Bibulu b’a fɔ an ye ko an balima kerecɛn minw kɔrɔla, an k’olu jati an bamusow wala an faaw ye ani minw ma kɔrɔ, an k’olu jati an kɔrɔw wala an dɔgɔw ye (1 Timote 5:1, 2 kalan). Balimacɛw yɛrɛ lo ka ɲi ka danbe ni bonya la balimamusow kan.

Balimacɛ dɔ man kan ka jarabikow kɛ ni balimamuso dɔ ye min t’a muso ye wala ka koo dɔ kɛ min bena maloya bila a la (Zɔbu 31:1). Balima min ma furu, a man kan ka koow kɛ cogo dɔ la min b’a to balimamuso dɔ b’a miiri ko a jarabinin lo a la ani ko a b’a fɛ ka teriya kɛ n’a ye furu kama.

Ni balimamuso dɔ ye diinan mɔgɔkɔrɔw ɲininga koo dɔ la, wala n’a ye koo dɔ fɔ u ye u ka ɲi ka min ɲɛnabɔ, u ka ɲi k’u mako don o balimamuso la cogo bɛnnin na. Cɛɛ tɛ balimamuso minw fɛ k’u latanga, diinan mɔgɔkɔrɔw ka ɲi k’u janto olu la kosɔbɛ.—Ruti 2:8, 9.

VIDEWO NIN FILƐ: KANUYA KANTIGIMAN YIRA BALIMA NUNU NA: FIRIYAMUSOW ANI MINW TƐ N’U FACƐ YE. O KƆ, ƝININGALI NUNU JAABI:

• Kafo balimaw y’a yira balimamuso Myint la cogo di ko u b’a kanu kosɔbɛ?

• Kafo balimaw ye kanuya min yira a la, o kɛra seereya ɲuman ye cogo di dugumɔgɔw fɛ?

• Kafo balimaw ye kanuya min yira balimamuso Myint la, o ye mun lo kɛ a denmusow la?

Balimamuso minw b’i ka kafo kɔnɔ, i be se k’a yira cogo tigitigi jumanw na ko i b’i janto u la?