1. Adama ni Awa bɔnɛna mun lo la ani o nɔfɛkow kɛra mun lo ye?

ELE ka miiri la, jɔn lo ka ɲi ka sariya sigi ɲuman ni juguman koo la? Yiri min b’a to mɔgɔ be koo ɲuman ni koo jugu lɔn ka bɔ ɲɔgɔn na, Adama ni Awa y’a latigɛ k’o deen dumu. O cogo la, u y’a yira ka gwɛ u be min miiri Jehova n’a ka sariyaw koo la. U y’a latigɛ k’u yɛrɛ ka sariya sigi ɲuman ni juguman koo la (Zɛnɛzi 3:22). Miiri k’a filɛ u bɔnɛna min na. Jɛnɲɔgɔnya min tun b’olu ni Jehova cɛ, u bɔnɛna o la. Sababu min tun dira u ma ka ɲɛnamaya kɛ fɔɔ abada, u bɔnɛna o la fana ani u ye jurumu ni saya lase u bɔnsɔnw ma (Ɔrɔm. 5:12). O kɛra bɔnɛba ye dɛ!

2-3. a) Etiyopika ye mun lo kɛ tuma min na Filipu y’a waaju? b) An be duga jumanw lo sɔrɔ n’an batizera? An bena ɲiningali jumanw lo lajɛ?

² Adama ni Awa y’a latigɛ ka bɔ Jehova kɔ. An k’u ka kokɛcogo suma ni Etiyopika ta ye. Tuma min na Filipu y’a waaju, a sinna ka batize. Mun na do? A y’o kɛ sabu Jehova ni Yezu ye min kɛ a ye, a tun b’u waleɲuman lɔn kosɔbɛ o kosɔn (Kɛw. 8:34-38). I ko Etiyopika, n’an fana y’an yɛrɛkun di Ala ma ka batize, an b’a yira ka gwɛ ko Jehova ni Yezu ye min kɛ an ye, an b’u waleɲuman lɔn o kosɔn. An b’a yira fana ko an jigi lanin be Jehova kan ani ko an sɔnna a ma ko joo b’ale kelenpe lo fɛ ka sariya sigi ɲuman ni juguman koo la.

³ Miiri k’a filɛ an be duga minw bɛɛ sɔrɔ n’an be Jehova bato! Adama ni Awa bɔnɛna min na, an be ni jigiya ye k’o sɔrɔ, hali ɲɛnamaya banbali yɛrɛ. Jehova b’an ka filiw yafa ani a b’a to an be kɛ ni dusukun ɲuman ye sabu an limaniyanin lo Yezu Krista la (Mat. 20:28; Kɛw. 10:43). Jehova sagokɛlaw y’a ka denbayamɔgɔw ye minkɛ, an y’o  denbayamɔgɔ dɔ ye fana ani Jehova ye layidu ta ko a bena siniɲasigi ɲuman di an ma (Zan 10:14-16; Ɔrɔm. 8:20, 21). O dugaw bɛɛ n’a ta, mɔgɔ minw ye lɔnniya sɔrɔ Jehova koo la, olu dɔw be sigasiga ka Etiyopika ladegi. Mun lo be se k’u bali ka batize? U be se ka see sɔrɔ o gwɛlɛyaw kan cogo di?

4-5. Gwɛlɛya jumanw lo tun be Avery ni Hannah kan?

⁴ U lanin t’u yɛrɛ la. Avery ye kanbele ye ani a bangebagaw ye Jehova Seerew ye. Mɔgɔw b’a facɛ tɔgɔɲuman fɔ sabu a ye faa kanutigi ni diinan mɔgɔkɔrɔ ɲuman ye. O n’a ta bɛɛ, Avery tun be sigasiga ka batize. Mun na do? A y’a fɔ ko: “N’ facɛ be koo ɲuman minw kɛ, ne tun ma la a la ko n’ bena se k’o ɲɔgɔn kɛ.” Avery tun ma la a la ko a bena se ka kunkanbaara dɔw dafa. A ko: “N’ tun be siranna u k’a ɲini n’ fɛ loon dɔ ko n’ ka delili kɛ jama ɲɛɛ na, ka forobakalan kɛ wala ka balimaw ɲɛminɛ waajuli la.”

⁵ Hannah be ni saan 18 ye ani a tun lanin t’a yɛrɛ la hali dɔɔni. A bangebagaw y’a lamɔ tiɲɛn sira kan. O n’a ta bɛɛ, a tun ma la a la ko a bena se ka Jehova ka sariyaw labato. Mun na do? Sabu a tun b’a miiri ko nafa foyi t’ale la. Tuma dɔw la yɛrɛ, a tun b’a fari yɔrɔ dɔw tigɛtigɛ dusukasi kosɔn. O tun be koo tɔɔ juguya le. A y’a fɔ ko: “N’ tun be min kɛ, n’ tun m’o fɔ mɔgɔ si ye ka ye, hali n’ bangebagaw yɛrɛ. N’ tun b’a miiri ko Jehova tɛna sɔn n’ ka batoli ma abada sabu n’ tun be koo jugu kɛ n’ yɛrɛ la.”

6. Mun lo tun be Vanessa balila ka batize?

⁶ U teriw. Vanessa be ni saan 22 ye. A ko: “Terimuso sɔbɛ dɔ tun be n’ fɛ ani an tun be ɲɔgɔn lɔn kabi saan 10 ɲɔgɔn.” Nka, Vanessa terimuso tun t’a jija a ka batize. O tun be Vanessa dusu tiɲɛ. A ko: “A ka gwɛlɛ n’ ma ka teriw sɔrɔ. O kama, n’ tun b’a miiri ko ni n’ ye daan sigi an ka teriya la, n’ tɛna se ka teri sɔbɛ sɔrɔ tugun.”

7. Makayla tun be siranna mun lo ɲɛ ani mun na do?

⁷ U be siran ka kojuguba kɛ. Makayla tun be ni saan 5 ye tuma min na u y’a kɔrɔcɛ gwɛn ka bɔ kafo kɔnɔ. O sungurunin bonyatɔ, a y’a ye a kɔrɔcɛ ka kɛwalew tun be a bangebagaw tɔɔrɔ cogo min na. Makayla ko: “N’ tun be siranna ko ni n’ batizera, n’a sɔrɔ n’ bena koo jugu dɔ kɛ ani u bena n’ gwɛn ka bɔ kafo kɔnɔ. O tun bena dɔ fara n’ bangebagaw ka dusukasi kan.”

8. Miles tun be siranna mun lo ɲɛ?

 ⁸ U be siran ko mɔgɔw bena u kɛlɛ. Miles ye kanbele ye. A bangebagaw tɛ ɲɔgɔn fɛ tugun. A facɛ ye Jehova batobaga ye, nka a bamuso tɛ Jehova Seere ye. Miles ko: “N’ tora ni n’ bamuso ye saan 18 kɔnɔ. Nka, n’ tun be siranna k’a fɔ a ye ko n’ b’a fɛ ka batize. N’ y’a ye a ye koow ta cogo min na tuma min na n’ facɛ kɛra Jehova Seere ye. O kama, n’ tun be siranna a kana n’ kɛlɛ.”

9. Jehova muɲunin lo ani a b’an kanu kosɔbɛ. N’i y’a ɲini k’o faamu ka ɲɛ, mun lo bena kɛ?

⁹ Adama ni Awa banna ka Jehova sago kɛ sabu u tun t’a kanu kosɔbɛ. O n’a ta bɛɛ, Jehova y’a to u ye sijan sɔrɔ walisa u ka deenw wolo ani u k’a latigɛ u yɛrɛ ma u bena u lamɔ cogo min na. A ma mɛɛn, u ka murutili nɔfɛkow y’a yira ka gwɛ k’u ye hakilintanyako lo kɛ. U dencɛ fɔlɔ y’a dɔgɔcɛ faga k’a sɔrɔ a ma foyi kɛ a la. Fariyakow nana caya dugukolo kan ani mɔgɔw fanba tora ka miiri u yɛrɛ nafa dɔrɔn lo la (Zɛnɛzi 4:8; 6:11-13). Nka, adamaden minw bɛɛ b’a fɛ ka Jehova sago kɛ, a ye labɛn dɔ kɛ walisa k’olu kisi (Zan 6:38-40, 57, 58). Jehova muɲunin lo ani a b’an kanu cogo min na, n’i y’a ɲini k’o faamu ka ɲɛ, o bena a to i b’a kanu kosɔbɛ. I tɛna Adama ni Awa ladegi, nka i bena a ɲini k’i yɛrɛkun di Jehova ma.

10. N’i be miiri Zaburuw 19:8 kɔnɔnakumaw na, mun na o be se k’i dɛmɛ ka Jehova sago kɛ?

¹⁰ To k’a ɲini ka Jehova lɔn ka ɲɛ. N’i tora ka dɔ fara i ka lɔnniya kan Jehova koo la, i bena la a la kosɔbɛ ko i be se ka Jehova sago kɛ kantigiya la. Avery min kofɔra ka tɛmɛ, ale ko: “Layidu min kofɔra Zaburuw 19:8 kɔnɔ, n’ ye sɛgɛsɛgɛri kɛ o koo la ani n’ miirila a kan minkɛ, n’ lara n’ yɛrɛ la.” (O vɛrise kalan). Avery ye Jehova kanu kosɔbɛ fana sabu a y’a ye Jehova y’o layidu dafa cogo min na. N’an be Jehova kanu, o b’a to an be la a la ko an be se k’a sago kɛ. Nka, o dɔrɔn tɛ. O kanuya b’an dɛmɛ fana ka ban ka koo dɔw kɛ  minw bena Jehova dusu tiɲɛ. Ka fara o kan, o be fanga di an ma ka Jehova sago kɛ. Hannah min kofɔra ka tɛmɛ, ale ko: “N’ ka Bibulu kalan ni n’ ka kelenna kalan sababu fɛ, n’ y’a faamu ko ni n’ be koo jugu kɛra n’ yɛrɛ la, n’ be Jehova lo hakɛ tara.” (1 Piyɛri 5:7). Min fɔra Ala ka Kuma kɔnɔ, Hannah y’o sira tagama (Zaki 1:22). Mun lo sɔrɔla o la? A ko: “N’ tun mana a ye ko ka mɛnni kɛ Jehova fɛ o be n’ nafa, o tun be n’ lasun k’a kanu kosɔbɛ. Sisan, n’ lanin b’a la ko tuma o tuma ni n’ mako be Jehova ka dɛmɛ na, a bena n’ dɛmɛ.” Hannah t’a fari tigɛtigɛ tugun. A y’a yɛrɛkun di Jehova ma ka batize.

11. Vanessa ye mun lo kɛ walisa ka teri ɲumanw sɔrɔ ani o b’an dɛmɛ ka mun lo faamu?

¹¹ I teriw sugandi ka ɲɛ. Vanessa min kofɔra dakun tɛmɛninw na, kɔfɛ ale y’a faamu ko a terimuso tun b’a balila ka Jehova sago kɛ. O kama, a ye daan sigi u ka teriya la. Nka a ma dan o dɔrɔn ma. A y’a jija kosɔbɛ fana ka teri kuraw sɔrɔ kafo kɔnɔ. A ko Nuhun n’a ka denbayamɔgɔw ka ɲɛyirali ɲuman y’ale dɛmɛ. A y’a fɔ fana ko: “Mɔgɔ minw tɛ Jehova bato, u tun b’olu cɛma. Nka, u tun be jɛnɲɔgɔnya ɲuman kɛ ni ɲɔgɔn ye.” Vanessa batizera ani o kɔ, a kɛra piyɔniye ye. Sisan a ko: “O ye n’ dɛmɛ ka teri ɲumanw sɔrɔ n’ ka kafo kɔnɔ. O kɛra sababu ye n’ ye teri ɲumanw sɔrɔ kafo wɛrɛw kɔnɔ fana.” Jehova ye baara min kalifa an ma, n’i b’i seko bɛɛ kɛ o baara la, ele fana bena teri ɲumanw sɔrɔ.—Mat. 24:14.

12. Adama ni Awa tun tɛ ni siranya sifa juman lo ye ani o nɔfɛko kɛra mun lo ye?

¹² Kɛ ni Ala ɲɛsiran ye. Siranya dɔw b’an nafa. Ɲɛyirali fɛ, an ka ɲi ka siran ka Jehova dusu tiɲɛ (Zab. 111:10). Ni Adama ni Awa tun be n’o siranya ɲɔgɔn ye, u tun tɛna muruti Jehova ma. U murutinin kɔ, u ɲɛɛw yɛlɛla. O kɔrɔ, u bɔra a kala ma k’u kɛra jurumutɔw ye. Kɔfɛ, u ye jurumu ni saya lase u deenw ma. U y’a faamu k’u ma mɛnni kɛ Ala fɛ. O sen fɛ, u y’a lɔn k’u fari lakolon lo ani u maloyara. O kama, u y’a ɲini k’u yɛrɛ sutara.—Zɛnɛzi 3:7, 21.

13-14. a) Ka kɛɲɛ ni 1 Piyɛri 3:21 ye, mun na an man ɲi ka siran kojugu saya ɲɛ? b) Mun na an ka ɲi ka Jehova kanu?

 ¹³ Tiɲɛn lo ko an ka ɲi ka siran ka Jehova dusu tiɲɛ. Nka, an man ɲi ka siran kojugu saya ɲɛ. Jehova ye labɛnw kɛ walisa an ka ɲɛnamaya banbali sɔrɔ. N’an ye jurumu kɛ ani n’an nimisara sɔbɛ la, Jehova bena yafa an ma. A bena o kɛ sabu an lanin b’a la ko a Dencɛ y’a niin di an kosɔn. An b’a yira cogo jɔnjɔn minw na ko an limaniyanin lo, u la dɔ ye k’an yɛrɛkun di Ala ma ani ka batize.—1 Piyɛri 3:21 kalan.

¹⁴ An ka ɲi ka Jehova kanu koo caaman kosɔn. An be fɛɛn ɲuman minw diyabɔ loon o loon, ale lo b’o di an ma. A b’an kalan fana a sagonata ani a yɛrɛ koo la (Zan 8:31, 32). Ka fara o kan, a ye kerecɛn kafo sigi walisa k’an ɲɛminɛ ani k’an dɛmɛ Alako ta fan fɛ. A b’an dɛmɛ fana k’an ka gwɛlɛyaw muɲu sisan yɛrɛ ani a be jigiya di an ma ka ɲɛnamaya kɛ fɔɔ abada hɛɛrɛ dafanin na (Zab. 68:20; Yir. 21:3, 4). Jehova ye fɛɛn minw bɛɛ kɛ an ye walisa k’a yira ko a b’an kanu, an ka miiri o la. O bena an lasun k’a kanu. N’an do be Jehova kanu, an bena kɛ ni Ala ɲɛsiran ye. O kɔrɔ, an bena siran k’a dusu tiɲɛ sabu an b’a kanu kosɔbɛ.

15. Makayla ye see sɔrɔ a ka siranya kan cogo di?

¹⁵ Makayla min kofɔra ka tɛmɛ ani a tun be siran ka kojuguba kɛ, ale ye see sɔrɔ o siranya kan. A sera k’o kɛ cogo di? A ye see sɔrɔ a ka siranya kan tuma min na a y’a faamu ko Jehova be yafa kosɔbɛ. A y’a fɔ ko: “N’ y’a faamu ko an bɛɛ ye mɔgɔ dafabaliw ye ani ko an be fili. Nka, n’ y’a faamu fana ko Jehova b’an kanu ani ko a bena yafa an ma kunmabɔsara barika la.” Makayla be ni kanuya min ye Jehova koo la, o y’a lasun k’a yɛrɛkun di a ma ani ka batize.

16. Miles ye see sɔrɔ a ka siranya kan cogo di?

¹⁶ Miles min kofɔra ka tɛmɛ ani a tun be siranna k’a fɔ a bamuso ye ko a b’a fɛ ka batize, ale ye ladili ɲini kafokulu kɔrɔsibaga dɔ fɛ. Miles ko: “Ale fana bangebaga kelen dɔrɔn lo tun ye Jehova Seere ye. A ye n’ dɛmɛ ka miiri n’ be se ka min fɔ walisa ka n’ bamuso dɛmɛ a k’a faamu ko ne yɛrɛ lo y’a latigɛ ka batize. A ye n’ dɛmɛ fana walisa n’ ka se k’a ɲɛfɔ n’ bamuso ye ko n’ facɛ tun tɛ n’ waajibiyara k’o kɛ.” Miles bamuso ma koow ta cogo ɲuman na. Kɔfɛ, a waajibiyara ka bɔ a bamuso ka soo. Nka Miles ma bɔ a ka desizɔn kan. A ko: “N’ kɛtɔ k’a faamu Jehova ye koo ɲuman minw bɛɛ kɛ n’ ye, o ye dusukun sɔrɔ. N’ mana miiri koɲuman Yezu ka kunmabɔsara koo la, n’ b’a faamu Jehova be n’ kanu kosɔbɛ cogo min na. O miiriya lo ye n’ lasun ka n’ yɛrɛkun di Jehova ma ani ka batize.”

17. Sababu dira an bɛɛ ma an ka mun lo kɛ?

¹⁷ Tuma min na Awa ye yiriden dumu Edɛn nankɔ kɔnɔ, a murutira a Faa ma. Adama fana murutira Ala ma. O cogo la, a y’a yira ko Jehova ye koo ɲuman minw bɛɛ kɛ a ye, a t’a waleɲuman lɔn o kosɔn. Sababu dira an bɛɛ ma k’a yira ko an ma sɔn Adama ni Awa ka desizɔn ma. Jehova be koo minw bɛɛ kɛ an ye, an ka ɲi k’a waleɲuman lɔn o kosɔn. N’an ye batɛmu ta, an b’a yira Jehova la ko an lanin b’a la ko joo b’ale lo fɛ k’a latigɛ min ka ɲi ani min man ɲi. An b’a yira fana ko an b’an Faa kanu ani ko an jigi lanin b’a kan.

18. I be se ka Jehova sago kɛ ni kantigiya ye cogo di?

¹⁸ An batizenin kɔ, min ka gwɛlɛ, o ye ka ban k’an sago kɛ ani ka Jehova ka sariyaw labato an ka loon o loon ɲɛnamaya kɔnɔ. Nka, mɔgɔ miliyɔn caaman be ɲɛnamaya kɛra o cogo lo la loon o loon. I be se k’u ladegi n’i tora ka koo nunu kɛ: ka dɔ fara i ka lɔnniya kan Bibulu koo la, ka jɛn n’i balimaw ye tuma o tuma ani i ye min faamu i Faa kanutigi koo la, k’o kofɔ tɔɔw ye ni kisɛya ye (Eburuw 10:24, 25). Jehova be tɛmɛ a ka Kuma n’a ka ɔriganisasiyɔn fɛ ka ladiliw di an ma. N’i ka ɲi ka desizɔnw ta, i janto o ladiliw la (Ezayi 30:21). N’i y’o kɛ, i ka koow bɛɛ bena ɲɛ.—Talenw 16:3, 20.

19. I ka ɲi ka sɔn mun lo ma tuma bɛɛ ani mun na?

¹⁹ I ka sɔn a ma tuma bɛɛ ko Jehova ka ladiliw b’i nafa kosɔbɛ. N’i sɔnna o ma, dɔ bena fara i ka kanuya kan Jehova koo la. Ka fara o kan, a ka sariyaw koo bena diya i ye kosɔbɛ. Sutana ka fɛɛn si tɛna se k’i lafili fana i be Jehova sago kɛli dabila. I ye desizɔn min ta ka batize, miiri k’a filɛ i bena min miiri o koo la saan 1000 o kɔ. Siga t’a la, i bena a ye ko i ma deli k’o desizɔn ɲuman ɲɔgɔn ta!