1. Jehova be se ka mun lo kɛ walisa k’a sagonata dafa?

JEHOVA mako b’a la ka kɛ min o min ye walisa k’a sago dafa, a be se ka kɛ o ye. Ɲɛyirali fɛ, a kɛra Karamɔgɔ, Dususalobaga, Waajulikɛla ani a ɲɔgɔnnaw ye (Ezayi 48:17; 2 Kor. 7:6; Gal. 3:8). O n’a ta bɛɛ, tuma caaman na, Jehova be tɛmɛ adamadenw fɛ k’a sago dafa (Mat. 24:14; 28:19, 20; 2 Kor. 1:3, 4). Jehova mako b’a la an ka kɛ min o min ye walisa k’a sago dafa, a be se ka hakilitigiya ni fanga di an kelen kelen bɛɛ ma an ka kɛ o ye. Bibulu sɛgɛsɛgɛrikɛla caaman y’a ɲɛfɔ k’o bɛnnin lo ni Jehova tɔgɔ kɔrɔ ye.

2. a) Mun na tuma dɔw la an be se k’a miiri ko Jehova tɛ tɛmɛ an fɛ k’a sago dafa? b) An bena mun lo lajɛ barokun nin na?

² An bɛɛ b’a fɛ Jehova ka tɛmɛ an fɛ k’a sago dafa. Nka, dɔw lanin t’a la ko a be tɛmɛ olu fɛ k’o kɛ. U b’a miiri k’u tɛ se ka caaman kɛ sabu u kɔrɔla, fanga bɛrɛ t’u la wala u ka koow cogoya kosɔn. Dɔ wɛrɛw b’a miiri k’u be min kɛra Jehova ye, o be bɔri kɛ ani ko kuun t’a la u k’a ɲini ka dɔ fara o kan. An kelen kelen bɛɛ mako be min na walisa ka Jehova sago kɛ, barokun nin na, an bena a ye a b’o di an ma cogo min na. O kɔ, an bena cɛɛw ni muso kantigi dɔw ka maana lajɛ Bibulu kɔnɔ. An bena a ye cogo min na Jehova y’a sago kɛli nege don u la ani k’a kɛ see di u ma. A laban, an bena a ye cogo min na an be se k’a to Jehova be tɛmɛ an fɛ k’a sago dafa.

3. Ka kɛɲɛ ni Filipikaw 2:13 ye, Jehova be se ka koo dɔ kɛli nege don an na cogo di?

³ Filipikaw 2:13 kalan. * Jehova be se ka koo dɔ kɛli nege don an na. A b’o kɛ cogo di? N’a sɔrɔ an y’a mɛn ko kafo kɔnɔ, dɔ mako be dɛmɛ na wala ko baara dɔ ka ɲi ka kɛ. Wala diinan mɔgɔkɔrɔw ye tɔnbolo ka lɛtɛrɛ dɔ kalan o min na, a fɔra ko u mako be dɛmɛ na yɔrɔ dɔ la. O la, an be se k’an yɛrɛ ɲininga ko: “Ne be se ka dɛmɛ don cogo di?” N’a sɔrɔ baara gwɛlɛ dɔ kalifara an ma ani an m’a lɔn n’an bena se k’o kɛ ka ɲɛ. A be se ka kɛ fana ko an ye Bibulu yɔrɔ dɔ kalan ani an b’an yɛrɛ ɲiningara ko: “Ne be se ka tɔɔw dɛmɛ n’o ye cogo di?” Jehova tɛna an waajibiya ka koo si kɛ. Nka, n’a y’a ye ko an be miirila k’a filɛ an be se ka min kɛ koo dɔ la, a be se k’o koo kɛli nege don an na.

4. Jehova be se ka koo dɔ kɛ see di an ma cogo di?

⁴ Jehova be se ka koo dɔ kɛ see di an ma (Ezayi 40:29). Setigiya min b’an fɛ ka ban, a be se ka dɔ fara o barika kan hakili senu sababu fɛ (Ɛkiz. 35:30-35). Jehova be se ka tɛmɛ a ka ɔriganisasiyɔn fɛ k’an degi baarakɛcogo dɔ la. Ni baara dɔ kalifara i ma ani i t’a lɔn o be kɛ cogo min na, dɛmɛ ɲini. Tuma o tuma, i be se ka “sebagaya kabakoman” deli an sankolola Faa Jehova fɛ. A tɛgɛ labilanin lo k’an dɛmɛ (2 Kor. 4:7; Luka 11:13). Jehova ye cɛɛw ni muso dɔw dɛmɛ a kɛtɔ ka baara dɔw kɛ nege n’u kɛ see di u ma. Bibulu b’u caaman kofɔ. O ɲɛyirali dɔw lajɛtɔ, a filɛ Jehova be se ka tɛmɛ ele fɛ cogo minw na k’o baaraw ɲɔgɔn kɛ.

5. Jehova tɛmɛna Musa fɛ k’a ka jama kisi. A y’o kɛ cogo min na ani tuma min na, an be kalan juman lo sɔrɔ o la?

⁵ Jehova ye Musa dɛmɛ a kɛra Israɛldenw kisibaga ye. A m’o kɛ tuma min na Musa tun b’a miiri ko ale labɛnnin lo sabu “lɔnniya min bɛɛ be Ezipiti, u ye [a] kalan n’o bɛɛ ye.” (Kɛw. 7:22-25). Nka, Jehova y’o kɛ tuma min na a ye Musa dɛmɛ a kɛra mɔgɔ majiginin ni mɔgɔ sabalinin ye (Kɛw. 7:30, 34-36). A ye jagwɛlɛya di Musa ma a sera ka kuma Ezipiti masaba fɛ (Ɛkiz. 9:13-19). A tɛmɛna Musa fɛ cogo min na ani tuma min na, an be kalan juman lo sɔrɔ o la? Minw b’u jija ka kɛ ni Ala ka jogow ɲɔgɔn ye ani u be fanga ɲini a fɛ, a be tɛmɛ olu lo fɛ k’a sago dafa.​—2 Kor. 4:7.

6. Jehova tɛmɛna Barizilayi fɛ cogo min na ka masacɛ Dawuda dɛmɛ, an be kalan juman lo sɔrɔ o la?

⁶ Saan kɛmɛkulu caaman Musa ka wagati kɔ, Jehova tɛmɛna Barizilayi fɛ ka masacɛ Dawuda dɛmɛ. Dawuda tun be bolila a dencɛ Abisalɔn ɲɛ. Ale n’a ka jama “tɔɔrɔla kɔngɔ ni minnɔgɔ bolo” ani u tun sɛgɛnnin lo. Barizilayi tun kɔrɔla, nka ale ni mɔgɔ wɛrɛw y’u niin bila farati la walisa ka Dawuda n’a ka jama dɛmɛ. A m’a miiri ko komi ale kɔrɔla, Jehova tɛ se ka tɛmɛ ale fɛ tugun ka koo dɔ kɛ. Nka, a y’a tɛgɛ labila k’a bololafɛnw di walisa ka Ala sagokɛlaw dɛmɛ gwɛlɛya wagati la (2 Sam. 17:27-29). An be kalan juman lo sɔrɔ o la? An ka jamana na wala jamana wɛrɛw la, n’a sɔrɔ an balima dɔw tɛ se k’u mako gwɛlɛw wasa. An sanda mana kɛ min o min ye, Jehova be se ka tɛmɛ an fɛ k’u dɛmɛ (Talenw 3:27, 28; 19:17). N’a sɔrɔ an tɛ se ka taga yen. Nka, an be se ka niliw kɛ an ka waajuli baara kama. O la,  an balimaw mana kɛ yɔrɔ o yɔrɔ ani tuma o tuma n’u mako be dɛmɛ na, u ka se k’a sɔrɔ.​—2 Kor. 8:14, 15; 9:11.

7. Jehova ye nɛɛma juman lo kɛ Simeyɔn ye ani mun na o b’an jija?

⁷ Simeyɔn tun ye cɛkɔrɔba kantigi dɔ ye Zeruzalɛmu. Jehova tun ye layidu ta a ye ko a tɛna sa n’a ma Masiya ye. Siga t’a la, o ye Simeyɔn jija kosɔbɛ sabu a tun be Masiya kɔnɔna kabi saan caaman. Jehova y’a duga a ka limaniya n’a ka muɲuli kosɔn. Loon dɔ, “Nii Senuman ka sebagaya y’a to” Simeyɔn tagara Alabatosoba kɔnɔ. A ye Yezu denɲɛninman ye o yɔrɔ la. Jehova tɛmɛna a fɛ ka kiraya kɛ o deen koo la, o min tun bena kɛ Krista ye (Luka 2:25-35). A be komi Simeyɔn sara sanni Yezu k’a ka cidenya baara daminɛ. Nka, a ye Ala waleɲuman lɔn sabu a ye Yezu ye. A bena duga caaman sɔrɔ sini ma! Duniɲa kura kɔnɔ, o cɛɛ kantigi bena a ye cogo min na Yezu ka kuntigiya bena duga lase siyaw bɛɛ ma dugukolo kan (Zɛnɛzi 22:18). Jehova be nɛɛma o nɛɛma kɛ an ye, an fana k’a waleɲuman lɔn o kosɔn.

8. Jehova tɛmɛna Barinabasi fɛ cogo min na, a be se k’o ɲɔgɔn kɛ n’an ye cogo di?

⁸ Saan kɛmɛkulu fɔlɔ la, cɛɛ dɔ tɔgɔ tun ko Yusufu ani a tɛgɛ tun foninin lo. A sɔnna Jehova ka tɛmɛ a fɛ ka koo dɔ kɛ (Kɛw. 4:36, 37). A tun be se mɔgɔw jijali la. O kama, cidenw tun b’a weele ko Barinabasi, o kɔrɔ, “min be mɔgɔ jaa gwɛlɛya.” Ɲɛyirali fɛ, a ye Sɔli jija ani k’a dɛmɛ ni ɲumanya ye tuma min na a kɛra kerecɛn ye. A y’o kɛ k’a sɔrɔ balima caaman tun be siran ka gwɛrɛ Sɔli la sabu a ye kafodenw tɔɔrɔ fɔlɔ la. Siga t’a la, Sɔli ye Barinabasi waleɲuman lɔn kosɔbɛ a ka ɲumanya kosɔn (Kɛw. 9:21, 26-28). Kɔfɛ, balima minw tun be fɔɔ Antiyɔsi, Siri jamana na, Zeruzalɛmu diinan mɔgɔkɔrɔw tun b’a fɛ k’olu jija. U ye jɔn lo ci do? Barinabasi! O tun bɛnnin lo yɛrɛ le, sabu a fɔra ko Barinabasi y’o balimaw “jaa gwɛlɛya k’u ka banba ka nɔrɔ Matigi kelen na.” (Kɛw. 11:22-24). Bi fana, Jehova be se ka tɛmɛ an fɛ k’an balimaw jaa gwɛlɛya. Ɲɛyirali fɛ, minw ka mɔgɔ kanulenw sara, Jehova be se ka tɛmɛ an fɛ k’u dusu saalo. Mɔgɔ min man kɛnɛ wala hakili ɲagami bana be min na, Jehova be se k’an lasun ka koo nunu dɔ kɛ o tigi ye: ka taga bɔ a ye wala k’a weele telefɔni na walisa ka kuma ɲuman dɔw fɔ a ye. Jehova tɛmɛna Barinabasi fɛ cogo min na, yala i bena sɔn a be tɛmɛ ele fana fɛ o cogo la wa?​—1 Tes. 5:14.

9. Jehova ye balimacɛ Vasily dɛmɛ cogo min na a kɛra diinan mɔgɔkɔrɔ ɲuman ye, an be kalan juman lo sɔrɔ o la?

⁹ Jehova ye balimacɛ dɔ dɛmɛ a kɛra diinan mɔgɔkɔrɔ ɲuman ye. A tɔgɔ ko Vasily ani a kɛra diinan mɔgɔkɔrɔ ye a saan 26. A tun sirannin lo ko ale tɛna se ka kafodenw dɛmɛ Alako ta fan fɛ sanko gwɛlɛya be minw kan. Nka, a ye fɔrɔmasɔn ɲuman sɔrɔ diinan mɔgɔkɔrɔ kolɔnbagaw fɛ ani Masaya cidenyabaara lakɔli la. A y’a jija kosɔbɛ walisa ka see sɔrɔ a ka siranya kan. Ɲɛyirali fɛ, a ye laɲinita nɔgɔman dɔw sɛbɛ. A tun mana u dɔ dafa, a tun be see sɔrɔ a ka siranya kan. Sisan a ko: “Fɛɛn min tun be siranya bila n’ na, sisan o be n’ ninsɔn diya kosɔbɛ. Jehova mana n’ dɛmɛ ka vɛrise bɛnnin dɔ sɔrɔ walisa ka kafoden dɔ dusu saalo, o be n’ ninsɔn diya kosɔbɛ.” Balimacɛw, i ko Vasily, n’aw b’a to  Jehova be tɛmɛ aw fɛ ka koo dɔ kɛ, a bena see di aw ma ka kunkanbaarabaw dafa kafo kɔnɔ.

10. Abigayɛli ye mun lo kɛ ani i be kalan juman lo sɔrɔ a fɛ?

¹⁰ Dawuda n’a ka cɛɛw mako tun be dɛmɛ na u bolitɔ masacɛ Sayuli ɲɛ. U ye Israɛlcɛ nafolotigi dɔ deli ko a ka dumuni dɔɔni di u ma. O cɛɛ tɔgɔ ko Nabali. Olu fɛ, u tun be se ka Nabali deli o la sabu u tun y’a ka sagaw kɔrɔsi kongokolon kɔnɔ. Nka Nabali tun be miiri a yɛrɛ nafa dɔrɔn na minkɛ, a ko a tɛ foyi di u ma. Dawuda dimina kosɔbɛ ani a tun b’a fɛ ka Nabali n’a ka sokɔnɔ cɛɛw bɛɛ faga (1 Sam. 25:3-13, 22). Nabali muso Abigayɛli tun ye hakilitigi ye ani a tun cɛ ka ɲi kosɔbɛ. A y’a jaa gwɛlɛya ka taga a kunbiri gwan Dawuda ɲɛɛ kɔrɔ. A y’a deli ko a kana a to mɔgɔ si joli hakɛ ka to a kan a kɛtɔ k’a yɛrɛ mɔnɛbɔ. A ko Dawuda ka koow to Jehova bolo. Abigayɛli y’a majigi ka kuma ani ka koow kɛ ni hakilitigiya ye minkɛ, o ye Dawuda dusu sɔrɔ kosɔbɛ. A y’a faamu ko Jehova lo ye Abigayɛli ci ale fɛ (1 Sam. 25:23-28, 32-34). Abigayɛli tun be ni jogo ɲumanw ye. O kama, Jehova tɛmɛna a fɛ ka koow kɛ. Balimamuso minw fana be koow kɛ nɛmɛnɛmɛ ni hakilitigiya ye, Jehova be se ka tɛmɛ u fɛ k’u somɔgɔw ni kafomɔgɔw jija.​—Talenw 24:3; Titi 2:3-5.

11. Salumu denmusow ye mun lo kɛ ani jɔn lo b’u ladegira bi?

¹¹ Saan kɛmɛkulu caaman o kɔ, Jehova tɛmɛna mɔgɔ minw fɛ ka Zeruzalɛmu kogow lalaga, Salumu denmusow tun y’u dɔw ye (Neemi 2:20; 3:12). U facɛ tun ye masaden ye. Nka, u sɔnna k’o baara gwɛlɛ kɛ hali ni farati tun b’a la (Neemi 4:9-12). * U ni Tekowakaw ɲɛmɔgɔw tun tɛ kelen ye hali dɔɔni, olu minw “banna ka kolo u kuntigiw ye, ka baara kɛ.” (Neemi 3:5). Miiri k’a filɛ Salumu denmusow dusu diyara cogo min na tuma min na o baara banna tile 52 dɔrɔn kɔnɔ! (Neemi 6:15). Bi fana, balimamusow ninsɔn ka di k’u yɛrɛ di ka Ala ka baara nunu kɛ: ka batolikɛyɔrɔw n’a ɲɔgɔnnaw lɔ ani k’u ladon. An mako b’o balimamusow ka lɔnniya, u ka ninsɔndiya n’u ka kantigiya la walisa o baaraw ka se ka kɛ ka ɲɛ.

12. Jehova tɛmɛna Tabita fɛ cogo min na, a be se k’o ɲɔgɔn kɛ n’an ye cogo di?

¹² Jehova ye Tabita lasun a ye koɲuman caaman kɛ “ka fantanw dɛmɛ,” sanko firiyamusow (Kɛw. 9:36). O ɲumanya kosɔn, mɔgɔ caaman kasira tuma min na a sara. Nka, ciden Piyɛri y’a lakunu minkɛ, u dusu diyara kosɔbɛ (Kɛw. 9:39-41). An be kalan juman lo sɔrɔ Tabita fɛ? Kanbelew, sunguruw, mɔgɔkɔrɔbaw, musow wala cɛɛw, an bɛɛ be se ka koo nafaman dɔw kɛ k’an balimaw dɛmɛ.—Eburuw 13:16.

13. Balimamuso Ruth tun be siran ka kuma mɔgɔw fɛ. Jehova tɛmɛna a fɛ cogo di k’a ka baara kɛ ani o balimamuso ye mun lo fɔ?

¹³ Balimamuso dɔ tɔgɔ ko Ruth ani kuma tun ka gwɛlɛ a ma. A tun b’a fɛ ka kɛ misɔnden ye. Kabi a denmisɛn tuma, a tun kisɛyanin lo. O kama, a tun be teliya ka taga soo ni soo ka sɛbɛninw tilan tilan. A ko: “O baara tun ka di n’ ye kosɔbɛ.” Nka, a tun be siran ka kuma mɔgɔw fɛ u ka daaw la ani ka Ala ka Masaya kofɔ u ye. O bɛɛ n’a ta, Ruth kɛra kudayi piyɔniye ye a saan 18. Saan 1946, a ye Gilead lakɔli kɛ ani kɔfɛ, a y’a ka cidenya baara kɛ Hawayi ani Zapɔn. Jehova tɛmɛna a fɛ ka baara caaman kɛ waajuli la o jamanaw na. Saan 80 ɲɔgɔn kɛnin kɔ waajuli baara la,  a ko: “Jehova ye fanga di n’ ma tuma bɛɛ. A ye n’ dɛmɛ ka see sɔrɔ n’ ka siranya kan. N’ lanin b’a la ko mɔgɔ o mɔgɔ b’a jigi la Jehova kan, a be se ka tɛmɛ o tigi fɛ k’a ka baara kɛ.”

14. Ka kɛɲɛ ni Kɔlɔsikaw 1:29 ye, an ka ɲi ka mun lo kɛ n’an b’a fɛ Jehova ka tɛmɛ an fɛ k’a sago dafa?

¹⁴ Kabi duniɲa danna, Jehova tɛmɛna a sagokɛlaw fɛ cogo caaman na k’a sago dafa. A bena tɛmɛ ele fɛ ka mun lo kɛ? O fanba be bɔ ele lo la. Yala i be sɔn ka jijalibaw kɛ wa? (Kɔlɔsikaw 1:29 kalan). N’i y’i yɛrɛ labila Jehova ye, a be se k’a kɛ i be kɛ waajulikɛla ye min kisɛyanin lo, kalanfa wala kalanba ɲuman, dususalobaga ɲuman, baarakɛla ŋana wala teri ɲuman ye. A b’a fɛ i ka kɛ min o min ye walisa k’a sago dafa, a be se k’a kɛ i be kɛ o ye.

15. Ka kɛɲɛ ni 1 Timote 4:12, 15 ye, kanbelew ka ɲi ka Jehova deli mun lo koo la?

¹⁵ N’i ye kanbele ye ani i bena kɛ baliku ye yanni dɔɔni, i be se ka mun lo kɛ do? Jehova ka ɔriganisasiyɔn mako be cɛɛw la fanga be minw na ka kunkanbaaraw dafa kafo kɔnɔ. A ɲini ka saratiw dafa walisa ka kɛ kɔrɔsigi ciden ye. Kafo caaman kɔnɔ, diinan mɔgɔkɔrɔw ka ca ni kɔrɔsigi cidenw ye. O la, a ɲini ka kunkanbaara wɛrɛw dafa kafo kɔnɔ. Balimacɛ dɔw be se k’a fɔ ko: “Ne ye weleweledala ye, o be ne wasa.” N’i b’o ɲɔgɔn miiri, Jehova deli a k’a nege don i la i k’a ɲini ka saratiw dafa ka kɛ kɔrɔsigi ciden ye. A deli fana a ka see d’i ma walisa i k’i seko bɛɛ kɛ k’a sago kɛ (Waaj. 12:1). An mako b’i ka dɛmɛ na!​—1 Timote 4:12, 15 kalan.

16. An ka ɲi ka mun lo deli Jehova fɛ ani mun na do?

¹⁶ Jehova b’a fɛ i ka kɛ min o min ye walisa k’a sago dafa, a be se k’a kɛ i be kɛ o ye. O la, a deli a k’a ka baara kɛli nege don i la ani i mako be fanga min na, a k’o d’i ma. I ye mɔgɔkɔrɔba, kanbele wala sunguru ye wo, i ka wagati, i fanga ani i ka fɛɛn wɛrɛw kɛ ka nɔɔrɔ la Jehova kan sisan (Waaj. 9:10). Ni sababu ɲuman dira i ma k’a ka baara kɛ bɛrɛbɛrɛ, kana sin ka ban o la sabu i be siran wala i b’a miiri ko i tɛ se. An Faa kanutigi Jehova ka kan ni nɔɔrɔ ye. Nɛɛmaba lo an fɛ k’an seko bɛɛ kɛ walisa k’o nɔɔrɔ la a kan!