Balimaw be baaraba lo kɛ walisa ka barokɛcogo modɛliw labɛn an ye. Ani, balima caaman y’a ye ko n’u be baara kɛ n’o barokɛcogo modɛliw ye u ka kafo ka kiinw kɔnɔ, u be sanga sɔrɔ u ka waajuli baara la. Nka, mɔgɔw ka koow cogoya tɛ kelen ye duniɲa yɔrɔ bɛɛ la. O kama waajuli kɛtɔ, weleweledalaw be se ka koow kɛ cogo wɛrɛ la wala u be se ka barokun wɛrɛ sugandi min bena diya mɔgɔw ye u ka mara la. Nka ni kanpaɲi kɛrɛnkɛrɛnnin lo, cikan minw dira kanpaɲi koo la, bɛɛ ka kan ka tugu o cikanw kɔ. An ka laɲinita ye ka Yezu ka cikan labato o min ye ka Masaya kibaro diiman fɔ mɔgɔw ye.—Mat. 24:14.

Ni weleweledalaw be kalan dɔ kɛra lajɛn na, barokun min be sɔrɔ barokɛcogo modɛli la an ka Lajɛnsɛbɛ kɔnɔ, u ka ɲi ka basigi o lo kan. Nka ɲiningali, vɛrise, ɲiningali minw labɛnna viziti kura kama, wala waajuli be kɛra koo min sen fɛ, u be se k’o yɛlɛma fɔɔ ni cikan wɛrɛ dira o koo la. O la, cikan minw tun dira saan 2020 zuwɛnkalo ka Lajɛnsɛbɛ ɲɛɛ 8nan na, yɛlɛmani dɔɔni donna u la.