1. Mun na an ka ɲi ka kolo Jehova ye?

AN KA ɲi ka kolo * Jehova ye sabu ale lo y’an Danbaga ye. Joo b’ale lo fɛ ka sariyaw sigi a ka danfɛnw ye (Yir. 4:11). Nka, an be kolo Jehova ye kuun jɔnjɔn wɛrɛ min kama, o ye ko a ka kuntigiya ɲɔgɔn tɛ yen. Kabi wagatijan, adamaden caaman ye kuntigiya kɛ u mɔgɔɲɔgɔnw kun na. Nka, n’an y’u ka kuntigiya suma ni Jehova ta ye, an b’a ye ko Jehova ka hakilitigiya, a ka kanuya, a ka makari n’a ka hinɛ ɲɔgɔn tɛ yen.—Ɛkiz. 34:6; Ɔrɔm. 16:27; 1 Zan 4:8.

2. Ka kɛɲɛ ni Eburuw 12:9-11 ka fɔta ye, mun na an ka ɲi ka kolo Jehova ye?

² Jehova t’a fɛ ale ɲɛsiran dɔrɔn k’an lasun ka mɛnni kɛ a fɛ. Nka, a b’a fɛ an ka mɛnni kɛ ale fɛ sabu an b’a kanu ani an b’a jati an Faa kanutigi ye. Pol ye bataki min ci Eburuw ma, a y’a ɲɛfɔ o kɔnɔ ko an ka kan ka kolo an sankolola Faa ye sabu ale “b’an ladi an ka ɲa kosɔn.”—Eburuw 12:9-11 kalan.

3. a) An b’a yira cogo di ko an kolonin lo Jehova ye? b) An bena ɲiningali jumanw lo lajɛ?

³ An be kolo Ala ye n’an b’an jija sɔbɛ la ka mɛnni kɛ a fɛ koo bɛɛ la ani n’an t’an jigi la an yɛrɛ kan (Talenw 3:5). N’an be Jehova ka jogo ɲumanw lɔn, a tɛna gwɛlɛya an ma ka kolo a ye. Mun na do? Sabu o jogow be ye a ka kokɛtaw bɛɛ la (Zab. 145:9). N’an tora ka Jehova lɔn  ka ɲɛ, dɔ bena to ka fara an ka kanuya barika kan a koo la. N’an b’a kanu, an mako tɛna kɛ sariya caaman na minw b’a yira an ka ɲi ka min kɛ ani an man ɲi ka min kɛ. An bena an jija ka miiri ani ka koow jati i ko ale. An bena ban fana ka kojugu kɛ (Zab. 97:10). Nka, mun na a man nɔgɔ an ma ka kolo Jehova ye tuma dɔw la? Gofɛrɛnɛrɛ Neemi, masacɛ Dawuda ani Yezu bamuso Mariyamu ka koow be se ka diinan mɔgɔkɔrɔw, denfaw ani denbaw dɛmɛ cogo di? An bena o ɲiningaliw lo lajɛ.

4-5. Ka kɛɲɛ ni Ɔrɔmukaw 7:21-23 ka fɔta ye, mun na a be se ka gwɛlɛya an ma ka kolo Jehova ye?

⁴ Fɛɛn minw b’a to a be se ka gwɛlɛya an ma ka kolo Jehova ye, u la dɔ ye ko an bɛɛ ye jurumutɔw ye. O kama, tuma bɛɛ tɛ an b’a fɛ ka kolo Jehova ye. Ala tun ko Adama ni Awa kana yiri dɔ deen dumu. Tuma min na u murutira Ala ma k’o yiri deen dumu, u y’a latigɛ u yɛrɛ ma min ka ɲi ani min man ɲi (Zɛnɛzi 3:22). Bi fana, mɔgɔw fanba b’o lo kɛ. U tɛ sɔn ka mɛnni kɛ Ala fɛ.

⁵ Hali minw be Jehova lɔn ani u b’a kanu, a be se ka gwɛlɛya olu ma ka kolo a ye bɛrɛbɛrɛ. O ɲɔgɔn ye ciden Pol sɔrɔ (Ɔrɔmukaw 7:21-23 kalan). I ko Pol, an b’a fɛ ka koo tilennin kɛ Jehova ɲɛɛ kɔrɔ. Nka, fɔɔ an ka to k’an ka nege juguw kɛlɛ.

6-7. Koo wɛrɛ juman lo kama a be se ka gwɛlɛya an ma ka kolo Jehova ye? Ɲɛyirali dɔ fɔ.

⁶ An lamɔna yɔrɔ min na, o yɔrɔ mɔgɔw ka kokɛcogo n’u ka miiricogo fana be se k’a to a be gwɛlɛya an ma ka kolo Jehova ye. Mɔgɔ caaman ka miiriyaw bɛnnin tɛ ni Jehova sago ye. O kama, tuma o tuma an ka ɲi ka banba walisa an kana kɛ n’o miiriyaw ɲɔgɔn ye. An ka ɲɛyirali dɔ lajɛ.

⁷ Jamana dɔw la, mɔgɔw ka teli ka kanbelew ni sunguruw lasun u k’u jija ka wari caaman sɔrɔ. O ɲɔgɔn ye balimamuso dɔ sɔrɔ min tɔgɔ ko Mari. * A ye kalan kɛ u ka jamana ka inivɛrisiteba dɔ la. Mari somɔgɔw tun b’a lasunna a ka baara ɲini min sara ka ca ani mɔgɔw bena a bonya min kosɔn. Ale fana tun b’o lo fɛ. Nka a y’a ka laɲinitaw yɛlɛma sabu a ye tiɲɛn lɔn Jehova koo la ani a y’a kanu. O bɛɛ n’a ta, a ko: “Tuma dɔw la, n’ be sababu dɔw sɔrɔ minw be se k’a to n’ be wari caaman sɔrɔ. Nka n’ be ban o la, sabu n’ b’a lɔn k’o bena n’ bali ka Jehova sago kɛ i ko n’ b’a kɛra cogo min na sisan. N’ lamɔcogo kosɔn, a bele ka gwɛlɛ n’ ma ka ban sababu dɔw la. Fɔɔ n’ ka to ka Jehova deli a ka n’ dɛmɛ n’ kana sɔn baara dɔ la min bena n’ bali k’a sago kɛ bɛrɛbɛrɛ.”—Mat. 6:24.

8. An bena mun lo lajɛ sisan?

⁸ N’an be kolo Jehova ye, o b’an yɛrɛ lo nafa. Kuntigiya dɔ kalifara diinan mɔgɔkɔrɔw, denfaw ni denbaw ma. N’u be kolo Ala ye, u bena se ka tɔɔw dɛmɛ. An ka ɲɛyirali dɔw lajɛ Bibulu kɔnɔ walisa k’a faamu cogo min na mɔgɔ be se k’a ka kuntigiya kɛ ka kɛɲɛ ni Jehova sago ye.

9. Neemi ye gwɛlɛya jumanw lo sɔrɔ?

⁹ Jehova ye kunkanbaaraba kalifa diinan mɔgɔkɔrɔw ma ko u k’u janto ale sagokɛlaw la (1 Piyɛri 5:2). Neemi ye Jehova sagokɛlaw minɛ cogo min na,  ni diinan mɔgɔkɔrɔw y’o sɛgɛsɛgɛ, u bena koo caaman faamu. Neemi lɔyɔrɔ tun ka bon sabu a tun ye Zuda mara ka gofɛrɛnɛrɛ ye (Neemi 1:11; 2:7, 8; 5:14). Miiri k’a filɛ a ye gwɛlɛya minw sɔrɔ. A y’a mɛn ko Yahutuw be koo dɔw kɛra Alabatosoba kɔnɔ minw tɛ bonya la Jehova kan. Dɛmɛ min tun ka kan ka di Levitew ma, u tun t’o dira u ma. U tun tɛ Jehova ka sariya labato lafiɲɛlon koo la. Cɛɛ dɔw fana tun ye siya wɛrɛ musow furu minw tɛ Jehova batobagaw ye. Gofɛrɛnɛrɛ Neemi tun ka ɲi k’o gwɛlɛyaw ɲɛnabɔ.—Neemi 13:4-30.

10. Neemi ye Jehova ka jama minɛ cogo di?

¹⁰ Kuntigiya min tun kalifara Neemi ma, a ma ta o ma ka jama waajibiya u k’ale sago kɛ. Nka, a ye Jehova deli n’a dusu bɛɛ ye walisa a k’a dɛmɛ ani a ye jama kalan Jehova ka sariyaw la (Neemi 1:4-10; 13:1-3). Neemi y’a yɛrɛ majigi fana ka baara kɛ n’a balimaw ye. A yɛrɛ y’u dɛmɛ ka Zeruzalɛmu kogow lɔ kokura.—Neemi 4:9. *

11. Ka kɛɲɛ ni 1 Tesalonikaw 2:7, 8 ye, diinan mɔgɔkɔrɔw ka ɲi ka kafomɔgɔw minɛ cogo di?

¹¹ N’a sɔrɔ diinan mɔgɔkɔrɔw tɛna Neemi ka gwɛlɛyaw ɲɔgɔn sɔrɔ. Nka, u be se k’a ladegi cogo caaman na. Ɲɛyirali fɛ, u b’u jija k’u balimaw dɛmɛ. Kuntigiya min kalifara u ma, u tɛ ta o ma k’a miiri k’u ka fisa n’u balimaw ye. Nka, u b’u minɛ ni kanuya ye (1 Tesalonikaw 2:7, 8 kalan). U be kuma u balimaw fɛ ni ɲumanya ye sabu u b’u kanu sɔbɛ la ani u majiginin lo. Andere ye diinan mɔgɔkɔrɔ ye kabi saan caaman. A ko: “N’ y’a kɔrɔsi ko ni diinan mɔgɔkɔrɔw be balimaw minɛ ni ɲumanya ni kanuya sɔbɛ ye, o ka di balimaw ye kosɔbɛ. O jogow b’u lasun ka mɛnni kɛ diinan mɔgɔkɔrɔw fɛ.”  Toni fana ye diinan mɔgɔkɔrɔ ye kabi saan caaman ani a ko: “N’ be n’ jija ka Filipikaw 2:3 ka ladili sira tagama. Tuma o tuma, n’ be n’ jija fana k’a jati ko tɔɔw ka fisa ni n’ ye. O be n’ dɛmɛ n’ kana n’ fanga digi tɔɔw kan.”

12. Mun na a kɔrɔtanin lo diinan mɔgɔkɔrɔw ka kɛ ni majigilenya ye?

¹² Diinan mɔgɔkɔrɔw ka ɲi ka kɛ ni majigilenya ye i ko Jehova. Hali k’a sɔrɔ Jehova lo ye duniɲa kuru bɛɛ Masaba ye, “a b’a yɛrɛ majigi” ani “a be makaritɔ wili ka bɔ duguma.” (Zab. 18:36; 113:6, 7). Bibulu b’a fɔ ko kuncɛbaw koo ka gwo Jehova ye.—Talenw 16:5.

13. Mun na diinan mɔgɔkɔrɔ ka ɲi k’a “kumacogo kɔlɔsi”?

¹³ Diinan mɔgɔkɔrɔ min be kolo Jehova ye, ale b’a “kumacogo kɔlɔsi.” N’o tɛ, ni dɔ y’a mafiɲɛya, a be se ka kuma jugu fɔ o tigi ma (Zaki 1:26; Gal. 5:14, 15). Andere y’a fɔ tugun ko: “Tuma dɔw la, n’a be n’ ɲɛɛ na ko balima dɔ ye n’ mafiɲɛya, n’ b’a fɛ ka kuma jugu fɔ a ma. Nka, n’ be miiri cɛɛ kantigi dɔw koo la minw kofɔra Bibulu kɔnɔ. O be n’ dɛmɛ k’a faamu ko a kɔrɔtanin lo n’ ka n’ yɛrɛ majigi ani n’ ka kɛ mɔgɔ sabalinin ye.” Ni diinan mɔgɔkɔrɔ be kuma n’a balimaw ani diinan mɔgɔkɔrɔ tɔɔw ye ni kanuya ni ɲumanya ye, o b’a yira ko a kolonin lo Jehova ye.—Kɔlɔs. 4:6.

14. Jehova ye kunkanbaara juman lo kalifa denfaw ma? A b’a fɛ u k’o dafa cogo di?

¹⁴ Jehova ye denfaw lo sigi u ka denbayaw kun na. A b’a fɛ u k’u deenw kalan, k’u ɲɛminɛ ani k’u kolo (1 Kor. 11:3; Efɛz. 6:4). Nka, daan be denfaw ka kuntigiya la. U b’u ka kuntigiya kɛ cogo min na, Jehova bena u ɲininga o la sabu ale lo ye denbayaw bɛɛ Tigi ye (Efɛz. 3:14, 15). Denfa minw be kolo Jehova ye, olu b’u ka kuntigiya kɛ ka kɛɲɛ ni Jehova sago ye. N’u ye masacɛ Dawuda ka koo sɛgɛsɛgɛ, u bena koo caaman faamu.

15. Mun na masacɛ Dawuda ye ɲɛyirali ɲuman ye denfaw fɛ?

¹⁵ Dawuda tun y’a ka denbaya kuntigi ye. Nka o dɔrɔn tɛ. Jehova tun y’a sigi Israɛl siya fana kun na. Ka Dawuda to a ka masaya la, setigiyaba tun b’a fɛ. Tuma dɔw la, a ye baara jugu kɛ n’o setigiya ye ani a ye jurumubaw kɛ (2 Sam. 11:14, 15). Nka, a y’a yira ko a be mɛnni kɛ Jehova fɛ sabu a sɔnna Jehova ka kololi ma. A y’a seko kɛ ka Jehova ka  ladiliw sira tagama ani a y’a kɔnɔkow bɛɛ fɔ a ye delili la (Zab. 51:3-6). Dawuda sɔnna cɛɛw, hali muso dɔw yɛrɛ ka ladili ɲumanw ma fana. O b’a yira ko a tun majiginin lo yɛrɛ le! (1 Sam. 19:11, 12; 25:32, 33). Dawuda y’a to a ka filiw y’a kolo ani Jehova ka baara lo tun y’a ɲɛnako fɔlɔ ye.

16. Denfaw be se ka kalan jumanw sɔrɔ Dawuda fɛ?

¹⁶ Denfaw be se ka kalan jumanw sɔrɔ masacɛ Dawuda fɛ? Denfa, Jehova ye kuntigiya min kalifa i ma, kana ta o ma k’i fanga digi i ka denbayamɔgɔw kan. Sɔn i ka filiw ma ani ni dɔ basigira Bibulu kan k’i ladi, sɔn o ma fana. N’i y’o kɛ, i ka denbayamɔgɔw bena i bonya i ka majigilenya kosɔn. Delili kɛtɔ n’u ye, i kɔnɔkow bɛɛ fɔ Jehova ye. O la, u bena a lɔn ko i jigi bɛɛ lanin lo Jehova lo kan. Min yɛrɛ kɔrɔtanin lo ka tɛmɛ, Jehova ka baara kɛ i ɲɛnako fɔlɔ ye (Deter. 6:6-9). I ka ɲɛyirali ɲuman ye nilifɛnw bɛɛ la nafamanba ye i be se ka min di i ka denbayamɔgɔw ma.

17. Jehova ye kunkanbaara juman lo kalifa denbaw ma?

¹⁷ Jehova ye kunkanbaaraba kalifa denbaw fana ma. A ye kuntigiya dɔ kalifa u ma u deenw kun na (Talenw 6:20). Denba be min kɛ ani a be fɔ, o be se ka nɔɔba to a deenw kan u sii bɛɛ la (Talenw 22:6). An k’a filɛ denbaw be se ka kalan min sɔrɔ Yezu bamuso Mariyamu fɛ.

18-19. Denbaw be se ka kalan jumanw sɔrɔ Mariyamu fɛ?

¹⁸ Mariyamu tun be Ala ka Kuma lɔn koɲuman. A tun be bonya la Jehova kan kosɔbɛ ani a tun be jɛnɲɔgɔnya teriman kɛ n’a ye. A tun labilanin lo ka Jehova sago kɛ hali n’o tun bena a ka ɲɛnamaya kɛcogo yɛlɛma pewu.—Luka 1:35-38, 46-55.

¹⁹ Denbaw, aw be se ka Mariyamu ladegi cogo caaman na. A fɔlɔ, aw be jɛnɲɔgɔnya teriman min kɛra ni Jehova ye, aw k’o barika bonya. Cogo di do? Aw kɛtɔ ka kelenna kalan ni delili kɛ tuma o tuma. A filanan, aw ye sɔn ka yɛlɛmaniw kɛ walisa k’aw koo diya Jehova ye. Ɲɛyirali fɛ, n’a sɔrɔ i bangebagaw tun be dimi joona ani u tun be kuma gwɛlɛw fɔ u deenw ma. O la, n’a sɔrɔ i b’a miiri k’o ye deen lamɔcogo ɲuman ye. Sisan, i y’a faamu Jehova b’a fɛ i k’i deenw minɛ cogo min na. Nka, a be se ka gwɛlɛya i ma ka muɲu ani k’i dusu suma u kɔrɔ, sanko n’i sɛgɛnnin lo ani n’u ma mɛnni kɛ i fɛ  (Efɛz. 4:31). O ɲɔgɔn na, a kɔrɔtanin lo i ka Jehova deli a k’i dɛmɛ. Denba dɔ tɔgɔ ko Lydia. A ko: “Tuma dɔw la ni n’ dencɛ ma mɛnni kɛ n’ fɛ, n’ be Jehova deli kosɔbɛ walisa n’ kana kuma a fɛ n’ diminin. N’ yɛrɛ delila ka bari ka kuma lalɔ ani ka Jehova deli n’ kɔnɔ a ka n’ dɛmɛ. Delili be n’ dɛmɛ n’ ka n’ dusu suma.”—Zab. 37:5.

20. Gwɛlɛya juman be denba dɔw kan? U be se ka see sɔrɔ o gwɛlɛya kan cogo di?

²⁰ A ka gwɛlɛ denba dɔw ma fana k’a yira u deenw na ko u b’u kanu (Titi 2:3, 4). Denba caaman denmisɛn tuma, u bangebagaw ma jɛnɲɔgɔnya teriman kɛ n’u ye. N’i lamɔna o cogo la, kana segi k’i bangebagaw ka fili ɲɔgɔn kɛ. Denba min kolonin lo Jehova ye, ale ka ɲi k’a ɲini k’a lɔn cogo min na a be se k’a yira a deenw na ko a b’u kanu. A be se ka gwɛlɛya a ma k’a miiricogo, a dusukunnakow ani a ka kokɛcogow yɛlɛma. Nka, a be se k’o kɛ ani o yɛlɛmaniw bena ale n’a ka denbayamɔgɔw nafa.

21-22. Ka kɛɲɛ ni Ezayi 65:13, 14 ye, minw be kolo Jehova ye, olu be nafa jumanw lo sɔrɔ?

²¹ Masacɛ Dawuda tun b’a lɔn nafa minw b’a la ka kolo Jehova ye. A y’a sɛbɛ ko: “Masaba ka fɔtaw ka ɲi, o be mɔgɔw nisɔndiya. Masaba ka ɲinita gwɛnin lo, o be mɔgɔw ɲaa yɛlɛ. Masaba, o y’i ka baarakɛla lalɔnniya, nafaba b’o batoli la.” (Zab. 19:9, 12). Bi, an b’a ye faranfasi min be mɔgɔ nunu cɛ: minw be kolo Jehova ye ani minw tɛ kolo a ye. Minw be kolo a ye, olu “dusu diyanin” be dɔnkili la.—Ezayi 65:13, 14 kalan.

²² Ni diinan mɔgɔkɔrɔw, denfaw ani denbaw be kolo Jehova ye, u ka ɲɛnamaya be fisaya. U ka denbayaw fana be kɛ hɛɛrɛ la ani kafo ka kelenya be sabati kosɔbɛ. Min kɔrɔtanin lo ka tɛmɛ o bɛɛ kan, o ye ko u be Jehova dusu diya (Talenw 27:11). Foyi tɛ mɔgɔ ninsɔn diya ka se o ma!