1. Koo minw ka di an ye kosɔbɛ Yezu fɛ, u la dɔ ye juman ye? A ɲɛfɔ.

KOO minw ka di an ye kosɔbɛ Yezu fɛ, u la dɔ ye ko a b’a faamu gwɛlɛya minw be mɔgɔ dafabaliw kan. K’a to dugukolo kan, “mɔgɔ minw be nisɔndiya la,” a tun be “nisɔndiya ni olu ye, minw be kasi,” a tun be “kasi ni olu ye fana.” (Ɔrɔm. 12:15). Ɲɛyirali fɛ, loon dɔ, a y’a ka kalanden 70 ci ka taga waajuli kɛ ani mɔgɔw y’u lamɛn koɲuman. Tuma min na u ninsɔndiyanin kɔsegira, “Yezu nisɔndiyara kosɔbɛ Nii Senuman barika la.” (Luka 10:17-21). Nka, a ‘dusu kasira’ tuma min na a y’a ye Lazari saya ye min kɛ a ka mɔgɔ kanulenw na.—Zan 11:33.

2. Mun lo ye Yezu dɛmɛ ka makari mɔgɔw la?

² Yezu tun ye mɔgɔ dafanin ye. Nka, a tun be makari kosɔbɛ ani a tun b’a janto mɔgɔ dafabaliw la. Mun lo y’a dɛmɛ k’o kɛ? A fɔlɔ, Yezu tun be mɔgɔw kanu. I ko an y’a ye barokun tɛmɛnin na cogo min na, adamadenw koo tun ka di a ye kosɔbɛ (Talenw 8:31). O kanuya lo y’a lasun k’a ɲini k’u ka miiriyaw lɔn ka ɲɛ. Ciden Zan y’a ɲɛfɔ ko: “A be adamaden n’a kɔnɔnako bɛɛ lɔn.” (Zan 2:25). Yezu tun be makari kosɔbɛ tɔɔw la. Mɔgɔw tun b’a ye ko a b’u kanu. O kama, u tun be sɔn ka Masaya kibaro diiman lamɛn. N’an fana be makari mɔgɔw la kosɔbɛ, an bena se k’u dɛmɛ bɛrɛbɛrɛ waajuli la.—2 Tim. 4:5.

3-4. a) N’an be makari mɔgɔw la, an bena an ka waajuli baara jati cogo di? b) An bena mun lo lajɛ barokun nin na?

³ Ciden Pol tun b’a lɔn ko waajuli ye waajibiko ye ale ma. O kelen lo an fana fɛ (1 Kor. 9:16). Nka n’an be makari mɔgɔw la, an tɛna an ka waajuli baara jati waajibiko dɔrɔn ye. An bena a yira fana ko an b’an janto mɔgɔw la ani ko an b’a fɛ k’u dɛmɛ. An b’a lɔn ko “nisɔndiya be mɔgɔ sɔnni na ka tɛmɛ sɔrɔli kan.” (Kɛw. 20:35). N’an ka waajuli baara kuun ye ka tɔɔw dɛmɛ, an bena ninsɔndiya sɔrɔ a la kosɔbɛ.

 ⁴ An be se k’a yira cogo di ko an be makari mɔgɔw la waajuli la? An bena o lo lajɛ barokun nin na. Yezu tun be makari mɔgɔw la cogo min na, an bena a filɛ an be se ka kalan minw sɔrɔ a fɛ o koo la. O kɔ, an bena cogo naani lajɛ o minw na an bena se k’a ladegi.—1 Piyɛri 2:21.

5-6. a) Yezu makarila mɔgɔ jumanw lo la? b) Ezayi 61:1, 2 ka fɔta la, Yezu ye minw waaju, mun na olu hinɛ y’a minɛ?

⁵ An ka ɲɛyirali dɔ lajɛ min b’a yira cogo min na Yezu be makari mɔgɔw la. Loon dɔ, Yezu n’a ka kalandenw tun sɛgɛnnin lo kosɔbɛ sabu u ye waajuli kɛ tile kuru bɛɛ kɔnɔ. U tun ma “waati yɛrɛ sɔrɔ ka dumuni kɛ.” O kama, Yezu y’a fɔ a ka kalandenw ye ko: “Aw ye na an ka taga danna yɔrɔ dɔ la janko aw ka lafiɲɛ dɔɔni.” Nka, mɔgɔ caaman bolila ka kɔn u ɲɛ u tagayɔrɔ la. Tuma min na Yezu sera yen ani ka jama ye, a ye mun lo kɛ do? O mɔgɔw “hinɛ donna a la, bari u tun be i ko sagaw, dɛndɛbaga te minw na. A y’a daminɛ k’u kalan fɛɛn caaman na.”—Mariki 6:30-34.

⁶ Mun na o mɔgɔw hinɛ ye Yezu minɛ? A fɔra ko u tun be “i ko sagaw, dɛndɛbaga te minw na.” N’a sɔrɔ Yezu y’a kɔrɔsi k’o mɔgɔw cɛma, dɔw ye fantanw ye ani u be baara gwɛlɛw kɛ walisa k’u ka denbaya mako wasa. N’a sɔrɔ dɔ wɛrɛw dusu kasinin lo sabu u ka mɔgɔ kanulen dɔ sara. N’o lo, a be komi Yezu y’a faamu min b’u kan. I ko an y’a ye barokun tɛmɛnin na cogo min na, Yezu yɛrɛ y’o gwɛlɛya dɔw sɔrɔ ka ye. A y’a ɲini k’o mɔgɔw dusu saalo ni kibaro diiman ye sabu a tun b’a janto tɔɔw la.—Ezayi 61:1, 2 kalan.

7. An be se ka Yezu ladegi cogo di?

⁷ An be kalan juman lo sɔrɔ Yezu fɛ? I ko Yezu, an fana sigiɲɔgɔnw “be i ko sagaw, dɛndɛbaga te minw na.” Gwɛlɛya caaman b’u kan. U mako be fɛɛn min na, o b’an bolo: Ala ka Masaya kibaro diiman (Yir. 14:6). O kama, an b’an Matigi ladegi  an kɛtɔ ka kibaro diiman fɔ mɔgɔw ye. An b’o kɛ sabu an be “makari barikatan na, ani fantan” na (Zab. 72:13). Mɔgɔw makari b’an na ani an b’a fɛ ka dɔ kɛ dɔ ye walisa k’u dɛmɛ.

8. Cogo fɔlɔ juman na an be se k’a yira ko an be makari mɔgɔw la waajuli la? Ɲɛyirali dɔ fɔ.

⁸ An be mɔgɔ minw waaju, mun lo be se k’an dɛmɛ k’a yira ko an be makari u la? An k’a ɲini k’an yɛrɛ bila u nɔɔ na. An k’u minɛ fana i ko an b’a fɛ mɔgɔw k’an minɛ cogo min na * (Mat. 7:12). An ka cogo naani lajɛ, o minw bena an dɛmɛ k’a yira ko an be makari mɔgɔw la waajuli la. A fɔlɔ, an be mɔgɔ minw waaju, an k’a filɛ u kelen kelen bɛɛ mako be min na. N’an be kibaro diiman fɔra, an be komi dɔgɔtɔrɔw. Dɔgɔtɔrɔ ɲuman be miiri koɲuman k’a filɛ banabagatɔ kelen kelen bɛɛ mako be min na. A be banabagatɔ ɲininga. Ni banabagatɔ b’a ɲɛfɔra a ye yɔrɔ min b’ale dimina, a b’a lamɛn koɲuman. Sanni dɔgɔtɔrɔ ka sin ka fura sɛbɛ k’a di banabagatɔ ma, a be wagati ta k’a filɛ min b’a la. O kɔ, a be sɔrɔ ka fura bɛnnin sɛbɛ k’a di a ma. O cogo kelen na, an man ɲi k’a ɲini ka baro daminɛ ni mɔgɔ kelen kelen bɛɛ ye cogo kelen na waajuli la. Nka, an k’a ɲini ka mɔgɔ kelen kelen bɛɛ ka koow cogoya faamu ani k’a ka miiriya lɔn.

9. An man ɲi ka miiri ko an be mun lo lɔn? A ɲɛfɔ.

⁹ N’an be mɔgɔ dɔ waajura, an kana a miiri ko an b’o tigi ka koow cogoya ani a ka lannakow lɔn ka ban (Talenw 18:13). Nka, an ka ɲiningaliw kɛ nɛmɛnɛmɛ walisa k’o tigi ka koow cogoya ani a ka lannakow lɔn (Talenw 20:5). N’a bɛnnin lo an ka mara la, an be se k’a ɲininga koo nunu na: a be baara min kɛ, a ka denbaya, koo minw y’a sɔrɔ a ka ɲɛnamaya kɔnɔ ani a ka miiriya ye min ye. Ɲiningaliw sababu fɛ, an b’a to mɔgɔw k’a fɔ an ye fɛɛn min kama u mako be kibaro diiman na. N’an y’o lɔn, an be se ka makari u la koo tigitigi dɔw kosɔn. U mako jɔnjɔn be min na, an bena se k’o lase u ma i ko Yezu tun b’a kɛ cogo min na.—1 Korɛntikaw 9:19-23 lajɛ.

10-11. Ka kɛɲɛ ni 2 Korɛntikaw 4:7, 8 ye, cogo 2nan juman na an be se k’a yira ko an be makari tɔɔw la? Ɲɛyirali dɔ fɔ.

¹⁰ A filanan, an be mɔgɔ minw waaju, an ka miiri k’a filɛ u ka ɲɛnamaya be cogo min na. N’a sɔrɔ a tɛna gwɛlɛya an ma k’u ka koow cogoya faamu. Mun na do? Sabu i ko olu, an ye jurumutɔw ye ani gwɛlɛyaw b’an kan fana (1 Kor. 10:13). An b’a lɔn ko duniɲa nin kɔnɔ,  ɲɛnamaya ka gwɛlɛ kosɔbɛ. An yɛrɛ be sera ka gwɛlɛyaw muɲu Jehova ka dɛmɛ lo barika la (2 Korɛntikaw 4:7, 8 kalan). Nka minw tɛ teriya kɛra ni Jehova ye, miiri k’a filɛ olu be bondori kɛra cogo min na walisa k’u ka gwɛlɛyaw muɲu. O mɔgɔw makari b’an minɛ i ko a tun be Yezu minɛ cogo min na. O kama, an b’a fɛ ka “kibaru diman fɔ” u ye.—Ezayi 52:7.

¹¹ An ka balimacɛ dɔ ka koo lajɛ min tɔgɔ ko Sergey. Sanni a ka tiɲɛn lɔn, a tun be maloya ani kuma tun man di a ye. A tun ka gwɛlɛ a ma kosɔbɛ ka kuma ni mɔgɔw ye. Kɔfɛ, Sergey sɔnna bibulukalan ma. A ko: “Bibulukalan kɛtɔ, n’ y’a faamu ko waajibi lo kerecɛnw fɛ u k’u ka lanaya kofɔ mɔgɔ wɛrɛw ye. Tiɲɛn na, ne tun b’a miiri ko n’ tɛna se k’o kɛ abada.” Nka, mɔgɔ minw ma kibaro diiman mɛn fɔlɔ, Sergey miirila olu koo la. A y’a faamu ko u ka ɲɛnamaya man nɔgɔ hali dɔɔni sabu u tɛ Jehova lɔn. A ko: “Ne tun be koo kura minw kalanna, o y’a to n’ ye hɛɛrɛ sɔrɔ ani n’ dusu lafiyara kosɔbɛ. N’ b’a lɔn ko mɔgɔ wɛrɛw fana mako b’o tiɲɛnkalanw na.” Tɔɔw makari tora ka Sergey minɛ kosɔbɛ minkɛ, a ye jagwɛlɛya sɔrɔ ka to ka waajuli kɛ. A ko: “A barila n’ na k’a ye ko n’ hakili sigira kosɔbɛ sabu n’ be to ka Bibulu kofɔ tɔɔw ye. Ka to ka n’ ka lannakow fɔ tɔɔw ye, o ye dɔ fara n’ ka limaniya barika kan fana.” *

12-13. An be bibulukalan kɛ ni mɔgɔ minw ye, mun na an ka ɲi ka muɲu u kɔrɔ? Ɲɛyirali dɔ fɔ.

¹² A sabanan, an be bibulukalan kɛ ni minw ye, an ka muɲu u kɔrɔ. An be Bibulu ka tiɲɛnkalan minw lɔn koɲuman, an k’a to an hakili la ko n’a sɔrɔ o mɔgɔw ma deli ka miiri u la. Mɔgɔ caaman ka lannakow ka di u ye kosɔbɛ. N’a sɔrɔ u ka diinan koo ka gwɛlɛ u ma sabu a b’u kaan bɛn n’u ka denbayamɔgɔw, u ka siyamɔgɔw ani u sigiɲɔgɔnw ye. An be se k’o ɲɔgɔnnamɔgɔw dɛmɛ cogo di?

 ¹³ An ka miiri ɲɛyirali nin na: Ni pɔɔn kɔrɔ dɔ tiɲɛna ani u ka ɲi ka dɔ wɛrɛ lɔ a nɔɔ na, u be mun lo kɛ do? Tuma caaman na, u be to ka pɔɔn kura lɔ ani mɔgɔw bele be to ka tɛmɛ kɔrɔman kan. Ni kuraman lɔra ka ban, u be sɔrɔ ka kɔrɔman ci. O cogo kelen na, komi mɔgɔw ka lannako “kɔrɔw” ka di u ye, an man ɲi ka kɔn k’a fɔ u ye u k’u to yen. U tɛ Bibulu ka tiɲɛnkalan minw lɔn, an k’u dɛmɛ fɔlɔ u k’o kalan “kuraw” faamu ani u koo ka diya u ye. O kɔ le, u bena sɔn k’u ka lannako kɔrɔw to yen. Walisa ka mɔgɔw dɛmɛ u k’o yɛlɛmaniw kɛ, o be se ka wagati caaman ta.—Ɔrɔm. 12:2.

14-15. Mɔgɔ minw tɛ bɛrɛ wala foyi lɔn ɲɛnamaya banbali jigiya koo la dugukolo kan, an be se k’olu dɛmɛ cogo di? Ɲɛyirali dɔ fɔ.

¹⁴ N’an be muɲu mɔgɔw kɔrɔ waajuli la, an tɛna a ɲini u fɛ u ka Bibulu ka tiɲɛnkalanw faamu ani ka sɔn u ma u siɲɛ fɔlɔ k’u mɛn. Nka, u makari b’an na minkɛ, an bena a ɲini k’u dɛmɛ dɔɔni dɔɔni u ka miiri koɲuman Bibulu ka kalanw kan. Ɲɛyirali fɛ, an b’a lɔn ko an bena ɲɛnamaya kɛ fɔɔ abada alijɛnɛ kɔnɔ, dugukolo lo kan. Mɔgɔ caaman tɛ bɛrɛ wala foyi lɔn o koo la. N’a sɔrɔ olu fɛ saya ye koo bɛɛ laban lo ye. Wala u b’a miiri ko mɔgɔ ɲumanw bɛɛ be taga sankolo la u sanin kɔ. An be se k’o mɔgɔw dɛmɛ cogo di u k’a faamu ko an bena ɲɛnamaya kɛ fɔɔ abada dugukolo lo kan?

¹⁵ Balimacɛ dɔ y’a lakali ale be sera ka mɔgɔw dɛmɛ cogo min na. A b’a daminɛ ka Zɛnɛzi 1:28 kalan. O kɔ, a b’a lamɛnnikɛla ɲininga Ala tun b’a fɛ adamadenw ka ɲɛnamaya kɛ cogo min na ani yɔrɔ min na. Mɔgɔw ka teli k’a jaabi ko: “Dugukolo kan hɛɛrɛ dafanin na.” Balimacɛ be vɛrise wɛrɛ kalan: Ezayi 55:11. N’a y’o kalan ka ban, a b’a lamɛnnikɛla ɲininga ni Ala ka laɲinita yɛlɛmana. Tuma caaman na, u b’a jaabi ko a ma yɛlɛma. A laban, balimacɛ be Zaburuw 37:10, 11 kalan. O kɔ, a be ɲiningali kɛ adamadenw ka siniɲasigi bena kɛ cogo min na. Balimacɛ be baara kɛ ni Bibulu ye o cogo lo la. O y’a to a sera ka mɔgɔ caaman dɛmɛ k’a faamu ko Ala bele b’a fɛ mɔgɔ ɲumanw ka ɲɛnamaya kɛ fɔɔ abada alijɛnɛ kɔnɔ, dugukolo kan.

16-17. Ka kɛɲɛ ni Talenw 3:27 ye, cogo jumanw na an be se k’a yira ko an be makari tɔɔw la? Ɲɛyirali dɔ fɔ.

¹⁶ A naaninan, an ka miiri k’a filɛ an be se ka min kɛ walisa k’a yira mɔgɔw la ko an b’an janto u la. Ɲɛyirali fɛ, yala an nana bɔ u ye wagati dɔ la min bɛnnin tɛ wa? N’o lo, an ka yafa deli u fɛ ani an k’a fɔ u ye ko an bena segi ka na wagati dɔ la min bɛnnin be u ma. N’u be baara dennin dɔ kɛra ani u mako be dɛmɛ na do? Dɔw fana tɛ se ka bɔ u ka soo bana wala kɔrɔya kosɔn ani u mako b’a la mɔgɔ dɔ ka koo dɔ kɛ u ye wala ka taga fɛɛn dɔ  san u ye. O koow ɲɔgɔn na, an be se k’o mɔgɔw dɛmɛ.—Talenw 3:27 kalan.

¹⁷ Balimamuso dɔ ye nafa sɔrɔ sabu a ye koo ɲuman dɔ kɛ mɔgɔw be se k’a jati ko min tɛ bɛrɛ ye. Mɔgɔ dɔw ka denɲɛnin sara ani u makari y’a minɛ minkɛ, a ye lɛtɛrɛ ci u ma. O lɛtɛrɛ kɔnɔ, a ye vɛrise dɔw sɛbɛ minw be mɔgɔ dusu saalo. O lɛtɛrɛ ye mun lo kɛ o denbayamɔgɔw la do? O denɲɛnin bamuso y’a sɛbɛ ko: “Kunu, n’ dusu tun kasinin lo kojugu. I tɛ se k’a lɔn i ka lɛtɛrɛ y’an dɛmɛ cogo min na. N’ b’i waleɲuman lɔn kosɔbɛ sabu a y’an dusu saalo yɛrɛ le. N’ y’o lɛtɛrɛ kalan siɲɛ 20 ni kɔ. I ye kuma ɲumanw fɔ o lɛtɛrɛ kɔnɔ. I y’a yira ko i b’i janto anw na ani i y’an jija cogo min na, a tɛ se ka fɔ. An b’i fo n’an dusu bɛɛ ye.” Mɔgɔ minw be tɔɔrɔla, an k’an yɛrɛ bila u nɔɔ na ani an ka dɔ kɛ dɔ ye walisa k’u dɛmɛ. N’an b’o kɛ, siga t’a la, an bena nafa sɔrɔ o la.

18. Ka kɛɲɛ ni 1 Korɛntikaw 3:6,7 ye, an ka ɲi ka mun lo to an hakili la an ka waajuli baara koo la?

¹⁸ Jehova be min ɲini an fɛ waajuli la, an ka ɲi k’o faamu koɲuman. An be se ka dɔ kɛ dɔ ye ka mɔgɔw dɛmɛ u ka Ala lɔn. Nka, anw lo t’o baara fanba kɛ (1 Korɛntikaw 3:6, 7 kalan). Jehova lo b’a to mɔgɔw be na ale yɔrɔ (Zan 6:44). A laban, mɔgɔ kelen kelen bɛɛ dusukun cogoya lo b’a to a be sɔn wala a be ban kibaro diiman ma (Mat. 13:4-8). Yezu tun ye karamɔgɔ ɲuman ye min ɲɔgɔn ma deli ka sɔrɔ dugukolo kan! Nka, an k’a to an hakili la ko mɔgɔw fanba ma sɔn a ka kumaw ma. O kama, an b’a ɲinina ka mɔgɔ minw dɛmɛ, n’u fanba ma sɔn k’an lamɛn, an kana an fari faga.

19. N’an be makari mɔgɔw la waajuli baara la, an be nafa jumanw lo sɔrɔ o la?

¹⁹ N’an be makari mɔgɔw la, an bena nafa sɔrɔ an ka waajuli baara la. An ka waajuli baara bena diya an ye kosɔbɛ. Ninsɔndiyaba min b’a la ka mɔgɔw sɔn, an bena o sɔrɔ. Ka fara o kan, ‘minw bɛɛ labɛnnin lo ka sɔn ɲɛnamaya banbali ma,’ a bena nɔgɔya olu ma ka sɔn kibaru diiman ma (Kɛw. 13:48, NW). “O la, ni koɲumankɛ see b’an ye tuma min na, an k’o kɛ mɔgɔ bɛɛ ye.” (Gal. 6:10). N’an y’o kɛ, an bena ninsɔndiya sɔrɔ ka nɔɔrɔ la an sankolola Faa kan.—Mat. 5:16.