Jaaw ni videwow be se ka mɔgɔ lasun ka mɛnni kɛ. A tigi ye min kalan, jaaw ni videwow be se k’a dɛmɛ fana k’o faamu ani k’a hakili to o. Jehova ye an Kalanbaga ye min ɲɔgɔn tɛ yen. A ye baara kɛ ni filɛlifɛnw ye walisa ka mɔgɔw kalan koo kɔrɔtaninw na (Zɛnɛzi 15:5; Zer. 18:1-6). Karamɔgɔba Yezu y’o lo kɛ fana (Mat. 18:2-6; 22:19-21). Kabi saan damanin, filɛlifɛn min ye sanga sɔrɔ kosɔbɛ, o ye videwow lo ye. Yala i be baara kɛ bɛrɛbɛrɛ ni videwow ye n’i be i ka Bibulu kalandenw kalanna wa?

Videwo deen tan labɛnna walisa k’an dɛmɛ ka kitabunin nin ka kalansenw lajɛ ni mɔgɔw ye: Kibaro diiman min bɔra Ala yɔrɔ. Ɲiningali dɔw sɛbɛra ka fin o kitabunin kɔnɔ ani tuma caaman na, videwo kelen kelen bɛɛ be taga ɲɔgɔn fɛ n’o kitabunin ka ɲiningali dɔ ye. N’an b’o kitabunin lajɛra an ka telefɔni wala tablɛti kan, yɔrɔ dɔ labɛnna walisa k’a yira an na tuma min na an be se k’o videwo kelen kelen bɛɛ yira kalanden na. Videwo wɛrɛw be yen fana minw be se k’an dɛmɛ ka mɔgɔw kalan n’an ka kalankɛminan caaman wɛrɛ ye.

Yala i be barokun dɔ lajɛra min faamuyali be se ka gwɛlɛya i ka Bibulu kalanden ma wa? Wala gwɛlɛya tigitigi dɔ b’i ka Bibulu kalanden kan wa? Videwo dɔw yaala jw.org^® kan ani JW Telewisɔn^® na minw bena i ka kalanden nafa. N’a sɔrɔ ele n’i ka kalanden be se k’o videwow dɔ filɛ ɲɔgɔn fɛ ani ka baro kɛ a kan.

Kalo o kalo, videwo kuraw be bɔ. N’i b’u filɛra, miiri k’a filɛ i be se ka baara kɛ n’u ye cogo min na n’i be mɔgɔw kalanna.