KERECƐNW KA ƝƐNAMAYA
A ɲini k’i ka waajuli kɛcogo fisaya: Waajuli kɛ telefɔni sababu fɛ
MUN NA A KƆRƆTANIN LO: Ka waajuli kɛ telefɔni sababu fɛ, o ye fɛɛrɛ jɔnjɔn dɔ lo ye ka ‘kibaro diiman fɔ mɔgɔw ye.’ (Kɛw. 20:24) *. O fɛɛrɛ b’a to an be se ka mɔgɔw waaju ni koo dɔw kosɔn an tɛ se k’u ye ka kuma u fɛ.
A KƐCOGO:
-
I yɛrɛ labɛn: Barokun dɔ sugandi min bɛnnin lo. O kɔ, i bena min fɔ, a miiriya jɔnjɔnw sɛbɛ. I be se fana ka hakilinata surun dɔ labɛn walisa k’a tigi welekun fɔ n’i benna repɔndɛri kan. I ye min sɛbɛ, a ka fisa o ni minan dɔw ka to i bolo kɔrɔ, i n’a fɔ i ka telefɔni wala i ka tablɛti, JW Library® be min kɔnɔ, wala i be se ka taga jw.org® kan ni min ye.
-
I hakili sigi: Kuma i yɛrɛ kumacogo la. Yɛlɛmisɛn kɛ ani i fari lamaga i n’a fɔ i tun b’a tigi ɲɛɛ kɔrɔ. Kana i ka kuma tigɛtigɛ gwansan. A ka fisa i ka kɛ ni balima wɛrɛ ye. Ni lamɛnnikɛla ye ɲiningali kɛ, o ɲiningali fɔ ni kaanba ye walisa o balima ka se k’i dɛmɛ k’a jaabili sɔrɔ.
-
Viziti kura juu sigi: N’a tigi y’a mako don, i be se ka ɲiningali dɔ kɛ ani k’a fɔ a ye ko i bena a weele siɲɛ wɛrɛ k’o jaabi. A tigi ɲininga n’i be se k’an ka gafe dɔ ci a ma e-mail sababu fɛ, wala ni ele wala mɔgɔ wɛrɛ be se ka taga a di a ma. Wala a ɲininga n’i be se ka SMS ci a ma wala n’i be se ka videwo wala barokun dɔ ci a ma e-mail sababu fɛ. N’a bɛnnin lo, an ka site web yɔrɔ dɔ kofɔ a tigi ye wala a fɔ a ye ko a be se ka bibulukalan kɛ jw.org kan.
^ dakun 3 N’a bɛnnin lo ka waajuli kɛ telefɔni sababu fɛ i ka mara la, i ka ɲi k’o kɛ ka kɛɲɛ ni sariya be min fɔ mɔgɔ wɛrɛ ka kunnafoniw mara koo la.
