Komi Yezu ye kumaɲɔgɔnya daminɛ ni Samarika muso dɔ ye, o b’a yira an na ko a tun labɛnnin lo ka waajuli kɛ sababu dɔ sen fɛ. Mun lo be se k’an dɛmɛ ka mɔgɔ dɔ waaju sababu dɔ sen fɛ hali n’an t’a tigi lɔn?

• I bena mɔgɔ minw kunbɛn, koow kɛ teriya la n’u ye ani kuma u fɛ. Hali ni Yezu tun sɛgɛnnin lo, a ye jii dali walisa ka kumaɲɔgɔnya daminɛ dɔrɔn. O la, walisa k’a daminɛ, i be se ka foli kɛ ni ninsɔndiya ye. O kɔ, ni saan ɲɛɛ man ɲi wala n’a ɲɛɛ ka ɲi, i be se ka basigi o kan ka baro daminɛ. I be se ka kuma koo dɔw la minw kɛra a ma mɛɛn. A to i hakili la ko a kuun ye ka kumaɲɔgɔnya daminɛ dɔrɔn. O la, koo o koo be se k’a to a tigi b’a mako don, kuma o koo la. N’a m’i jaabi, o tɛ foyi tiɲɛ. A ɲini ka kuma ni mɔgɔ wɛrɛ ye. Jehova deli a ka jagwɛlɛya d’i ma.—Neemi 2:4; Kɛw. 4:29.

• Sababu ɲini ka kibaro diiman fɔ, nka kana kɔrɔtɔ. Kana a tigi waajibiya a be kuma. N’i kɔrɔtɔra, n’a sɔrɔ i bena a tigi degun ani baro tɛna taga ɲɛ. Ni baro banna ani i ma se k’a tigi waaju, kana i jigi tigɛ. N’i b’a miiri ko i bena siran ka kuma kibaro diiman koo la, i be se ka baro daminɛ ni mɔgɔw ye dɔrɔn ani i t’a ɲini k’u waaju. [Videwo fɔlɔ yira ani baro kɛ a kan.]

• Sababu ɲini k’a tigi waaju. Cogo di do? Kuma dɔ fɔ a ye i ka lanaya koo la walisa a k’a ɲini ka faamuyali sɔrɔ. Yezu ye kuma kabakoman dɔw fɔ minw y’o muso lasun ka ɲiningali dɔw kɛ. A laban, Yezu y’a daminɛ ka kibaro diiman fɔ walisa k’o muso ka ɲiningaliw jaabi. [Videwo 2nan yira ani baro kɛ a kan. O kɔ, videwo 3nan yira ani baro kɛ a kan.]