1. Lajɛnba dɔ la saan 1935, kalan dɔ ye nɔɔ juman lo to kanbelenin dɔ kan?

KANBELE dɔ tun be ni saan 18 ye tuma min na a batizera saan 1926. A bangebagaw tun ye Bibulu Kalandenw ye. O tun ye Jehova Seerew tɔgɔ ye o wagati la. U tun be ni dencɛ saba ani denmuso fila ye. U y’u deenw lamɔ u kɛra Jehova batobagaw ani Yezu Krista ladegibagaw ye. I ko Bibulu Kalandenw fanba o wagati la, o kanbelenin kantigi tun be to ka buru dumu ani ka diwɛn min saan o saan Matigi ka surafana na. Nka, a ka jigiya yɛlɛmana pewu tuma min na a ye forobakalan kɛrɛnkɛrɛnnin nin lamɛn: “Jamaba mɔgɔw.” Balimacɛ Rutherford lo tun y’o kalan kɛ saan 1935 lajɛnba dɔ la Etazini, Wasintɔn dugu la. Bibulu Kalandenw ye mun lo faamu o lajɛnba la?

2. Balimacɛ Rutherford ye tiɲɛnko nafaman juman lo ɲɛfɔ a ka forobakalan na?

² “Jamaba” mɔgɔ minw kofɔra Yirali 7:9 kɔnɔ, balimacɛ Rutherford ka forobakalan na, a y’a ɲɛfɔ o mɔgɔw ye minw ye. Ka kɔn o wagati ɲɛ, Bibulu Kalandenw tun b’a miiri ko jamaba mɔgɔw bena taga sankolo la. Nka, u tun b’a miiri fana k’o mɔgɔw tɛ kantigiya kɛ bɛrɛbɛrɛ i ko kerecɛn mɔlenw. Balimacɛ Rutherford basigira Bibulu kan k’a ɲɛfɔ ko jamaba mɔgɔw ma sugandi walisa ka taga sankolo la. Nka, u ye Krista ka saga dɔ wɛrɛw * lo ye minw bena kisi  “tɔɔrɔba” la ani ka ɲɛnamaya kɛ fɔɔ abada dugukolo kan (Yir. 7:14). Yezu ye layidu ta ko: “Saga dɔ wɛrɛw be ne fɛ minw te wɛɛrɛ nin kɔnɔ. Fɔɔ n ka na n’u ye. U bena na n kaan mɛn. U bɛɛ be kɛ kulu kelen ye, ani dɛndɛbaga kelen u kɔ.” (Zan 10:16). O saga dɔ wɛrɛw ye Jehova sagokɛla kantigiw ye minw ka jigiya ye ka ɲɛnamaya banbali kɛ alijɛnɛ kɔnɔ dugukolo kan (Mat. 25:31-33, 46). An k’a filɛ cogo min na o Bibulu faamuyali kura ye Jehova sagokɛla caaman ka ɲɛnamaya kɛcogo yɛlɛma, i n’a fɔ kanbele min kofɔra dakun fɔlɔ la.—Zab. 97:11; Talenw 4:18.

3-4. Mɔgɔ waa caaman ye mun lo faamu u ka jigiya koo la saan 1935 ka lajɛnba la?

³ Kalan tuma na, wagati dɔ la, kalankɛla y’a fɔ jama ye ko: “Minw bɛɛ jigi b’a la ka ɲɛnamaya kɛ kudayi dugukolo kan, u ka hakɛ to ka wuli ka lɔ.” Mɔgɔ waa mugan ɲɔgɔn lo tun b’o lajɛnba la. Balimacɛ dɔ tun be yen ani a ko mɔgɔ minw wulila ka lɔ, u tun ka ca ni jama tilancɛ ye. O ye jama ninsɔn diya kosɔbɛ. Balimacɛ Rutherford y’a fɔ ko: “A’ y’a filɛ! Jamaba mɔgɔw ye nin ye!” O kɔ, jama ye ninsɔndiya kulekan bɔ. Mɔgɔ minw wulila ka lɔ, u y’a faamu ko u ma sugandi ka taga sankolo la. U tun b’a lɔn ko Jehova ma u mɔ ni hakili senu ye. O loon dugusagwɛ, mɔgɔ 840 batizera ka kɛ Jehova Seerew ye. U fanba tun ye saga dɔ wɛrɛ mɔgɔw ye.

⁴ O forobakalan kɔ, an ye kanbele min kofɔ ka tɛmɛ, ale ni mɔgɔ waa caaman wɛrɛw y’a dabila ka buru dumu ani ka diwɛn min Matigi ka surafana na. Balimacɛ dɔ y’a fɔ ni majigilenya ye ko: “Saan 1935 ka Hakilijigi lajɛn kɔ, n’ ma buru dumu ani ka diwɛn min tugun Matigi ka surafana na. N’ y’a faamu ko n’ ka jigiya tɛ ka taga ɲɛnamaya kɛ sankolo la sabu Jehova m’o yira n’ na a ka hakili senu barika la. Nka, n’ ka jigiya ye ka ɲɛnamaya kɛ dugukolo kan ani ka dɛmɛ don k’a kɛ alijɛnɛ ye.” Balima caaman tun b’o lo miiri fana (Ɔrɔm. 8:16, 17; 2 Kor. 1:21, 22). Kabi o wagati, dɔ farala jamaba mɔgɔw hakɛ kan ani u be jɛn ka baara kɛ ni kerecɛn mɔlen tɔɔw ye. *

5. Minw tun be buru dumu ani ka diwɛn min Hakilijigi lajɛn na, nka u y’o dabila, Jehova be mun lo miiri u koo la?

⁵ Minw tun be buru dumu ani ka diwɛn min, nka u y’o dabila saan 1935 ka Hakilijigi lajɛn kɔ, Jehova be mun lo miiri olu koo la? Bi, Jehova Seere dɔw be buru dumu ani ka diwɛn min ni kɔnɔgwɛ ye Matigi ka surafana na. Nka n’u nana a faamu ko u tɛ kerecɛn mɔlenw ye do? (1 Kor. 11:28). Dɔw tun be buru dumu ani ka diwɛn min sabu u tun m’a faamu u ka jigiya ye min ye. Nka n’u sɔnna a ma ko u filila le, o kɔ, u y’a dabila ka buru dumu ani ka diwɛn min do? N’u tora ka Jehova sago kɛ kantigiya la, siga t’a la, a bena sɔn u ma ani k’u jati saga dɔ wɛrɛ mɔgɔw cɛma. Tiɲɛn lo ko u tɛ buru dumu ani ka diwɛn min Hakilijigi lajɛn na. Nka, u bele be taga o lajɛn na sabu Jehova ni Yezu ye min kɛ u ye, u be u waleɲuman lɔn kosɔbɛ o kosɔn.

6. Yezu ye cii di mɛlɛkɛw ma ko u ka mun lo kɛ?

⁶ Tɔɔrɔba wagati surunyana kosɔbɛ.  O kama, Yirali sapitiri 7nan be min fɔ kerecɛn mɔlenw ani jamaba mɔgɔw koo la, a ka ɲi an k’o lajɛ. Yezu ye cii di mɛlɛkɛw ma ko u ka halakili fɔɲɔ naani siri ka lɔ. A ko u man ɲi k’a to o fɔɲɔw ka fiyɛ dugukolo kan fɔɔ tagamasiɲɛ laban ka la kerecɛn mɔlenw bɛɛ kan. O tagamasiɲɛ kɔrɔ ko Jehova y’a latigɛ ko u ye kantigiw ye (Yir. 7:1-4). Krista balima mɔlenw tora kantigiya la minkɛ, u bena kɛ masacɛw ni sarakalasebagaw ye n’a ye sankolo la (Yir. 20:6). Jehova, Yezu ani mɛlɛkɛw ninsɔn bena diya kosɔbɛ tuma min na mɔgɔ 144 000 nunu bena u ka sara sɔrɔ sankolo la.

7. Ka kɛɲɛ ni Yirali 7:9, 10 ye, Zan ye jɔnw lo ye a ka yelifɛn kɔnɔ ani u tun be mun lo kɛra? (Jaa lajɛ ɲɛɛ fɔlɔ kan.)

⁷ Zan kumana mɔgɔ 144 000 nunu koo la minw kɛra masacɛw ani sarakalasebagaw ye ni Yezu ye. O kɔ, a ye fɛɛn dɔ ye min y’a kabakoya: A ye “jamaba” dɔ ye min kisira Arimagedɔn kɛlɛ la. Jamaba mɔgɔw ka ca kosɔbɛ ni mɔgɔ 144 000 nunu ye ani an t’u daa tigitigi lɔn (Yirali 7:9, 10 kalan). “Fanigwɛ tun b’u kaan na.” O kɔrɔ ko u y’u yɛrɛ tanga Sutana ka duniɲa ka “koo nɔgɔninw bɛɛ ma” ani u ye kantigiya kɛ tuma bɛɛ Ala ani Krista ye (Zaki 1:27). U tun be to k’u kaan kɔrɔta k’a fɔ ko olu kisira Jehova ani Yezu kosɔn, ale min ye Ala ka Sagaden ye. Tenfuraburuw fana tun b’u bolo. O b’a yira ko u sɔnna a ma ko Jehova ye Yezu lo sugandi k’a kɛ Masacɛ ye ani u ninsɔn ka di o kosɔn.—Zan 12:12, 13 lajɛ.

8. Minw be sankolo la, Yirali 7:11, 12 be mun lo fɔ olu koo la?

⁸ Yirali 7:11, 12 kalan. Minw be sankolo la, olu ye mun lo kɛ tuma min na u ye jamaba mɔgɔw ye? Zan y’a ye ko u bɛɛ ninsɔn diyara kosɔbɛ ani u ye barika la Ala ye. Zan ye koo minw ye yelifɛn na, tuma min na u bena dafa, minw be sankolo la, olu bena ninsɔndiya k’a ye ko jamaba mɔgɔw kisira tɔɔrɔba wagati la.

9. Ka kɛɲɛ ni Yirali 7:13-15 ye, jamaba mɔgɔw be mun lo kɛra bi?

⁹ Yirali 7:13-15 kalan. Zan y’a fɔ ko jamaba mɔgɔw “y’u ka faniw ko ka gwɛ Sagaden joli la.” O kɔrɔ ko u be ni dusukun ɲuman ye ani u koo ka di Jehova ye (Ezayi 1:18). U y’u yɛrɛkun di Jehova ma, u batizera ani u limaniyanin lo kosɔbɛ Yezu ka kunmabɔsara koo la. U be jɛnɲɔgɔnya ɲuman kɛra ni Jehova ye fana (Zan 3:36; 1 Piyɛri 3:21). O kama, u koo ka di Ala ye ani u be se “k’a bato . . . suu ni tile” batosoba lukɛnɛ kɔnɔ, o kɔrɔ, dugukolo kan yan. Baara min be kɛra ka Masaya kibaro diiman fɔ ani ka mɔgɔw kɛ Krista ka kalandenw ye, olu lo b’o baara fanba kɛra bi. U kisɛyanin lo o baara la sabu Ala ka Masaya lo y’u ɲɛnako fɔlɔ ye.—Mat. 6:33; 24:14; 28:19, 20.

10. Jamaba mɔgɔw lanin be mun lo la? Layidu juman lo bena dafa u ɲɛɛ na?

¹⁰ Jamaba mɔgɔw kisira tɔɔrɔba la minkɛ, u lanin b’a la ko Ala bena to k’a janto u la sabu “min siginin be masasigilan kan, ale bena u tanga.” Saga dɔ wɛrɛ mɔgɔw tun kɔrɔtɔnin lo layidu min ka dafa, o bena dafa bɛrɛbɛrɛ. O layidu ye ko: “[Ala] bena u ɲaji bɛɛ cɛ. Saya kɔni, o te yen tugu. Mɔgɔ tena sa, mɔgɔ tena kasi, mɔgɔ tena tɔɔrɔ tugu.”—Yir. 21:3, 4.

11-12. a) Ka kɛɲɛ ni Yirali 7:16, 17 ye, jamaba mɔgɔw bena duga jumanw lo sɔrɔ? b) Saga dɔ wɛrɛ mɔgɔw be se ka mun lo kɛ Hakilijigi lajɛn na ani mun lo b’u lasun k’o kɛ?

¹¹ Yirali 7:16, 17 kalan. Bi, Jehova sagokɛla dɔw tɔɔrɔnin lo kɔngɔ bolo sabu  wariko gwɛlɛya wala kɛlɛ b’u ka jamana kɔnɔ. U ye dɔw don kaso la u ka lannakow kosɔn. O bɛɛ n’a ta, minw ye jamaba mɔgɔw ye, olu ninsɔn ka di kosɔbɛ. U ninsɔn ka di sabu u b’a lɔn ko u kisinin kɔ duniɲa juguman nin halaki tuma na, u bena dumuni caaman sɔrɔ k’a dumu tuma bɛɛ. Jehova bena u kalan koo caaman na fana. Tuma min na Jehova bena Sutana ka duniɲa juguman nin halaki, a bena jamaba mɔgɔw kisi a ka dimiya ma, o min be i ko “funteni.” Minw bena kisi tɔɔrɔba wagati la, Yezu bena taga n’olu ye ɲɛnamaya banbali “jii” yɔrɔw la. Miiri k’a filɛ: Jamaba mɔgɔw be ni jigiya ɲuman ye yɛrɛ le! Mɔgɔ miliyari caaman minw bena kisi, n’a sɔrɔ olu tɛna sa abada!—Zan 11:26.

¹² Saga dɔ wɛrɛ mɔgɔw be ni jigiya ɲuman min ye, u be Jehova ni Yezu waleɲuman lɔn o kosɔn! Jehova ma u sugandi walisa u ka taga sankolo la. Nka, a b’u kanu i ko a be kerecɛn mɔlenw kanu cogo min na. Kerecɛn mɔlenw wo, saga dɔ wɛrɛ mɔgɔw wo, u bɛɛ be se ka Ala ni Krista tando. U b’o kɛ cogo minw na, u la dɔ ye ka na Matigi ka surafana na.

13-14. Mun na kerecɛn mɔlen minw be dugukolo kan ani saga dɔ wɛrɛ mɔgɔw bɛɛ ka ɲi ka taga Krista saya Hakilijigi lajɛn na?

¹³ Saan damanin tɛmɛninw na, mɔgɔ minw be na Hakilijigi lajɛn na, mɔgɔ waa kelen kan, mɔgɔ kelen ɲɔgɔn lo be buru dumu ani ka diwɛn min. Kafow fanba kɔnɔ, mɔgɔ si tɛ buru dumu ani ka diwɛn min Hakilijigi lajɛn na. Mɔgɔ minw be na Hakilijigi lajɛn na, u fanba ka jigiya ye ka ɲɛnamaya kɛ dugukolo kan. N’o lo, mun na u be na Matigi ka surafana na? Kuun min kama mɔgɔ be taga a teri ka furu la, o kuun kelen lo kama jamaba mɔgɔw be taga Matigi ka surafana na. Mɔgɔ be taga furu dɔ la walisa k’a yira ko kɔɲɔcɛ ni kɔɲɔmuso koo ka di a ye ani ko a be n’u ye. O cogo kelen na, saga dɔ wɛrɛ mɔgɔw be taga Hakilijigi lajɛn na walisa k’a yira ko u be Krista ni kerecɛn mɔlenw kanu ani ko u be n’u ye. Saga dɔ wɛrɛ mɔgɔw be taga Hakilijigi lajɛn na fana walisa k’a yira ko u be Ala waleɲuman lɔn Yezu ka kunmabɔsara kosɔn. O kunmabɔsara lo  sababu la u bena ɲɛnamaya banbali kɛ dugukolo kan.

¹⁴ Saga dɔ wɛrɛ mɔgɔw be na Hakilijigi lajɛn na kuun kɔrɔtanin wɛrɛ kosɔn: U b’a fɛ ka Yezu ka cikan labato. Tuma min na Yezu ye Matigi ka surafana fɔlɔ dumu n’a ka ciden kantigiw ye, a y’a fɔ u ye ko u ka to k’o kɛ ‘k’u hakili jigi ale la.’ (1 Kor. 11:23-26). O la, ka kerecɛn mɔlen dɔw to dugukolo kan, Matigi ka surafana bena to ka kɛ ani saga dɔ wɛrɛ mɔgɔw bena to ka na a la. U yɛrɛ be mɔgɔ wɛrɛw fana weele ka na fara u kan.

15. An be se ka Ala ni Krista tando cogo di Hakilijigi lajɛn na?

¹⁵ Hakilijigi lajɛn na, sababu dira an ma ka Ala ni Krista tando dɔnkili ani delili la. Kalan min bena kɛ ɲina, o kuun ye ko: “Ala ni Krista ye min kɛ aw ye, aw k’u waleɲuman lɔn o kosɔn!” O kalan bena an dɛmɛ ka Jehova ni Krista waleɲuman lɔn kosɔbɛ. Tuma min na u bena tɛmɛ ni buru ni diwɛn ye, an bena se ka miiri u ye fɛɛn minw tagamasiɲɛ ye, o kɔrɔ, Yezu farisogo n’a joli. O bena an hakili jigi ko Jehova y’a to a Dencɛ nana sa an kosɔn walisa an ka ɲɛnamaya sɔrɔ (Mat. 20:28). An sankolola Faa n’a Dencɛ koo ka di mɔgɔ o mɔgɔ ye, a bena diya o tigi ye ka na Hakilijigi lajɛn na.

16. Kerecɛn mɔlenw ani saga dɔ wɛrɛ mɔgɔw ye kelen ye koo jumanw na?

¹⁶ Kerecɛn mɔlenw ani saga dɔ wɛrɛ mɔgɔw ye kelen ye koo dɔw la. Jehova tɛ u dɔ kanu ka tɛmɛ tɔɔ kelen kan. Kerecɛn mɔlenw wo, saga dɔ wɛrɛ mɔgɔw wo, u bɛɛ koo ka di Jehova ye cogo kelen na. Jehova y’u bɛɛ san sɔngɔ kelen na: A y’a Dencɛ kanulen niin di u bɛɛ kosɔn. Faranfasi min b’o jɛnkulu fila cɛ, o ye ko u tɛ ni jigiya kelen ye. Nka, u bɛɛ ka ɲi ka to kantigiya la Ala ni Krista ye (Zab. 31:24). A to i hakili la ko Jehova tɛ hakili senu di kerecɛn mɔlenw ma ka tɛmɛ saga dɔ wɛrɛ mɔgɔw kan. Jehova be hakili senu di an kelen kelen bɛɛ ma ka kɛɲɛ n’an ka makoya ye.

17. Kerecɛn mɔlen tɔɔw be mun lo makɔnɔna?

¹⁷ Kerecɛn mɔlenw be ni jigiya min ye ka taga sankolo la, u ma wolo n’o ye. Ala lo y’o di u ma. U be miiri u ka jigiya la, ka delili kɛ a koo la ani u kɔrɔtɔnin lo k’u ka sara sɔrɔ sankolo la. U t’a lɔn u farisogo bena kɛ cogo min na yen (Filip. 3:20, 21; 1 Zan 3:2). Nka, u kɔrɔtɔnin lo ka kɛ ni Jehova, Yezu, mɛlɛkɛw ani kerecɛn mɔlen wɛrɛw ye. U kɔrɔnin lo fana ka kɛ masacɛw ni sarakalasebagaw ye Ala ka Masaya kɔnɔ sankolo la.

18. Saga dɔ wɛrɛ mɔgɔw be mun lo makɔnɔna?

 ¹⁸ Saga dɔ wɛrɛ mɔgɔw kɔrɔtɔnin lo ka ɲɛnamaya banbali kɛ dugukolo kan. O lo ye adamadenw bɛɛ ka laɲinita ye (Waaj. 3:11). Wagati min na u bena se ka dɛmɛ don ka dugukolo kuru bɛɛ yɛlɛma k’a kɛ alijɛnɛ ye, u kɔrɔtɔnin lo o wagati ka se. Tuma min na u bena u ka soow lɔ, ka nankɔw tutu ani ka deen dafaninw sɔrɔ, u kɔrɔtɔnin lo o wagati ka se fana (Ezayi 65:21-23). U kɔrɔtɔnin lo ka dugukolo yaala yaala walisa ka kuluw, kongotuw ni bajiw lajɛ ani k’a ɲini ka koo caaman lɔn Jehova ka danfɛnw bɛɛ koo la. Nka, min yɛrɛ b’u ninsɔndiya ka tɛmɛ, o ye ko u be jɛnɲɔgɔnya min kɛra ni Jehova ye, o barika bena to ka bonya.

19. Hakilijigi lajɛn be sababu juman lo di an kelen kelen bɛɛ ma? Ɲina ka Hakilijigi lajɛn bena kɛ loon juman?

¹⁹ Jehova ye jigiya ɲuman di a sagokɛlaw kelen kelen bɛɛ ma (Zer. 29:11). Ala ni Krista ye koo caaman kɛ walisa an ka se ka ɲɛnamaya banbali sɔrɔ. Krista ka saya Hakilijigi lajɛn be sababu di an kelen kelen bɛɛ ma ka Ala ni Krista tando u ka kɛtaw bɛɛ kosɔn. Hakilijigi lajɛn ye lajɛn kɔrɔtaninba ye Jehova Seerew be min kɛ saan o saan. Saan 2021 ta bena kɛ sibirilon, marisikalo tile 27, tile bennin kɔ. Mɔgɔ caaman be yɔrɔ minw na, foyi t’u bali ka na Hakilijigi lajɛn na. Nka kɔrɔbɔli be dɔw kan ani dɔw yɛrɛ be kaso la. O bɛɛ n’a ta, u bɛɛ bena se ka Hakilijigi lajɛn kɛ. Jehova, Yezu, mɛlɛkɛw ani kerecɛn mɔlen minw kununa ka taga sankolo la, a bena diya olu bɛɛ ye k’an filɛ an be Hakilijigi lajɛn kɛra. Kafow, jɛnkuluw ani minw bena kɛ u kelen, an bɛɛ ka Hakilijigi lajɛn diyabɔ!