1. An be se ka la koo fila jumanw lo la?

SANGA ni wagati bɛɛ, Jehova b’a sagokɛlaw kanu ani a bena to k’u kanu fɔɔ abada. Tilenninya fana ka di a ye (Zab. 33:5). O kama, an be se ka la koo fila nunu na: 1) N’u be tilenbaliyako kɛra a sagokɛlaw la, o b’a tɔɔrɔ. 2) A ye layidu ta ko u tɛna to ka tilenbaliya kɛ a sagokɛlaw la kudayi. Minw be tilenbaliyako kɛ u la, a ko a bena olu ɲangi bɛrɛbɛrɛ. Barokun 4 nunu yɔrɔ fɔlɔ la, * an y’a ye ko Musa ka sariya basiginin lo kanuya lo kan. O sariya tun be mɔgɔw jija u ka bɛɛ minɛ ni tilenninya ye, sanko dɛmɛbaga tɛ minw na (Deter. 10:18). O sariya b’a yira ko Jehova b’a janto kosɔbɛ a sagokɛlaw la.

2. An bena ɲiningali jumanw lo lajɛ?

² Musa ka sariya tɛ sen kan tugun kabi tuma min na kerecɛn kafo juu sigira saan 33. Nka, yala sariya dɔ be kerecɛnw fɛ min juu sigira kanuya kan ani a be tilenninya lafasa wa? Ɔnhɔn, sariya kura dɔ be yen min b’u nafa kosɔbɛ! Barokun nin na, an bena a filɛ fɔlɔ o sariya ye min ye. O kɔ, an bena ɲiningali nunu jaabi: Mun na an be se k’a fɔ k’o sariya basiginin lo kanuya lo kan? Mun na an be se k’a fɔ ko a be tilenninya lafasa? Kuntigiya kalifara minw ma, olu ka ɲi ka tɔɔw minɛ cogo di ka kɛɲɛ n’o sariya ye?

3. “Krista ka sariya” min kofɔra Galatikaw 6:2 kɔnɔ, o ye mun ni mun lo ye?

³ Galatikaw 6:2 kalan. Kerecɛnw be “Krista ka sariya” lo kɔrɔ. Yezu ma sariya si sɛbɛ ka di a ka kalandenw ma. Nka, a y’u kalan cikanw ani sariyakolow lo la minw b’u ɲɛminɛ. Yezu ye mɔgɔw kalan koo minw bɛɛ la, olu lo ye “Krista ka sariya” ye. An bena koo caaman faamu o sariya koo la dakun nɔfɛtaw la.

4-5. Yezu ye mɔgɔw kalan cogo di ani a y’o kɛ tuma juman?

⁴ Yezu ye mɔgɔw kalan cogo di? A fɔlɔ, a ka kumaw fɛ. Barika tun b’o kumaw na koo nunu kosɔn: A tun be tiɲɛn fɔ Ala koo la, ka mɔgɔw dɛmɛ u ka kuun sɔrɔ u ka ɲɛnamaya la ani u k’a faamu ko Ala ka Masaya lo be se k’an ka tɔɔrɔw bɛɛ ban (Luka 24:19). A filanan, Yezu ye mɔgɔw kalan a ka ɲɛyirali fɛ. A ka koow kɛcogo fɛ, a y’a yira a ka kalandenw ka ɲi ka koow kɛ cogo min na.—Zan 13:15.

⁵ Yezu ye mɔgɔw kalan tuma juman? A y’o kɛ a ka cidenya baara wagati la dugukolo kan (Mat. 4:23). Dɔɔni a suu kununin kɔ, a y’a ka kalandenw kalan. N’a sɔrɔ u mɔgɔ 500 ni kɔ lo tun lajɛnnin lo. A y’a yɛrɛ yira u la ani a ye cikan di u ma k’u ka taga mɔgɔw “kɛ [ale] ka kalandenw ye (Mat. 28:19, 20; 1 Kor. 15:6). Yezu lo be kafo kun na. O kama, a tora k’a ka kalandenw ɲɛminɛ a seginin kɔ sankolo la. Ɲɛyirali fɛ, saan 96, a ye ciden Zan ɲɛminɛ walisa a ka kerecɛn mɔlenw jija ani k’u ladi.—Kɔlɔs. 1:18; Yir. 1:1.

6-7. a) Yezu ka kalanw be sɔrɔ min? b) An be Krista ka sariya labato cogo di?

⁶ Yezu ka kalanw be sɔrɔ min? A ye min fɔ ani a ye min kɛ dugukolo kan, u fanba lakalila Evanziliw kɔnɔ. Gɛrɛkikan sɛbɛnin tɔɔw fana b’an dɛmɛ ka Yezu ka miiriyaw faamu. Sabu minw y’u sɛbɛ, u tun be “Krista ka miiriya” lɔn ani hakili senu y’u ɲɛminɛ.—1 Kor. 2:16.

⁷ Kalan minw be sɔrɔ o la: Yezu ka kalanw ɲɛsinna an ka ɲɛnamaya faan  bɛɛ ma. O kama, Krista ka sariya b’an ɲɛminɛ an ka kokɛtaw bɛɛ la soo, baarakɛyɔrɔ, lakɔliso la ani kafo kɔnɔ. Walisa k’o sariya lɔn, fɔɔ an ka Gɛrɛkikan sɛbɛninw kalan ani ka miiri u kan. Cikanw ani sariyakolo minw b’o sɛbɛninw kɔnɔ, n’an be koow kɛ ka kɛɲɛ n’u ye, an be Krista ka sariya lo labatora. N’an y’o kɛ, an be mɛnni kɛra kanutigi Ala Jehova lo fɛ sabu Yezu ka kalanw bɛɛ bɔra ale lo yɔrɔ.—Zan 8:28.

8. Krista ka sariya juu sigira mun lo kan?

⁸ Ni boon juu sigira ka ɲɛ, minw b’a kɔnɔ, u latanganin lo ani u tɛ siran. Ni sariya ɲuman fana juu sigira ka ɲɛ, minw b’a labato, u latanganin lo ani u tɛ siran. Krista ka sariya juu sigira jogo ɲumanba nin lo kan: kanuya. Mun na an b’o fɔ?

9-10. Mun lo b’a yira ko kanuya lo tun be Krista lasun ka koow kɛ? An be se k’a ladegi cogo di?

⁹ A fɔlɔ, kanuya lo tun be Yezu lasun ka koow kɛ. Kanuya lo be mɔgɔ lasun ka hinɛ wala ka makari a mɔgɔɲɔgɔn na. Yezu tun be makari mɔgɔw la. O lo kama, a ye jamaba kalan, ka banabagatɔw kɛnɛya, ka dumuni di kɔngɔtɔw ma ani ka suuw kunu (Mat. 14:14; 15:32-38; Mariki 6:34; Luka 7:11-15). O koow tun tɛ ɲɛ jijaliba kɔ ani o y’a ka wagati caaman ta. O n’a ta bɛɛ, a sɔnna ka tɔɔw nafa lo ɲini fɔlɔ. Yezu y’a ka kanuya yira cogo kabakoman min na, o ye k’a niin di tɔɔw kosɔn.—Zan 15:13.

¹⁰ Kalan minw be sɔrɔ o la: An be se ka Yezu ladegi n’an be tɔɔw nafa lo ɲini fɔlɔ. An b’a ladegi fana n’an be makari an ka kiinmɔgɔw la. N’an be kibaro diiman fɔ u ye ani k’u kalan sabu an be makari u la, an be Krista ka sariya lo labatora.

11-12. a) Mun lo b’a yira ko Jehova b’a janto an na kosɔbɛ? b) An be se ka Jehova ka kanuya ladegi cogo di?

¹¹ A filanan, Yezu y’a Faa ka kanuya yira. Jehova b’a janto kosɔbɛ a sagokɛlaw la cogo min na, Yezu y’o yira a ka cidenya baara la. Yezu ye mɔgɔw kalan koo minw na, o dɔ ye ko an kelen kelen bɛɛ koo ka gwɛlɛ an sankolola Faa ma (Mat. 10:31). Ni Jehova sagokɛla dɔ y’a mabɔ kafo la, n’a nimisara ka kɔsegi, Jehova b’a bisimila ni dusudiya ye (Luka 15:7, 10). Jehova y’a ka kanuya yira an na a kɛtɔ k’a Dencɛ di ka kɛ an kunmabɔsara ye.—Zan 3:16.

¹² Kalan minw be sɔrɔ o la: An be se ka Jehova ka kanuya ladegi cogo di? (Efɛz. 5:1, 2). An balima kelen kelen bɛɛ koo ka ɲi ka gwɛlɛya an ma. Minw tun tununa, n’u kɔsegira Jehova ma, an k’u bisimila ni dusudiya ye (Zab. 119:176). An b’a yira ko an b’an balimaw kanu, n’an b’an yɛrɛ di k’u dɛmɛ, sanko gwɛlɛyaw wagati la (1 Zan 3:17). N’an be tɔɔw minɛ ni kanuya ye, an be Krista ka sariya lo labatora.

13-14. a) Ka kɛɲɛ ni Zan 13:34, 35 ye, Yezu ye cikan juman lo di a ka kalandenw ma? Mun na o ye cikan kura ye? b) An b’o cikan kura sira tagama cogo di?

¹³ A sabanan, Yezu ye cii di a ka kalandenw ma k’u ka kɛ ni kanuya ye min b’u lasun k’u yɛrɛ saraka tɔɔw kosɔn (Zan 13:34, 35 kalan). O kanuya b’an lasun an k’an balimaw kanu i ko Yezu y’an kanu cogo min na. An tɛ se k’o kɛ n’an tɛ ni kanuya ye min b’an lasun k’an yɛrɛ saraka tɔɔw kosɔn. * Cikan kura lo  sabu Musa ka sariya tun t’a ɲini mɔgɔ fɛ a ka kɛ n’o kanuya sifa ye. An ka ɲi k’an balimaw kanu ka tɛmɛ an yɛrɛ kan. I ko Yezu, an k’u kanu fɔɔ ka sɔn k’an niin di u kosɔn.

¹⁴ Kalan minw be sɔrɔ o la: An be cikan kura labato, n’an be sɔn ka fɛɛn dɔw saraka an balimaw kosɔn, hali an niin yɛrɛ. An be sɔn fana ka fɛɛn fitinin fitinin dɔw saraka u kosɔn. Ɲɛyirali fɛ n’an be koo nunu kɛ, an be Krista ka sariya lo labatora: ka to ka balima mɔgɔkɔrɔba dɔ ta ka na n’a ye lajɛnw na, k’an diyanye fɛɛn dɔ saraka walisa k’an kerecɛnɲɔgɔn dɔ dusu diya wala an ka kɔnze wagati la, ka taga dɛmɛ don yɔrɔ minw na balawow kɛra. N’an b’o kɛ, bɛɛ bena a ye k’u latanganin lo kafo kɔnɔ ani u tɛna siran.

15-17. a) Yezu be tilenninya jati cogo min na, a ka kɛwalew y’o yira cogo di? b) An be se ka Krista ladegi cogo di?

¹⁵ Ka kɛɲɛ ni Bibulu ye, Ala be koo minw jati koo tilenninw ye, n’an b’u sira tagama ka ɲɛsin bɛɛ ma, o lo ye “tilenninya” ye. Mun na an be se k’a fɔ ko Krista ka sariya be tilenninya lafasa?

¹⁶ A fɔlɔ, an k’a filɛ Yezu ka kɛwalew y’a yira a be tilenninya jati cogo min na. Yezu ka wagati la, diinan kuntigi minw tun ye Yahutuw ye, siya wɛrɛ mɔgɔw koo tun ka gwo olu ye. U tun be Yahutu tɔɔw mafiɲɛya ani u tun tɛ bonya la musow kan. Nka Yezu tun tɛ mɔgɔ bɔ mɔgɔ la, a tun be bɛɛ minɛ ni tilenninya ye. Siya wɛrɛ mɔgɔ minw lara a la, a tun be sɔn u ka kɛ a ka kalandenw ye (Mat. 8:5-10, 13). A tun be bɛɛ waaju, nafolotigiw fara fantanw kan (Mat. 11:5; Luka 19:2, 9). A tun tɛ fariya musow ma wala k’a fanga digi u kan. A tun b’u bonya ani k’u minɛ ni ɲumanya ye hali mɔgɔw tun be minw mafiɲɛya.—Luka 7:37-39, 44-50.

¹⁷ Kalan minw be sɔrɔ o la: An be Yezu ladegi n’an tɛ mɔgɔ woloma ani minw be sɔn k’an lamɛn, n’an b’u waaju. An b’o kɛ u mana kɛ nafolotigiw wala fantanw ye ani u ka diinan mana kɛ min o min ye. Balimacɛw be Yezu ladegi n’u be bonya la musow kan. N’an b’o koow kɛ, an be Krista ka sariya lo labatora.

18-19. Yezu ye mɔgɔw kalan mun lo la tilenninya koo la? An be kalan jumanw lo sɔrɔ o la?

¹⁸ A filanan, an k’a filɛ Yezu ye mɔgɔw kalan min na tilenninya koo la. A y’u kalan sariyakolow la. O sariyakolow tun bena a ka kalandenw dɛmɛ u ka tɔɔw minɛ ni tilenninya ye. Ɲɛyirali fɛ, Yezu y’a yira ko n’an b’a fɛ tɔɔw k’an minɛ ni tilenninya ye, an fana ka ɲi k’u minɛ ni tilenninya ye. N’an b’o kɛ, olu fana bena an minɛ ni tilenninya ye (Mat. 7:12). Nka, ni dɔ ye tilenbaliyako kɛ an na do? Yezu y’a fɔ a ka kalandenw ye ko n’u be “dɛmɛ ɲini [ Jehova] fɛ suu ni tile” walisa tilenninyako ka kɛ, u ka la a la ko a bena u jaabi (Luka 18:6, 7). O kuma ye layidu lo ye. O b’a yira ko gwɛlɛya minw b’an kan laban wagati nunu na, tilenninya tigi Ala b’o kala ma. A bena o koow ɲɛnabɔ tilenninya la a ka wagati latigɛnin na.—2 Tes. 1:6.

¹⁹ Kalan minw be sɔrɔ o la: Yezu ye mɔgɔw kalan sariyakolo minw na, n’an b’u labato, an bena tɔɔw minɛ ni tilenninya ye. N’u ye tilenbaliyako kɛ an na Sutana ka duniɲa kɔnɔ, k’a lɔn ko Jehova bena o koo ɲɛnabɔ tilenninya la, o b’an dusu saalo.

20-21. a) Kuntigiya kalifara minw ma, olu ka ɲi ka tɔɔw minɛ cogo di? b) Cɛɛ b’a yira cogo di ko a b’a muso kanu fɔɔ a be sɔn k’a yɛrɛ saraka a kosɔn? Facɛman ka ɲi k’a deenw minɛ cogo di?

²⁰ Kuntigiya kalifara minw ma, olu ka ɲi ka tɔɔw minɛ cogo di Krista ka sariya kɔrɔ? U ka ɲi ka danbe la tɔɔw kan ani k’u minɛ ni kanuya ye sabu Krista ka sariya juu sigira kanuya lo kan. U ka ɲi k’a to u hakili la ko Krista b’a fɛ an ka koo bɛɛ kɛ ni kanuya ye.

²¹ Denbaya kɔnɔ. Cɛɛ ka ɲi k’a muso kanu “i n’a fɔ Krista ye a ka jama kanu cogo min na.” (Efɛz. 5:25, 28, 29). A b’o kɛ n’a be sɔn k’a yɛrɛ saraka a muso kosɔn a kɛtɔ k’a nafa ɲini fɔlɔ. A be se ka gwɛlɛya cɛɛ dɔw ma ka kɛ n’o kanuya ɲɔgɔn ye. N’a sɔrɔ u lamɔna yɔrɔ min na, mɔgɔw man teli ka tɔɔw minɛ tilenninya ni kanuya la. A be se ka gwɛlɛya u ma k’u ka delinanko juguw dabila. Nka, u ka ɲi k’o kɛ walisa ka Krista ka sariya labato. Muso b’a cɛɛ bonya n’a b’a ye ko a cɛɛ be sɔn k’a yɛrɛ saraka ale kosɔn. Faa min b’a deenw kanu sɔbɛ la, ale t’u dusu kasi a ka kumaw wala a ka kɛwalew fɛ (Efɛz. 4:31). Nka, a b’a yira ko a deenw koo ka di a ye. O la, u tɛ siran ani u b’a ye k’u latanganin lo. Facɛman min b’o kɛ, a deenw b’a kanu ani u b’u jigi la a kan.

22. Ka kɛɲɛ ni 1 Piyɛri 5:1-3 ye, ‘sagaw’ ye jɔn ta lo ye ani u ka ɲi ka minɛ cogo di?

²² Kafo kɔnɔ. Diinan mɔgɔkɔrɔw ka ɲi k’a to u hakili la ko ‘sagaw’ ye Jehova ta lo ye, olu ta tɛ (Zan 10:16; 1 Piyɛri 5:1-3 kalan). Kumaden nunu b’o lo yira: “Ala . . . ka sagakulu,” “ka kɛɲɛ ni Ala sago ye” ani “minw kalifara aw ma.” Jehova b’a fɛ u k’ale ka sagaw minɛ ni kanuya  ani dususuman ye (1 Tes. 2:7, 8). Diinan mɔgɔkɔrɔ minw b’u ka kunkanbaara dafa ni kanuya ye, olu koo ka di Jehova ye. Kafodenw b’u kanu ani k’u bonya.

23-24. a) Diinan mɔgɔkɔrɔw ka ɲi ka mun lo kɛ n’u be jurumubaw koo ɲɛnabɔra? b) U ka ɲi k’u janto mun lo la n’u b’o koow ɲɔgɔn ɲɛnabɔra?

²³ Diinan mɔgɔkɔrɔw ka ɲi ka mun lo kɛ walisa ka jurumubaw koo ɲɛnabɔ? U tɛ koow kɛ i ko kiritigɛlaw ni cɛkɔrɔba minw tun be Musa ka sariya kɔrɔ. Olu tun be Alakow ani koo wɛrɛw ɲɛnabɔ. Nka Krista ka sariya kɔrɔ, diinan mɔgɔkɔrɔw be Alakow dɔrɔn lo ɲɛnabɔ ni jurumuba dɔ kɛra. U b’a lɔn ko ni mɔgɔ ye jamana ka sariya tiɲɛ wala ka mɔgɔ faga, Ala ye faamanw sigi walisa u k’o koow ɲɛnabɔ. O kɔrɔ ko olu be se k’o tigi don kaso la wala k’a waajibiya a ka alamani sara.—Ɔrɔm. 13:1-4.

²⁴ Diinan mɔgɔkɔrɔw be Alakow ɲɛnabɔ cogo di ni jurumuba dɔ kɛra? U be basigi Bibulu kan k’o koo sɛgɛsɛgɛ ani ka desizɔnw ta. U b’a to u hakili la ko Krista ka sariya basiginin be kanuya lo kan. Kanuya b’u lasun u k’u janto koo nin na ni kojuguba dɔ kɛra: O koo kɛra mɔgɔ o mɔgɔ la kafo kɔnɔ, u ka ɲi ka mun lo kɛ walisa k’a dɛmɛ? Ka ɲɛsin o koo kɛbaga ma, kanuya be diinan mɔgɔkɔrɔw lasun u ka jatiminɛ kɛ koo nunu kan: Yala o tigi nimisanin lo wa? Yala u be se k’o tigi dɛmɛ a ka jɛnɲɔgɔnya ɲuman kɛ tugun ni Jehova ye wa?

25. An bena ɲiningali juman lo jaabi barokun nata la?

²⁵ An be Ala waleɲuman lɔn kosɔbɛ sabu an be Krista ka sariya kɔrɔ! N’an bɛɛ b’an jija k’o sariya labato, kanuya be kɛ kafo kɔnɔ, bɛɛ b’a ye k’u latanganin lo ani ko nafa b’u la. Nka duniɲa nin kɔnɔ, mɔgɔ juguw be juguyara “ka taga.” (2 Tim. 3:13). O kama, an ka ɲi k’an janto an yɛrɛ la tuma bɛɛ. Mɔgɔ dɔ mana ben deen kan ka cɛnimusoko kɛ n’a ye, ni diinan mɔgɔkɔrɔw b’o koo ɲɛnabɔra, u be Ala ka tilenninya yira cogo di? An bena o jaabi barokun nata la.