Bibulu tun kɔnna k’a fɔ ko Sutana tun bena an kɛlɛ walisa k’an bali an ka waajulibaara la (Zan 15:20; Yir. 12:17). An kerecɛnɲɔgɔn minw be kɔrɔbɔli la jamana wɛrɛw la, an be se k’u dɛmɛ cogo di? An be se ka delili kɛ u ye. “Barika be mɔgɔtilennin ka daalili la kosɔbɛ.”—Zaki 5:16.

An be se ka delili kɛ mun koo la? An be se ka Jehova deli a ka jagwɛlɛya di an balimaw ma ani a k’u dɛmɛ u kana siran (Ezayi 41:10-13). An fana be se ka delili kɛ faamanw ye walisa u ka sɔn an ka waajuli baara ka kɛ, “waasa an ka se ka to ɲasuma ni hɛrɛ la.”—1 Tim. 2:1, 2.

Tuma min na Piyɛri ni Pol tun be kɔrɔbɔli la, kerecɛn fɔlɔw ye delili kɛ u ye. U yɛrɛ y’u tɔgɔw fɔ u ka deliliw la (Kɛw. 12:5; Ɔrɔm. 15:30, 31). An balima minw be kɔrɔbɔli la bi, hali n’an t’u bɛɛ tɔgɔw lɔn, an be se k’u ka kafo, u ka jamana wala u ka dugu tɔgɔ weele.