Musa ka sariya tun b’a fɔ ko ni mɔgɔ dɔ b’a fɛ k’a ka furu sa, a tigi ka kan ka furusasɛbɛ kɛ. O sariya kuun tun ye ka mɔgɔw bali u k’u ka furu sa joona joona. Nka Yezu ka wagati la, diinan kuntigiw y’a kɛ mɔgɔ be se k’a ka furu sa cogo nɔgɔman na. Cɛɛw tun be se k’u muso furu sa kuun sifa bɛɛ la (Kunnafoni kuma nin koo la, Marika 10:4 kɔnɔ: “furusasɛbɛ.” A be sɔrɔ nwtsty kɔnɔ. Kunnafoni kuma nin koo la, Mariki 10:11 kɔnɔ: “O tigi be kakalaya kɛ, a b’a muso fɔlɔ hakɛ ta.” A be sɔrɔ nwtsty kɔnɔ). Yezu y’a yira ko Jehova lo ye furuko latigɛ ani k’a juu sigi (Mariki 10:2-12). Cɛɛ n’a muso ka ɲi ka kɛ farisogo kelen ye ani u ka furu ka ɲi ka kɛ furututuko ye. Bibulu kɔnɔ, koo kelenpe min be se k’a to furu be sa, Matiyo ka kitabu b’a fɔ k’o ye “ɲamɔgɔya” lo ye.—Mat. 19:9.

Bi, mɔgɔ caaman tɛ furu jati i ko Yezu tun b’a jati cogo min na. U b’a jati i ko Fariziɲɛw. Duniɲamɔgɔw be sin k’u ka furu sa ni gwɛlɛya dɔ b’u kan. Nka kerecɛn furuninw ye dajuru min ta u furulon na, u b’o ta sɔbɛ la ani u b’u seko bɛɛ kɛ ka Bibulu ka sariyakolow sira tagama walisa ka see sɔrɔ gwɛlɛyaw kan. Videwo nin filɛ: Kanuya ni ɲɔgɔnbonya be na ni bɛɛn ye denbaya kɔnɔ. O kɔ, ɲiningali nunu jaabi:

• I be se ka Talenw 15:1 ka kumaw labato cogo di i ka furu kɔnɔ ani mun na o kɔrɔtanin lo?

• Talenw 19:11 be se k’i dɛmɛ cogo di k’i yɛrɛ tanga gwɛlɛyaw ma?

• N’i ka furu be ɲini ka sa, sanni i ka miiri ko “Yala n’ ka ɲi ka n’ ka furu sa wa?” i ka ɲi k’i yɛrɛ ɲininga mun ni mun lo la?

• Matiyo 7:12 be se k’i dɛmɛ cogo di ka kɛ furucɛ wala furumuso ɲuman ye?