɔra ko soo kunnasigibaga ye koo ɲuman kɛ. A t’a fɔra fana ko ka nanbara kɛ, o tɛ kojugu ye. A b’a fɛ a ka kalandenw ka mun lo faamu? A y’a fɔ u ye ko: “A’ ye teriw sɔrɔ aw yɛrɛw ye ni tilenbaliya nafolo ye, walisa ni o banna, u ka aw ladon sigi yɔrɔ banbaliw la.” (Luka 16:9, ABM). A b’a fɛ u k’a faamu k’u ka ɲi ka kɔn ka labɛn kɛ ani ka koow kɛ ni hakilitigiya ye. “Kɛnɛyeelendenw” ye Ala sagokɛlaw lo ye. U ka ɲi ka baara ɲuman kɛ n’u bololafɛnw ye siniɲasigi banbali kama.

 Jehova Ala n’a Dencɛ dɔrɔn lo be se ka sɔn mɔgɔ ka kɛ sankolo Masaya la wala alijɛnɛ kɔnɔ dugukolo kan, Masaya ka mara tuma na. An ka ɲi k’an seko bɛɛ kɛ ka teriya ɲini n’u ye. O kama, an ka baara kɛ n’an bololafɛnw ye ka dɛmɛ don Ala ka Masaya koow la. O la, an bena siniɲasigi banbali sɔrɔ tuma min na sanu, warigwɛ ani nafolofɛn wɛrɛw tɛna foyi ɲɛ mɔgɔ ye.

Yezu y’a fɔ fana ko minw be baara kɛ kantigiya la n’u ka nafolo wala n’u bololafɛnw ye, u bena koobabaw ɲɛnabɔ kantigiya la fana. A ko: “O de kosɔn, ni aw tɛ dannamɔgɔw ye nin tilenbaliya nafolo kow la, jɔni na nafolo sɛbɛ kalifa aw ma [i n’a fɔ Masaya koow]?”—Luka 16:11, ABM.

Yezu b’a yirala a ka kalandenw na ko walisa u ka “ladon sigi yɔrɔ banbaliw la,” u ka ɲi ka saratiba dɔw dafa. Mɔgɔ tɛ se ka to ka tugu nafolo kɔ ani o wagati kelen na ka kɛ Ala sagokɛla sɔbɛ ye. Yezu y’a ka kumaw kuncɛ ko: “Baaraden si tɛ se ka baara kɛ kuntigi fila ye, katuguni a na dɔ koniya k’a tɔ kelen kanu, wala a na i nɔrɔ kelen na k’i mago bɔ dɔ la. Aw tɛ se ka baara kɛ Ala ye k’a kɛ nafolo fana ye.”—Luka 16:9, 13, ABM.