KABAKURU dɔ be sɔrɔ Zeruzalɛmu dugu ka mize dɔ kɔnɔ (Musée des pays de la Bible). U ye fɛɛn dɔ sɛbɛ o kabakuru kan saan 700 ni saan 600 cɛ ka kɔn Krista tile ɲɛ. Sɛgɛsɛgɛrikɛlaw y’o kabakuru sɔrɔ kuluwo dɔ kɔnɔ, mɔgɔw suu tun be don yɔrɔ min na. O yɔrɔ man jan ni Eburɔn dugu ye, Israɛl jamana na. A sɛbɛnin b’o kabakuru kan ko: “Kagav dencɛ Kagaf danganin lo Yahweh Sabawo tɔgɔ la.” O kumaw b’a yira cogo di ko Bibulu kɔnɔkow ye tiɲɛn ye? O b’a yira ko Ala tɔgɔ Jehova min be sɛbɛ Eburukan sɛbɛcogo la ko YHWH, o tɔgɔ tun lɔnnin lo kosɔbɛ Bibulu sɛbɛwagati la ani mɔgɔw tun b’o fɔ loon o loon. Sɛbɛri wɛrɛw yera o kuluwo kɔnɔ minw b’a yira ko mɔgɔ minw tun be lajɛn wala ka dogo yen, olu tun be Ala tɔgɔ sɛbɛ tuma o tuma. Ala tɔgɔ be sɔrɔ tɔgɔ minw na, u dɔw tun be kogow kan.

Profesɛri Rachel Nabulsi be baara kɛ Zɔrizi ka inivɛrisite la. Ale ko: “Ala tɔgɔ min be sɛbɛ ko YHWH, o be sɔrɔ o sɛbɛriw kɔnɔ siɲɛ caaman. O b’an kalan koo caaman na. . . . O b’a yira ko tɔgɔ min be sɛbɛ ko YHWH, o tigi koo tun ka gwɛlɛ mɔgɔw ma Israɛl ani Zuda jamana na.” O b’a yira fana ko Bibulu kɔnɔkow ye tiɲɛn ye. Ala tɔgɔ min be sɛbɛ Eburukan sɛbɛcogo la ko YHWH, o be sɔrɔ Bibulu kɔnɔ siɲɛ waa caaman. Ala tɔgɔ tun ka teli ka sɔrɔ mɔgɔ caaman tɔgɔw kɔnɔ.

Kabakuru min be Zeruzalɛmu mize kɔnɔ, kuma minw sɛbɛra a kan ko “Yahweh Sabawo,” o kumadenw kɔrɔ ko “Kɛlɛbolowtigi Jehova.” O la, a be komi Bibulu sɛbɛwagati la, mɔgɔw tun ka teli ka Ala tɔgɔ fɔ. Nka o dɔrɔn tɛ. Kumaden minw ye ko “Kɛlɛbolowtigi Jehova,” u tun b’o fana fɔ. O kumadenw be sɔrɔ siɲɛ 283 Eburukan sɛbɛninw kɔnɔ. U fanba be Ezayi, Zeremi ani Zakari ka kitabuw lo kɔnɔ.