1-2. a) Jamanaw ɲɛmɔgɔw bena mun lo fɔ yanni dɔɔni? b) An ka ɲi k’a ɲini ka ɲiningali jɔnjɔn jumanw lo jaabili sɔrɔ?

MIIRI k’a filɛ, an tun be min kɔnɔna kabi wagatijan, o kɛra: Jamanaw ɲɛmɔgɔw y’a fɔ ko “hɛrɛ ni jigisigi be yen”! N’a sɔrɔ u be wasoya kɛra ko hɛɛrɛ ma deli ka kɛ duniɲa kɔnɔ ten. U b’a fɛ an k’a miiri ko u be sera ka duniɲa ka gwɛlɛyaw bɛɛ ɲɛnabɔ. Nka, tɔɔrɔ min bena cun u kan yanni dɔɔni, u tɛna se k’o bali. Mun na do? Sabu Bibulu tun kɔnna k’a fɔ k’o “tɔɔrɔ bena ben u kan fɔɔ u te se ka bɔyɔrɔ sɔrɔ.”​—1 Tes. 5:3.

² Mun lo bena kɛ “tɔɔrɔba” wagati la? Jehova bena a ɲini an fɛ an ka mun lo kɛ? Ani an be se k’an yɛrɛ labɛn cogo di kabini sisan walisa ka to kantigiya la tɔɔrɔba wagati la? An ka ɲi k’a ɲini k’o ɲiningali jɔnjɔnw jaabili sɔrɔ.​—Mat. 24:21.

3. Ka kɛɲɛ ni Yirali 17:5, 15-18 ye, Ala bena Babilonɛba halaki cogo di?

³ Yirali 17:5, 15-18 kalan. Babilonɛba bena halaki! I ko an y’a fɔ ka tɛmɛ cogo min na, koo min bena kɛ o wagati la, jamanaw ɲɛmɔgɔw tɛna se k’o bali. Mun na do? Sabu u bena min kɛ, “Ala le [bena o] ŋaniya kelen d’u ma.” O ye ŋaniya juman lo ye? O ye ka duniɲa kuru bɛɛ ka ngalon diinanw jɛnkulu halaki,  hali kerecɛn tɔgɔtigiw yɛrɛ. * Ala bena a ka miiriya don “sogo wuleman” ani a “gɔɔn tan” dusu la. Gɔɔn tan nunu ye gofɛrɛnɛmanw bɛɛ lo ye minw be “sogo” nin dɛmɛ. O sogo nin ye Nasiyɔn Zini lo ye (Yir. 17:3, 11-13; 18:8). Tɔɔrɔba bena daminɛ tuma min na gofɛrɛnɛmanw bena wuli ngalon diinanw kama. O tɔɔrɔba bena juguya yɛrɛ le!

4. a) N’a sɔrɔ gofɛrɛnɛmanw bena mun lo fɔ k’a yira fɛɛn min kama u wulila ka Babilonɛba halaki? b) Minw tun be ngalon diinanw na, n’a sɔrɔ olu bena mun lo kɛ?

⁴ An t’a lɔn gofɛrɛnɛmanw bena min fɔ k’a yira fɛɛn min kama u wulila ka Babilonɛba halaki. N’a sɔrɔ u bena a fɔ ko diinanw lo b’a tora hɛɛrɛ tɛ yen ani k’u b’u daa don politikikow la tuma bɛɛ. Wala, n’a sɔrɔ u bena a fɔ ko diinan jɛnkuluw ye nafoloba lajɛn u yɛrɛ ye (Yir. 18:3, 7). Tuma min na gofɛrɛnɛmanw bena wuli ngalon diinanw kama, n’a sɔrɔ u tɛna o diinanmɔgɔw bɛɛ halaki. Nka, a be komi u bena diinanjɛnkuluw lo halaki. O jɛnkuluw halakinin kɔ, minw tun b’o diinanw na, olu bena a faamu ko u ka diinan ɲɛmɔgɔw y’u lafili. A be komi u bena a fɔ ko u ma deli ka kɛ o diinanden dɔ ye abada.

5. Jehova ye layidu juman lo ta tɔɔrɔba koo la ani mun na?

⁵ Bibulu t’a fɔ an ye Babilonɛba halakili bena mɛɛn fɔɔ wagati min na. Nka, an kɔni b’a lɔn k’o tɛna kɛ wagatijan kɔnɔ (Yir. 18:10, 21). Jehova ye layidu ta ko a bena “dɔ bɔ o tɔɔrɔ waati la.” A bena o kɛ walisa “a ye mɔgɔ minw woloma,” olu ni tiɲɛn diinan kana halaki (Mariki 13:19, 20). Nka, Jehova bena a ɲini an fɛ an ka mun lo kɛ tɔɔrɔba daminɛ wagati ni Arimagedɔn kɛlɛ cɛ?

6. An man ɲi k’an niin don ngalon diinan ka koo si la. Nka, mun na o dama tɛ bɔri kɛ?

⁶ I ko an y’a ye barokun tɛmɛnin na cogo min na, Jehova b’a fɛ a sagokɛlaw kana u niin don Babilonɛba ka koo si la. Nka o dɔrɔn tɛ. An ka ɲi k’an jija fana ka to ka tiɲɛn batoli lafasa,​—o min ye Jehova ka batoli senuman ye. An ka cogo fila lajɛ minw bena an dɛmɛ k’o kɛ.

7. a) An be se ka to ka Jehova ka sariyaw labato cogo di tagamacogo ta fan fɛ? b) Eburuw 10:24, 25 b’a yira cogo di ko a kɔrɔtanin lo an ka to ka ɲɔgɔn lajɛn, sanko sisan?

⁷ A fɔlɔ, an ka ɲi ka to ka Jehova ka sariyaw labato tagamacogo ta fan fɛ. An kana sɔn duniɲa ka koow filɛcogo ma. Ɲɛyirali fɛ, an be koo nunu haramuya: cɛɲɔgɔnfuru wala musoɲɔgɔnfuru, cɛɲɔgɔnɲini wala musoɲɔgɔnɲini ani a ɲɔgɔnnaw (Mat. 19:4, 5; Ɔrɔm. 1:26, 27). A filanan, an ka ɲi ka to ka Jehova bato n’an kerecɛnɲɔgɔnw ye. O be se ka kɛ yɔrɔ o yɔrɔ, an b’o kɛ: Masaya Boonw kɔnɔ, balimaw ka soo wala dogo la yɛrɛ. A ka kɛ min o min ye, an tɛna lajɛntaga dabila. An mako b’a la ka ɲɔgɔn lajɛn sabu an “ɲaa b’a la ko Matigi ka loon surunyana ka ban.”​—Eburuw 10:24, 25 kalan.

8. An be kibaro min fɔ mɔgɔw ye, n’a sɔrɔ o bena yɛlɛma cogo di?

⁸ An be kibaro min fɔ mɔgɔw ye, n’a sɔrɔ o bena yɛlɛma tɔɔrɔba wagati la. Sisan, an be Masaya kibaro diiman lo fɔ ani an b’an jija ka mɔgɔw dɛmɛ u ka kɛ Krista ka kalandenw ye. Nka o wagati la, an bena kuma gwɛlɛw lo fɔ minw be i n’a fɔ sanbɛrɛ gwilimanw (Yir. 16:21). N’a sɔrɔ an bena waajuli kɛ ko yanni dɔɔni, Sutana ka duniɲa bena halaki pewu. N’o wagati sera, an bena a lɔn an ka ɲi ka min fɔ tigitigi ani an ka ɲi k’o fɔ cogo min na. Kabi saan kɛmɛ ni kɔ, an be tɛmɛ fɛɛrɛ minw fɛ ka waajuli kɛ, yala an bele bena baara kɛ n’olu lo ye wa? Wala an bena baara kɛ ni fɛɛrɛ kuraw lo ye? An t’o lɔn. A mana kɛ min o min ye, a be komi an bena nɛɛma sɔrɔ ka Jehova ka kitikow fɔ ni kisɛya ye.​—Ezek. 2:3-5.

9. An bena kibaro min fɔ, n’a sɔrɔ gofɛrɛnɛmanw bena a ɲini ka mun lo kɛ o kosɔn? Nka, an lanin be mun lo la?

⁹ An bena kibaro min fɔ, a be komi o lo bena a to gofɛrɛnɛmanw b’a ɲini ka dan sigi an ka waajuli baara la pewu pewu. O wagati la, an ka ɲi k’an jigi la Jehova kan i ko an b’an jigi la a kan waajuli la cogo min na bi. An ka la a la ko Jehova bena fanga di an ma walisa an ka se k’a sago kɛ.​—Mise 3:8.

10. I ko a tun kɔnna ka fɔ Luka 21:25-28 kɔnɔ cogo min na, koo minw bena kɛ tɔɔrɔba wagati la, o bena mun lo kɛ mɔgɔ caaman na?

¹⁰ Luka 21:25-28 kalan. Tɔɔrɔba wagati la, mɔgɔw dabali bena ban. U bena a ye ko u jigi tun be fɛɛn minw kan, olu bɛɛ be halakira. O fɛɛnw ye politikikow, jagokow ani duniɲa ka koo wɛrɛw ye. O bena kɛ wagati gwɛlɛ ye min ɲɔgɔn ma deli ka kɛ kabi duniɲa danna. A bena kɛ ‘dusukasi’ wagati ye ani mɔgɔw bena siran u niin kana to a la (Sof. 1:14, 15). O wagati la, a be komi koow bena gwɛlɛya kosɔbɛ hali Jehova sagokɛlaw fɛ. Komi an tɛ duniɲa ta ye, n’a sɔrɔ an bena gwɛlɛya dɔw sɔrɔ. An mako jɔnjɔn be fɛɛn minw na, n’a sɔrɔ an bena fɔn u dɔw la fana.

11. a) Mun na mɔgɔw ani jamanaw ɲɛmɔgɔw bena u ɲɛsin Jehova Seerew lo ma? b) Mun na kuun t’a la an ka siran tɔɔrɔba ɲɛ?

 ¹¹ Wagati dɔ bena se, minw ka diinan halakira, olu bena dimi sabu u bena a ye ko Jehova Seerew bele b’u ka batoli kɛra. Miiri k’a filɛ u bena mankan min wuli hali rezo sosiyow, arajo wala telewisɔn kan. An koo bena gwoya jamanaw n’u kuntigi Sutana ye sabu an ka diinan kelenpe lo ma halaki. Jamanaw ɲɛmɔgɔw ka laɲinita tun ye ka diinanw bɛɛ halaki ka bɔ dugukolo kan. Nka, u ma se k’o kɛ. O kama, u bena u ɲɛsin anw lo ma. O wagati lo la jamanaw bena jɛn ka kɛ Gɔgi ye min be bɔ Magɔgi. * U bena jɛn ka wuli Jehova sagokɛlaw kama faan bɛɛ la n’u fanga bɛɛ ye (Ezek. 38:2, 14-16). N’an be miiri o koow bɛɛ la, n’a sɔrɔ an be siran sabu an t’a lɔn koow bena kɛ cogo min na tigitigi tɔɔrɔba wagati la. Nka, an kɔni b’a lɔn ko an man ɲi ka siran tɔɔrɔba ɲɛ. Jehova bena cikanw di an ma walisa k’an latanga (Zab. 34:20). An bena se ka ‘dɔ fara an jigi n’an ka jagwɛlɛya kan,’ bari an bena a lɔn ko an “hɔrɔnyali [wala kisili] waati sera.” *

12. “Jɔnkɛ dannamɔgɔ hakiliman” b’an labɛnna cogo di koo nataw kama?

¹² “Jɔnkɛ dannamɔgɔ hakiliman” b’an labɛnna walisa an ka to kantigiya la tɔɔrɔba wagati la (Mat. 24:45, Bible senuma). A b’o kɛra cogo caaman na. An ka ɲɛyirali kelen lajɛ: An ye kalan minw sɔrɔ wagati bɛnnin na saan 2016, saan 2017 ani saan 2018 ka tile saba lajɛnbaw la. Komi Jehova ka loon be surunyana, an mako be jogo dɔw la. O lajɛnbaw ka kalanw y’an jija an k’o jogow barika bonya. An ka segi k’o jogow lajɛ dɔɔni.

13. An be kantigiya min kɛra Jehova ye, an be se k’o barika bonya cogo di? Mun na an ka ɲi k’o kɛ kabini sisan?

¹³ Kantigiya: Saan 2016 ka tile saba lajɛnba kuun tun ye ko: “Kantigiya kɛ Jehova ye!” Kalanw y’an dɛmɛ k’a faamu ko n’an be jɛnɲɔgɔnya barikaman kɛ ni Jehova ye, an bena kantigiya kɛ a ye. U y’an hakili jigi ko walisa k’an magwɛrɛ Jehova la, an ka ɲi k’a deli n’an dusu bɛɛ ye ani k’a ka Kuma kalan bɛrɛbɛrɛ. O bena an dɛmɛ ka fanga sɔrɔ walisa ka gwɛlɛyabaw yɛrɛ muɲu. Sutana ka duniɲa banwagati surunyana kosɔbɛ. O kama, an be kantigiya min kɛra Jehova n’a ka Masaya ye, an ka la a la k’o bena kɔrɔbɔ kosɔbɛ. N’a sɔrɔ mɔgɔw bele bena to k’an lɔgɔbɔ (2 Piyɛri 3:3, 4). Kuun jɔnjɔn minw kama u bena o kɛ, u dɔ ye ko an t’an seen don Sutana ka duniɲa ka koow la. An ka ɲi k’an ka kantigiya barika bonya kabini sisan. O la, an bena to kantigiya la tɔɔrɔba wagati la.

14. a) Yɛlɛmani juman lo bena don an ɲɛminɛbagaw koo la? b) Mun na an ka ɲi ka kantigiya kɛ tɔɔrɔba wagati la?

¹⁴ Balima minw b’an ɲɛminɛna bi dugukolo kan, olu lo tɛna an ɲɛminɛ tugun tɔɔrɔba wagati la. Wagati dɔ la tɔɔrɔba tuma na, kerecɛn mɔlen minw bele be dugukolo kan, olu bɛɛ bena lajɛn sankolo la. U bena fara Yezu kan ka Arimagedɔn kɛlɛ kɛ (Mat. 24:31; Yir. 2:26, 27). O kɔrɔ ko Koow Ɲɛnabɔla Jɛnkulu tɛna kɛ n’an ye dugukolo kan  tugun. Nka, jamaba mɔgɔw ka koow bele labɛnnin bena to. Balima setigi minw be saga wɛrɛ mɔgɔw cɛma, olu dɔw bena an ɲɛminɛ. An ka ɲi ka kantigiya kɛ o balimaw ye an kɛtɔ k’u dɛmɛ ani k’u ka cikanw labato, o minw bɔra Jehova yɔrɔ. An ka kisili bena bɔ o lo la!

15. An be se ka dɔ fara an ka muɲuli barika kan cogo di? Mun na a kɔrɔtanin lo an k’o kɛ sisan?

¹⁵ Muɲuli: Saan 2017 ka tile saba lajɛnba kuun tun ye ko: “Kana i fari faga!” O kalanw y’an dɛmɛ ka dɔ fara an ka muɲuli barika kan. Ni koow ka nɔgɔ, o lo t’an dɛmɛ ka muɲuli kɛ. Nka min b’an dɛmɛ, o ye k’an jigi la Jehova kan (Ɔrɔm. 12:12). An kana ɲinɛ fewu Yezu ka layidu nin kɔ: “Ni mɔgɔ min muɲuna fɔɔ ka taga se a laban ma, o tigi bena kisi.” (Mat. 24:13). O kɔrɔ ko gwɛlɛya o gwɛlɛya mana an sɔrɔ, an ka ɲi ka to kantigiya la. N’an be gwɛlɛyaw bɛɛ muɲu sisan, an ka limaniya barika bena bonya sanni tɔɔrɔba wagati ka se.

16. An ka jagwɛlɛya be bɔ mun lo la? An be se k’an ka jagwɛlɛya barika bonya cogo di kabini sisan?

¹⁶ Jagwɛlɛya: Saan 2018 ka tile saba lajɛnba kuun tun ye ko: “I jaa gwɛlɛya!” O kalanw y’an hakili jigi ko an ka jagwɛlɛya tɛ bɔ an ka setigiya la. I ko muɲuli, fɛɛn min b’an dɛmɛ ka kɛ ni jagwɛlɛya sɔbɛ ye, o ye k’an jigi la Jehova kan. Mun lo bena an dɛmɛ an k’an jigi la Jehova kan bɛrɛbɛrɛ? An k’a ka Kuma kalan loon o loon ani a y’a sagokɛlaw kisi cogo min na galen, an ka miiri o la (Zab. 68:21; 2 Piyɛri 2:9). Tuma min na jamanaw bena wuli an kama tɔɔrɔba wagati la, an mako bena kɛ jagwɛlɛya la. An ka ɲi fana k’an jigi la Jehova kan ka tɛmɛ sanga ni wagati bɛɛ kan (Zab. 112:7, 8; Eburuw 13:6). Tuma min na Gɔgi bena wuli an kama, an mako bena kɛ jagwɛlɛya min na, an bena kɛ n’o ye n’an b’an jigi la Jehova kan kabini sisan. *

17. Mun na an man ɲi ka siran Arimagedɔn kɛlɛ ɲɛ? (Jaa lajɛ ɲɛɛ fɔlɔ kan.)

¹⁷ I ko an y’a fɔ barokun tɛmɛnin na  cogo min na, an fanba y’an ka ɲɛnamaya kɛ laban wagati lo la. Nka, an jigi b’a la ka kisi tɔɔrɔba wagati la. Arimagedɔn kɛlɛ lo bena daan sigi duniɲa juguman nin na pewu. An man ɲi ka siran Arimagedɔn ɲɛ sabu Ala ka kɛlɛ lo (Talenw 1:33; Ezek. 38:18-20; Zak. 14:3). Ni Jehova ye sira di, Yezu bena kɛlɛ daminɛ. O y’a sɔrɔ kerecɛn mɔlenw bɛɛ suu kununa sankolo la. Olu ani mɛlɛkɛ waa caamanba bena jɛn ni Yezu ye ka Sutana, a ka jinaw ani jamanaw ɲɛmɔgɔw kɛlɛ.—Dan. 12:1; Yir. 6:2; 17:14.

18. a) Jehova y’a daa di an ma mun lo la? b) Yirali 7:9, 13-17 b’an dɛmɛ cogo di an kana sigasiga an ka siniɲasigi koo la?

¹⁸ Jehova y’a daa di ko: “Kɛlɛkɛminan fɛɛn o fɛɛn dilanna i kama, o si tena foyi ɲa.” (Ezayi 54:17). Jehova sagokɛla kantigiw “jamaba” bena kisi ka ‘bɔ tɔɔrɔba’ la! O kɔ, u bena to ka Jehova bato (Yirali 7:9, 13-17 kalan). Bibulu b’an dɛmɛ an ka la a la kosɔbɛ ko an bena kisi. An b’a lɔn ko “Jehova be mɔgɔ kantigiw latanga.” (Zab. 31:23, NW ). Minw be Jehova kanu ani u b’a tando, olu bɛɛ ninsɔn bena diya tuma min na Ala bena a tɔgɔ saniya ka bɔ ngalon sifa bɛɛ la.​—Ezek. 38:23.

19. An ka jigiya ɲuman juman lo bena dafa yanni dɔɔni?

¹⁹ Duniɲa kura kɔnɔ, Sutana tɛna kɛ yen. Minw bena ɲɛnamaya kɛ yen, n’an b’a fɛ k’olu ka koo lakali, miiri k’a filɛ 2 Timote 3:2-5 kɔnɔnakow bena kɛ min ye. (Koorilen nin lajɛ: “ Mɔgɔw sɔɔn bena kɛ cogo min na o wagati la.”) Balimacɛ George Gangas tun kɛra Koow Ɲɛnabɔla Jɛnkulu mɔgɔ dɔ ye. Ale ko: “Miiri k’a filɛ duniɲa bena kɛ cogo min na tuma min na bɛɛ bena kɛ balimaw ye! Yanni dɔɔni, i bena nɛɛma sɔrɔ ka ɲɛnamaya kɛ duniɲa kura kɔnɔ. I bena ɲɛnamaya kɛ fɔɔ abada i ko Jehova.” O ye jigiya ɲuman ye dɛ!