Yanni dɔɔni, Jehova tɛna muɲu duniɲa juguman nin kɔrɔ tugun. Ngalon diinanw bena halaki, jamanaw lajɛnni bena wuli Ala sagokɛlaw kama, ani Jehova bena mɔgɔjuguw halaki Arimagedɔn kɛlɛ la. Kerecɛnw kɔrɔtɔnin lo o koobaw ka kɛ.

Tiɲɛn lo ko an tɛ ni kunnafoniw bɛɛ ye tɔɔrɔba koo la. Misali la, an t’a lɔn o bena daminɛ loon min na tigitigi. An t’a la lɔn fɛɛn min kama politikimɔgɔw bena wuli ngalon diinanw kama. Tuma min na jamanaw lajɛnnin bena wuli Ala sagokɛlaw kama, an t’an lɔn min bena kɛ ani o bena wagati min ta. An t’a lɔn fana Jehova bena tɛmɛ fɛɛn minw fɛ tigitigi ka mɔgɔjuguw halaki Arimagedɔn kɛlɛ la.

Nka, an mako be kunnafoni minw bɛɛ la walisa ka jagwɛlɛya ni jigisigi sɔrɔ o koo nataw kama, o bɛɛ be sɔrɔ Bibulu kɔnɔ. Misali la, an b’a lɔn ko an be “laban tuma” laban wagati lo la (2 Tim. 3:1). Tuma min na politiki jɛnkuluw bena wuli diinanw kama k’u kɛlɛ, o wagati bena surunya walisa u kana tiɲɛn diinan halaki (Mat. 24:22). An b’a lɔn ko Jehova bena a ka jama kisi (2 Piyɛri 2:9). Ani an b’a lɔn ko Jehova ye Tigi min sugandi walisa ka mɔgɔjuguw halaki ani ka jamaba kisi Arimagedɔn kɛlɛ la, a Tigi tilennin lo ani fanga b’a la.—Yirali 19:11, 15, 16.

Koo minw bena kɛ sini ma, o bena mɔgɔw jaa tigɛ kosɔbɛ, siga t’o la. Nka, Jehova y’a sagokɛlaw kisi cogo min na galen, ani a ye min fɔ an ye siniɲasigi koo la, n’an miirila o la, an bena se ka ‘an kuun kɔrɔta ka an ɲɛɛ lawuli san fɛ,’ sabu an lanin b’a la ko an kisili wagati surunyana.—Luka 21:26, 28.