K’a ta ɲinan ma, an bena wagati caaman sɔrɔ k’an yɛrɛ labɛn Krista ka saya Hakilijigi lajɛn kama. Ni Hakilijigi lajɛn loon bɛnna loon dɔ ma min tɛ wikɛni ye, Kerecɛnw ka ɲɛnamaya ni waajuli baara lajɛn tɛ kɛ o lɔgɔkun na. Nka, n’a bɛnna wikɛni lo ma, forobakalan ni Kɔrɔsili Sangaso ka kalan tɛ kɛ. Wagati min dira i ma, yala i bena to o b’i nafa wa? I ko a tun be kɛ cogo min saan kɛmɛkulu fɔlɔ la, labɛn dɔw fana ka ɲi ka kɛ o lajɛn kɛrɛnkɛrɛnnin kama (Luka 22:7-13; km 3/15 1). Nka, an kelen kelen bɛɛ ka ɲi k’an dusukunw labɛn o lajɛn kama. An be se k’o kɛ cogo di?

• Miiri k’a filɛ fɛɛn min kama a kɔrɔtanin lo i ka taga o lajɛn na.—1 Kor. 11:23-26.

• Delili kɛ ani jɛnɲɔgɔnya min be ele ni Jehova cɛ, miiri k’a filɛ o be cogo min na.—1 Kor. 11:27-29; 2 Kor. 13:5.

• Barokun minw b’a ɲɛfɔ fɛɛn min kama Hakilijigi lajɛn kɔrɔtanin lo, an be se k’u kalan ani ka miiri u kan.—Zan 3:16; 15:13.

Bibulu kalan porogramu dɔ labɛnna Hakilijigi lajɛn kama ani a be sɔrɔ “Examinons les Écritures chaque jour” kɔnɔ. Weleweledala dɔw be basigi o kan ka Bibulu kalan ani ka miiri a kan. Bibulusen minw be sɔrɔ jukɔrɔ tablo kan, dɔw fana be basigi o kan ka Bibulu kalan. Kɔrɔsili Sangaso ka barokun minw be kuma hakili jigi lajɛn koo la ani minw b’a ɲɛfɔ Jehova ni Yezu ye kanuya min yira an na, dɔw fana b’u lajɛ. I mana basigi fɛɛrɛ o fɛɛrɛ kan, an jigi b’a la ko o bena i dɛmɛ i k’i magwɛrɛ Jehova n’a Dencɛ la kosɔbɛ.