Siga t’a la, kibaro diiman ka di i ye. I k’a lɔn ko kibaro diiman dɔ be yen min ɲɛsinna e n’i somɔgɔw ma.

O kibaro diiman be sɔrɔ Bibulu kɔnɔ. Duniɲa Danbaga Jehova Ala lo y’a to u y’o kitabu sɛbɛ kabi galen. Gafe nin basiginin be Bibulu ka kitabu naani kan, kibaro diiman be sɔrɔ minw kɔnɔ an bɛɛ ye. Ala ye cɛɛ minw lasun k’o kitabuw sɛbɛ, olu lo tɔgɔw b’u kan: Matiyo, Mariki, Luka ani Zan.

Mɔgɔ caaman b’o lakalita naani weele ko Evanziliw. N’u ko “Evanzili,” o kɔrɔ ko kibaro diiman. Kibaro diiman min b’o lakalita naani kɔnɔ, o ɲɛsinna Yezu lo ma: Ala y’ale lo kɛ an Kisibaga ye. Ani, komi ale lo ye Ala ka Masaya Masacɛ ye, minw limaniyanin lo a la, a bena duga banbaliw lase u bɛɛ ma.—Mariki 10:17, 30; 13:13.

N’a sɔrɔ i b’i yɛrɛ ɲininga ko mun na Ala y’a kɛ u ye lakalita naani sɛbɛ walisa ka Yezu ka ɲɛnamaya lakali ani k’a ka kalanw kofɔ mɔgɔw ye?

Nafa b’a la ka kɛ ni lakalita naani ye. An ka ɲɛyirali dɔ ta. Miiri k’a filɛ: Cɛɛ naani lɔnin be karamɔgɔba dɔ gɛrɛfɛ. Cɛɛ min lɔnin b’a ɲɛfɛ, o ye lanpominɛlaw kuntigi dɔ ye. Min b’a kinibolo fan fɛ, ale ye dɔgɔtɔrɔcɛ ye. Cɛɛ min b’a lamɛnna a numanbolo fan fɛ, ale ye jɛgɛminɛla ye, ani karamɔgɔcɛ teri sɔbɛ lo. Cɛɛ min lɔnin be kɔfɛ, tɔɔw bɛɛ ka kɔrɔ n’ale ye ani a be karamɔgɔcɛ ka kokɛcogow kɔrɔsira. O cɛɛ naani bɛɛ ye mɔgɔ hɔɔrɔnw ye, nka u kelen kelen bɛɛ ka koow jaticogo be dan na. N’u kelen kelen bɛɛ ye karamɔgɔcɛ ka kumaw n’a ka kɛwalew lakali, u bena koow pereperelatigɛ cogo min na, o tɛna kɛ kelen ye. N’an y’o lakalita naani bɛɛ kalan, an bena se ka karamɔgɔcɛ ka kumaw n’a ka kɛwalew bɛɛ faamu ka ɲɛ. O b’a yira fɛɛn min kama nafa b’a la ka kɛ ni lakalita naani ye Karamɔgɔba Yezu koo la.

An ka segi an ka ɲɛyirali kan: Komi lanpominɛlaw kuntigi ka lakalita ɲɛsinna Yahutuw lo ma, Yezu ka kalanw n’a ka kɛwale minw bena  Yahutuw dusukun sɔrɔ, a b’olu lo lakali. Nka, dɔgɔtɔrɔcɛ tɛ kuma o koow la, wala a b’u lakali cogoya wɛrɛ la sabu ale be sinsin min kan, o ye banabagatɔw ni namaraw kɛnɛyali koo lo ye. Karamɔgɔcɛ teri sɔbɛ be sinsin min kan, o ye karamɔgɔcɛ dusukunnakow n’a jogow lo ye. Cɛɛ naaninan (kanbele) ka lakalita ka surun, a tɛ koow pereperelatigɛ. Nka o cɛɛ naani ka lakalitaw bɛɛ ye tiɲɛnko lo ye. O b’a yira ka gwɛ nafa min b’a la ka kɛ ni lakalita naani ye Yezu koo la: o b’an dɛmɛ k’a ka kɛwalew, a ka kalanw n’a jogow faamu ka ɲɛ.

Tuma dɔw la, an b’a mɛn ko “Matiyo ka Evanzili” wala “Zan ka Evanzili.” O kuma tɛ ngalon ye sabu “Kibaru diman min be Ala Dencɛ Yezu Krista koo fɔ,” o lo be sɔrɔ o Evanzili kelen kelen bɛɛ kɔnɔ (Mariki 1:1). Nka, yɛrɛ yɛrɛ la, Evanzili kelen, wala kibaro diiman kelen dɔrɔn lo be yen Yezu koo la ani cɛɛ naani lo y’o lakali.

Koo minw lakalila Matiyo, Mariki, Luka ani Zan ka kitabuw kɔnɔ, Bibulu kalanbaga caaman y’o koow suma ɲɔgɔn na. Siri jamana ka lɔnnikɛla dɔ y’a ɲini k’o lo kɛ saan 170 Krista tile la. A tɔgɔ ko Tatian. Ale fɛ, o kitabu naani bɛɛ ye tiɲɛn lo ye ani u bɔra Ala yɔrɔ. O kama, a y’o lakalita naani bɛɛ fara ɲɔgɔn kan ka kɛ lakalita kelen ye min be weele ko Diatessaron.

Gafe nin (Yezu: Ale lo ye sira, tiɲɛn ani ɲɛnamaya ye) b’o ɲɔgɔn lo kɛ. Nka a kɔnɔnakow ye tiɲɛn ye ka tɛmɛ Tatian ta kan ani a dafanin lo ka tɛmɛ ale ta kan fana. Mun na do? Bi, an b’a faamu ka ɲɛ cogo min na Yezu ka kiraya kumaw n’a ka ntalen kuma caaman be dafara. O faamuyali y’a to Yezu ye min fɔ, a ye min kɛ, ani a ye koow kɛ ka tugu tugu ɲɔgɔn kɔ cogo min na, o gwɛnin lo an ɲɛɛ na. Lɔnnikɛlaw bɔra fɛɛn kɔrɔ minw kan, u fana y’an dɛmɛ ka kunnafoni dɔw sɔrɔ ani ka Evanziliw sɛbɛbagaw ka kuma dɔw faamu. Koo kelen kelen bɛɛ kɛra ka tugu tugu ɲɔgɔn kɔ cogo min na, an kɔni tɛ se k’o fɔ ka ja kelen kan. Nka, gafe nin be koow lakali cogo bɛnnin na ani cogo tilennin na.

Gafe nin kalantɔ, a ɲini k’a to i hakili la u b’a fɛ ele n’i somɔgɔw ka min kɛ. Yezu Krista ye min fɔ ciden Toma ye, o to i hakili la. A ko: “Ne le ye sira, ni tiɲɛ, ani [ɲɛnamaya] ye. Mɔgɔ si te se n Faa fɛ ni ne sababu tɛ.”—Zan 14:6.

Gafe nin bena i dɛmɛ k’a faamu ko Yezu lo ye “sira” ye, siga t’o la. Mɔgɔ si tɛ se ka gwɛrɛ Jehova Ala la delili fɛ ni Yezu sababu tɛ. Ka fara o kan, n’ale sababu tɛ, bɛɛn tɛ se ka kɛ an ni Ala cɛ (Zan 16:23; Ɔrɔmukaw 5:8). Ale sababu dɔrɔn lo la, an be se ka jɛnɲɔgɔnya ɲuman kɛ ni Ala ye.

Yezu lo ye ‘tiɲɛn’ ye. A ka kuma n’a ka ɲɛnamaya kɛcogo tun basiginin be tiɲɛn lo kan. A be se ka fɔ ko ale lo kɛra sababu ye tiɲɛn bɔra kɛnɛ kan. A ye kiraya kuma caaman dafa, u kɛra “ɔwɔ ye” ale barika la (2 Korɛntikaw 1:20, ABM; Zan 1:14). O kiraya kumaw b’an dɛmɛ k’a faamu Yezu lɔyɔrɔ ye min ye Ala sagonata koo la.—Yirali 19:10.

Yezu ye ɲɛnamaya ye. A y’a niin dafanin di k’o kɛ kunmabɔsara ye. O sababu la, an be se ka ‘ɲɛnamaya sɔbɛ’ sɔrɔ, o min ye “ɲɛnamaya banbali” ye (1 Timote 6:12, 19, ABM; Efɛzikaw 1:7; 1 Zan 1:7). Yezu bena kɛ ɲɛnamaya ye mɔgɔ miliyɔn caaman fɛ minw bena kunu ka bɔ saya la ani ka sababu sɔrɔ ka ɲɛnamaya kɛ fɔɔ abada alijɛnɛ kɔnɔ.—Zan 5:28, 29.

Yezu lɔyɔrɔ ye min ye Ala sagonata koo la, an bɛɛ ka ɲi k’o jati fɛɛnba ye. O kama, a bena diya i ye ka dɔ lɔn tugun Yezu koo la, ale min ye “sira, tiɲɛn ani [ɲɛnamaya] ye.”