1. Ala sagokɛlaw bɛɛ b’a fɛ ka mun lo kɛ ani mun na do? (Jaa lajɛ ɲɛɛ fɔlɔ kan.)

YEZU KRISTA ye ci di a ka kalandenw ma ko: “Aw ye taga siyaw bɛɛ kɛ ne ka kalandenw ye.” (Mat. 28:19). Ala sagokɛla kantigiw bɛɛ b’a fɛ k’a lɔn u be se k’u ka cidenya “baara kɛ ka ɲa” cogo min na (2 Tim. 4:5). O baara kɔrɔtanin lo kosɔbɛ, a nafa ka bon ani kɔrɔtɔko lo ka tɛmɛ baara tɔɔw bɛɛ kan. Nka, n’a sɔrɔ a man nɔgɔ an fɛ ka wagati caaman kɛ waajuli la i ko an b’a fɛ cogo min na.

2. N’a sɔrɔ an be gwɛlɛya jumanw lo muɲu walisa k’an ka cidenya baara dafa?

² An b’an ka fanga don baara wɛrɛw la minw kɔrɔtanin lo ani u b’an ka wagati ta. N’a sɔrɔ an ka ɲi ka baloɲini baara kɛ lɛri caaman tile kɔnɔ walisa k’an n’an denbayamɔgɔw mako wasa. A be se ka kɛ fana ko a ka gwɛlɛ an ma k’an ka kunkanbaaraw bɛɛ dafa denbaya kɔnɔ. N’a sɔrɔ an man kɛnɛ, hakiliɲagami bana b’an na wala gwɛlɛya dɔw b’an kan kɔrɔya kosɔn. An be se k’an ka cidenya baara dafa bɛrɛbɛrɛ cogo di o gwɛlɛyaw bɛɛ n’a ta?

3. Yezu ye min fɔ Matiyo 13:23 kɔnɔ, o b’an dɛmɛ ka mun lo faamu?

³ N’an ka koow cogoya b’a to an tɛ se ka bɛrɛ kɛ Jehova ka baara la, an kana an fari faga. Yezu tun b’a lɔn ko an bɛɛ tɛna se ka jijali kɛ cogo kelen na Masaya waajuli baara la (Matiyo 13:23 kalan). An be baara o baara kɛ Jehova ye, n’an b’o kɛ n’an seko bɛɛ ye, o ka di a ye kosɔbɛ (Eburuw 6:10-12). N’a sɔrɔ an b’a jati ko an ka koow cogoya b’a to an be se ka caaman kɛ Jehova ka baara la.  Barokun nin na, an bena a ye cogo min na an be se ka cidenya baara kɛ an ɲɛnako fɔlɔ ye. An bena a ye fana cogo min na an be se k’an ka ɲɛnamaya kɛ cogo nɔgɔman na ani an be se ka min kɛ walisa k’an ka waajuli kɛcogo fisaya. Nka, an k’a filɛ fɔlɔ a kɔrɔ ye min ye k’an ka cidenya baara dafa bɛrɛbɛrɛ.

4. K’an ka cidenya baara dafa bɛrɛbɛrɛ, o kɔrɔ ko di?

⁴ Walisa ka se k’an ka cidenya baara dafa bɛrɛbɛrɛ, an ka ɲi k’an seko bɛɛ kɛ ka waajuli kɛ ani ka mɔgɔw kalan. An be wagati hakɛ min kɛ o baara la, o dɔrɔn lo t’a yira ko an b’a dafara bɛrɛbɛrɛ. An be waajuli kɛ kuun min kama, o fana kɔrɔtanin lo Jehova fɛ. Komi an be Jehova n’an mɔgɔɲɔgɔnw kanu, an b’an ka cidenya baara * kɛ n’an dusu bɛɛ ye (Mariki 12:30, 31; Kɔlɔs. 3:23). Ka baara kɛ Jehova ye n’an dusu bɛɛ ye, o kɔrɔ ko k’an seko bɛɛ kɛ a ka baara la. N’an be waajuli baara jati nɛɛmaba ye, an bena an seko bɛɛ kɛ ka kibaro diiman fɔ mɔgɔ caamanba ye.

5-6. Wagati caaman tɛ mɔgɔ min fɛ, o tigi be se ka waajuli baara kɛ a ɲɛnako fɔlɔ ye cogo di? Tɛmɛ ɲɛyirali dɔ fɛ k’o ɲɛfɔ.

⁵ Miiri kanbele dɔ koo la. Ngɔnifɔ ka di a ye. A mana sababu sɔrɔ dɔrɔn, a ka di a ye ka ngɔni fɔ. Nka, walisa k’a mako wasa, a ye baara ɲini jagokɛyɔrɔ dɔ la. Hali n’a b’a ka wagati fanba kɛ o baara la, ngɔnifɔ lo ka di a ye ka tɛmɛ. A b’a fɛ n’a dusu bɛɛ ye ka kɛ ngɔnifɔla ŋana ye ani k’o baara kɛ kudayi. O kama, a be sababu bɛɛ ɲini ka ngɔni fɔ hali ni wagati dɔɔni dɔrɔn lo.

⁶ O cogo kelen na, n’a sɔrɔ i tɛ se ka wagati caaman kɛ waajuli la. Nka, o baara lo ka di i ye kosɔbɛ. O kama, i b’i jija k’i ka waajuli kɛcogo fisaya walisa ka mɔgɔw dusukun sɔrɔ. Nka komi i ka ɲi ka koo caaman kɛ, n’a sɔrɔ i b’i yɛrɛ ɲiningara i be se ka min kɛ walisa waajuli baara ka kɛ i ɲɛnako fɔlɔ ye.

7-8. Yezu tun b’a ka cidenya baara jati cogo min na, an be se k’a ladegi o la cogo di?

⁷ Yezu tun be cidenya baara jati cogo min na, o ye ɲɛyirali ɲuman ye an fɛ. A ɲɛnako fɔlɔ tun ye ka Ala ka Masaya kofɔ mɔgɔw ye (Zan 4:34, 35). A ye kilomɛtɛrɛ caaman kɛ seen na walisa ka mɔgɔ caamanba waaju. A tun be sababuw bɛɛ ɲini ka kuma mɔgɔw fɛ jamayɔrɔw la ani u ka soo. A ka cidenya baara lo tun y’a ɲɛnako fɔlɔ ye.

⁸ An be Yezu ladegi n’an be sababuw ɲini ka kibaro diiman fɔ mɔgɔw ye tuma bɛɛ ani yɔrɔ bɛɛ n’a be se ka kɛ. An labɛnnin lo ka fɛɛn caaman saraka waajuli baara kosɔn (Mariki 6:31-34; 1 Piyɛri 2:21). Kafo kɔnɔ, dɔw sera ka kɛ dan na piyɔniyew, kudayi piyɔniyew wala piyɔniye kɔrɔsigiw ye. Dɔ wɛrɛw ye kaan wɛrɛ degi wala u tagara sigi yɔrɔ minw na waajulikɛlaw man ca. Weleweledala dɔw tɛ se k’o si kɛ nka, u b’u seko bɛɛ lo kɛra. Waajuli baara fanba be sera ka kɛ olu lo sababu la. An be sera ka caaman kɛ waajuli la wo, an tɛ sera ka caaman kɛ wo, Jehova tɛ koo ɲini an fɛ an tɛ se min na. A b’a fɛ an bɛɛ ka ninsɔndiya sɔrɔ “nɔɔrɔtigi Ala ka kibaru diman” fɔli la.—1 Tim. 1:11; Deter. 30:11.

9. a) Hali ni Pol tun ka ɲi ka baloɲini baara kɛ, a ye waajuli baara kɛ a ɲɛnako fɔlɔ ye cogo di? b) Pol tun be waajuli baara jati cogo min na, Kɛwaliw 28:16, 30, 31 be mun lo yira an na o koo la?

⁹ Ciden Pol fana ye ɲɛyirali ɲuman ye an fɛ. Waajuli baara lo tun y’a ɲɛnako fɔlɔ ye. Ɲɛyirali fɛ, a ka voyazi filanan na a ka misɔndenya baara la, a ye wagati damanin kɛ Korɛnti dugu la. K’a to o yɔrɔ la, wari bɛrɛ tun t’a fɛ. O kama, a tun ka ɲi k’a ka wagati dɔ ta ka fanibuguw dilan. Nka, o baara lo tun t’a ɲɛnako fɔlɔ ye. O baara kuun tun ye k’a mako wasa a ka cidenya baara la ani ka kibaro diiman fɔ Korɛntikaw ye “gwansan” (2 Kor. 11:7). Hali ni Pol tun ka ɲi ka baloɲini baara kɛ, waajuli baara lo tun y’a ɲɛnako fɔlɔ ye. A tun be waajuli kɛ lafiɲɛlonw bɛɛ la. Kɔfɛ, a ka koow cogoya fisayara minkɛ, a ye dɔ fara a ka waajuli baara kan. A “y’a ka baara bɛɛ kɛ Yezu koo fɔli dama ye, k’a yira zuwifuw la ko Yezu le ye Ala ka Mɔgɔ wolomanin ye.” (Kɛw. 18:3-5; 2 Kor. 11:9). Saan fila kɔnɔ, a kɛra kasoden ye soo dɔ kɔnɔ a tun ye min ta luwanse la Ɔrɔmu dugu la. Mɔgɔ minw tun be na bɔ a ye, a tun be seereya kɛ olu ye ani a tun be lɛtɛrɛw sɛbɛ (Kɛwaliw 28:16, 30, 31 kalan). Pol tun jijanin lo walisa foyi kana a bali ka waajuli kɛ. A y’a sɛbɛ ko: “[Ala] ye baara nin kalifa an ma, o la, an jigi te tigɛ fewu.” (2 Kor. 4:1). I ko Pol, hali n’an ka ɲi ka wagati caaman kɛ an ka baloɲini baara la, an bele be se ka Masaya waajuli baara kɛ an ɲɛnako fɔlɔ ye.

10-11. I be se k’i ka cidenya baara dafa bɛrɛbɛrɛ cogo di hali n’i man kɛnɛ?

¹⁰ N’an tɛ se ka waajuli kɛ caaman soo ni soo, kɔrɔya wala kɛnɛyako kosɔn, an be se ka waajuli kɛ cogo wɛrɛw la. Saan kɛmɛkulu fɔlɔ la, waajulikɛlaw tun mana kɛ yɔrɔ o yɔrɔ, u tun be mɔgɔw waaju. U tun be tɛmɛ sababuw bɛɛ fɛ ka kibaro diiman fɔ mɔgɔw ye. U tun b’o kɛ u tun mana mɔgɔw sɔrɔ tuma o tuma ani yɔrɔ o yɔrɔ i n’a fɔ soo ni soo, jamayɔrɔw la ani sababu dɔw sen fɛ (Kɛw. 17:17; 20:20). N’an tɛ se ka tagama  caaman, an be se ka sigi jamayɔrɔ dɔ la ani ka tɛmɛbagaw waaju. Wala an be se ka seereya kɛ sababu dɔ sen fɛ, ka lɛtɛrɛw sɛbɛ wala ka seereya kɛ telefɔni na. Tiɲɛn lo ko weleweledala dɔw tɛ se ka waajuli kɛ caaman soo ni soo kɔrɔya wala gwɛlɛya wɛrɛw kosɔn. Nka, u bele be se ka ninsɔndiyaba sɔrɔ waajuli kɛcogo wɛrɛw la.

¹¹ Hali n’i man kɛnɛ, i be se k’i ka cidenya baara dafa bɛrɛbɛrɛ. An ka ciden Pol ka koo lajɛ tugun. A ko: “Krista min be see di ne ma, ale barika la ne be se ka o koow bɛɛ kɛ.” (Filip. 4:13). Pol ka voyazi dɔ la a ka misɔndenya baara la, a banana. O kama, a mako tun b’o fanga la. A y’a ɲɛfɔ Galatikaw ye ko: “Ne ka bana koo le kɛra sababu ye ne ka sɔrɔ ka kibaru diman fɔ aw ye.” (Gal. 4:13). O cogo kelen na, i ka bana be se k’a to i be sababuw sɔrɔ ka kibaro diiman fɔ mɔgɔw ye, i n’a fɔ dɔgɔtɔrɔw ani mɔgɔ wɛrɛ minw b’i ladon. O mɔgɔw fanba t’u ka soo ni balimaw tagara bɔ u ye walisa k’u waaju.

12. K’i ɲɛɛ “lɔnin” to fɛɛn kelen kan, o kɔrɔ ko di?

¹² Yezu y’a fɔ ko: “Mɔgɔ ɲɛden lo ye a farikolo lanpan ye. N’i ɲɛɛ lɔnin be fɛɛn kelen kan, i fari yɔrɔ bɛɛ be kɛ yeelen na.” (Matiyo 6:22, NW). O kumaw kɔrɔ ko di do? O kɔrɔ ko an ka ɲi ka koo kelen lo kɛ an ɲɛnako fɔlɔ ye. An kana a to foyi k’an bali k’o laɲinita dafa. Yezu ye ɲɛyirali ɲuman ye an fɛ o koo la.  A ka cidenya baara lo tun y’a ɲɛnako fɔlɔ ye. A y’a fɔ a ka kalandenw ye k’u ka Jehova ka baara n’a ka Masaya kɛ u ɲɛnako fɔlɔ ye. An be Yezu ladegi n’an fana be waajuli baara kɛ an ɲɛnako fɔlɔ ye. O kɔrɔ, n’an be “Ala ka masaya n’a ka tilenninya ɲini fɔlɔ.”—Mat. 6:33.

13. Mun lo be se k’an dɛmɛ k’an ka cidenya baara kɛ an ɲɛnako fɔlɔ ye?

¹³ Koo minw be se k’an dɛmɛ k’an ka cidenya baara kɛ an ɲɛnako fɔlɔ ye, u la dɔ ye ka ɲɛnamaya kɛ cogo nɔgɔman na. O la, an bena wagati caaman sɔrɔ ka mɔgɔw dɛmɛ u ka Jehova lɔn ani k’a kanu. * Ɲɛyirali fɛ, an be se k’an ka baarakɛ lɛriw yɛlɛma walisa ka se ka waajuli kɛ bɛrɛbɛrɛ lɔgɔkun kɔnɔ. Ɲɛnagwɛko minw b’an ka wagati caaman ta, an be se k’u dɔw to yen.

14. Balimacɛ dɔ n’a muso ye yɛlɛmani jumanw lo kɛ walisa ka waajuli baara kɛ u ɲɛnako fɔlɔ ye?

¹⁴ Diinan mɔgɔkɔrɔ dɔ n’a muso y’u ka ɲɛnamaya kɛcogo nɔgɔya. O balimacɛ tɔgɔ ko Elias ani a ko: “An tun tɛ se ka piyɔniye baara daminɛ yɔrɔnin kelen. Nka, an tun be se ka fɛɛn wɛrɛw kɛ walisa ka wagati caaman kɛ waajuli la. O kama, an ye koo den-dennin dɔw kɛ walisa ka dɔ fara an ka waajuli baara kan. Ɲɛyirali fɛ, an ye dɔ bɔ an ka musakaw la, an be wagati min kɛ ɲɛnagwɛkow la, an ye dɔ bɔ o la fana. An y’a ɲini an ka patɔrɔnw fɛ u k’an ka baarakɛ lɛriw yɛlɛma walisa an ka se ka wagati caaman kɛ waajuli la. O kɛra sababu ye an sera ka to ka waajuli kɛ sufɛ ani ka bibulukalan caaman kɛ. Ka wikɛniw niin bɔ a la, an yɛrɛ sera ka waajuli kɛ siɲɛ fila kalo kɔnɔ. An ye ninsɔndiya sɔrɔ yɛrɛ le!”

15-16. Ka kɛɲɛ ni 1 Timote 4:13, 15 ye, an be se ka to k’an ka waajuli kɛcogo fisaya cogo di? (Koorilen nin lajɛ fana: “ Laɲinita dɔw, walisa ka n’ ka cidenya baara dafa bɛrɛbɛrɛ.”)

¹⁵ An be se k’an ka cidenya baara dafa bɛrɛbɛrɛ cogo wɛrɛ min na, o ye k’an ka waajuli kɛcogo fisaya. Baara dɔw la, mɔgɔw be fɔrɔmasɔn sɔrɔ tuma o tuma. O kuun ye ka dɔ fara u ka lɔnniya kan ani k’u ka baara kɛcogo fisaya. O cogo kelen na, Masaya waajulikɛlaw ka ɲi ka to k’u ka waajuli kɛcogo fisaya.—Talenw 1:5; 1 Timote 4:13, 15 kalan.

¹⁶ An be se ka to ka ɲɛtaga kɛ an ka cidenya baara la cogo di? An be se k’o kɛ n’an be ɔriganisasiyɔn ka cikanw sira tagama. An b’o cikanw sɔrɔ Kerecɛnw ka ɲɛnamaya n’u ka waajuli baara lajɛn na. An be kalan nafamanw sɔrɔ o lajɛn na walisa k’an ka waajuli kɛcogo fisaya dɔɔni dɔɔni. Ɲɛyirali fɛ, ni kalan ɲɛbila be ladiliw dira lakɔlidenw ma, an k’a filɛ ladili minw be se k’an dɛmɛ k’an ka waajuli kɛcogo fisaya. An be se k’o ladiliw sira tagama siɲɛ wɛrɛ n’an be waajuli kɛra. An be se fana ka dɛmɛ ɲini an ka waajuli jɛnkulu kɔrɔsibaga fɛ. An be se ka waajuli kɛ n’ale, weleweledala kolɔnbaga dɔ, piyɔniye dɔ wala ni kafokulu kɔrɔsibaga ye. N’an sera baara kɛcogo la koɲuman n’an ka kalankɛ minanw ye, a bena diya an ye kosɔbɛ ka waajuli kɛ ani ka mɔgɔw kalan.

17. I bena nafa jumanw lo sɔrɔ n’i b’i ka cidenya baara dafa bɛrɛbɛrɛ?

¹⁷ Nɛɛmaba lo an fɛ ka kɛ Jehova ka “baarakɛɲɔgɔnw” ye! (1 Kor. 3:9). N’i b’i jija k’a lɔn koo minw kɔrɔtanin lo kosɔbɛ ani n’i b’i ka cidenya baara kɛ i ɲɛnako fɔlɔ ye, i bena Jehova ka baara kɛ “ni nisɔndiya ye.” (Filip. 1:10; Zab. 100:2). Komi i be baara kɛra Jehova ye, i ka la a la ko i mako be fanga min na walisa k’i ka cidenya baara dafa, a bena o di i ma. I bena se k’o kɛ, i ka gwɛlɛyaw mana kɛ min o min ye (2 Kor. 4:1, 7; 6:4). Yala i ka koow cogoya b’a to i be sera ka waajuli kɛ caaman wala dɔɔni dɔrɔn le wa? A mana kɛ min o min ye, i bena ninsɔndiya sɔrɔ n’i b’i seko bɛɛ kɛ o baara la (Gal. 6:4). N’i b’i ka cidenya baara dafa bɛrɛbɛrɛ, i b’a yira ko i be Jehova n’i mɔgɔɲɔgɔn kanu. O la, “i bena i yɛrɛ kisi ani k’i lamɛnbagaw fana kisi.”—1 Tim. 4:16.