Tuma min na Yezu tun be dugukolo kan, a y’a fɔ ka gwɛ ko: “I k’i baa n’i faa boɲa.” (Ɛkiz. 20:12; Mat. 15:4). Yezu y’o fɔ ni hakili sigi ye sabu a tun b’a wolobagaw “boɲa kosɔbɛ” a kanbele tuma na (Luka 2:51). A tun ye baliku ye tuma min na, a ye labɛn kɛ walisa a bamuso ka ladon ale saya kɔ.—Zan 19:26, 27.

Bi fana, ni kerecɛn kanbelew ni sunguruw be mɛnni kɛ ani u be kuma u wolobagaw fɛ yɛrɛtɛ, u b’a yira k’u b’u bonya. Cikan min ko an k’an wolobagaw bonya, a sanga tɛ ben ka ye. Hali n’u kɔrɔla, an ka ɲi ka to ka hakili ɲini u fɛ. O b’a yira ko an b’u bonya (Talenw 23:22). An b’a yira fana ko an b’u bonya n’an b’an janto u dusukunnataw la ani k’u mako wasa wariko ta fan fɛ (1 Tim. 5:8). An ye kanbele, sunguru wala mɔgɔkɔrɔba ye wo, n’an bɛɛ b’a fɛ k’an wolobagaw bonya, an ka ɲi ka kumaɲɔgɔnya ɲuman kɛ n’u ye.

VIDEWO NIN FILƐ: NE KA ƝI KA KUMA N’ WOLOBAGAW FƐ COGO DI? O KƆ, ƝININGALI NUNU JAABI:

• Mun na a be se ka gwɛlɛya i ma ka kuma n’i wolobagaw ye?

• I be se k’i wolobagaw bonya cogo di n’i be kumana n’u ye?

• N’i b’i jija ka kuma n’i wolobagaw ye, mun na o tɛ fuu ye? (Talenw 15:22).