An be to ka tile saba lajɛnba minw kɛ saan o saan, mun na u ka di an ye kosɔbɛ? I ko Israɛldenw ka tile la, tile saba lajɛnbaw ka teli ka sababu di an ma ka fara an balima caamanba kan walisa ka Jehova bato. Kalan diiman minw be kɛ yen, ani an be wagati diiman minw kɛ n’an teriw ani an somɔgɔw ye, o bɛɛ ka di an ye kosɔbɛ. O lajɛnbaw ka di an ye kosɔbɛ fɔɔ an t’a fɛ ka fɔn u loon si la.

Ni sababu dira an ma ka jɛn n’an balimaw ye, an kana miiri an yɛrɛ nafa dɔrɔn na, nka an k’a filɛ an be se ka kanuya yira tɔɔw la cogo min na (Gal. 6:10; Eburuw 10:24, 25). N’an be daa yɛlɛ an balimaw ye, wala an mako be sigiyɔrɔ daa min na, n’an b’o dɔrɔn lo mara, an b’a yira ko an be tɔɔw ka nafa ɲini (Filip. 2:3, 4). Lajɛnbaw be sababu ɲuman di an ma ka teri kuraw sɔrɔ. An tɛ mɔgɔ minw lɔn, an be se k’a latigɛ ka baro kɛ n’u ye. An be se k’o kɛ sanni lajɛnba ka daminɛ, lajɛnba bannin kɔ, ani dumuni kɛtuma na (2 Kor. 6:13). An be teri minw sɔrɔ o lajɛnbaw la, o teriya be se ka mɛɛn fɔɔ abada! Min yɛrɛ kɔrɔtanin lo, o ye ko minw b’an kɔrɔsi, n’u y’a ye ko kanuya sɔbɛ b’an cɛ, u be se k’a latigɛ ka na fara an kan ka Jehova bato.—Zan 13:35.

VIDEWO NIN FILƐ: ‘KANUYA TƐ BAN FEWU’! LAJƐNBA MINW LABƐNNA JAMANA CAAMAN KAMA. O KƆ, ƝININGALI NUNU JAABI:

• Saan 2019 la, balima minw bɔra jamana wɛrɛw la ka taga lajɛnbaw la, mɔgɔw ye kanuya yira u la cogo di?

• Bɛɛn ni kanuya min be Jehova sagokɛlaw cɛ, mun na o be mɔgɔ kabakoya ten?

• Koow Ɲɛnabɔla Jɛnkulu mɔgɔw kumana kanuya wale jumanw lo koo la?

• Cogo juman na kerecɛn kanuya ye balimaw dɛmɛ ka see sɔrɔ Alemaɲi ani Kore Worodugu fan fɛ?

• An ka ɲi k’an cɛsiri ka mun lo kɛ?