Levite minw tun tɛ sarakalasebagaw ye, olu tun be baara wɛrɛw kɛ i n’a fɔ ka Alabatoso kɔrɔsi. Alabatoso kuntigi lo tun b’o baara ɲɛminɛ. Yahutucɛ Philo min ye sɛbɛrikɛla ye, ale y’a ɲɛfɔ Alabatoso kɔrɔsibagaw ka baara tun ye min ye. A ko: “[Levite] minw tun b’o baara kɛ, u dɔw tun be lɔ Alabatoso dondaw la k’u kɔrɔsi. U dɔw tun be lɔ yɔrɔ senuman ɲɛɛ fɛ [Alabatoso kɔnɔ] walisa k’a kɔrɔsi. U tun b’u janto ko mɔgɔ minw man kan ka don yɔrɔ senuman kɔnɔ, u si kana fili wala ka tugu ka don yen. Alabatoso kɔrɔsibaga dɔw fana tun be to ka tagama ka Alabatoso munumunu walisa k’a kɔrɔsi suu ni tile. U tun be to k’o kɛ ka di ɲɔgɔn ma.”

Yahutuw ka kititigɛlaw jɛnkulu tun be se ka dɛmɛ ɲini Alabatoso kɔrɔsibagaw fɛ. Ɔrɔmu faamanw tun y’a daga k’o kɔrɔsibagaw dɔrɔn lo be se ka kɛ ni kɛlɛkɛminanw ye.

Lɔnnikɛla Joachim Jeremias y’a fɔ ko tuma min na u nana Yezu minɛyɔrɔ, a y’u ɲininga ko mun na u m’ale minɛ tuma min na a tun be mɔgɔw kalanna Alabatoso kɔnɔ (Mat. 26:55). Joachim Jeremias ko Yezu tun tɛna o fɔ n’a minɛbagaw tun tɛ Alabatoso kɔrɔsibagaw ye. O lɔnnikɛla b’a miiri fana ko ka kɔn o ɲɛ, u tun y’o kɔrɔsibagaw lo ci k’u ka taga Yezu minɛ (Zan 7:32, 45, 46). Kɔfɛ, Yahutuw ka kititigɛlaw jɛnkulu y’a ɲini Alabatoso kɔrɔsibaga dɔw n’u kuntigi fɛ, k’u ka taga Yezu ka kalandenw minɛ ka na n’u ye. N’a sɔrɔ o kɔrɔsibagaw fana lo ye ciden Pol sama ka bɔ Alabatoso kɔnɔ.—Kɛw. 4:1-3; 5:17-27; 21:27-30.