1-2. Mun na Yezu hakili tun ɲagaminin lo?

YEZU ye loon laban min kɛ dugukolo kan, a hakili tun ɲagaminin lo. Yanni dɔɔni, mɔgɔ juguw tun bena a tɔɔrɔ kosɔbɛ ani k’a faga. Yezu tun tɛ hamina a saya dɔrɔn koo la. A tun b’a Faa kanu kosɔbɛ ani a tun b’a fɛ k’a dusu diya. A tun b’a lɔn ko n’ale tora kantigiya la o kɔrɔbɔli nataw bɛɛ n’a ta, ngalon minw bɛɛ lara Jehova kan, a tun bena a yira k’o tɛ tiɲɛn ye. A tun bena a yira fana ko Jehova ka kan ni bonya ye. Yezu tun be mɔgɔw fana kanu. A tun b’a lɔn ko n’ale tora kantigiya la fɔɔ ka taga se saya ma, o dɔrɔn lo tun bena a to adamadenw be ɲɛnamaya banbali jigiya sɔrɔ.

² Hali ni Yezu hakili tun ɲagaminin lo kosɔbɛ, a tun be hɛɛrɛ la. A y’a fɔ a ka cidenw ye ko: “Hɛrɛ min be bɔ ne fɛ, ne be o le di aw ma.” (Zan 14:27). Yezu tun be ni “Ala ka hɛrɛ” ye. Mɔgɔ min be jɛnɲɔgɔnya kɛrɛnkɛrɛnnin kɛra ni Jehova ye, o tigi be ni hakilisigi min ye, o lo ye Ala ka hɛɛrɛ ye. O hɛɛrɛ lo y’a to Yezu hakili sigira.—Filip. 4:6, 7.

3. An bena mun lo lajɛ barokun nin na?

³ Tɔɔrɔ min ye Yezu sɔrɔ, o ɲɔgɔn tɛna an si sɔrɔ ka ye. Nka, an k’a to an hakili la ko Yezu ka kalandenw bɛɛ bena gwɛlɛyaw sɔrɔ (Mat. 16:24, 25; Zan 15:20). I ko Yezu, an hakili bena ɲagami tuma dɔw la fana. O la, an be se ka mun lo kɛ walisa hamikojugu kana see sɔrɔ an kan ani k’an hakili ɲagami? An ka fɛɛn saba lajɛ Yezu ye minw kɛ a ka cidenya baara wagati la dugukolo kan. An k’a filɛ fana an be se k’a ladegi cogo min na ni gwɛlɛyaw b’an kan.

4. Ka 1 Tesalonikaw 5:17 ka miiriya to i hakili la, mun lo b’a yira ko Yezu ye delili kɛ siɲɛ caaman a ka loon laban na dugukolo kan?

⁴ Vɛrise nin kalan: 1 Tesalonikaw 5:17. Yezu ye delili kɛ siɲɛ caaman a ka loon laban na dugukolo kan. Tuma min na a y’a ka saya Hakilijigi lajɛn sigi sen kan, a ye delili kɛ buru ni diwɛn kan (1 Kor. 11:23-25). A ye Tɛmɛnkan seli kɛ yɔrɔ min na n’a ka kalandenw ye, a ye delili kɛ n’u ye o yɔrɔ la, u sɔrɔla ka bɔ yen (Zan 17:1-26). O suu kelen na, a tagara n’a ka kalandenw ye Zɛtisemane ani a ye delili kɛ yen siɲɛ caaman (Mat. 26:36-39, 42, 44). A ye kuma laban minw fɔ ka sɔrɔ ka sa, o fana tun ye delili lo ye (Luka 23:46). Yezu ka suu laban na dugukolo kan, koo o koo y’a sɔrɔ, a ye Jehova deli o koo la.

5. Mun na Yezu ka cidenw fari fagara?

⁵ Fɛɛn minw y’a to Yezu sera k’a ka tɔɔrɔw muɲu, o dɔ ye ko a jigi tun lanin b’a Faa kan: A y’a deli siɲɛ caaman. O loon sufɛ, a ka cidenw kɔni m’u jija Ala deli la. O kama, tuma min na kɔrɔbɔli wagati sera, u fari fagara (Mat. 26:40, 41, 43, 45, 56). An ka Yezu ladegi an kɛtɔ ka to ka “Ala daali” tuma o tuma. O dɔrɔn lo bena an dɛmɛ an be to kantigiya la kɔrɔbɔliw tuma na. An be se ka delili kɛ mun lo koo la?

6. Limaniya be se k’an dɛmɛ cogo di an hakili siginin be to?

⁶ An be se ka Jehova deli a ka “dɔ fara an ka lanaya kan.” (Luka 17:5; Zan 14:1). An mako be “lanaya” wala limaniya la sabu Sutana bena Yezu ka kalandenw bɛɛ kɔrɔbɔ (Luka 22:31). Limaniya be se k’an  dɛmɛ cogo di an hakili siginin be to hali n’an ka gwɛlɛyaw be tugutugura ɲɔgɔn kɔ? N’an y’an seko bɛɛ kɛ walisa ka see sɔrɔ gwɛlɛya dɔ kan, limaniya bena an lasun k’o koo to Jehova bolo. An lanin b’a la ko min ka fisa an ma, a b’o lɔn kosɔbɛ ka tɛmɛ an kan. O kama, an hakili siginin lo.—1 Piyɛri 5:6, 7.

7. Robert ye min fɔ, o y’i dɛmɛ ka mun lo faamu?

⁷ An ka gwɛlɛyaw mana kɛ min o min ye, delili b’an dɛmɛ an hakili siginin be to. An ka Robert ka koo lajɛ. Diinan mɔgɔkɔrɔ kantigi lo min be ni saan 80 ni kɔ ye. A ko: “Ladili min be sɔrɔ Filipikaw 4:6, 7 kɔnɔ, o ye n’ dɛmɛ n’ ye see sɔrɔ gwɛlɛya caaman kan. N’ ye gwɛlɛyaw sɔrɔ wariko ta fan fɛ. Ka fara o kan, nɛɛma min dira n’ ma ka kɛ diinan mɔgɔkɔrɔ ye, n’ bɔnɛna o la wagati dɔ kɔnɔ.” Mun lo ye Robert dɛmɛ a hakili siginin tora? A ko: “Ni n’ hakili y’a daminɛ ka ɲagami dɔrɔn, n’ be sin ka delili kɛ. N’ b’a lɔn ko tuma o tuma ni n’ ye delili kɛ ni n’ dusu bɛɛ ye, n’ hakili be sigi kosɔbɛ.”

8. I ko Zan 8:29 b’a yira cogo min na, fɛɛn wɛrɛ juman lo y’a to Yezu hakili tun siginin lo?

⁸ Zan 8:29 kalan. Yezu tun b’a lɔn ko ale b’a Faa dusu diyara. O kama, a hakili tun siginin lo hali n’u tun b’a tɔɔrɔla. A tora ka mɛnni kɛ Jehova fɛ hali tuma minw na a tun ka gwɛlɛ a ma k’o kɛ. A tun b’a Faa Jehova kanu ani a y’ale sago lo kɛ a ɲɛnako fɔlɔ ye. Sanni Yezu  ka na dugukolo kan, a tun be Ala ka “baaraɲamɔgɔya” la (Talenw 8:30). K’a to dugukolo kan, a y’a Faa kofɔ tɔɔw ye ni kisɛya ye (Mat. 6:9; Zan 5:17). O baara ye Yezu ninsɔndiya kosɔbɛ.—Zan 4:34-36.

9. N’an bolo degunnin lo waajuli la, o b’an dɛmɛ cogo di an hakili siginin be to?

⁹ An be Yezu ladegi n’an be mɛnni kɛ Jehova fɛ ani n’an be “taga ɲa Matigi ka baara la tuma bɛɛ.” (1 Kor. 15:58). N’an bolo degunnin lo waajuli la, an bena an ka gwɛlɛyaw filɛ ni ɲɛɛ ɲuman ye (Kɛw. 18:5). Ɲɛyirali fɛ, an be mɔgɔ minw waaju, tuma caaman, u ka gwɛlɛyaw ka jugu n’an taw ye. Nka, n’u y’a daminɛ ka Jehova kanu ani k’a ka ladiliw sira tagama, u ka ɲɛnamaya kɛcogo be fisaya ani u be ninsɔndiya sɔbɛ sɔrɔ. Tuma o tuma n’an y’o koo ɲɔgɔn ye, an be la a la kosɔbɛ ko Jehova bena a janto an na. O lanaya b’a kɛ an hakili siginin be to. Balimamuso dɔ y’a kɔrɔsi k’o ye tiɲɛn ye. Saan caaman kɔnɔ, hakiliɲagami bana tun b’a la ani a tun b’a miiri ko nafa foyi t’ale la. A ko: “Ni n’ bolo degunnin lo waajuli la, n’ b’a ye ko n’ be se ka n’ ka miiriya juguw kɛlɛ ani o be n’ ninsɔn diya kosɔbɛ. Ne fɛ, fɛɛn min b’o kɛ, o ye ko ni n’ be waajuli kɛra n’ b’a ye ko n’ magwɛrɛnin lo Jehova la kosɔbɛ.”

10. Brenda ye min fɔ, o y’i dɛmɛ ka mun lo faamu?

¹⁰ An ka balimamuso Brenda ka koo lajɛ fana. Bana jugu dɔ b’ale n’a denmuso la. Fanga bɛrɛ tɛ Brenda la, a yɛrɛ be namara wotoro lo kɔnɔ sabu a tɛ se ka tagama. Tuma kelen kelen, a be waajuli kɛ soo ni soo. Nka, a ka teli ka seereya kɛ lɛtɛrɛw lo sababu fɛ. A ko: “Tuma min na n’ y’a faamu ani n’ sɔnna a ma ko n’ tɛna kɛnɛya sɔrɔ duniɲa nin kɔnɔ, n’ sera ka sinsin n’ ka waajuli baara kan. Tiɲɛn na, ni n’ be waajuli kɛra, n’ tɛ miiri n’ ka gwɛlɛyaw la. Nka, n’ be mɔgɔ minw waaju n’ ka kafo ka kiinw kɔnɔ, n’ be miiri olu lo koo la. N’ be ni jigiya min ye siniɲasigi koo la, o b’a to fana n’ be miiri o la tuma o tuma.”

11-13. a) Cidenw ani mɔgɔ wɛrɛw y’a yira cogo di k’u ye Yezu teri sɔbɛw ye? b) Yezu teriw ka dɛmɛ ye mun lo kɛ a la?

¹¹ Yezu ka cidenya baara wagati bɛɛ la, a ka ciden kantigiw y’a yira ko u y’a teri sɔbɛw ye. U tun be i n’a fɔ teri sugu min kofɔra Talenw 18:24 kɔnɔ: “Terisɔbɛ be se ka fisaya ni baden ye.” O teri sifaw tun koo ka gwɛlɛ Yezu ma. A ka cidenya baara wagati la, a baden si ma la a la (Zan 7:3-5). Wagati dɔ la yɛrɛ, u y’a miiri ko a kuun wulila (Mariki 3:21). Nka Yezu ka suu labanna na, a ye kuma nunu fɔ a ka ciden kantigiw ye: “Aw kɔni muɲuna ka to ne fɛ n ka sigɛnw waati la.”—Luka 22:28.

¹² Yezu ka cidenw y’a jigi tigɛ tuma dɔw la. Nka sanni a ka sinsin o kan, a y’a to a hakili la k’u limaniyanin lo ale la (Mat. 26:40; Mariki 10:13, 14; Zan 6:66-69). A ye suu laban min kɛ n’o cɛɛ kantigiw ye ka sɔrɔ ka sa, a y’a fɔ u ye ko: “Ne b’aw wele n teriw, bari ne ye fɛɛn min bɛɛ mɛn n Faa fɛ, ne y’o bɛɛ yira aw la.” (Zan 15:15). Siga t’a la, Yezu teriw y’a jija kosɔbɛ. U ye dɛmɛ min lase Yezu ma a ka cidenya baara la, o y’a ninsɔn diya kosɔbɛ.—Luka 10:17, 21.

¹³ Ka cidenw niin bɔ a la, teri wɛrɛw tun be Yezu fɛ fana. Cɛɛw ni musow lo  minw y’a dɛmɛ waajuli baara la ani cogo nafaman wɛrɛw la. Dɔw y’a weele ka na dumuni kɛ u ka soo (Luka 10:38-42; Zan 12:1, 2). Dɔ wɛrɛw y’a bila sira a ka voyaziw la ani u y’a dɛmɛ n’u bololafɛnw ye (Luka 8:3). Teri sɔbɛw tun be Yezu fɛ sabu ale yɛrɛ tun ye teri sɔbɛ ye u fɛ. Yezu ye koo ɲuman kɛ a teriw ye ani u tun tɛ se min na, a tun t’o ɲini u fɛ. Hali ni Yezu tun dafanin lo, a teri dafabaliw ka dɛmɛ tun ka di a ye. Siga t’a la, o teriw y’a dɛmɛ a hakili siginin tora.

14-15. An be se ka teri sɔbɛw sɔrɔ cogo di? U be se k’an dɛmɛ cogo di?

¹⁴ Teri sɔbɛw bena an dɛmɛ ka to kantigiya la Jehova ye. An be se ka teri sɔbɛw sɔrɔ cogo fisaman min na, o ye ko an yɛrɛ ka kɛ teri sɔbɛ ye (Mat. 7:12). Ɲɛyirali fɛ, Bibulu b’an jija an k’an ka wagati n’an fanga kɛ ka mɔgɔw dɛmɛ, sanko minw ye “dɛsɛbagatɔw” ye (Efɛz. 4:28). Miiri mɔgɔ dɔ koo la i ka kafo kɔnɔ i be se ka min dɛmɛ. Yala i be se ka taga sanni kɛ balima dɔ ye min tɛ se ka bɔ a ka soo kɔrɔya wala bana kosɔn wa? Yala i be se ka dumuni di denbayamɔgɔ dɔw ma wariko gwɛlɛya be minw kan wa? N’a sɔrɔ i be se baara la koɲuman n’an ka site web jw.org^® ani JW Library^® porogramu ye. N’o lo, yala i be se ka tɔɔw dɛmɛ i ka kafo kɔnɔ walisa u fana ka se ka baara kɛ n’u ye wa? N’an jijanin lo ka tɔɔw dɛmɛ, an ninsɔn bena diya kosɔbɛ.—Kɛw. 20:35.

¹⁵ An teriw bena an dɛmɛ ni gwɛlɛyaw b’an kan ani u bena an dɛmɛ an hakili siginin be to. Tuma min na Zɔbu tun be  kumana a ka kɔrɔbɔliw koo la, a tericɛ Eliyu y’a lamɛn. O cogo kelen na, an teriw be muɲu k’an lamɛn n’an b’an ka gwɛlɛyaw kofɔra u ye (Zɔbu 32:4). An man ɲi k’a ɲini u fɛ u ka desizɔnw ta an nɔɔ na. Nka, u be basigi Bibulu kan ka ladili minw di an ma, hakilitigiyako lo k’an janto o la (Talenw 15:22). Masacɛ Dawuda sɔnna a teriw ka dɛmɛ na. O cogo kelen na, an teriw be dɛmɛ min lase an ma gwɛlɛya tuma na, an k’an majigi ka sɔn o ma (2 Sam. 17:27-29). Tiɲɛn na, o teri suguw ye Jehova ka nilifɛn lo ye.—Zaki 1:17.

16. Ka kɛɲɛ ni Filipikaw 4:6, 7 ye, an be se ka Ala ka hɛɛrɛ sɔrɔ cogo kelenpe juman lo la? A ɲɛfɔ.

¹⁶ Filipikaw 4:6, 7 kalan. Mun na a fɔra o vɛrise kɔnɔ ko an be se ka Ala ka hɛɛrɛ sɔrɔ “Yezu Krista barika” lo la? A y’o fɔ sabu n’an b’a fɛ an hakili siginin ka to, fɔɔ an ka Yezu lɔyɔrɔ faamu Jehova sagonata koo la ani an ka la o la. Ɲɛyirali fɛ, Yezu ka kunmabɔsara sababu la, an ka jurumuw bɛɛ be se ka yafa (1 Zan 2:12). O b’an hakili sigi yɛrɛ le! Yezu lo be Ala ka Masaya kun na. Sutana n’a ka duniɲa ye tɔɔrɔ minw bɛɛ lase an ma, Yezu bena u nɔfɛkow bɛɛ lalaga (Ezayi 65:17; 1 Zan 3:8; Yir. 21:3, 4). O ye jigiya ɲuman ye dɛ! Yezu ye baaraba kalifa an ma. Nka, an t’an kelen na, a b’an dɛmɛna duniɲa laban tuma nin na (Mat. 28:19, 20). O b’an jaa gwɛlɛya kosɔbɛ! An do mako be dususalo, jigiya ani jagwɛlɛya la walisa an hakili ka sigi.

17. a) Kerecɛn hakili siginin be se ka to cogo di? b) I ko a fɔra cogo min na Zan 16:33 kɔnɔ, an bena se ka mun lo kɛ?

¹⁷ I hakili siginin be se ka to cogo di ni gwɛlɛyabaw b’i kan? Yezu ye koo minw kɛ, n’i b’o ɲɔgɔn kɛ, i hakili siginin be se ka to. A fɔlɔ, delili kɛ ani timinandiya o la. A filanan, mɛnni kɛ Jehova fɛ ani waajuli kɛ ni kisɛya ye hali tuma min na a ka gwɛlɛ i ma k’o kɛ. A sabanan, ni gwɛlɛyaw b’i kan, dɛmɛ ɲini i teriw fɛ. N’i y’o kɛ, Ala ka hɛɛrɛ bena i tanga hamikojugu ma. Ka fara o kan, i bena see sɔrɔ kɔrɔbɔliw bɛɛ kan i ko Yezu sera k’a kɛ cogo min na.—Zan 16:33 kalan.