Ni mɔgɔ dɔ gwɛnna ka bɔ kafo kɔnɔ, o be kafo latanga ani o be kɛ kololi ye kojugukɛla ma min tɛ nimisa a ka jurumuw na (1 Kor. 5:6, 11). Ni Jehova ye mɔgɔ dɔ kolo o cogo la ani an be sɔn o ma, an b’an ka kanuya yira. O be se ka kɛ cogo di hali k’a sɔrɔ ni mɔgɔ dɔ gwɛnna ka bɔ kafo kɔnɔ, a somɔgɔw ani diinan mɔgɔkɔrɔ minw ye ɲɔgɔnye kɛ n’a ye, o b’u bɛɛ dusu kasi?

O be se ka kɛ sabu min yɛrɛ kɔrɔtanin lo, o ye ko an b’a yira ko an be Jehova kanu, ko an t’a fɛ a tɔgɔ ka nɔgɔ, ani an b’a yira ko fɛɛn minw saniyanin lo a ɲɛɛ kɔrɔ, o lo ka di an ye (1 Piyɛri 1:14-16). An b’a yira fana ko mɔgɔ min gwɛnna ka bɔ kafo kɔnɔ, an b’ale fana kanu. N’u ye mɔgɔ dɔ kolo bɛrɛbɛrɛ, tiɲɛn lo k’o be mɔgɔ dusu kasi. Nka kɔfɛ, a “nafa ye hɛrɛ ni tilenninya ye.” (Eburuw 12:5, 6, 11). Mɔgɔ min gwɛnna ka bɔ kafo kɔnɔ wala mɔgɔ min y’a yɛrɛ mabɔ kafo la, n’an be jɛn n’a ye, an b’a yira ko an ma sɔn Jehova ka kololi ma. A to i hakili la ko Jehova b’a sagokɛlaw kolo k’a dama kɛɲɛ (Zer. 30:11). N’an be sɔn Jehova ka kololi ma, ani ka kɛ ni delinanko ɲumanw ye Alako ta fan fɛ, an b’a yira o cogo la ko an jigi b’a la k’o tigi bena kɔsegi an Faa kanutigi Jehova ma.—Ezayi 1:16-18; 55:7.

VIDEWO NIN FILƐ: TO KANTIGIYA LA NI DUSUKUN KELEN YE. O KƆ, ƝININGALI NUNU JAABI:

• Dusukasi juman lo be kerecɛn bangebagaw kan n’u deen dɔ y’a kɔɔ di Jehova ma?

• Kafomɔgɔw be se ka somɔgɔ kantigiw dɛmɛ cogo di?

• Bibulu ka maana juman lo b’a yira ko ka kantigiya kɛ Jehova ye, o kɔrɔtanin lo ka tɛmɛ ka kantigiya kɛ an somɔgɔw ye?

• An be se k’a yira cogo di ko an be kantigiya kɛ Jehova ye ka tɛmɛ an somɔgɔw kan?