1. An kelen kelen bɛɛ ka ɲi ka mun lo kɛ?

YALA a bena diya i ye k’i seen don boli gwɛlɛ dɔ la sanko n’i man kɛnɛ wala n’i sɛgɛnnin lo wa? An ma la o la. Nka, ciden Pol ko kerecɛn sɔbɛw bɛɛ seen be boli dɔ la (Eburuw 12:1). An ye denmisɛn wala mɔgɔkɔrɔba ye wo, fanga b’an na wala a t’an na wo, an bɛɛ ka ɲi ka muɲu fɔɔ ka se o boli laban na. O la, an bena sara sɔrɔ, Jehova ye min labɛn an ye.—Mat. 24:13.

2. Ka kɛɲɛ ni 2 Timote 4:7, 8 ye, mun na Pol tun be se ka ladiliw di kerecɛnw ma u ka boli koo la?

² Pol tun be se ka ladiliw di kerecɛnw ma u ka boli koo la sabu a tun sera a ka “boli danyɔrɔ ma.” (2 Timote 4:7, 8 kalan). Nka Pol tun kaan be boli tigitigi juman lo ma?

3. Pol tun kaan be boli juman lo ma?

³ Galen, Grɛkiw tun be farikolo ɲɛnagwɛ minw kɛ, Pol basigira o kan ka mɔgɔw kalan koo nafamanw na (1 Kor. 9:25-27; 2 Tim. 2:5). Siɲɛ caaman, a ye kerecɛnw ka ɲɛnamaya suma ni ɲɔgɔndanboli ye (1 Kor. 9:24; Filip. 3:14; 2 Tim. 4:7). Mɔgɔ b’o boli daminɛ n’a y’a yɛrɛkun di Jehova ma ani ka batize (1 Piyɛri 3:21). A be se boli danyɔrɔ la ni Jehova ye ɲɛnamaya banbali di a ma.—Mat. 25:31-34, 46; 2 Tim. 4:8.

4. An bena mun lo lajɛ barokun nin na?

⁴ Ka ɲɔgɔndanboli kɛ sirajan kan, jɛɛn jumanw lo b’o ni kerecɛn ka ɲɛnamaya cɛ? Koo caaman b’a to u bɔnnin be ɲɔgɔn ma. An k’u la saba lajɛ. A fɔlɔ, an ka ɲi ka sira ɲuman ta. A filanan, an ka ɲi ka sinsin boli danyɔrɔ kan.  A sabanan, an man ɲi ka boli dabila hali ni gwɛlɛyaw b’an kan.

5. An ka ɲi ka sira juman lo ta ani mun na?

⁵ Walisa ka sara sɔrɔ ɲɔgɔndanboli yɛrɛ yɛrɛ la, bolibagaw ka ɲi ka boli sira tigitigi dɔ kan. N’an fana b’a fɛ ka ɲɛnamaya banbali sɔrɔ, an ka ɲi ka ɲɛnamaya kɛ i ko a ɲinina kerecɛnw fɛ cogo min na (Kɛw. 20:24; 1 Piyɛri 2:21). Nka, Sutana n’a nɔfɛmɔgɔw t’a fɛ an ka ɲɛnamaya kɛ o cogo la. Olu b’a fɛ an ka “jɛn n’u ye” ka koow kɛ (1 Piyɛri 4:4). U b’an lɔgɔbɔ sabu an be Bibulu ka sariyaw labato. U b’a fɔ k’olu ka ɲɛnamaya kɛcogo b’u hɔɔrɔnya ani ko a ka fisa n’an ta ye. Nka, o ye ngalon lo ye.—2 Piyɛri 2:19.

6. An be kalan juman lo sɔrɔ Brian ka koo la?

⁶ Sutana ka duniɲa ye nɔɔ to minw kan, mɔgɔ minw be tugu olu kɔ, u tɛ mɛɛn k’a faamu k’u ka ɲɛnamaya kɛcogo t’u hɔɔrɔnya. Nka, u be kɛ Sutana n’u nigɛ juguw ka jɔɔnw lo ye (Ɔrɔm. 6:16). An ka Brian ka koo lajɛ. A bangebagaw y’a jija a ka ɲɛnamaya kɛ i ko a ɲinina kerecɛnw fɛ cogo min na. Nka a kanbele tuma na, a tun ma la a la k’o bena a to a be ninsɔndiya sɔrɔ. Mɔgɔ minw be tugu Sutana ka sariyaw kɔ, a y’a latigɛ k’olu ladegi. A ko: “N’ tun t’a lɔn ko n’ tun be hɔɔrɔnyali min ɲinina, o tun bena a to n’ be kɛ delinanko juguw ka jɔɔn ye. N’ y’a daminɛ ka dɔrɔgi ta, ka dɔrɔ min kojugu ani ka kakalayakow kɛ. Saan caaman kɔnɔ, n’ ye dɔrɔgi farimanw ta ani n’ kɛra u caaman ka jɔɔn ye. . . . N’ y’a daminɛ ka dɔrɔgi feere walisa ka n’ mako wasa.” A laban, Brian y’a latigɛ ka Jehova ka sariyaw labato. A y’a ka ɲɛnamaya kɛcogo yɛlɛma ani a batizera saan 2001. Sisan, a ninsɔn ka di sɔbɛ la sabu a be ɲɛnamaya kɛra i ko a ɲinina kerecɛnw fɛ cogo min na. *

7. Ka kɛɲɛ ni Matiyo 7:13, 14 ye, sira fila jumanw lo be yen?

⁷ A kɔrɔtanin lo kosɔbɛ an ka sira ɲuman sugandi! Sira min be taga ni mɔgɔ ye “hɛrɛ yɔrɔ la,” o ka dɔgɔ. Sutana b’a fɛ an ka bɔ o sira kan ani ka siraba ta, mɔgɔw fanba be min kan. O siraba tagama ka di, nka a “be taga ni mɔgɔ ye halakiyɔrɔ la.” (Matiyo 7:13, 14 kalan). Walisa ka to sira ɲuman kan ani Sutana nɔfɛmɔgɔw kana se k’an lafili, an ka ɲi k’an jigi la Jehova kan ani ka mɛnni kɛ a fɛ.

8. Ni bolibaga dɔ talonna ka ben, a be mun lo kɛ do?

⁸ Mɔgɔ min be ɲɔgɔndanboli kɛ sirajan kan, a be to ka sira filɛ walisa a kana talon. Nka, bolibaga wɛrɛ be se k’a sennaɲagami wala ale yɛrɛ be se ka talon. N’a benna, a be wuli ka boli daminɛ. Fɛɛn min y’a to a benna, a tɛ sinsin o kan. Nka, a be sinsin boli danyɔrɔ lo kan ani a jigi b’a la ka sara min sɔrɔ.

9. N’an talonna ka ben, an ka ɲi ka mun lo kɛ?

⁹ An ka boli la, an be se ka talon siɲɛ caaman, o kɔrɔ, an be se ka fili siɲɛ caaman an ka kɛwalew n’an ka kumaw fɛ. Bolibaga wɛrɛ fana be se ka fili dɔw kɛ minw b’an kɔnɔ gwan. O man ɲi ka bari an na sabu an bɛɛ ye dafabaliw ye ani an bɛɛ be bolila ɲɛnamaya sira min kan, o ka dɔgɔ. Siga t’a la, an bena gosi ɲɔgɔn na tuma dɔw la. Ciden Pol y’a fɔ ko tuma dɔw la, an dɔ bena “koo dɔ kɛ min ma bɛn a tɔɲɔgɔn ma.” (Kɔlɔs. 3:13). Fɛɛn min y’a to an talonna, an kana sinsin o kan. Nka, sara min b’an kɔnɔna, an ka sinsin o lo kan. N’an talonna ka ben, an ka wuli ka boli daminɛ. N’an ye dimi mara an kɔnɔ ani ka Jehova sago kɛli dabila, an tɛna se boli danyɔrɔ la ani ka sara sɔrɔ. Ka fara o kan, an bena a to a be gwɛlɛya tɔɔw ma ka Jehova sago kɛ ninsɔndiya la.

10. An be se ka mun lo kɛ walisa an kana kɛ sentalonfɛn ye tɔɔw fɛ?

¹⁰ An be se ka fɛɛn wɛrɛ juman lo kɛ walisa an kana kɛ sentalonfɛn ye an balimaw fɛ? A kɔrɔtanin lo an kana a ɲini u fɛ, u ka koow kɛ tuma bɛɛ i ko an b’a fɛ cogo min na. N’a be se ka kɛ, an k’a to u ka koow kɛ i k’olu yɛrɛ b’a fɛ cogo min na (Ɔrɔm. 14:13, 19-21; 1 Kor. 8:9, 13). O koo la, an ni bolibaga yɛrɛ yɛrɛw be dan na. Olu be sanga ni ɲɔgɔn ye ani u kelen kelen bɛɛ b’a fɛ ale lo ka sara sɔrɔ. U be miiri u yɛrɛ dɔrɔn nafa lo la. O kama, u be se k’a ɲini k’u tɔɲɔgɔn ɲɔndi k’a bila gɛrɛn na walisa ka bila a ɲɛ. Nka, anw kɔni t’an yɛrɛ sanga ni ɲɔgɔn ye (Gal. 5:26; 6:4). An ka laɲinita ye ka mɔgɔ caamanba dɛmɛ walisa an bɛɛ ka se boli danyɔrɔ la ani ka ɲɛnamaya banbali sɔrɔ.  O kama, an b’an jija ka Pol ka ladili sira tagama, a y’o min sɛbɛ hakili senu barika la. A ko: “Mɔgɔ si kana miiri a yɛrɛ la dɔrɔn, aw ka miiri aw tɔɲɔgɔn na fana.”—Filip. 2:4.

11. Bolibagaw b’u ɲɛɛ lɔnnin to mun lo kan ani mun na?

¹¹ Mɔgɔ minw be ɲɔgɔndanboli kɛ, olu t’u ka sira dama filɛ. Nka, u b’u ɲɛɛ lɔnnin to boli danyɔrɔ kan fana. Hali n’u ɲɛɛ t’a la, u be to ka miiri k’u sera boli danyɔrɔ la ani k’u ye sara sɔrɔ. U kɛtɔ ka miiri u ka sara la, o b’u jija.

12. Jehova ye layidu ɲuman juman lo ta an ye?

¹² An be boli min na, Jehova ye layidu ta ko minw bena a laban, a bena sara di olu ma: ɲɛnamaya banbali sankolo la wala alijɛnɛ kɔnɔ dugukolo kan. Bibulu be dɔɔni fɔ an ye o koo la walisa an k’a faamu ɲɛnamaya bena diya cogo min na. Jehova ye layidu min ta an ye siniɲasigi koo la, an ka to ka miiri o la. N’an b’o kɛ, an bena an jija ka muɲuli kɛ.

13. Nɛɛma juman lo b’an fɛ min tɛ bolibaga yɛrɛ yɛrɛw fɛ?

¹³ Grɛkiw ka jamana na galen, bolibagaw tun be gwɛlɛyaw sɔrɔ, i n’a fɔ sɛgɛn ani faridimi. U bɛɛ tun ka ɲi k’u jigi la u ka fɔrɔmasɔn ani u yɛrɛ fanga lo kan. I k’o bolibagaw, an fana be fɔrɔmasɔn sɔrɔ min b’an dɛmɛ an ka boli la. Nka, nɛɛma dɔ b’an fɛ min tɛ bolibaga yɛrɛ yɛrɛw fɛ. An be se ka fanga sɔrɔ Jehova fɛ. An do b’a lɔn ko daan t’a ka fanga la. A ko n’an y’an jigi la ale kan, a bena fɔrɔmasɔn di an ma ani k’an barika bonya!—1 Piyɛri 5:10.

14. Min fɔra 2 Korɛntikaw 12:9, 10 kɔnɔ, o b’an dɛmɛ cogo di ka gwɛlɛyaw muɲu?

¹⁴ Ciden Pol ye gwɛlɛya caaman sɔrɔ. Mɔgɔw y’a nɛni ani k’a tɔɔrɔ. Tuma dɔw la fana fanga bɛrɛ tun t’a la ani a tun ka ɲi ka gwɛlɛya dɔ muɲu, o min tun be komi “ŋɔni” a farikolo la (2 Kor. 12:7, Bible senuma). Nka, a ma Jehova sago kɛli dabila o gwɛlɛyaw kosɔn. A y’a jati k’o gwɛlɛyaw ye sababu ye ale fɛ a k’a jigi la Jehova kan (2 Korɛntikaw 12:9, 10 kalan). Komi Pol tun be koow filɛ o cogo la, Jehova y’a dɛmɛ a ka gwɛlɛyaw bɛɛ la.

15. N’an be Pol ladegi, an bena mun lo kɔrɔsi?

¹⁵ U be se k’anw fana nɛni wala k’an tɔɔrɔ an ka limaniya kosɔn. An be se ka bana wala ka sɛgɛn kojugu fana. Nka n’an be Pol ladegi, o gwɛlɛya kelen kelen bɛɛ be se ka kɛ sababu ye Jehova b’an dɛmɛ ni kanuya ye.

16. I be se ka mun lo kɛ hali n’i kɔrɔla wala ni farikolodɛsɛ b’i kan?

¹⁶ Yala i man kɛnɛ wala farikolodɛsɛ b’i kan wa? I kunbiriw b’i dimi wala i tɛ yeli kɛ ka ɲɛ wa? N’o lo, yala i be se ka Jehova sago kɛ ni kanbelew ni sunguruw ani kɛnɛbagatɔw ye wa? Ɔnhɔn, i be se! Minw kɔrɔla ani farikolodɛsɛ be minw kan, u caaman be bolila ɲɛnamaya sira kan. U tɛ se k’o kɛ n’u yɛrɛ fanga ye. Nka, u be fanga sɔrɔ ka bɔ Jehova fɛ u kɛtɔ ka lajɛnw lamɛn telefɔni na wala k’u filɛ videwo la. U be waajuli kɛ fana u kɛtɔ ka seereya kɛ u somɔgɔw ani dɔgɔtɔrɔw ye.

17. Kɔrɔya wala kɛnɛyako be minw kan, Jehova be mun lo miiri olu koo la?

¹⁷ Ni kɔrɔya wala kɛnɛyako b’i kan, kana i fari faga ani k’a miiri ko fanga t’i la ka boli ɲɛnamaya sira kan. Jehova b’i kanu i ka limaniya n’i ka muɲuli  kosɔn. I mako b’a ka dɛmɛ na sisan ka tɛmɛ sanga ni wagati bɛɛ kan. A tɛna i to yen abada! (Zab. 9:11). A yɛrɛ bena a magwɛrɛ i la kosɔbɛ. Balimamuso dɔ man kɛnɛ ani a ko: “N’ ka bana tora ka juguya minkɛ, n’ y’a ye ko a ka gwɛlɛ ka sababuw sɔrɔ ka tiɲɛn kofɔ mɔgɔw ye. Nka, n’ b’a lɔn ko hali ni n’ ka jijaliw tɛ bɛrɛ ye, u be Jehova dusu diya. K’a lɔn ko Jehova dusu ka di n’ kɔrɔ, o be n’ ninsɔn diya.” N’i fari fagara, a to i hakili la ko Jehova be n’i ye. Miiri ciden Pol ka ɲɛyirali la ani i hakili to a ka jijali kuma nunu na: “Ne be nisɔndiya ne ka dɛsɛ koow la, . . . bari ne y’a lɔn ko waati min na ne barika dɛsɛra, o waati yɛrɛ la ne be fanga sɔrɔ.”—2 Kor. 12:10.

18. Gwɛlɛyaba juman lo be dɔw kan?

¹⁸ Minw be bolila ɲɛnamaya sira kan, gwɛlɛya wɛrɛ b’olu dɔw kan. Koo dɔw b’o balimaw tɔɔrɔla tɔɔw ɲɛɛ tɛ min na ani u tɛ se ka min faamu. Ɲɛyirali fɛ, hakiliɲagami bana b’u la wala u be hami kojugu. Mun na o ye gwɛlɛyaba ye o balima kantigiw fɛ? Ni mɔgɔ bolo karila wala a be muruku wotoro kɔnɔ, bɛɛ ɲɛɛ b’a la min b’a kan ani u be se k’a dɛmɛ. Nka hakiliɲagami bana be minw na, n’a sɔrɔ foyi t’a yira k’u man kɛnɛ. U do be tɔɔrɔla i n’a fɔ mɔgɔ min seen wala a bolo karila. Komi mɔgɔ tɛ se k’a ye k’u be tɔɔrɔla, u mako be kanuya min na, n’a sɔrɔ mɔgɔw tɛna o yira u la.

19. An be kalan juman lo sɔrɔ Mefibosɛti fɛ?

¹⁹ Ni kɔrɔya wala kɛnɛyako b’i kan ani i b’a miiri ko mɔgɔw t’i faamu, Mefibosɛti ka koo be se k’i jija (2 Sam. 4:4). A tun ye muruku ye ani loon dɔ, masacɛ Dawuda ye tilenbaliyako kɛ a la. Min tun ye Mefibosɛti sɔrɔ, o tun t’a nɔɔ ye. Nka, a ma dimi mara a kɔnɔ. Koo ɲuman minw kɛra a ka ɲɛnamaya kɔnɔ, a tun be Ala waleɲuman lɔn o kosɔn. A tun be Dawuda fana waleɲuman lɔn sabu a tun y’a minɛ ni ɲumanya ye saan tɛmɛninw na (2 Sam. 9:6-10). O kama, a ma sinsin Dawuda ka tilenbaliyako kan ani a ma dimi a kɔrɔ. Nka, min ye Dawuda bila o la, a miirila o lo la. A fana ma Jehova jalaki Dawuda ka kɛwalew kosɔn. Komi Jehova lo tun ye Dawuda sugandi k’a kɛ masacɛ ye, Mefibosɛti miirila k’a filɛ a be se ka Dawuda dɛmɛ cogo min na (2 Sam. 16:1-4; 19:25-31 *). Jehova y’a kɛ  u ye Mefibosɛti ka ɲɛyirali ɲuman sɛbɛ a ka Kuma kɔnɔ an nafa kosɔn.—Ɔrɔm. 15:4.

20. Hamikojugu be se ka nɔɔ juman lo to mɔgɔ dɔw kan? Nka u be se ka la mun lo la?

²⁰ Balima dɔw be deli ka koo dɔw kɛ loon o loon. Nka hamikojugu kosɔn, u hakili siginin tɛ n’u b’o koow kɛra ni mɔgɔ wɛrɛw ye. N’a sɔrɔ a ka gwɛlɛ u ma ka kɛ jama cɛma. O n’a ta bɛɛ, u be to ka taga lajɛnw ni lajɛnbaw la. U tɛ mɔgɔ minw lɔn, a ka gwɛlɛ u ma ka kuma n’u ye. Nka, u be kuma mɔgɔw fɛ waajuli la. N’o gwɛlɛyaw b’i kan, i k’a lɔn ko i kelen tɛ. O gwɛlɛyaw ɲɔgɔn be mɔgɔ caaman kan. A to i hakili la ko i be jijali minw kɛra n’i dusu bɛɛ ye, u ka di Jehova ye. I ma Jehova sago kɛli dabila minkɛ, o b’a yira ko Jehova b’i dugara ani ko i mako be fanga min na, a b’o dira i ma * (Filip. 4:6, 7; 1 Piyɛri 5:7). N’i be Jehova sago kɛra farikolodɛsɛ, kɔrɔya wala hakiliɲagami bana bɛɛ n’a ta, la a la ko i be Jehova ninsɔn diyara.

21. An kelen kelen bɛɛ be se ka mun lo kɛ Jehova ka dɛmɛ barika la?

²¹ An ninsɔn ka di k’a lɔn ko Pol kumana boli min koo la, o ni boli yɛrɛ yɛrɛ tɛ kelen ye. Ɲɔgɔndanboli minw tun be kɛ Bibulu sɛbɛwagati la, mɔgɔ kelen dɔrɔn lo tun be sara sɔrɔ. Nka kerecɛnw be boli min na, minw b’o kɛ kantigiya la fɔɔ ka se a daan na, olu bɛɛ bena ɲɛnamaya banbali sɔrɔ (Zan 3:16). Boli yɛrɛ yɛrɛ la, bolibagaw bɛɛ ka ɲi ka kɛ kɛnɛya la. N’o tɛ, u tɛna se ka sara sɔrɔ. Nka an cɛma, mɔgɔ caaman man kɛnɛ. O n’a ta bɛɛ, an bɛɛ banbanin lo boli la ɲɛnamaya banbali kama (2 Kor. 4:16). Jehova ka dɛmɛ barika la, an bɛɛ bena se o boli danyɔrɔ la!