N’u ko teri, o ye mɔgɔ dɔ ye min be “nɔrɔ mɔgɔ wɛrɛ la sabu a koo ka di a ye ani a b’a bonya.” Misali la, Zonatan ni Dawuda y’a daminɛ ka teriya sɔbɛ kɛ ni ɲɔgɔn ye tuma min na Dawuda ye Goliyati faga (1 Sam. 18:1). U kelen kelen bɛɛ tun be ni jogo dɔw ye minw y’a to u koo gwɛlɛyara ɲɔgɔn ma. O la, teriya sɔbɛ basiginin be lɔnniya sɔbɛ lo kan. Ka se ka mɔgɔ dɔ lɔn, o ka teli ka wagati ta ani o tɛ ɲɛ jijali kɔ. Nka mɔgɔw be kɛ teriw ye rezo sosiyow kan u kɛtɔ ka yɔrɔ dɔ digi dɔrɔn u ka aparɛyi kan. Mɔgɔw be se k’u ka kumaw labɛn koɲuman ɛntɛrɛnɛti kan ani k’a kɛ mɔgɔw k’u ye cogo wɛrɛ la. O la, a ka nɔgɔ u ma ka tɔɔw lafili walisa u kan’a lɔn u ye mɔgɔ min ye tigitigi. O kama, a ka ɲi an ka miiri koɲuman walisa k’a filɛ an bena sɔn mɔgɔ sifa minw ka kɛ an teriw ye ɛntɛrɛnɛti kan. N’i tɛ mɔgɔ dɔ lɔn ka ɲɛ, i be se ka siran ka ban a ka teriya la ɛntɛrɛnɛti kan sabu i t’a fɛ ka don a gasi la. Nka kana a to o k’i bali. Dɔw yɛrɛ y’a latigɛ k’u tɛna baara kɛ ni rezo sosiyow ye fewu fewu sabu farati b’o la. Nka, n’i y’a latigɛ ka baara kɛ ni rezo sosiyow ye, i ka ɲi ka mun lo to i hakili la?

VIDEWO NIN FILƐ: BAARA KƐ NI REZO SOSIYOW YE HAKILITIGIYA LA. O KƆ, ƝININGALI NUNU JAABI:

• I ka ɲi ka miiri mun lo la ka sɔrɔ ka mesazi ni fotow ci rezo sosiyow kan?

• Mun na i ka ɲi k’i yɛrɛ kɔrɔsi n’i b’i teriw sugandira ɛntɛrɛnɛti kan?

• An be wagati min kɛ rezo sosiyow kan, mun na an ka ɲi k’o kɛ k’a dama kɛɲɛ?—Efɛz. 5:15, 16.