1. I be se ka teriya sɔbɛ don ni mɔgɔ ye cogo di?

WALISA ka teriya sɔbɛ don ni mɔgɔ ye, i ka ɲi ka wagati kɛ n’o tigi ye. N’aw b’aw ka miiriyaw n’aw dusukunnakow fɔ ɲɔgɔn ye, o b’a to aw be kɛ teriw ye. Nka, a man nɔgɔ ka kɛ Yezu teri sɔbɛ ye. Mun na do?

2. Koo fɔlɔ juman lo b’a to a ka gwɛlɛ an ma ka kɛ Yezu teriw ye?

² Koo fɔlɔ min b’a to a ka gwɛlɛ an ma ka kɛ Yezu teriw ye, o ye ko an ma deli k’a ye. Saan kɛmɛkulu fɔlɔ la, kerecɛn caaman fana tun ma Yezu ye ka ye. O bɛɛ n’a ta, ciden Piyɛri ko: “Aw ɲaa ma la a kan, nga a koo do diyara aw ye. Aw y’aw jigi la a kan, k’a sɔrɔ aw m’a ye fɔlɔ.” (1 Piyɛri 1:8). O la, hali n’an ma Yezu ye ka ye, an be se ka teriya sɔbɛ kɛ n’a ye.

3. Koo filanan juman lo b’a to a ka gwɛlɛ an ma ka kɛ Yezu teriw ye?

³ Koo filanan min b’a to a ka gwɛlɛ an ma ka kɛ Yezu teriw ye, o ye ko an tɛ se ka kuma a fɛ. N’an be delili kɛra, an be kuma Jehova lo fɛ. Tiɲɛn lo ko an be delili kɛ Yezu tɔgɔ la, nka an tɛ kuma a fɛ. Yezu yɛrɛ t’a fɛ an k’ale deli. Mun na do? Sabu delili y’an ka batoli faan dɔ lo ye. An do ka ɲi ka Jehova kelenpe lo bato (Mat. 4:10). Nka, an be se k’a yira ko an be Yezu kanu.

4. Koo sabanan juman lo b’a to a ka gwɛlɛ an ma ka kɛ Yezu teriw ye? An bena mun lo ye barokun nin na?

⁴ Koo sabanan min b’a to a ka gwɛlɛ an ma ka kɛ Yezu  teriw ye, o ye ko a be sankolo la. O kama, an tɛ se ka wagati kɛ n’a ye. O bɛɛ n’a ta, an be se ka koo caaman lɔn a koo la. Barokun nin na, an bena koo naani ye minw bena an dɛmɛ ka kɛ Yezu teri sɔbɛw ye. An k’a filɛ fɔlɔ fɛɛn min kama a kɔrɔtanin lo kosɔbɛ an ka kɛ Yezu teri sɔbɛw ye.

5. Mun na an ka ɲi ka kɛ Yezu teriw ye? (Koorilen nunu fana lajɛ: “ N’an ye Yezu teriw ye, o b’a to an be kɛ Jehova teriw ye” ani “ Yezu lɔyɔrɔ ye min ye, o jati k’a dama kɛɲɛ.”)

⁵ N’an b’a fɛ ka jɛnɲɔgɔnya ɲuman kɛ ni Jehova ye, fɔɔ an ka kɛ Yezu teriw ye. Mun na do? An ka kuun fila dɔrɔn lajɛ. A fɔlɔ, Yezu y’a fɔ a ka kalandenw ye ko: “N Faa yɛrɛ fana b’aw kanu, bari aw ye ne kanu.” (Zan 16:27). A y’a fɔ fana ko: “Mɔgɔ si te se n Faa fɛ ni ne sababu tɛ.” (Zan 14:6). N’an tɛ Yezu teri sɔbɛw ye, a bena gwɛlɛya an ma ka kɛ Jehova teriw ye. O be i n’a fɔ k’a ɲini ka don boon dɔ kɔnɔ n’an tɛ tɛmɛ ni daa ye. Yezu y’o ɲɛyirali ɲɔgɔn ta tuma min na a ko: “Sagaw be don ni daa min ye wɛɛrɛ kɔnɔ, ne lo.” (Zan 10:7). A filanan, Yezu y’a Faa jogow ladegi cogo dafanin na. A y’a fɔ a ka kalandenw ye ko: “Ni mɔgɔ min ɲaa lara ne kan, o tigi ye n Faa fana ye.” (Zan 14:9). O la, an be se ka Jehova lɔn cogo jɔnjɔn min na, o ye k’a ɲini ka Yezu lɔn. N’an be Yezu lɔn ka ɲɛ, an bena a kanu kosɔbɛ. Ni dɔ be farala an ka kanuya barika kan Yezu koo la, an bena a Faa fana kanu kosɔbɛ.

6. Kuun wɛrɛ juman kama a kɔrɔtanin lo an ka kɛ Yezu teriw ye? A ɲɛfɔ.

⁶ A kɔrɔtanin lo an ka kɛ Yezu teriw ye,  n’an b’a fɛ Jehova k’an ka deliliw jaabi. An ka deliliw laban na, an b’a fɔ ko: “Yezu tɔgɔ la.” Nka, an man ɲi ka dan o dɔrɔn ma. Jehova be tɛmɛ Yezu fɛ cogo min na k’an ka deliliw jaabi, an ka ɲi k’o faamu fana. Yezu y’a fɔ a ka cidenw ye ko: “Aw mana fɛɛn o fɛɛn daali ne tɔgɔ la, ne bena o kɛ.” (Zan 14:13). Jehova lo b’an ka deliliw lamɛn ani k’u jaabi. Nka, a ye see di Yezu ma walisa a k’ale ka fɛtaw dafa (Mat. 28:18). O la, sanni Ala k’an ka deliliw jaabi, a b’a filɛ fɔlɔ n’an be Yezu ka ladili sira tagama. Ɲɛyirali fɛ, Yezu ko: “Mɔgɔ minw be fili aw ma, n’aw be yafa olu ma, aw Faa min be sankolo la, ale fana bena yafa aw ma. Nga, n’aw te yafa u ma, aw Faa min be sankolo la, ale fana tena yafa aw ma.” (Mat. 6:14, 15). Jehova ni Yezu b’an minɛ ni ɲumanya ye cogo min na, a kɔrɔtanin lo kosɔbɛ an ka tɔɔw minɛ o cogo la!

7. Yezu ka kunmabɔ saraka be jɔn lo nafa?

⁷ Minw be jɛnɲɔgɔnya teriman kɛ ni Yezu ye, olu dɔrɔn lo be nafa sɔrɔ a ka kunmabɔ saraka la. Mun na an b’o fɔ? An b’o fɔ sabu Yezu tun y’a fɔ ko ale bena a ‘nii di a teriw kosɔn.’ (Zan 15:13). Jehova sagokɛla kantigi dɔw ye ɲɛnamaya kɛ sanni Yezu ka na dugukolo kan. Olu lakununin kɔ, u ka ɲi k’a ɲini ka Yezu lɔn ani k’a kanu. U dɔw ye Ibrayima, Sara, Musa ani Rahab ye. O mɔgɔ tilenninw yɛrɛ ka ɲi ka teriya kɛ ni Yezu ye n’u b’a fɛ ka ɲɛnamaya banbali sɔrɔ.—Zan 17:3; Kɛw. 24:15; Eburuw 11:8-12, 24-26, 31.

8-9. Ka kɛɲɛ ni Zan 15:4, 5 ye, an be sera ka mun lo kɛ sabu an ye Yezu teriw ye? Mun na o teriya kɔrɔtanin lo?

⁸ Ninsɔndiya lo an fɛ ka baara kɛ ni Yezu ye walisa ka Masaya kibaro diiman fɔ mɔgɔw ye ani k’u kalan. Tuma min na Yezu tun be dugukolo kan, kalanfa tun lo. Kabi a kɔsegira sankolo la, ale lo ye kafo kuntigi ye. Ale lo b’an ka baara ɲɛminɛna, o min ye ka waajuli kɛ ani ka mɔgɔw kalan. I be jijali minw kɛra ka mɔgɔ caamanba dɛmɛ u ka Yezu n’a Faa lɔn, Yezu b’o kala ma ani o ka di a ye kosɔbɛ. Jehova ni Yezu yɛrɛ ka dɛmɛ lo sababu la an be sera k’o baara kɛ.—Zan 15:4, 5 kalan.

⁹ Ala ka Kuma b’a fɔ ka gwɛ ko walisa k’an koo diya Jehova ye, an ka ɲi ka to ka Yezu kanu. An ka koo naani lajɛ an be se ka minw kɛ walisa ka kɛ Yezu teriw ye.

10. An ka ɲi ka koo fɔlɔ juman lo kɛ walisa ka kɛ Yezu teriw ye?

¹⁰ A fɔlɔ: A ɲini ka Yezu lɔn. An be se k’o kɛ an kɛtɔ ka Bibulu ka kitabu nunu kalan: Matiyo, Mariki, Luka ani Zan. Yezu ka ɲɛnamaya lakalila yen. N’an be miiri o kitabuw kɔnɔkow kan, an bena Yezu kanu ani ka bonya la a kan sabu a ye mɔgɔw minɛ ni ɲumanya ye. Ɲɛyirali fɛ, a m’a ka kalandenw minɛ i n’a fɔ jɔɔnw hali k’a sɔrɔ ale lo tun y’u Matigi ye. Nka, a y’a kɔnɔnakow n’a dusukunnakow fɔ u ye (Zan 15:15). U dusu tun mana tiɲɛ, Yezu fana dusu tun be tiɲɛ. A yɛrɛ kasira n’u ye (Zan 11:32-36). Yezu juguw yɛrɛ tun b’a lɔn ko minw sɔnna a ka kalan ma, a kɛra olu teriw ye (Mat. 11:19). Yezu y’a ka kalandenw minɛ cogo min na, an k’a ladegi o la. N’an b’o kɛ, an ni tɔɔw ka jɛnɲɔgɔnya bena sabati ani an bena ninsɔndiya yɛrɛ le! An bena Yezu kanu ani ka bonya la a kan kosɔbɛ fana.

11. An ka ɲi ka koo filanan juman lo kɛ walisa ka kɛ Yezu teriw ye? Mun na o koo kɔrɔtanin lo?

 ¹¹ A filanan: Miiri ani koow kɛ i ko Yezu. N’an ye Yezu miiricogo lɔn ani k’o ladegi koɲuman, an be teriya min kɛra n’a ye, o barika bena bonya (1 Kor. 2:16). An be se ka Yezu ladegi cogo di? An ka ɲɛyirali kelen dɔrɔn lajɛ. Yezu tun be miiri min na ka kosɔbɛ, o ye ka tɔɔw dɛmɛ, a yɛrɛ diyanankow tɛ (Mat. 20:28; Ɔrɔm. 15:1-3). O kama, a tun be sɔn k’a yɛrɛ saraka tɔɔw nafa kosɔn ani ka yafa u ma. Mɔgɔw tun be min fɔ a koo la, a tun tɛ dimi joona o kosɔn (Zan 1:46, 47). A tun tɛ mɔgɔw minɛ fana ka kɛɲɛ n’u ka jurumu tɛmɛninw ye (1 Tim. 1:12-14). A kɔrɔtanin lo an ka mɔgɔw minɛ i ko Yezu tun b’a kɛ cogo min na sabu a ko: “Mɔgɔ bɛɛ ben’a lɔn o seen fɛ ko aw kɛra ne ka kalandenw ye, ni aw be ɲɔgɔn kanu.” (Zan 13:35). A ka ɲi i k’i yɛrɛ ɲininga ko: “Yala ne be Yezu ladegira n’ kɛtɔ ka n’ seko bɛɛ kɛ walisa ka to hɛɛrɛ la ni n’ balimaw ye wa?”

12. An ka ɲi ka koo sabanan juman lo kɛ walisa ka kɛ Yezu teriw ye? An be se k’o kɛ cogo di?

¹² A sabanan: Yezu balimaw dɛmɛ. An be koo minw kɛ Yezu balima mɔlenw ye, a b’a jati ko an b’o kɛ ale lo ye (Mat. 25:34-40). Yezu ye cii di a ka kalandenw ma ko u ka waajuli kɛ Ala ka Masaya koo la ani u ka mɔgɔw kɛ ale ka kalandenw ye. An be Yezu balimaw dɛmɛ cogo jɔnjɔn min na, o ye k’an seen don o baara la (Mat. 28:19, 20; Kɛw. 10:42). Baaraba min be kɛra waajuli la duniɲa kuru bɛɛ kɔnɔ, Yezu balimaw be sera k’o kɛ ‘saga dɔ wɛrɛ’ mɔgɔw ka dɛmɛ lo sababu la (Zan 10:16). N’i y’o mɔgɔ dɔ ye, tuma o tuma i mana waajuli kɛ, i b’a yira ko i be Yezu n’a balimaw kanu ani ko i masirinin lo u la.

13. Yezu ka ladili min be sɔrɔ Luka 16:9 kɔnɔ, an be se k’o sira tagama cogo di?

¹³ Jehova ni Yezu lo be waajuli baara ɲɛminɛna. An be se ka teriya kɛ n’u ye fana, an kɛtɔ ka wari di walisa ka dɛmɛ don o baara n’a ɲɔgɔnnaw na (Luka 16:9 kalan). Ɲɛyirali fɛ, baara min be kɛra duniɲa kuru bɛɛ kɔnɔ, an be se ka dɛmɛ don o la niliw sababu fɛ. Baara be kɛ n’o niliw ye walisa ka dɛmɛ don waajuli baara la yɔrɔjanw na. O niliw lo be kɛ ka Masaya Boonw n’a ɲɔgɔnnaw lɔ ani k’u ladon. Balawokow ye minw sɔrɔ, o niliw be kɛ fana k’olu dɛmɛ bololafɛnw koo ta fan fɛ. An be se ka wari di fana k’an ka kafo dɛmɛ ani kafoden minw mako be dɛmɛ na (Talenw 19:17). An be tɛmɛ o fɛɛrɛw lo fɛ ka Krista balimaw dɛmɛ.

14. Ka kɛɲɛ ni Efɛzikaw 4:15, 16 ye, an ka ɲi ka koo naaninan juman lo kɛ walisa ka kɛ Yezu teriw ye?

¹⁴ A naaninan: Dɛmɛ don Jehova ka ɔriganisasiyɔn ka labɛnw na. Yezu lo ye kafo kuntigi ye. An b’an ka jɛnɲɔgɔnya sabati n’a ye, n’an be sɔn ka kolo an ɲɛminɛbagaw ye (Efɛzikaw 4:15, 16 kalan). Ɲɛyirali fɛ, an b’a ɲinina ka baara kɛ ni Masaya Boonw bɛɛ ye cogo fisaman na. O kama, kafo dɔw farala ɲɔgɔn kan ka kɛ kelen ye ani yɛlɛmani donna kafo ka kiinw koo la. O kɛra sababu ye mɔgɔw ye wari min di ka kɛ niliw ye, ɔriganisasiyɔn sera k’o caaman mara. O wagati kelen na, a ɲinina weleweledala dɔw fɛ u ka yɛlɛmaniw kɛ ka kɛɲɛ n’o labɛn ye. N’a sɔrɔ o balima kantigiw tun be kafo dɔ kɔnɔ kabi saan caaman ani u tun be jɛnɲɔgɔnya  ɲuman kɛra n’o kafodenw ye. Nka sisan, a ɲinina u fɛ u ka taga kafo wɛrɛ kɔnɔ. Siga t’a la, Yezu dusu ka di kosɔbɛ k’a ye k’o balima kantigiw sɔnna o labɛnw na ani u be koow kɛra ka kɛɲɛ n’o ye!

15. An ka teriya bena sabati cogo di ni Yezu ye sini ma?

¹⁵ Mɔgɔ minw mɔnna ni hakili senu ye, olu jigi b’a la ka ɲɛnamaya kɛ ni Yezu ye fɔɔ abada sankolo la. U bena masaya kɛ n’a ye Ala ka Masaya kun na. U bena kɛ ni Yezu ye yɛrɛ yɛrɛ la. U bena kuma a fɛ ani ka wagati kɛ n’a ye (Zan 14:2, 3). Minw ka jigiya ye ka ɲɛnamaya kɛ dugukolo kan, olu fana bena a ye ko Yezu b’u kanu ani a b’a janto u la. Tiɲɛn lo k’u tɛna Yezu ye. Nka, u ka teriya bena to ka sabati n’a ye ɲɛnamaya banbali kɛtɔ dugukolo kan. U bena o ɲɛnamaya banbali sɔrɔ Jehova ni Yezu sababu lo la.—Ezayi 9:5, 6.

16. An be teriya min kɛra ni Yezu ye, an be duga jumanw lo sɔrɔ o la?

¹⁶ Yezu b’an weele ko an ka kɛ a teriw ye. N’an sɔnna o welekan na, an bena duga caaman sɔrɔ. Ɲɛyirali fɛ, a b’an kanu ani k’an dɛmɛ kabi sisan. Sababu dira an ma ka ɲɛnamaya kɛ fɔɔ abada. Min yɛrɛ kɔrɔtanin lo, o ye ko an be teriya min kɛra ni Yezu ye, o be kɛ sababu ye an be teriya sɔbɛ kɛ n’a Faa Jehova ye. O teriya ɲɔgɔn tɛ yen. Tiɲɛn na, ka weele ko Yezu teriw, o ye nɛɛmaba ye dɛ!