Dawuda sera ka Goliyati kɛlɛ sabu a y’a jigi la Jehova kan (1 Sam. 17:45). Jehova b’a fɛ k’a ka sebagaya kɛ k’a sagokɛlaw dɛmɛ (2 Til. Kib. 16:9). Sanni an k’an jigi la an yɛrɛ ka setigiya n’an ka lɔnniya kan, an be se k’a yira cogo di ko an b’an jigi la Jehova lo kan walisa a k’an dɛmɛ? Fɛɛrɛ saba ye nin ye:

• Delili kɛ tuma o tuma: Kana Jehova deli dɔrɔn walisa a k’i ka jurumuw yafa, nka a deli fana walisa a ka fanga d’i ma i ka see sɔrɔ kɔrɔbɔliw kan (Mat. 6:12, 13). Kana Jehova deli dɔrɔn ko i ye desizɔn minw ta ka ban a k’u ɲɛɛ i bolo. Nka sanni i yɛrɛ ka desizɔn dɔ ta, a deli a k’i ɲɛminɛ ani ka hakilitigiya d’i ma.—Zaki 1:5.

• To ka Bibulu kalan ani k’a sɛgɛsɛgɛ: Bibulu kalan loon o loon (Zab. 1:2). I be min kalan Bibulu kɔnɔ, miiri o kan. Ani i ye kalan minw sɔrɔ, u sira tagama (Zaki 1:23-25). I yɛrɛ labɛn waajuli kama sanni k’i bolo la i yɛrɛ ka lɔnniya kan. Kɔn k’i yɛrɛ labɛn lajɛnw kama walisa ka nafa sɔrɔ u la bɛrɛbɛrɛ.

• Jehova ka ɔriganisasiyɔn ka cikanw labato: Jehova ka ɔriganisasiyɔn be cikan kura minw di, a ɲini k’u lɔn ani u sira tagama joona joona (Nɔnb. 9:17). Mɛnni kɛ diinan mɔgɔkɔrɔw fɛ n’u be cikanw ani ladiliw dira i ma.—Eburuw 13:17.

VIDEWO NIN FILƐ: KUUN T’A LA AN KA SIRAN KƆRƆBƆLIW ƝƐ. O KƆ, ƝININGALI NUNU JAABI:

• Mun lo ye siranya bila balimaw na?

• Mun lo y’u dɛmɛ ka see sɔrɔ u ka siranya kan?