KERECƐNW KA ƝƐNAMAYA
Balimaw dɛmɛcogo, balawo kɛnin kɔ
Bi bi nin na, balawokow ka teli ka kɛ. Balawo cunna minw kan, walisa k’u dɛmɛ an ka ɲi ka labɛnw kɛ koɲuman. O lo kama, koow ɲɛnabɔla jɛnkulu ye labɛnw kɛ walisa tɔnbolo kelen kelen bɛɛ kɔnɔ, kɔmite dɔ ka sigi min be dɛmɛ don kasara yɔrɔw la.
Ni o kɔmite balimaw y’a mɛn ko balawo kɛra yɔrɔ dɔ la, u be kaan bɔ joona joona o yɔrɔ diinan mɔgɔkɔrɔw ma walisa k’a lɔn balimaw mako be dɛmɛ min na. Tiɲɛni minw kɛra, n’o juguyara kosɔbɛ fɔɔ o yɔrɔ balimaw tɛ se k’o koo ɲɛnabɔ u yɛrɛ ma do? O koo ɲɔgɔn na, u ka tɔnbolo bena kaan bɔ balima dɔw ma minw b’o baara ɲɛɛ lɔn ka ɲɛ walisa u k’u ɲɛminɛ. Tuma dɔw la, o balimaw b’a ɲini balima wɛrɛw fɛ u ka na u dɛmɛ wala u ka fɛɛn tigitigi dɔw di k’u dɛmɛ. Tuma dɔw la fana, o balimaw be fɛɛn dɔw san o yɔrɔ la ani k’o tilan tilan kasaratɔw ye.
Nafa caaman b’a la ka koow kɛ o cogo la. O b’a to balimaw t’u yɛrɛ sɛgɛn ka baara gwansan kɛ, koow tɛ kɛ cogo ferekenin na ani baarakɛminanw ni wari tɛ tiɲɛ gwansan. O lo ka teli ka kɛ ni balima dɔw be wuli ka koow kɛ u yɛrɛ ma.
Tɔnbolo ye balima minw sugandi, olu be se ka jatiminɛ kɛ k’a filɛ u mako bena kɛ wari ani baarakɛla hakɛ min na walisa ka dɛmɛ don kasara yɔrɔ la. O balimaw be se ka kaan bɔ o yɔrɔ faamanw ma fana sabu tuma caaman na faamanw be se k’an ka baara nɔgɔya an ma. O kama ni sira ma di i ma, sabari kana a bɔ i yɛrɛ la ka bolomafara minɛ balimaw fɛ, ka fɛɛn dɔw ci kasaratɔw ma wala k’i seen fa ka taga balawo kɛra yɔrɔ min na.
Nka ni balawo cunna an balimaw kan, an b’a fɛ k’u dɛmɛ (Eburuw 13:16). An b’u kanu! O la, an be se k’u dɛmɛ cogo di? Min kɔrɔtanin lo kosɔbɛ, o ye ko balawo cunna balima minw kan ani minw tagara u dɛmɛ, an ka delili kɛ u ye. Baara min be kɛ duniɲa kuru bɛɛ kɔnɔ, an be se fana ka nili kɛ walisa ka dɛmɛ don o la. Tɔnbolo balimaw b’a lɔn ka ɲɛ yɔrɔ minw na balimaw mako b’o niliw la kosɔbɛ. Koow ɲɛnabɔla jɛnkulu lo be cikanw di tɔnbolo balimaw ma o koo la. N’an b’a fɛ k’an yɛrɛ di ka dɛmɛ don kasara yɔrɔw la, an be se ka demandi DC-50 dafa (Demande d’admission comme volontaire local de développement-construction).
VIDEWO NIN FILƐ: SANJIBA DƆ YE TIƝƐNI KƐ BEREZIL JAMANA NA. O KƆ, ƝININGALI NIN JAABI:
Tuma min na sanjiba ye tiɲɛni kɛ Berezil jamana na saan 2020, Jehova Seerew ye min kɛ k’u balimaw dɛmɛ, mun lo b’i kabakoya o la?
