1-2. Muso minw tagara Yezu ka kaburu la, mɛlɛkɛ dɔ ye mun lo fɔ olu ye? Yezu yɛrɛ ye cikan juman lo di u ma?

AN BE Nisankalo tile 16, sɔgɔma joona, saan 33 Krista tile la. Muso minw be Jehova kanu, olu dɔw dusu kasinin be tagara Yezu ka kaburu la. A tile kelen ni tilan ɲɔgɔn ye nin ye, Yezu suu donna yen. O musow ye wusulan ni tulu kasadimanw labɛn walisa k’u mɔ Yezu suu la. Nka u sera tuma min na, u kabakoyara k’a ye ko kaburu lakolon lo! Mɛlɛkɛ dɔ y’a fɔ u ye ko Yezu lakununa ka bɔ saya la. O kɔ, mɛlɛkɛ ko: “A ko a be taga aw ɲa Galile mara la. Aw bena taga sɔrɔ o yɔrɔ la.”​—Mat. 28:1-7; Luka 23:56; 24:10.

² O musow kɔsegitɔ, Yezu yɛrɛ gwɛrɛla u la ani a ye cikan nin di u ma: “Aw ye taga fɔ n balimaw ye k’u ka taga Galile, k’u bena n ye o yɔrɔ le la.” (Mat. 28:10). Yezu ye koo fɔlɔ min kɛ a suu kununin kɔ, o ye ka ɲɔgɔnye dɔ labɛn ale n’a ka kalandenw cɛ. O ɲɔgɔnye la, a ye cikan dɔw di u ma minw kɔrɔtanin lo kosɔbɛ.

3-4. Cikan min be sɔrɔ Matiyo 28:19, 20 kɔnɔ, mun na an be se k’a fɔ ko Yezu m’o di a ka cidenw dɔrɔn lo ma? (Jaa lajɛ ɲɛɛ fɔlɔ kan.)

³ Matiyo 28:16-20 kalan. * Yezu ye ɲɔgɔnye min labɛn, a ye baara kɔrɔtanin dɔ kofɔ a ka kalandenw ye. Olu y’o baara kɛ saan kɛmɛkulu fɔlɔ la ani an b’o baara kɛra bi. Yezu ko: “Aw ye taga siyaw bɛɛ kɛ ne ka kalandenw ye . . . k’u kalan, waasa u ka ne ka kuma bato.”

 ⁴ Yezu b’a fɛ a ka kalandenw bɛɛ ka waajuli kɛ. A m’o baara kalifa a ka ciden kantigi 11 dɔrɔn ma. An b’o lɔn cogo di? Tuma min na a tun b’o cikan dira Galile kulu kan, a ka cidenw dɔrɔn lo tun tɛ yen. Kana ɲinɛ ko mɛlɛkɛ tun y’a fɔ musow ye ko: “Aw bena taga sɔrɔ [Galile].” O la, a be komi muso kantigiw fana tun be yen o ɲɔgɔnye la. Nka, olu dɔrɔn tɛ. Ciden Pol y’a fɔ ko Yezu “y’a yɛrɛ yira an balimaw na minw tun be tɛmɛ mɔgɔ kɛmɛ duuru kan.” (1 Kor. 15:6). O balimaw tun lajɛnna min?

5. Ɲɔgɔnye min kɛra Galile ani a kofɔra Matiyo sapitiri 28nan kɔnɔ, mun na an lanin b’a la ko Pol tun kaan b’o lo ma 1 Korɛntikaw 15:6 kɔnɔ?

⁵ Ɲɔgɔnye min kɛra Galile ani a kofɔra Matiyo sapitiri 28nan kɔnɔ, Pol tun kaan b’o lo ma 1 Korɛntikaw 15:6 kɔnɔ. Dalilu dɔw b’o yira ka gwɛ. A fɔlɔ, Yezu ka kalandenw fanba tun ye Galilekaw ye. O kama, a tun ka nɔgɔ ka mɔgɔ caaman lajɛn Galile kulu kan sanni k’u lajɛn boon dɔ kɔnɔ Zeruzalɛmu. A filanan, Yezu suu kununin kɔ, a tun y’a yɛrɛ yira ka ban a ka ciden 11 na boon dɔ kɔnɔ Zeruzalɛmu. Ni Yezu tun b’a fɛ a ka cidenw dɔrɔn lo ka waajuli kɛ ani ka mɔgɔw kɛ a ka kalandenw ye, a tun be se k’o cikan di u ma Zeruzalɛmu. A tun tɛna a fɔ a ka cidenw ni musow ani mɔgɔ wɛrɛw ye k’u ka lajɛn Galile.​—Luka 24:33-36.

6. Matiyo 28:20 b’a yira cogo di ko Yezu ye cikan min di a ka kalandenw ma, o be sen kan halibi? Komi mɔgɔw b’o cikan labatora, nafa jumanw lo be sɔrɔla o la?

⁶ A sabanan, Yezu ye cikan min di a ka kalandenw ma ko u ka mɔgɔw kɛ ale ka kalandenw ye, o ma ɲɛsin saan kɛmɛkulu fɔlɔ kerecɛnw dɔrɔn lo ma. An b’o lɔn cogo di? Yezu y’a ka cikan kuncɛ ko: “Ne kɔni bena to n’aw ye loon o loon fɔɔ ka taga diɲɛ wili.” (Mat. 28:20). I ko Yezu y’a fɔ cogo min na, mɔgɔ caaman b’u mɔgɔɲɔgɔnw dɛmɛna bi, u ka kɛ Krista ka kalandenw ye. Miiri k’a filɛ: Saan o saan, mɔgɔ 300 000 ɲɔgɔn be kɛ Yezu ka kalandenw ye ani u be batize ka kɛ Jehova Seerew ye. O ye kabako ye dɛ!

7. Sisan, an bena mun lo lajɛ ani mun na?

⁷ Bibulu kalanden caaman be ɲɛtaga kɛ ani u be batize. Nka, a be komi dɔw be siran ka kɛ Yezu ka kalandenw ye. Kalan ka di u ye, nka u tɛ ɲɛtaga kɛ ka batize. N’i be bibulukalan kɛra ni dɔ ye, siga t’a la, i b’a fɛ k’a dɛmɛ walisa a be min kalanna, a k’o sira tagama ani a ka kɛ Yezu ka kalanden dɔ ye. An be se ka kalandenw dusukun sɔrɔ cogo di? An be se k’u dɛmɛ cogo di walisa u ka ɲɛtaga kɛ Alako ta fan fɛ? An bena o lo ye barokun nin na. Mun na a ka ɲi an k’o ɲiningaliw lajɛ? Sabu wagati dɔ la, an ka ɲi k’a latigɛ n’an bena taga ɲɛ ni Bibulu kalanden dɔ ka kalan ye wala n’an bena a lalɔ.

8. Mun na a be se ka gwɛlɛya tuma dɔw la ka Bibulu kalandenw dɛmɛ u ka Jehova kanu?

⁸ Jehova b’a fɛ mɔgɔw k’ale bato sabu u b’a kanu. O la, an ka laɲinita ye ka Bibulu kalandenw dɛmɛ u k’a faamu ko Jehova b’a janto kosɔbɛ u la ani k’u koo ka di a ye haali! An b’a fɛ k’u dɛmɛ u k’a ye ko Jehova ye “falatɔ faa ye, ale lo be firiyamuso” latanga (Zab. 68:6). N’i ka Bibulu kalandenw y’a faamu Ala b’u kanu kosɔbɛ cogo min na, o be se k’u lasun k’a kanu fana. A be se ka gwɛlɛya kalanden dɔw ma k’a ye ko Jehova ye Faa kanutigi ye sabu u yɛrɛ wolofaw m’u kanu (2 Tim. 3:1, 3). O la, bibulukalan kɛtɔ, sinsin Jehova ka jogo kabakomanw kan. I ka Bibulu kalandenw dɛmɛ u k’a faamu ko Jehova b’a fɛ u ka ɲɛnamaya banbali  sɔrɔ ani ko a labilanin lo k’u dɛmɛ o la. An be se ka mun lo kɛ tugun?

9-10. An ka ɲi ka bibulukalan kɛ ni mɔgɔw ye gafe jumanw lo kɔnɔ ani mun na?

⁹ Baara kɛ ni gafe nunu ye: “Bibulu b’an kalan mun lo la?” ani “I be se ka to Ala ka kanuya la cogo min na.” O gafew labɛnna walisa k’an dɛmɛ ka Bibulu kalandenw dusukun sɔrɔ. Ɲɛyirali fɛ, gafe Bibulu kalan sapitiri fɔlɔ kɔnɔ, ɲiningali nunu jaabiliw be sɔrɔ: “Ala b’a janto an na, wala a dusu ka gwɛlɛ?”, “Adamadenw ka tɔɔrɔ be mun lo kɛ Ala la?” ani “I be se ka kɛ Ala teri ye wa?” Gafe To Ala ka kanuya la labɛnna walisa ka Bibulu kalanden dɛmɛ a k’a faamu ko n’a be Bibulu ka sariyakolow labato, o be se k’a ka ɲɛnamaya kɛcogo fisaya. O be se k’a dɛmɛ fana a k’a magwɛrɛ Jehova la. N’a sɔrɔ i delila ka bibulukalan kɛ ni mɔgɔw ye o gafew kɔnɔ. O bɛɛ n’a ta, i yɛrɛ labɛn koɲuman bibulukalan kelen kelen bɛɛ kama ani kalanden ka makoya jɔnjɔnw to i hakili la.

 ¹⁰ Bibulu kalanden be se k’a mako don barokun dɔ la min be sɔrɔ gafe dɔ kɔnɔ ani o gafe t’an ka kalankɛminan dɔ ye. O ɲɔgɔn na, i ka ɲi ka mun lo kɛ do? I be se k’a jija a k’o gafe kalan a yɛrɛ ma. O la, an be bibulukalan kɛ ni mɔgɔw ye n’an ka kalankɛminan minw ye, aw be se ka taga ɲɛ ni kalan ye u dɔ kɔnɔ.

11. Tuma juman lo an ka ɲi ka bibulukalan daminɛ ani k’a laban ni delili ye? An be se ka Bibulu kalanden dɛmɛ cogo di a k’a faamu k’o kɔrɔtanin lo?

¹¹ Bibulukalan daminɛ ni delili ye. Tuma caaman na, dɔɔni bibulukalan juu siginin kɔ, a ka fisa an k’a daminɛ ani k’a laban ni delili ye. An ka ɲi ka kalanden dɛmɛ a k’a lɔn ko hakili senu ka dɛmɛ dɔrɔn lo barika la an be se ka Ala ka Kuma faamu. Weleweledala dɔw b’a ɲɛfɔ kalanden ye fɛɛn min kama an be delili kɛ ka sɔrɔ ka kalan kɛ. U be Zaki 1:5 kalan. O vɛrise ko: “N’aw dɔ dɛsɛnin lo hakilitigiya la, o tigi k’a daali Ala fɛ.” O kɔ, u be kalanden ɲininga ko: “N’an be hakilitigiya fɛ, an ka ɲi ka mun lo kɛ?” Kalanden ka teli ka sɔn a ma ko an ka ɲi ka Ala deli.

12. I be se ka basigi Zaburuw 139:2-4 kan cogo di ka Bibulu kalanden dɛmɛ a ka Jehova deli n’a dusu bɛɛ ye?

¹² Delili kɛcogo yira i ka Bibulu kalanden na. A ɲɛfɔ a ye ko a be delili minw kɛ n’a dusu bɛɛ ye, Jehova b’a fɛ k’u lamɛn. A ɲɛfɔ a ye fana ko an be sigasiga k’an dusukunnako minw fɔ mɔgɔw ye, an be se k’an kɔnɔ gwɛ k’u fɔ Jehova ye. An be se k’o kɛ sabu Jehova b’an ka miiriya dogoninw bɛɛ lɔn ka ban (Zaburuw 139:2-4 kalan). An be se ka kalanden jija fana a ka Jehova deli a k’a dɛmɛ ka koo nunu kɛ: ka miiriya juguw kɛlɛ ani ka see sɔrɔ delinanko juguw kan. Ɲɛyirali fɛ, kerecɛn sɔbɛw man kan ka fɛti minw kɛ, n’a sɔrɔ u dɔ ka di Bibulu kalanden dɔ ye. A b’a lɔn k’o fɛti man ɲi nka, koo dɔw be kɛ o fɛti la minw ka di a ye. N’o lo, a jija a k’a dusukunnako tigitigiw fɔ Jehova ye. A jija fana a ka dɛmɛ ɲini Jehova fɛ walisa koo minw ka di Jehova ye, o koow dɔrɔn lo ka diya ale fana ye.​—Zab. 97:10.

13. a) Bibulukalan juu siginin kɔ dɔrɔn, mun na i ka ɲi ka kalanden weele ka na lajɛnw na? b) I be se ka mun lo kɛ walisa kalanden hakili ka sigi n’a nana lajɛnw na?

¹³ Bibulukalan juu siginin kɔ dɔrɔn, kalanden weele ka na lajɛnw na. A bena min ye ani ka min mɛn yen, o be se k’a dusukun sɔrɔ ani k’a dɛmɛ a ka ɲɛtaga kɛ. Videwo nin yira a la: Mun lo be kɛ an ka Masaya boonw kɔnɔ? A fɔ a ye ni dusudiya ye ko n’a b’a fɛ, i be se ka na a ta aw be taga ɲɔgɔn fɛ lajɛn na. A ka ɲi i k’a ɲini weleweledala wɛrɛw fɛ u k’i bila sira a ka bibulukalan na. O la, kalanden bena kafoden tɔɔw lɔn ani o bena a to a hakili be sigi n’a nana lajɛnw na.

14. Mun lo be se ka kalanden lasun a ka ɲɛtaga kɛ Alako ta fan fɛ?

¹⁴ An ka laɲinita ye ka Bibulu kalandenw dɛmɛ u ka ɲɛtaga kɛ Alako ta fan fɛ (Efɛz. 4:13). Ni dɔ sɔnna bibulukalan na, n’a sɔrɔ a b’a fɛ k’a lɔn kalan bena ale nafa cogo min na. Nka, n’a ka kanuya barika tora ka bonya Jehova koo la, n’a sɔrɔ a bena a daminɛ k’a filɛ a be se ka mɔgɔw dɛmɛ cogo min na. O mɔgɔw be se ka kɛ kafodenw fana ye (Mat. 22:37-39). Wagati bɛnnin na, kana sigasiga k’a fɔ kalanden ye ko nɛɛma dira a ma ka dɛmɛ don Masaya ka koow la niliw sababu fɛ.

15. An be se ka kalanden dɛmɛ cogo di a k’a lɔn a ka ɲi ka min kɛ ni bɛnbaliya donna ale ni balima dɔ cɛ?

 ¹⁵ A yira kalanden na a ka ɲi ka min kɛ n’a ye gwɛlɛya dɔ sɔrɔ. Ɲɛyirali fɛ, a be se ka kɛ ko i ka Bibulu kalanden min ma batize fɔlɔ, ale y’a fɔ i ye ko kafoden dɔ donna a gasi la. Sanni i ka joo di a ma wala k’a jalaki, a ɲɛfɔ a ye Bibulu b’a fɔ a ka ɲi ka min kɛ. A be se ka yafa o balima ma. N’a y’a ye ko a tɛ se k’o kɛ, a be se ka kuma o balima fɛ ni ɲumanya ani kanuya ye walisa ka bɛɛn sigi (Matiyo 18:15 lajɛ). A bena min fɔ, a dɛmɛ a k’o labɛn. A yira a la a be se ka baara kɛ cogo min na ni fɛɛn nunu ye walisa k’a lɔn tigitigi a ka ɲi ka min kɛ: JW Library^®, jw.org^® ani Guide de recherche pour les Témoins de Jéhovah. A ka ɲi kalanden k’a lɔn bɛnbaliyakow be ɲɛnabɔ cogo min na ka kɔn a ka batɛmu ɲɛ. O bena a dɛmɛ ka jɛnɲɔgɔnya ɲuman kɛ ni kafodenw ye hali a batizenin kɔ.

16. N’i be weleweledala wɛrɛw weele u k’i bila sira i ka bibulukalan na, nafa jumanw lo b’o la?

¹⁶ A ɲini kafoden dɔw wala kafokulu kɔrɔsibaga fɛ u k’i bila sira i ka bibulukalan na. Nafa minw b’o la, an y’o dɔw kofɔ ka tɛmɛ. Ka fara o kan, ele tɛ se ka kalanden dɛmɛ koo minw na, n’a sɔrɔ weleweledala wɛrɛw be se k’o kɛ. Miiri k’a filɛ ko i ka Bibulu kalanden y’a ɲini siɲɛ caaman ka sigarɛtimin dabila, nka a ma se. I be se ka balima dɔ weele a k’i bila sira o bibulukalan na. N’a sɔrɔ o balima tun y’a ɲini siɲɛ caaman ka sigarɛtimin dabila ani kɔfɛ a sera k’o kɛ. N’a sɔrɔ o balima bena se ka ladili nafamanw di kalanden ma, a mako tun be minw na. N’a ka gwɛlɛ i ma ka bibulukalan kɛ balima kolɔnbaga dɔ ɲɛna, i be se k’a ɲini a fɛ a k’o bibulukalan ɲɛminɛ. N’i be tɔɔw weele u k’i bila sira i ka bibulukalan na, kalanden bena kalan sɔrɔ u fɛ. A to i hakili la ko an ka laɲinita ye ka kalanden dɛmɛ a ka ɲɛtaga kɛ Alako ta fan fɛ.

17-18. N’i b’a latigɛra n’i ka ɲi wala n’i man ɲi ka Bibulu kalanden dɔ ka kalan lalɔ, i ka ɲi ka miiri mun lo la?

¹⁷ N’i ka Bibulu kalanden tɛ yɛlɛmani donna a ka ɲɛnamaya kɔnɔ, wagati dɔ la i ka ɲi k’i yɛrɛ ɲininga ko: “Yala n’ ka ɲi k’a ka kalan lalɔ wa?” I ka ɲi ka miiri a tigi ka setigiya la ka sɔrɔ k’a latigɛ i bena min kɛ. Dɔw be ɲɛtaga kɛ joona, nka dɔw ta be wagati ta. O la, i yɛrɛ ɲininga ko: “Yala n’ ka Bibulu kalanden be ɲɛtaga kɛra ka kɛɲɛ n’a ka koow cogoya ye wa? A be kalan min kɛra, yala a y’a daminɛ k’o sira tagama wa?” (Mat. 28:20). Kalanden dɔ be se ka wagati caaman ta ka sɔrɔ ka kɛ Yezu ka kalanden ye. Nka, a ka ɲi ka to ka yɛlɛmani don a ka ɲɛnamaya kɔnɔ dɔɔni dɔɔni.

¹⁸ N’i be bibulukalan kɛra ni dɔ ye kabi wagati dɔ la, nka a t’a yira ko kalan ka di a ye do?  Miiri k’a filɛ ko i tilara gafe nin na n’a tigi ye: “Bibulu b’an kalan mun lo la?” N’a sɔrɔ aw yɛrɛ ye gafe nin daminɛ: “I be se ka to Ala ka kanuya la cogo min na.” Nka, kalanden bele ma deli ka na kafo ka lajɛn si la hali Hakilijigi lajɛn yɛrɛ! A ka teli ka fɔn a ka kalan na koo den-denninw kosɔn fana. O koo ɲɔgɔn na, a ka ɲi i k’i kɔnɔ gwɛ ka kuma n’a ye. *

19. Ni bibulukalan man di kalanden dɔ ye, i be se ka mun lo fɔ a ye? I ka ɲi ka miiri mun lo la?

¹⁹ I be se ka kɔn k’a ɲininga ko: “Mun lo ka gwɛlɛ i ma kosɔbɛ walisa ka kɛ Jehova Seere dɔ ye?” N’a sɔrɔ a bena a fɔ ko: “Bibulukalan ka di n’ ye, nka n’ tɛna kɛ Jehova Seere ye abada!” N’i ka Bibulu kalanden be n’o miiriya ɲɔgɔn ye k’a sɔrɔ a be kalan kɛra kabi wagati damanin, n’a sɔrɔ kuun t’a la i ka taga ɲɛ n’a ka kalan ye. Wala, n’a sɔrɔ a bena a ɲɛfɔ i ye fɛɛn min b’a bali ka ɲɛtaga kɛ. Ɲɛyirali fɛ, a be se ka kɛ ko a b’a miiri ko ale tɛna se abada ka waajuli kɛ soo ni soo. N’i y’a faamu a be min miiri, i bena se k’a dɛmɛ bɛrɛbɛrɛ.

20. Kɛwaliw 13:48 b’an dɛmɛ k’a faamu cogo di n’an ka ɲi ka taga ɲɛ ni dɔ ka bibulukalan ye wala n’an ka ɲi k’a lalɔ?

²⁰ A fɔ man di nka, Bibulu kalanden dɔw be komi Israɛldenw, kira Ezekiyɛli ka wagati la. Jehova y’a fɔ Ezekiyɛli ye u koo la ko: “Tiɲɛ na, i kɛra u ɲana dɔnkili diman labaga ye, min kaan ka di, ni mɔgɔ min be se fɔli la dɔrɔn. U b’i ka kumaw mɛn, nga u t’o kɛ.” (Ezek. 33:32). N’a sɔrɔ a ka gwɛlɛ an ma k’a fɔ mɔgɔ dɔ ye ko an bena a ka bibulukalan lalɔ. Nka, “waati caaman t’an bolo” tugun (1 Kor. 7:29). O la, an kana wagati tiɲɛ ka bibulukalan kɛ ni dɔ ye min tɛ ɲɛtaga kɛra. A ka fisa an ka mɔgɔw ɲini minw “labɛnnin lo ka sɔn ɲɛnamaya banbali ma.”​—Kɛw. 13:48, NW.

21. Saan 2020 ka kalankun ye mun lo ye ani a bena an dɛmɛ ka mun lo kɛ?

²¹ Saan 2020 ka kalankun bena a to an be miiri koɲuman k’a filɛ an be se ka mɔgɔw kɛ Yezu ka kalandenw ye bɛrɛbɛrɛ cogo min na. Yezu ye ɲɔgɔnyeba min kɛ n’a ka kalandenw ye Galile kulu kan, a ye min fɔ o sen fɛ, saan 2020 ka kalankun basiginin lo o lo kan. O kalankun ko: “Aw ye taga siyaw bɛɛ kɛ ne ka kalandenw ye k’u batize.”​—Mat. 28:19.