1. Jehova ko mun lo tun bena kɛ an ka wagati la?

JEHOVA kɔnna k’a fɔ ko an ka wagati la, “siya wɛrɛw mɔgɔ tan bena zuwifu kelen ka fani dagolo minɛ ka to k’a fɔ ko: ‘An b’a fɛ ka taga n’aw ye, bari an y’a mɛn ko Ala b’aw le fɛ.’ ” (Zak. 8:23). Jehova ye minw mɔ ni hakili senu ye, olu lo ye “zuwifu” nin ye ani u be weele ko “Ala ka Israɛl.” (Gal. 6:16, Bible senuma). Minw ka jigiya ye ka ɲɛnamaya banbali kɛ dugukolo kan, olu lo ye “mɔgɔ tan” nunu ye. U b’a kala ma ko Jehova ye kerecɛn mɔlenw sugandi ani u b’a jati ko nɛɛma lo olu fɛ ka jɛn n’u ye ka Jehova bato.

2. “Mɔgɔ tan” nunu be “taga” ni kerecɛn mɔlenw ye cogo di?

² Kerecɛn mɔlen minw be dugukolo kan bi, an tɛ se k’u bɛɛ tɔgɔ lɔn. * O bɛɛ n’a ta, minw be ni jigiya ye ka ɲɛnamaya kɛ dugukolo kan, olu be se “ka taga” n’o kerecɛn mɔlenw ye. Cogo di do? Bibulu b’a fɔ ko “mɔgɔ tan [tun] bena zuwifu kelen ka fani dagolo minɛ ka to k’a fɔ ko: ‘An b’a fɛ ka taga n’aw ye, bari an y’a mɛn ko Ala b’aw le fɛ.’ ” O vɛrise be kuma zuwifu kelen lo koo la. Nka, a fɔra fana ko “aw.” O b’a yira ko zuwifu min kofɔra, mɔgɔ kelen dɔrɔn tɛ. Kerecɛn mɔlenw  jɛnkulu lo. Minw tɛ kerecɛn mɔlenw ye, olu be jɛn n’o mɔlenw ye ka Jehova bato. Nka, u t’a jati ko kerecɛn mɔlenw y’u kuntigiw ye sabu u b’a lɔn ko Yezu lo y’u Kuntigi ye.​—Mat. 23:10.

3. An bena ɲiningali jumanw lo jaabi barokun nin na?

³ Komi kerecɛn mɔlenw bele b’an cɛma bi, dɔw be se k’u yɛrɛ ɲininga ko: 1) Kerecɛn mɔlenw ka ɲi k’u yɛrɛ jati cogo di? 2) Minw be buru dumu ani ka diwɛn min Hakilijigi lajɛn na, an ka ɲi k’olu jati cogo di? 3) Ni dɔ be farala o mɔgɔw hakɛ kan, yala o ka ɲi k’an hakili ɲagami wa? An bena o ɲiningaliw jaabi barokun nin na.

4. Lasɔmini kuma juman lo be sɔrɔ 1 Korɛntikaw 11:27-29 kɔnɔ, kerecɛn mɔlenw ka ɲi ka miiri min na sɔbɛ la? Mun na u ka ɲi ka miiri o la do?

⁴ Kerecɛn mɔlenw ka ɲi ka miiri kosɔbɛ lasɔmini kuma na min be sɔrɔ 1 Korɛntikaw 11:27-29 kɔnɔ. (A kalan.) Cogo juman na kerecɛn mɔlen be se ka buru dumu ani ka diwɛn min Hakilijigi lajɛn na “cogo bɛnbali” la? A be se k’o kɛ n’a b’o fɛɛnw dumu k’a sɔrɔ a tɛ Jehova ka sariya tilenninw labato (Eburuw 6:4-6; 10:26-29). Kerecɛn mɔlenw b’a faamu ko u ka ɲi ka to kantigiya la n’u b’a fɛ ka ‘sara  sɔrɔ Ala b’u wele min kosɔn Yezu Krista barika la.’​—Filip. 3:13-16.

5. Kerecɛn mɔlenw b’u yɛrɛ jati cogo di?

⁵ Jehova ka hakili senu t’a sagokɛlaw dɛmɛ u ka kuncɛbaya kɛ, nka a b’u dɛmɛ u ka kɛ mɔgɔ majigininw lo ye (Efɛz. 4:1-3; Kɔlɔs. 3:10, 12). O la, kerecɛn mɔlenw t’a jati k’u ka fisa ni tɔɔw ye. U b’a lɔn ko waajibi tɛ Jehova ka hakili senu di olu ma ka tɛmɛ a sagokɛla tɔɔw kan. U t’a miiri k’u be Bibulu faamu ka tɛmɛ tɔɔw kan. U tɛna sɔn k’a fɔ mɔgɔ si ye ko ale fana ye kerecɛn mɔlen ye ani ko a ka ɲi ka buru dumu ani ka diwɛn min Hakilijigi lajɛn na. Nka, u b’u majigi ka sɔn a ma ko Jehova kelenpe lo be se ka mɔgɔ sugandi a ka taga sankolo la.

6. Ka kɛɲɛ ni 1 Korɛntikaw 4:7, 8 ye, kerecɛn mɔlenw ka ɲi ka koow kɛ cogo di?

⁶ Tiɲɛn lo ko kerecɛn mɔlenw b’a jati ko nɛɛma lo ka taga sankolo la. Nka, u t’a ɲini tɔɔw fɛ u ka bonya la u kan k’a dama tɛmɛ (Filip. 2:2, 3). U b’a lɔn fana ko tuma min na Jehova y’u mɔ ni hakili senu ye, a m’a to mɔgɔ wɛrɛ ka bɔ o kala ma. O la, a tɛ bari kerecɛn mɔlen na ni a daminɛ na, dɔw lanin t’a la ko Ala y’a mɔ ni hakili senu ye. A b’a faamu ko Bibulu ka fɔta la, ni dɔ y’a fɔ ko Ala ye kunkanbaara kɛrɛnkɛrɛnnin dɔ kalifa ale ma, an man ɲi ka sin ka la o tigi la (Yir. 2:2). Kerecɛn mɔlen t’a fɛ mɔgɔw ka bonya la a kan k’a dama tɛmɛ. O kama, n’a ye mɔgɔ dɔ kunbɛn a siɲɛ fɔlɔ la, a t’a fɔ a tigi ye ko ale ye kerecɛn mɔlen ye. A tɛ wasoya kɛ fana o kosɔn.​—1 Korɛntikaw 4:7, 8 kalan.

7. Kerecɛn mɔlenw tɛ mun lo kɛ ani mun na?

⁷ Kerecɛn mɔlenw t’a jati ko u ka ɲi ka wagati kɛ ni kerecɛn mɔlenw dɔrɔn lo ye, i n’a fɔ u be jɛnkulu kɛrɛnkɛrɛnnin dɔ lo kɔnɔ. U tɛ kerecɛn mɔlen wɛrɛw yɔrɔ ɲini walisa ka baro kɛ u ka jigiya koo la ani ka jɛn n’u ye ka Bibulu sɛgɛsɛgɛ (Gal. 1:15-17). N’u tun b’o koow kɛ, kafo tun bena faranfaran. A tun bena kɛ komi hakili senu b’u ɲɛminɛna walisa u ka min kɛ, u be banna k’o kɛ. Hakili senu lo do be Ala sagokɛlaw dɛmɛ u ka to kelenya ani hɛɛrɛ la​—Ɔrɔm. 16:17, 18.

8. An be kerecɛn mɔlenw jati cogo min na, mun na an ka ɲi k’an janto o la? (Jukɔrɔla kunnafoni fana lajɛ.)

⁸ Musow ni cɛɛ minw ye kerecɛn mɔlenw ye, an ka ɲi k’olu jati cogo di? Koo jugu lo ka bonya la mɔgɔ kan k’a dama tɛmɛ, hali n’a ye Krista balima mɔlen dɔ ye (Mat. 23:8-12). Bibulu b’an jija ko an ka diinan mɔgɔkɔrɔw ka limaniya ladegi. Nka a t’a fɔ an ye ko an be se ka adamaden dɔ kɛ an kuntigi ye (Eburuw 13:7). Tiɲɛn lo ko Bibulu b’a fɔ ko dɔw “ka kan ni boɲa ye kosɔbɛ.” Nka a t’o fɔ sabu u ye kerecɛn mɔlenw ye. A b’o fɔ sabu u “b’u ka baara kɛ ka ɲa,” u b’u jija ka “waajuli kɛ” ani ka “mɔgɔw kalan.” (1 Tim. 5:17). N’an be kerecɛn mɔlenw bonya ani k’u tando kojugu, o be se k’u niin degun. * Min yɛrɛ ka jugu, o ye k’o be se k’a to u be kuncɛbaya kɛ (Ɔrɔm. 12:3). An t’a fɛ ka koo si kɛ min be se k’a to Krista balima mɔlen dɔ b’o filiba ɲɔgɔn kɛ!​—Luka 17:2.

9. An be se k’a yira cogo di ko an be bonya la kerecɛn mɔlenw kan?

⁹ Jehova ye kerecɛn minw mɔ ni hakili senu ye, an be se ka bonya la olu kan cogo di? Ɲɛyirali fɛ, an tɛna u ɲininga ko u y’a lɔn cogo di ko u kɛra kerecɛn mɔlenw ye? O t’an ka koo ye ani an man ɲi k’a ɲini k’o lɔn (1 Tes. 4:11; 2 Tes. 3:11). An man ɲi k’a miiri ko kerecɛn mɔlen dɔ cɛɛ wala a muso, a bangebagaw wala a somɔgɔ wɛrɛw fana ye kerecɛn mɔlenw ye. Mɔgɔ tɛ kɛ kerecɛn mɔlen ye sabu a somɔgɔ dɔ ye kerecɛn mɔlen ye. Ala lo be mɔgɔ kɛ a ye (1 Tes. 2:12). An man ɲi ka to ka ɲiningali dɔw kɛ minw bena tɔɔw dusu tiɲɛ. Ɲɛyirali fɛ, an man ɲi ka kerecɛn mɔlen dɔ muso ɲininga ko a be mun lo kɛ a la n’a miirila k’a ye ko a bena ɲɛnamaya banbali kɛ dugukolo kan k’a sɔrɔ a cɛɛ bena taga sankolo la? An ka la a la ko duniɲa kura kɔnɔ, Jehova bena “nimanfɛnw bɛɛ wasa.”​—Zab. 145:16.

10. N’an tɛ bonya la mɔgɔ kan k’a dama tɛmɛ, cogo juman na an b’an yɛrɛ latanga?

¹⁰ N’an t’a jati ko kerecɛn mɔlenw ka fisa ni tɔɔw ye, an b’an yɛrɛ latanga fana. Cogo di do? Bibulu b’a fɔ ko n’a sɔrɔ kerecɛn mɔlen dɔw tɛna to kantigiya la (Mat. 25:10-12; 2 Piyɛri 2:20, 21). O la, n’an tɛ bonya la mɔgɔ kan k’a dama tɛmɛ, an tɛna tugu adamaden kɔ. An tɛna o kɛ hali n’a tigi ye kerecɛn mɔlen ye, a tɔgɔ bɔra kosɔbɛ wala a be Jehova sago kɛra kabi wagatijan. O cogo la, hali n’a tigi ma kantigiya kɛ wala n’a bɔra kafo kɔnɔ, an ka limaniya tɛna nagasi ani an tɛna Jehova sago kɛli dabila.

11. Minw be buru dumu ani ka diwɛn min Hakilijigi lajɛn na, yɛlɛmani tora ka don u hakɛ la cogo di?

¹¹ Saan caaman kɔnɔ, minw be buru dumu ani ka diwɛn min Hakilijigi lajɛn na, dɔ tun be bɔra u hakɛ la. Nka a saan damanin ye nin ye, dɔ tora ka fara u hakɛ kan. Yala o ka ɲi k’an hakili ɲagami wa? Ayi. An k’a filɛ fɛɛn minw kama o man ɲi k’an hakili ɲagami.

12. Minw be buru dumu ani ka diwɛn min Hakilijigi lajɛn na, mun na an hakili man ɲi ka ɲagami n’u hakɛ be cayara?

¹² “Minw ye Matigi ta ye, a b’olu lɔn.” (2 Tim. 2:19). Minw be buru dumu ani ka diwɛn min, balima minw b’olu jati Hakilijigi lajɛn na, olu t’a lɔn minw ye kerecɛn mɔlenw ye sɔbɛ la. Jehova kelen dɔrɔn lo b’o lɔn. O la, minw be buru dumu ani ka diwɛn min, olu cɛma, balima dɔw b’a miiri k’olu ye kerecɛn mɔlenw ye k’a sɔrɔ u t’a ye. Ɲɛyirali fɛ, dɔw tun be to  ka buru dumu ani ka diwɛn min Hakilijigi lajɛn na, nka u nana a dabila. N’a sɔrɔ hakiliɲagami bana be dɔw fana na ani o b’a to u b’a miiri ko u bena masaya kɛ ni Krista ye sankolo la. Tiɲɛn na, an t’a lɔn tigitigi kerecɛn mɔlenw hakɛ min be dugukolo kan bi.

13. Yala Bibulu b’a fɔ kerecɛn mɔlenw hakɛ min bena kɛ dugukolo kan tuma min na tɔɔrɔba bena daminɛ wa?

¹³ Kerecɛn mɔlenw bena kɛ yɔrɔ caaman na dugukolo kan tuma min na Yezu bena na u ta ka taga n’u ye sankolo la (Mat. 24:31). Bibulu b’a yira ko laban wagati la, kerecɛn mɔlen minw bele bena kɛ dugukolo kan, u tɛna caya (Yir. 12:17). Nka, a t’a fɔ an ye kerecɛn mɔlenw hakɛ min bena kɛ dugukolo kan tuma min na tɔɔrɔba bena daminɛ.

14. Ka kɛɲɛ ni Ɔrɔmukaw 9:11, 12, 16 ye, an be mun lo faamu kerecɛn mɔlenw sugandili koo la?

¹⁴ Jehova lo b’a latigɛ tuma min na a be kerecɛn mɔlenw sugandi (Ɔrɔm. 8:28-30). A y’a daminɛ k’u sugandi Yezu suu kununin kɔ. A be komi saan kɛmɛkulu fɔlɔ la, kerecɛn sɔbɛw bɛɛ tun ye kerecɛn mɔlenw ye. Saan kɛmɛkulu minw tugura o kɔ, minw tun b’a fɔ k’u ye kerecɛnw ye, u fanba tun tɛ Yezu ka kalanw sira tagama sɔbɛ la. O bɛɛ n’a ta, o saanw na, mɔgɔ damanin minw tun ye kerecɛn sɔbɛw ye, Jehova y’olu mɔ ni hakili senu ye. U tun be komi sumansi min falenna binjuguw cɛma (Mat. 13:24-30). Laban loonw na, Jehova tora ka mɔgɔw sugandi minw bena kɛ mɔgɔ 144 000 nunu cɛma. * Ni  Jehova y’a latigɛ k’o mɔgɔ dɔw sugandi dɔɔni sanni laban ka se, an ka la a la ko a ka hakilitigiya ɲɔgɔn tɛ yen * (Ɔrɔmukaw 9:11, 12, 16 kalan). An ka ɲi k’an janto walisa an kana koow kɛ i n’a fɔ Yezu ye baarakɛla minw kofɔ a ka ntalen dɔ kɔnɔ. U tun be ŋunuŋununa sabu u matigi tun ye ɲumanya kɛ baarakɛla wɛrɛw ye minw tun ye baara daminɛ tile bannin kɔ.​—Mat. 20:8-15.

15. Jɔncɛ kantigiman hakiliman min kofɔra Matiyo 24:45-47 kɔnɔ, yala o ye kerecɛn mɔlenw bɛɛ lo ye wa? A ɲɛfɔ.

¹⁵ Minw ka jigiya ye ka taga ɲɛnamaya kɛ sankolo la, olu bɛɛ tɛ Jɔncɛ kantigiman hakiliman mɔgɔ dɔw ye (Matiyo 24:45-47 kalan). I ko saan kɛmɛkulu fɔlɔ la, Jehova ni Yezu be tɛmɛ balima damanin lo fɛ ka mɔgɔ caaman balo Alako ta fan fɛ. Saan kɛmɛkulu fɔlɔ la, Jehova tɛmɛna kerecɛn mɔlen damanin dɔrɔn lo fɛ ka Gɛrɛkikan sɛbɛninw sɛbɛ. Bi fana, kunkanbaara kalifara kerecɛn mɔlen damanin dɔrɔn lo ma u ka dumuni di Alako ta fan fɛ “a diwaati la,” Ala sagokɛlaw ma.

16. I ye mun lo faamu barokun nin na?

¹⁶ An ye mun lo faamu barokun nin na? Jehova y’a latigɛ ka ɲɛnamaya banbali di a sagokɛlaw fanba ma dugukolo kan. A ye mɔgɔ damanin sugandi walisa u ka taga masaya kɛ ni Yezu ye sankolo la. Jehova b’a sagokɛlaw bɛɛ duga, “zuwifu” ni “mɔgɔ tan” nunu bɛɛ. A b’a ɲini u bɛɛ fɛ u ka sariya kelen lo labato ani u ka to kantigiya la. U bɛɛ majiginin ka ɲi ka to fana ani ka jɛn ka baara kɛ a ye kelenya la. U bɛɛ ka ɲi k’u jija fana walisa hɛɛrɛ ka to kafo kɔnɔ. Komi laban be surunyana, an bɛɛ k’an jija ka to ka Jehova sago kɛ ani ka tugu Krista kɔ i ko sagakulu kelen.​—Zan 10:16.