1-2. a) Mun na Arimagedɔn ye kibaro diiman ye? b) An bena ɲiningali jumanw lo lajɛ barokun nin na?

DƆW b’a miiri ko bɔnbu nikilɛri wala balawoko dɔ lo bena duniɲa halaki. Nka, Bibulu t’o fɔ. A b’a fɔ ko yanni dɔɔni, kɛlɛ dɔ bena kɛ min nɔfɛko bena kɛ hɛɛrɛko ye. A be weele ko Arimagedɔn ani Bibulu be min fɔ a koo la, o ka ɲi k’an ninsɔndiya (Yir. 1:3). Arimagedɔn kɛlɛ tɛna adamadenw siya tunu, nka a bena u kisi le! Cogo di do?

² Bibulu b’a fɔ ko Arimagedɔn kɛlɛ wagati la, Ala bena koo nunu kɛ walisa ka adamadenw kisi: a bena daan sigi adamadenw ka kuntigiya la, ka mɔgɔ juguw halaki, ka mɔgɔ tilenninw kisi ani ka dugukolo tiɲɛbagaw halaki (Yir. 11:18). Walisa k’o faamu ka ɲɛ, an ka ɲiningali naani nunu lajɛ: Arimagedɔn ye mun lo ye? Koo jumanw lo bena kɛ ka kɔn a ɲɛ? An ka ɲi ka mun lo kɛ walisa ka kisi Arimagedɔn wagati la? Arimagedɔn surunyana minkɛ, an be se ka to kantigiya la cogo di?

3. a) “Arimagedɔn” kɔrɔ ko di? b) Ka kɛɲɛ ni Yirali 16:14, 16 ye, mun na an be se k’a fɔ ko Arimagedɔn tɛ yɔrɔ yɛrɛ yɛrɛ ye?

³ Yirali 16:14, 16 kalan. “Arimagedɔn” bɔra eburukan kumaden dɔ la min kɔrɔ ko “Megido kulu.” A be sɔrɔ siɲɛ kelen dɔrɔn le Bibulu kɔnɔ (Yir. 16:16). Megido tun ye dugu dɔ ye Israɛl jamana na galen (Zozuwe 17:11). Nka, Arimagedɔn tɛ yɔrɔ yɛrɛ yɛrɛ ye dugukolo kan. A ɲɛsinna wagati dɔ lo ma, o min na “diɲɛ kɔnɔ masaw” bena lajɛn walisa ka Jehova kɛlɛ (Yir. 16:14). Kɛlɛ min bena kɛ o wagati la, o fana be weele ko Arimagedɔn. An b’a lɔn cogo di ko Arimagedɔn tɛ yɔrɔ  yɛrɛ yɛrɛ ye? A fɔlɔ, Megido kulu tɛ yen yɛrɛ yɛrɛ la. A filanan, “diɲɛ kɔnɔ masaw,” u ka kɛlɛbolow n’u ka kɛlɛkɛminanw bɛɛ tɛ se ka lajɛn Megido mara la sabu a ka dɔgɔ kojugu. A sabanan, an bena a ye ko Arimagedɔn kɛlɛ bena daminɛ tuma min na duniɲa “masaw” bena Ala sagokɛlaw kɛlɛ. Olu do jɛnsɛnnin lo duniɲa kuru bɛɛ kɔnɔ.

4. Mun na Jehova ye jɛn sigi kɛlɛba laban ni Megido cɛ?

⁴ Mun na Jehova ye jɛn sigi kɛlɛba laban ni Megido cɛ? Bibulu sɛbɛwagati la, kɛlɛ caaman kɛra Megido ani a gɛrɛfɛ, Zizireyɛli kɔkɛnɛ na. Tuma dɔw la, Jehova y’a ka mɔgɔw dɛmɛ u ye see sɔrɔ u juguw kan o kɛlɛw la. Ɲɛyirali fɛ, a ye kititigɛla Baraki dɛmɛ a ye see sɔrɔ cogo kabakoman na Kanankaw ka kɛlɛbolo dɔ kan, “Megido jii” daa la. Sizera lo tun b’o kɛlɛbolo kun na. Baraki ni kiramuso Debora ye Jehova fo o kosɔn. U ye dɔnkili la ko: “Ka lolow to sankolo la, . . . u ye Sizera kɛlɛ. Kisɔn kɔɔ [y’an juguw] ta.”—Kirit. 5:19-21.

5. Baraki ye kɛlɛ min kɛ, faranfasiba juman lo b’o ni Arimagedɔn kɛlɛ cɛ?

⁵ Baraki ni Debora y’u ka dɔnkili laban ko: “Masaba, i juguw bɛɛ ka halaki ten! E koo ka di mɔgɔ minw ye, olu ka kɛ i ko tile, a gwantuma papapa.” (Kirit. 5:31). O cogo kelen na, Arimagedɔn kɛlɛ la, Jehova juguw bena halaki ani a kanubagaw bena kisi. Nka, faranfasiba be Baraki ka kɛlɛ ni kɛlɛ nata cɛ. Arimagedɔn kɛlɛ la, Ala sagokɛlaw tɛna kɛlɛ kɛ. Kɛlɛkɛminanw yɛrɛ tɛna kɛ u bolo! U ka fanga bena kɛ min ye, o ye k’u ‘hakili sigi ani k’u jigi la’ Jehova n’a ka sankolola kɛlɛbolow kan.—Ezayi 30:15; Yir. 19:11-15.

6. Arimagedɔn kɛlɛ la, Ala bena a juguw halaki cogo di?

⁶ Arimagedɔn kɛlɛ la, Ala bena a juguw halaki cogo di? Fɛɛrɛ caaman b’a fɛ. A be se ka tɛmɛ dugukoloyɛrɛyɛrɛ, sanbɛrɛ wala sanyɛgɛyɛgɛ fɛ (Zɔbu 38:22, 23; Ezek. 38:19-22). A be se k’a kɛ a juguw be wuli ɲɔgɔn kama (2 Til. Kib. 20:17, 22, 23). A be se ka tɛmɛ a ka mɛlɛkɛw fana fɛ ka mɔgɔ juguw halaki (Ezayi 37:36). Ala mana tɛmɛ fɛɛrɛ o fɛɛrɛ fɛ, a juguw bɛɛ bena halaki. Nka, mɔgɔ tilenninw bɛɛ bena kisi.—Talenw 3:25, 26.

7-8. a) Ka kɛɲɛ ni 1 Tesalonikaw 5:1-6 ka fɔta ye, jamanaw ɲɛmɔgɔw bena mun lo wangola min bena bari bɛɛ la? b) Mun na faratiba bena kɛ o kumaw na?

⁷ Jamanaw ɲɛmɔgɔw bena a fɔ ko “hɛrɛ ni jigisigi be yen.” O kɔ, “Matigi bena na loon min na [Jehova ka loon, NW ],” o bena se (1 Tesalonikaw 5:1-6 kalan). “Jehova ka loon” min kofɔra 1 Tesalonikaw 5:2 kɔnɔ, o ɲɛsinna “tɔɔrɔba” wagati lo ma (Yir. 7:14). An bena a lɔn cogo di ko tɔɔrɔba wagati surunya kosɔbɛ? Bibulu b’a fɔ ko u bena koo dɔ wangola min bena bari bɛɛ la. O koo bena a yira ko tɔɔrɔba bena daminɛ yanni dɔɔni.

⁸ U bena min wangola, o ye ko “hɛrɛ ni jigisigi be yen.” Mun na jamanaw ɲɛmɔgɔw bena o fɔ? Diinan ɲɛmɔgɔw bena fara u kan wa? N’a sɔrɔ. An kɔni be min lɔn, o ye ko n’u y’a fɔ ko “hɛrɛ ni jigisigi be yen,” o ye jinaw ka ngalonfin dɔ ye. Nka, faratiba bena kɛ o kumaw na. U bena a to mɔgɔw b’a miiri k’u latanganin lo k’a sɔrɔ tɔɔrɔba dɔ be nana min ɲɔgɔn ma deli ka kɛ. O wagati la,  “tɔɔrɔ [wala halakili] bena ben u kan . . . i n’a fɔ muso ka tiin be cun a kan cogo min na.” Nka Jehova sagokɛla kantigiw do? Komi u t’a lɔn tɔɔrɔba bena daminɛ loon tigitigi min na, a bena bari u la dɔɔni. Nka, u labɛnnin bena to.

9. Jehova bena Sutana ka duniɲa nin halaki cogo di?

⁹ Jehova tɛna Sutana ka duniɲa nin bɛɛ halaki siɲɛ kelen i ko Nuhun ka wagati la. A fɔlɔ, a bena kɔn ka Babilonɛba lo halaki, o min ye ngalon diinanw jɛnkulu ye. A laban, a bena Sutana ka duniɲa tɔɔ halaki, o min ye politikikow, kɛlɛkow ani jagokow ye. An k’o koo kɔrɔtanin fila lajɛ.

10. Ka kɛɲɛ ni Yirali 17:1, 6 ani 18:24 ye, mun na Jehova bena Babilonɛba halaki?

¹⁰ “Kakalamuso min tɔgɔ bɔra kosɔbɛ,” ale kitiko (Yirali 17:1, 6; 18:24 kalan). Babilonɛba ye Ala tɔgɔ tiɲɛ kosɔbɛ. Ɲɛyirali fɛ, a ma tiɲɛn fɔ Ala koo la. I ko kakalamuso, a ye Jehova janfa a kɛtɔ ka jɛn ka koow kɛ ni duniɲa kuntigiw ye. Ngalon diinanw y’u fanga digi u ka diinandenw kan ani u y’u ka wari minɛ. U ye mɔgɔ caamanba faga fana, hali Ala sagokɛlaw yɛrɛ (Yir. 19:2). Jehova bena Babilonɛba halaki cogo di do?

11. “Sogo wuleman” ye mun lo tagamasiɲɛ ye? Ala bena tɛmɛ a fɛ cogo di ka Babilonɛba halaki?

¹¹ Jehova bena tɛmɛ “sogo wuleman” ka “gɔɔn tan” lo fɛ ka Babilonɛba halaki. O “sogo wuleman” ye Nasiyɔn Zini (ONU) lo tagamasiɲɛ ye. Jamana minw be dɛmɛ don Nasiyɔn Zini ka koow la, olu lo ye “gɔɔn tan” nunu ye. Ala ka wagati latigɛnin na, o jamanaw ni Nasiyɔn Zini bena wuli Babilonɛba kama. “U ben’a walaka k’a to lakolon,” u kɛtɔ k’a ka nafolow bɔsi a la ani k’a ka juguyakow yira bɛɛ la (Yir. 17:3, 16). O halakili bena kɛ yɔrɔnin kelen i n’a fɔ loon kelen koo. Minw be tugu Babilonɛba kɔ, o koo bena olu niinaban  sabu a tun be to ka waso. A tun be to ka waso ko ale be “i n’a fɔ masamuso min cɛɛ be nii na, ko sanga tena bɔ ale fɛ ka ye.”—Yir. 18:7, 8.

12. Jehova tɛna a to jamanaw ka mun lo kɛ ani mun na do?

¹² Ala tɛna a to jamanaw k’a sagokɛlaw halaki. Mun na do? Sabu a sagokɛlaw ye mɛnni kɛ a fɛ ani u bɔra Babilonɛba kɔnɔ. U y’u jija fana ka tɔɔw dɛmɛ walisa u ka bɔ a kɔnɔ. Ka fara o kan, u ninsɔn ka di sabu Ala tɔgɔ lara u kan (Kɛw. 15:16, 17; Yir. 18:4). O kama, Babilonɛba ka “tɔɔrɔ” si tɛna se olu ma. Nka, u ka limaniya bena kɔrɔbɔ.

13. a) Mun lo ye Gɔgi ye? b) Ka kɛɲɛ ni Ezekiyɛli 38:2, 3, 8, 9 ye, Arimagedɔn kɛlɛ bena daminɛ tuma juman?

¹³ Gɔgi ka kɛlɛ (Ezekiyɛli 38:2, 3, 8, 9 kalan). Ni Jehova ye ngalon diinanw bɛɛ halaki ka ban tuma min na, diinan kelenpe lo bena kɛ yen dugukolo kan: Jehova sagokɛlaw. Siga t’a la, o bena Sutana kɔnɔ gwan kosɔbɛ. O kosɔn, a bena tɛmɛ jinaw ka ngalonw fɛ k’a kɛ jamanaw be jɛn ka Jehova sagokɛlaw kɛlɛ (Yir. 16:13, 14). O jamanaw lajɛnnin lo be weele ko ‘Gɔgi min be Magɔgi jamana na.’ Tuma min na jamanaw bena wuli Jehova sagokɛlaw kama, Arimagedɔn kɛlɛ bena daminɛ.—Yir. 16:16.

14. Gɔgi bena bɔ mun lo kala ma?

¹⁴ Gɔgi bena a jigi la a “bolo farisogoma,” o kɔrɔ a ka kɛlɛbolow kan (2 Til. Kib. 32:8). An kɔni bena an jigi la Jehova, an ka Ala lo kan. Nka, jamanaw bena a miiri k’o ye hakilintanya lo ye. Mun na do? Sabu Babilonɛba fanga tun ka bon, nka a ka alaw ma se k’a kisi “sogo wulenman” n’a ka “gɔɔn tan” ka halakili ma! (Yir. 17:16). O kama, Gɔgi bena a miiri ko a tɛna gwɛlɛya a ma k’an halaki. A bena wuli an kama “i n’a fɔ sankaba be dugukolo datugu cogo min na.” (Ezek.  38:16). Nka, a bena bɔ a kala ma joona k’o kɛlɛ tɛna diya a la! A bena a ye ko a wulila Jehova lo kama i ko Farahuna y’o faamu cogo min na Kɔgɔji Wulen na.—Ɛkiz. 14:1-4; Ezek. 38:3, 4, 18, 21-23.

15. Arimagedɔn kɛla la, Yezu bena mun lo kɛ do?

¹⁵ Krista n’a ka sankolola kɛlɛbolow bena Ala sagokɛlaw latanga ani ka jamanaw n’u ka kɛlɛbolow bɛɛ halaki pewu (Yir. 19:11, 14, 15). Jehova juguba Sutana lo bena ngalon tigɛ jamanaw ye k’a kɛ u be wuli Ala sagokɛlaw kama Arimagedɔn kɛlɛ la. Mun lo bena kɛ Sutana na do? Yezu bena ale n’a ka jinaw fili dingɛjugu kɔnɔ. U bena to yen fɔɔ saan waa kelen.—Yir. 20:1-3.

16. a) An b’a yira cogo di ko an be “Ala lɔn”? b) N’an be Jehova lɔn, o bena an nafa cogo di Arimagedɔn kɛlɛ la?

¹⁶ An ka ɲi ka mun lo kɛ walisa ka kisi Arimagedɔn kɛlɛ la? An be tiɲɛn sira kan a mɛɛnna wo a ma mɛɛn wo, an ka ɲi k’a yira ko an be “Ala lɔn” ani ko an be “sɔn an Matigi Yezu ka kibaru diman ma.” (2 Tes. 1:7-9). N’an be Ala ka sariyaw lɔn, n’an b’a lɔn min ka di a ye ani min man di a ye, an b’a yira ko an be “Ala lɔn.” An b’o yira fana n’an b’a kanu, n’an be mɛnni kɛ a fɛ ani n’an b’ale kelenpe lo bato (1 Zan 2:3-5; 5:3). N’an b’o koow kɛ, Ala fana bena an lɔn, o kɔrɔ an koo bena diya a ye (1 Kor. 8:3). O la, an bena kisi Arimagedɔn kɛlɛ la!

17. An b’a yira cogo di ko an be “sɔn an Matigi Yezu ka kibaru diman ma”?

¹⁷ Yezu ye mɔgɔw kalan min bɛɛ la, o lo ye “an Matigi Yezu ka kibaru diman” ye ani o be sɔrɔ Ala ka Kuma kɔnɔ. An b’a yira ko an be sɔn o kibaro diiman ma n’an be koo nunu kɛ: ka Yezu ka kalanw sira tagama, ka Ala ka Masaya ɲini fɔlɔ, ka Jehova ka sariyaw labato ani ka Masaya kibaro diiman fɔ (Mat. 6:33; 24:14). An b’o yira fana n’an  be Krista balima mɔlenw dɛmɛ u k’u ka kunkanbaaraba dafa.—Mat. 25:31-40.

18. “Saga dɔ wɛrɛw” ye ɲumanya min kɛ kerecɛn mɔlenw ye, mɔlenw bena u sara o kosɔn cogo di?

¹⁸ “Saga dɔ wɛrɛw” ye ɲumanya min kɛ kerecɛn mɔlenw ye, yanni dɔɔni o mɔlenw bena u sara o kosɔn (Zan 10:16). Sanni Arimagedɔn kɛlɛ ka daminɛ, o y’a sɔrɔ mɔgɔ 144 000 nunu bɛɛ be sankolo la. U bena kɛ mɛlɛkɛw ye ani Ala bena sabaliya di u ma. U bena kɛ sankolola kɛlɛbolow cɛma. O kɛlɛbolow lo bena Gɔgi halaki ani ka Jehova sagokɛlaw “jamaba” kisi (Yir. 2:26, 27; 7:9, 10). O jamaba bena ninsɔndiya kosɔbɛ sabu a ye mɔlenw dɛmɛ dugukolo kan.

19-20. Arimagedɔn be surunyana minkɛ, an be se ka to kantigiya la cogo di gwɛlɛyaw bɛɛ n’a ta?

¹⁹ Gwɛlɛyaw be Jehova sagokɛla caaman kan sabu an be laban loonw lo la. Nka, an be se ka muɲuli kɛ ni ninsɔndiya ye (Zaki 1:2-4). N’an be to ka delili kɛ n’an dusu bɛɛ ye, o bena an dɛmɛ kosɔbɛ (Luka 21:36). An ka Bibulu kalan loon o loon, ka miiri a kan ani ka sɛgɛsɛgɛri kɛ. Kiraya kuma minw b’a yira koo minw bena kɛ yanni dɔɔni, an ka miiri olu fana kan (Zab. 77:13). N’an b’o koow kɛ ani n’an b’an seko bɛɛ kɛ waajuli la, an ka limaniya n’an ka jigiya sabatinin bena to!

²⁰ Ni Babilonɛba halakira ani ni Arimagedɔn kɛlɛ banna, miiri k’a filɛ i ninsɔn bena diya cogo min na! Miiri k’a filɛ fana i ninsɔn bena diya cogo min na tuma min na Ala tɔgɔ n’a ka Masabaya bena lafasa! (Ezek. 38:23). Tiɲɛn na, Arimagedɔn ye kibaro diiman ye mɔgɔ nunu fɛ: minw be Ala lɔn, u be mɛnni kɛ a Dencɛ fɛ ani u be muɲuli kɛ fɔɔ laban na.—Mat. 24:13.