1, 2. a) N’a fɔra ko Ala be ni ɔriganisasiyɔn ye, dɔw be mun lo fɔ o koo la? b) An bena mun lo lajɛ barokun nin na?

ALA be ni ɔriganisasiyɔn ye wa? Dɔw be se k’a fɔ i ye ko: “I mako t’a la ko ɔriganisasiyɔn dɔ k’i ɲɛminɛ. I mako be min na, o ye ka jɛnɲɔgɔnya teriman kɛ ni Ala ye.” O ye tiɲɛn ye wa? Koow be mun lo yira?

² An bena a ye barokun nin na ko Jehova ye koo labɛnbaga ye min ɲɔgɔn tɛ yen. Jehova ka ɔriganisasiyɔn be cikanw di an ma. An bena a filɛ fana an ka ɲi k’o cikanw ta cogo min na (1 Kor. 14:33, 40). Saan kɛmɛkulu fɔlɔ wagati la ani bi tile la, Jehova sagokɛlaw tugura Bibulu ka ladiliw kɔ ani u sera ka waajuli kɛ bɛrɛbɛrɛ. An be sɔn Bibulu ka fɔta ma ani an be ɔriganisasiyɔn ka cikanw labato. O lo kama, an saniyanin lo ani hɛɛrɛ ni bɛɛn be kafo kuru bɛɛ kɔnɔ.

3. Mun lo b’a to ele lanin b’a la ko Jehova ye koo labɛnbaga ye min ɲɔgɔn tɛ yen?

³ Duniɲa dancogo b’a yira ko Ala ye koo labɛnbaga ye min ɲɔgɔn tɛ yen. Bibulu b’a fɔ ko: “Masaba ye dugukolo  dan ni lɔnniya ye, a ye sankolo kɛ ni hakilitigiya ye.” (Talenw 3:19). An be Ala ka “kɛwalifitini” dɔrɔn le lɔn ani “an be mankan min mɛn, o man bon.” (Zɔbu 26:14). Nka, an be fitinin min lɔn Ala ka danfɛnw koo la, o b’an lasun k’a lɔn k’o sankolola fɛɛnw labɛnnin lo koɲuman (Zab. 8:4, 5). Lolokuluw kɔnɔ, lolo miliyɔn caaman lo be yen ani u bɛɛ n’u ka sira lo. Planɛti minw be tile munumunu, u b’o kɛ ka kɛɲɛ ni sariya dɔw ye. Siga t’a la, Ala ka danfɛnw bɛɛ labɛnnin lo cogo kabakoman na! O b’an dɛmɛ k’a faamu ko an ka kan ka kantigiya kɛ Jehova ye. An ka ɲi k’a tando fana ani k’a bato sabu a ye dugukolo ni “sankolo dan ni hakilitigiya ye.”—Zab. 136:1, 5-9.

4. Mun na lɔnnikɛlaw ma se ka ɲiningali caaman jaabi?

⁴ Lɔnnikɛlaw ye lɔnniya min sɔrɔ duniɲa ni dugukolo koo la, o b’an nafa koo caaman na. Nka, u ma se ka ɲiningali caaman jaabi. Ɲɛyirali fɛ, lɔnnikɛlaw tɛ se k’a fɔ tigitigi duniɲa daminɛna cogo min na. U fana tɛ se k’a fɔ fɛɛn min kama anw, bɛgɛnw ani yiriw be dugukolo kan. Mɔgɔw fanba tɛ se k’a ɲɛfɔ fana fɛɛn min kama adamadenw b’a fɛ ka ɲɛnamaya kɛ fɔɔ abada (Waaj. 3:11). Mɔgɔw be ɲiningali caaman kɛ minw kɔrɔtanin lo. Mun na u t’o jaabili sɔrɔ? Sabu lɔnnikɛlaw ani mɔgɔ caaman b’a fɔ ko Ala tɛ yen. U b’a fɔ ko bɛgɛnw lo yɛlɛma-yɛlɛmana ka kɛ mɔgɔw ye. Ɲiningali minw be hami bila mɔgɔw la yɔrɔ bɛɛ, Jehova y’u jaabi a ka Kitabu kɔnɔ.

5. Cogo juman na an ka ɲɛnamaya basiginin be Ala ka sariyaw kan?

⁵ Jehova ye sariya minw sigi duniɲa kɔnɔ, u tɛ yɛlɛma ani an ka ɲɛnamaya basiginin b’olu lo kan. Dɔgɔtɔrɔw, aviyɔn bolilaw, kuran baarakɛlaw ani bololabaarakɛla wɛrɛw ka ɲi k’o sariyaw labato. Ɲɛyirali fɛ, komi adamadenw farikolo cogoya ye kelen ye, o be dɔgɔtɔrɔw dɛmɛ. U b’a lɔn banabagatɔ dusukun be yɔrɔ min na. O la, Ala ye sariya minw sigi duniɲa kɔnɔ, an bɛɛ b’u labato. N’i y’o dɔ kɔrɔbɔ, i n’a fɔ ka to sanfɛ k’i yɛrɛ fili, i be se k’i niin bila farati la.

6. Mun na, an lanin b’a la ko Jehova b’a fɛ a sagokɛlaw fana ka labɛn?

⁶ Tiɲɛn na, Jehova ka danfɛnw labɛnna cogo kabakoman na. O kama, a man kan ka bari an na ko Jehova b’a fɛ a sagokɛlaw fana ka labɛn koɲuman. O yɛrɛ lo kama Ala ye Bibulu di an ma. N’an tɛ sɔn Ala ka ɔriganisasiyɔn n’a ka cikanw ma, an tɛ se ka hɛɛrɛ ni ninsɔndiya sɔrɔ.

7. Mun lo b’a yira ko Bibulu labɛnna ka ɲɛ?

⁷ Tiɲɛn na, Bibulu ye Ala ka nilifɛn ye min nafa ka bon kosɔbɛ. Lɔnnikɛla dɔw b’a fɔ ko mɔgɔw ye Yahutuw ni kerecɛnw ka sɛbɛ damanin lo fara fara ɲɔgɔn kan ka kɛ Bibulu ye. Nka o tɛ tiɲɛn ye. Bibulu labɛnna ka ɲɛ sabu a kɔnɔkow bɔra Ala yɔrɔ. Kitabu minw b’a kɔnɔ, u tɛ ɲɔgɔn sɔsɔ. A kɔnɔkow be taga ɲɔgɔn fɛ k’a ta Zɛnɛzi fɔɔ ka taga se Yirali la ani barokun kelen lo b’a kɔnɔ: Jehova ka Masabaya bena lafasa ani a sago bena dafa dugukolo koo la a ka Masaya sababu fɛ. Layidu tara “deen” min koo la, o ye Krista ye ani Masaya dira ale lo ma.—Zɛnɛzi 3:15; Matiyo 6:10; Yirali 11:15 kalan.

8. Mun na an be se k’a fɔ ko Israɛldenw tun labɛnnin lo koɲuman?

⁸ Israɛldenw tun ye ɲɛyirali ɲuman ye labɛncogo koo la. Ɲɛyirali fɛ, muso  dɔw tun be “baara kɛ Ɲɔgɔnkunbɛn fanibugu daa la” ani u tun labɛnnin lo o baara kama (Ɛkiz. 38:8). Israɛldenw tun be Ala ka fanibugu minanw cɛ ani k’u ka tagama kɛ cogo labɛnnin na. Kɔfɛ, masacɛ Dawuda ye Levitew ni sarakalasebagaw labɛn cogo ɲuman na k’u tilan jɛnkuluw jɛnkuluw (1 Til. Kib. 23:1-6; 24:1-3). Israɛldenw tun mana kolo Jehova ye, a tun b’u labɛn ani hɛɛrɛ ni bɛɛn tun be kɛ u ni ɲɔgɔn cɛ.—Deter. 11:26, 27; 28:1-14.

9. Mun lo b’a yira ko kerecɛn fɔlɔw ka kafo tun labɛnnin lo?

⁹ Kerecɛn fɔlɔw ka kafow tun labɛnnin lo ani koow ɲɛnabɔla jɛnkulu tun be cikanw ci u ma. A daminɛ na, Yezu ka cidenw lo tun ye koow ɲɛnabɔla jɛnkulu ye (Kɛw. 6:1-6). Kɔfɛ, mɔgɔ wɛrɛw farala u kan (Kɛw. 15:6). Koow ɲɛnabɔla jɛnkulu wala u ka lasigidenw tun be ladiliw ni cikanw ci kafow ma lɛtɛrɛw sababu fɛ. Ala ka miiriyaw lo tun b’o lɛtɛrɛw kɔnɔ (1 Tim. 3:1-13; Titi 1:5-9). Kafodenw tun mana o cikanw sira tagama, nafa juman lo tun be sɔrɔ o la?

10. Kafodenw tun mana Koow Ɲɛnabɔla Jɛnkulu ka cikanw labato, nafa juman lo tun be sɔrɔ o la? ( Jaa lajɛ, barokun daminɛ na.)

¹⁰ Kɛwaliw 16:4, 5 kalan. “Cidenw ni Krista ka jama ɲamɔgɔ minw tun be Zeruzalɛmu, olu tun ye koo minw ŋaniya,” koow ɲɛnabɔla jɛnkulu ka lasigidenw tun be taga o lase kafow ma. Komi kafow tun b’o cikanw labato, u tun be “sabatira ka taga ɲa. Loon o loon, dɔ tun be fara u kan.” An be mun lo faamu o koo la min be se k’an dɛmɛ Ala ka ɔriganisasiyɔn kɔnɔ bi?

11. Kunkanbaara kalifara minw ma, u ka ɲi ka Ala ka ɔriganisasiyɔn ka cikanw ta cogo di?

¹¹ Bi, tɔnbolo ka kɔmite, jamana ka kɔmite, kafokulu kɔrɔsibagaw ani diinan mɔgɔkɔrɔw ka ɲi ka mun lo kɛ n’u ye cikanw sɔrɔ ka bɔ Koow Ɲɛnabɔla Jɛnkulu fɛ? Jehova ka Kitabu b’a fɔ an bɛɛ ye ko an ka mɛnni kɛ u fɛ ani ka kolo u ye (Deter. 30:16; Eburuw 13:7, 17). Minw be mɔgɔ kɔrɔfɔ ani mɔgɔ murutininw man kan ka sɔrɔ Ala ka ɔriganisasiyɔn kɔnɔ. U be se k’a to kanuya, hɛɛrɛ ani bɛɛn min be kafow kɔnɔ, o be nagasi. Tiɲɛn lo ko kerecɛn kantigi si t’a fɛ ka kɛ i n’a fɔ Diyotɛrɛfu. Ale tun ye mɔgɔ murutinin ye ani a tun tɛ kantigiya kɛ (3 Zan 9, 10 kalan). An ka ɲi k’an yɛrɛ ɲininga ko: “Ne be n’ balimaw sabati Alako ta fan fɛ wa? An ɲɛminɛbagaw be cikan minw di, ne be sɔn u ma joona joona ani k’u sira tagama wa?”

12. Mɔgɔ be kɛ diinan mɔgɔkɔrɔ wala kɔrɔsigi ciden ye cogo di bi?

¹² Koow Ɲɛnabɔla Jɛnkulu ye koo dɔ latigɛ a ma mɛɛn. An k’o lajɛ. Mɔgɔ be kɛ diinan mɔgɔkɔrɔ ani kɔrɔsigi ciden ye cogo min na, barokun nin tun b’a yira yɛlɛmani minw kɛra o koo la: “Questions des lecteurs,” Kɔrɔsili Sangaso kɔnɔ (w14-F 11/15). A tun fɔra yen ko saan kɛmɛkulu fɔlɔ la, Koow Ɲɛnabɔla Jɛnkulu tun ye sira di kɔrɔsibaga tagamakɛlaw ma ko u ka cɛɛ dɔw sigi walisa u ka kafo ɲɛminɛ. Ka kɛɲɛ n’o ye, kafokulu kɔrɔsibaga lo be diinan mɔgɔkɔrɔw ani kɔrɔsigi cidenw sigi kafo kɔnɔ. O daminɛna kabi saan 2014, sɛtanburu tile fɔlɔ la. U b’a fɛ k’o nɛɛma baara kalifa cɛɛ minw ma, kafokulu kɔrɔsibaga b’a ɲini k’olu lɔn ka ɲɛ. N’a be se ka kɛ, a be waajuli kɛ n’u ye. A b’u ka denbaya koo lajɛ fana (1 Tim. 3:4, 5). Diinan mɔgɔkɔrɔw jɛnkulu ani kafokulu kɔrɔsibaga b’a filɛ n’o cɛɛw be Bibulu ka saratiw dafa walisa ka kɛ diinan  mɔgɔkɔrɔw wala kɔrɔsigi cidenw ye.—1 Tim. 3:1-10, 12, 13; 1 Piyɛri 5:1-3.

13. An b’a yira cogo di ko an be diinan mɔgɔkɔrɔw ka cikanw sira tagama?

¹³ Diinan mɔgɔkɔrɔw be basigi Bibulu kan ka cikanw di an ma. An ka ɲi k’u sira tagama. O ɲɛminɛbaga kantigi minw be Ala ka ɔriganisasiyɔn kɔnɔ, olu be basigi Bibulu ka cikanw kan. O cikan ɲumanw be mɔgɔ nafa (1 Tim. 6:3). Minw tun be koo ferekeninw kɛ kafo kɔnɔ, ciden Pol tun ye ladili minw di olu ma, an k’an hakili to o la. Mɔgɔ dɔw tun ye “salabagatɔw ye” ani koo minw t’u ka sira la, u tun b’u daa don o la. A gwɛnnin lo ko diinan mɔgɔkɔrɔw tun y’u ladi, nka u tora ka tulogwɛlɛya kɛ. Kafo tun ka kan k’o mɔgɔw minɛ cogo di? Pol y’a fɔ ko: “Aw k’o tigi to yen, aw kana jɛnɲɔgɔnya kɛ n’a ye tugu.” U man kan ka teriya kɛ n’a ye, nka u tun man ɲi k’a jati u jugu ye (2 Tes. 3:11-15). Bi, diinan mɔgɔkɔrɔw be se ka kalan dɔ kɛ walisa ka kafodenw lasɔmi mɔgɔ dɔ koo la. A tigi be tulogwɛlɛya kɛra koo dɔ la i n’a fɔ ka teriya kɛ ni dannabali dɔ ye furu kama. O koo be nɔɔ jugu to kafo kan (1 Kor. 7:39). Ni diinan mɔgɔkɔrɔw y’a ye k’u ka ɲi k’o kalan ɲɔgɔn kɛ, e b’o koo ta cogo di? N’i b’o tigi lɔn, i bena a ɲini ka teriya kɛ n’o tigi ye wa? I ka kanuya n’i ka kantigiya be se k’o tigi lasun k’a ka sira jugu bila. ^[1]

14. An be se ka mun lo kɛ walisa kafo saniyanin ka to?

¹⁴ N’an be Bibulu ka cikanw labato, o be kɛ sababu ye kafo saniyanin be to Alako ta fan fɛ. An k’a filɛ koo min tun be kɛra Korɛntikaw ka kafo kɔnɔ galen. Ciden Pol y’a yɛrɛ saraka ka waajuli kɛ yen. A tun b’o yɔrɔ balimaw jati mɔgɔ “senumaw” ye ani a tun b’u kanu (1 Kor. 1:1, 2, Bible senuma). Kakalayako tun be kɛra o kafo kɔnɔ ani balimaw tun y’u ɲɛɛ tugu o kan. A tun be Pol tɔɔrɔ k’a ye k’o koo tun ma ɲɛnabɔ. Pol ye cii di diinan mɔgɔkɔrɔw ma ko u k’o kakala di Sutana ma, o kɔrɔ, u k’a gwɛn ka bɔ kafo kɔnɔ. Walisa kafo saniyanin ka to, diinan mɔgɔkɔrɔw tun ka ɲi k’o jurumukɛla bɔ yen janko a kana kafodenw kunnatiɲɛ (1 Kor. 5:1, 5-7, 12). Mɔgɔ min tɛ nimisa a ka jurumuw na, diinan mɔgɔkɔrɔw be se k’a latigɛ k’o tigi gwɛn ka bɔ kafo kɔnɔ. N’an be sɔn o ma, o be kɛ sababu ye kafo saniyanin be to. O fana be se k’o tigi lasun ka nimisa ani ka yafa deli Jehova fɛ.

15. An be se ka mun lo kɛ walisa hɛɛrɛ ka to kafo kɔnɔ?

¹⁵ Koo wɛrɛ tun be kɛra Korɛntikaw ka kafo kɔnɔ ani Pol tun ka ɲi ka kuma o koo la. Balima dɔw tun b’u kerecɛnɲɔgɔnw weele kititigɛso la. Ciden Pol ye ɲiningali dɔ kɛ min kɔrɔtanin lo kosɔbɛ. A ko: “Mun na aw te sɔn ka tilenbaliyakow muɲu?” (1 Kor. 6:1-8). Bi fana, balima dɔw be ɲɔgɔn weele kititigɛso la. Tuma dɔw la, hɛɛrɛ min be balimaw cɛ, o be nagasi sabu jagoko dɔ ma ɲɛ u bolo. U bɔnɛna wari la ani n’a sɔrɔ dɔ b’a miiri ko a tɔɲɔgɔn y’a janfa. Nka Bibulu b’an dɛmɛ k’a faamu ko a ka fisa an ka tilenbaliyakow muɲu sanni ka Ala tɔgɔ tiɲɛ ani ka kafo ka hɛɛrɛ nagasi. ^[2] An ka ɲi ka Yezu ka ladiliw sira tagama walisa ka gwɛlɛyaba dɔ wala bɛnbaliyako dɔ ɲɛnabɔ (Matiyo 5:23, 24; 18:15-17 kalan). O la, bɛɛn min be Jehova sagokɛlaw cɛ, o bena barika sɔrɔ.

16. Mun na a man kan ka bari an na k’a ye ko Ala sagokɛlaw kaan bɛnnin lo?

 ¹⁶ Ala sagokɛlaw kaan bɛnnin lo. Jehova ka Kitabu b’a yira fɛɛn min kama o man kan ka bari an na. Zaburu sɛbɛbaga ye dɔnkili la ko: “Tiɲɛ na, balimaw ka to ɲɔgɔn fɛ, o ka ɲi, o ka di.” (Zab. 133:1). Israɛldenw tun mana kolo Jehova ye, a tun b’u labɛn ani bɛɛn tun be kɛ u cɛ. Ala tun bena min kɛ a sagokɛlaw ye, a y’o fɔ ko: “Ne bena u kɛ ɲɔgɔn kan i ko sagaw, wɛɛrɛ kɔnɔ.” (Mise 2:12). Jehova tɛmɛna kira Sofoni fana fɛ k’a fɔ ko: “Ne bena siyaw daa saniya, waasa u bɛɛ ka se ka ne Masaba daali, ani ka ne bato ni dusu kelen ye.” (Sof. 3:9). An be Jehova waleɲuman lɔn kosɔbɛ sabu an be se k’a bato ni kaan kelen ye!

17. Diinan mɔgɔkɔrɔw ka kan ka kitikow ɲɛnabɔ cogo di?

¹⁷ Diinan mɔgɔkɔrɔw ka kan ka kitikow ɲɛnabɔ joona joona ni kanuya ye walisa kafo saniyanin ka to ani bɛɛn ka kɛ yen. Ciden Pol tun b’a lɔn ko hali ni Ala b’an kanu, a tɛ ta o ma k’a ɲɛɛw tugu kojugu kan (Talenw 15:3). O lo kama, ciden Pol ma sigasiga ka Korɛntikaw ka bataki fɔlɔ sɛbɛ. A ye kuma gwɛlɛw fɔ o bataki kɔnɔ, nka o tun b’a yira ko Pol tun b’a balimaw kanu. Kalo damanin o kɔ, Pol ye Korɛntikaw ka bataki 2nan sɛbɛ. A y’a yira ko koow fisayara sabu diinan mɔgɔkɔrɔw y’ale ka cikanw sira tagama. Ni mɔgɔ dɔ ye koo jugu kɛ a ɲina ma, balimacɛ setigiw ka kan k’a ɲini k’o tigi dɛmɛ ni dususuman ye.—Gal. 6:1.

18. a) Bibulu ka ladiliw ye kerecɛn fɔlɔw dɛmɛ cogo di? b) An bena mun lo lajɛ barokun nata la?

¹⁸ Siga t’a la, ladili minw be Ala ka Kitabu kɔnɔ, olu ye kerecɛn fɔlɔw dɛmɛ Korɛnti dugu la ani yɔrɔ wɛrɛw la. O lo y’a to kafow saniyanin tora, hɛɛrɛ ni bɛɛn tun be yen tuma bɛɛ (1 Kor. 1:10; Efɛz. 4:11-13; 1 Piyɛri 3:8). O kɛra sababu ye, balimaw sera ka waajuli kɛ bɛrɛbɛrɛ. Tiɲɛn na, Pol tun be se k’a fɔ ko kibaro diiman “fɔra danfɛnw bɛɛ ye diɲɛ kɔnɔ.” (Kɔlɔs. 1:23). Bi fana, Ala sagokɛlaw kaan bɛnnin lo ani u labɛnnin lo. U jijanin lo waajuli la duniɲa kuru bɛɛ kɔnɔ! Barokun nata la, an bena dalilu wɛrɛw lajɛ. U bena a yira ko Bibulu ye fɛɛn nafamanba ye Ala sagokɛlaw fɛ ani u cɛsirinin lo ka bonya la duniɲa kuru bɛɛ Masaba Jehova kan.—Zab. 71:15, 16.