1. Jehova be mun lo miiri mɔgɔ majigininw koo la? A ɲɛfɔ.

MƆGƆ majigininw koo ka di Jehova ye. Minw majiginin lo sɔbɛ la, olu dɔrɔn lo be se ka jɛnɲɔgɔnya teriman kɛ ni Jehova ye. Nka, a “be yɛrɛboɲalaw lɔn yɔrɔjan.” (Zab. 138:6). An bɛɛ b’a fɛ k’an koo diya Jehova ye ani k’a ye ko a b’an kanu. O kama, a kɔrɔtanin lo an k’a ɲini ka kɛ ni yɛrɛmajigilenya ye.

2. An bena mun lo lajɛ barokun nin na?

² An bena ɲiningali saba nunu lajɛ: 1) Yɛrɛmajigilenya ye mun lo ye? 2) Mun na an ka ɲi k’a ɲini ka kɛ n’o jogo ye? 3) Koo jumanw lo be se k’an ka majigilenya kɔrɔbɔ? An bena a ye ko n’an majiginin lo, an be Jehova dusu diya ani o b’an yɛrɛ nafa.—Talenw 27:11; Ezayi 48:17.

3. Yɛrɛmajigilenya ye mun lo ye?

³ Mɔgɔ majiginin t’a yɛrɛ fisaya ni tɔɔw ye ani a t’a yɛrɛ bonya. Bibulu b’a yira ko mɔgɔ majiginin b’a faamu ko a tɛ suma ni Ala ye hali dɔɔni. A b’a jati ko tɔɔw ka fisaya n’ale ye koo dɔw la.—Filip. 2:3, 4.

4-5. Mun na majigilenya sɔbɛ tɛ ɲɛnayeli koo ye?

⁴ Mɔgɔ dɔw be komi u majiginin lo k’a sɔrɔ u majiginin tɛ tiɲɛn na. N’a sɔrɔ kuma man di u ye wala u be mɔgɔw bonya sabu u lamɔna ten le. Nka tiɲɛn tiɲɛn na, n’a sɔrɔ u ye kuncɛbaw ye. A mɛɛn o mɛɛn, u bena u sɔɔn yɛrɛ yɛrɛ yira.—Luka 6:45.

 ⁵ Dɔw fana be sin k’u ka miiriya fɔ ani a be komi u lanin b’u yɛrɛ la. O kɔrɔ tɛ k’u ye kuncɛbaw ye (Zan 1:46, 47). Nka, o ɲɔgɔnnamɔgɔw ka ɲi k’u yɛrɛ kɔrɔsi walisa u kana la u yɛrɛ la kojugu. Kuma ka di an ye wo, kuma man di an ye wo, an bɛɛ ka ɲi k’an jija k’an yɛrɛ majigi sɔbɛ la.

6. Ka kɛɲɛ ni 1 Korɛntikaw 15:10 ye, an be kalan juman lo sɔrɔ ciden Pol ka koo la?

⁶ An ka ciden Pol ka koo lajɛ. Jehova tɛmɛna a fɛ siɲɛ caaman ka kafo kuraw juu sigi dugu ni duguw la. N’a sɔrɔ a ye caaman kɛ waajuli la ka tɛmɛ Yezu ka ciden tɔɔw bɛɛ kan. Nka, Pol m’a yɛrɛ fisaya n’a balimaw ye. A y’a fɔ ni majigilenya ye ko: “Ne ye cidenw bɛɛ la fitinin ye, ne man kan ka wele ko ciden yɛrɛ, bari minw lara Ala la ne ye olu tɔɔrɔ.” (1 Kor. 15:9). O kɔ, a ko ale tɛ jɛnɲɔgɔnya ɲuman kɛra ni Jehova ye ale ka baara n’a ka setigiya kosɔn. Nka, a ko a be jɛnɲɔgɔnya ɲuman kɛra ni Ala ye sabu a ye nɛɛma kɛ ale ye (1 Korɛntikaw 15:10 kalan). Pol ye ɲɛyirali ɲuman ye majigilenya koo la. Tuma min na a ye lɛtɛrɛ ci Korɛnti kafo ma, a ma waso hali k’a sɔrɔ kafoden dɔw tun b’a jati k’u ka fisa n’a ye.—2 Kor. 10:10.

7. An ka wagati la, nɛɛma baara kalifara balimacɛ minw ma, olu la dɔ y’a yira cogo di ko a majiginin lo?

⁷ Balimacɛ Karl F. Klein ka maana ye Jehova sagokɛla caaman jija. A tun kɛra Koow Ɲɛnabɔla Jɛnkulu mɔgɔ dɔ ye. A y’a ka ɲɛnamaya lakali k’a yira a ye gwɛlɛya minw sɔrɔ ani a y’a ka fiɲɛ caaman kofɔ. A y’o kɛ ni majigilenya ni kɔnɔgwɛ ye. Ɲɛyirali fɛ, a siɲɛ fɔlɔ ka waajuli kɛ soo ni soo saan 1922, a y’a jati  k’o baara ka gwɛlɛ kojugu. O kama, a ye saan fila ɲɔgɔn kɛ a ma bɔ waajuli la. Kɔfɛ, tuma min na a tun be Betɛli la, a ye dimi mara sabu balima dɔ tun y’a ladi. Hakiliɲagami bana delila k’a minɛ ani a kɛnɛyara. Kunkanbaarabaw kalifara a ma fana Jehova ka ɔriganisasiyɔn kɔnɔ. Mɔgɔ caaman tun be balimacɛ Klein lɔn. O n’a ta bɛɛ, a y’a kɔnɔ gwɛ ka kuma a ka filiw koo la. O b’a yira ka gwɛ ko a majiginin tun lo kosɔbɛ. Balima caaman bele hakili b’a la. A y’a kɔnɔ gwɛ k’a ka ɲɛnamaya lakali minkɛ, o diyara balima caaman ye ani u hakili tora o la. *

8. Majigilenya ka di Jehova ye. 1 Piyɛri 5:6 b’an dɛmɛ cogo di k’o faamu?

⁸ Kuun jɔnjɔn min kama an ka ɲi k’a ɲini ka kɛ ni majigilenya ye, o ye k’o ka di Jehova ye. Ciden Piyɛri y’o lo yira ka gwɛ (1 Piyɛri 5:6 kalan). Piyɛri ye min fɔ, an ka gafe dɔ b’o ɲɛfɔ ko: “Kuncɛbaya be i ko pɔsɔni. A baga ka fari. Hali ni dɔ be ni setigiyaba ye, ni kuncɛba lo, nafa si t’a la Ala ɲɛɛ kɔrɔ. Nka ni mɔgɔ majiginin lo, hali ni setigiya bɛrɛ t’a fɛ, o tigi nafa ka bon Jehova ɲɛɛ kɔrɔ. . . . A bena diya [a] ye kosɔbɛ k’i duga i ka majigilenya kosɔn.” * Tiɲɛn na, ka Jehova ninsɔn diya, fɛɛn si nafa man bon ka se o ma!—Talenw 23:15.

9. N’an majiginin lo, mun na o b’a to an koo be diya mɔgɔw ye?

⁹ N’an b’a ɲini ka kɛ ni majigilenya ye, o be Jehova ninsɔn diya ani o b’an yɛrɛ nafa kosɔbɛ. N’an majiginin lo, an koo bena diya mɔgɔw ye. Miiri k’a filɛ a ka d’i ye ka kɛ ni mɔgɔ sifa minw ye (Mat. 7:12). Dɔw b’a fɛ olu sago lo ka kɛ tuma bɛɛ ani u tɛ sɔn ladiliw ma. A man di an fanba ye ka jɛnɲɔgɔnya kɛ n’o ɲɔgɔnna mɔgɔw ye. Nka, an ninsɔn ka di kosɔbɛ ka kɛ n’an kerecɛnɲɔgɔnw ye n’u be ‘ɲɔgɔn kanu i n’a fɔ balimaw, ka ɲɔgɔn dɛmɛ, ka makari ɲɔgɔn na, k’u majigi ɲɔgɔn ye.’ (1 Piyɛri 3:8). Ni mɔgɔ majigininw koo ka di an ye, an ka la a la ko n’an fana majiginin lo, an koo bena diya u ye.

10. Majigilenya be koow nɔgɔya an ma cogo di?

¹⁰ Majigilenya be koow nɔgɔya an ma fana. Tuma dɔw la, an bena koo dɔw  ye wala koo dɔw bena kɛ an na minw tilennin tɛ an ɲɛɛ na. Masacɛ hakilitigi Solomani ko: “Ne ye jɔɔnw taatɔ ye soow kan, ka masadenw ye seen na i ko jɔɔnw.” (Waaj. 10:7). Tuma dɔw la, setigiyaba be minw fɛ, olu tɛ tandoli sɔrɔ. Nka, setigiyaba tɛ minw fɛ, olu lo be tandoli caaman sɔrɔ. O kama, Solomani y’a fɔ ko koow be cogo min na, an ka sɔn o ma ani an kana a to o k’an fari faga (Waaj. 6:9). N’an majiginin lo, koow mana kɛ cogo o cogo, an bena sɔn o ma hali n’an b’a miiri k’o tun ka ɲi ka kɛ cogo wɛrɛ la.

11. An ka ɲi ka koow ta cogo di n’u y’an ladi?

¹¹ Loon o loon an be sababu caaman sɔrɔ k’a yira ko an majiginin lo. An ka ɲɛyirali dɔw lajɛ. N’u y’an ladi. An k’a to an hakili la ko ni mɔgɔ dɔ ye wagati ta k’an ladi, a be se ka kɛ ko an ye filiba dɔ lo kɛ ani an yɛrɛ t’o kala ma. O koo ɲɔgɔn na, n’a sɔrɔ an bena sin ka ban o ladili ma. N’a sɔrɔ an yɛrɛ bena a tigi kɔrɔfɔ wala k’a fɔ ko a m’o ladili di cogo ɲuman na. Nka n’an majiginin lo, an bena o koo ta cogo ɲuman na.

12. Ka kɛɲɛ ni Talenw 27:5, 6 ye, ni mɔgɔ dɔ y’an ladi, mun na an ka ɲi k’a waleɲuman lɔn o kosɔn? Ɲɛyirali dɔ fɔ.

¹² N’u ye mɔgɔ majiginin ladi, o ka di a ye. Miiri k’a filɛ: I be Masaya Boon na. I kumana ni balima caaman ye ani o kɔ, balima dɔ b’i weele ka bɔ gɛrɛfɛ k’a fɔ i ye ko: “Hakɛ to k’i daa jɔsi, dumuni murumuru b’a kan.” Siga t’a la, o bena maloya bila i la. Nka, i bena o balima waleɲuman lɔn sabu a y’o fɔ i ye. A yɛrɛ tun bena diya i ye ni dɔ tun y’o fɔ i ye joona. O cogo kelen na, an mako be ladili min na, ni balima dɔ y’a jaa gwɛlɛya k’o di an ma, an ka ɲi k’an yɛrɛ majigi ka sɔn o ma ani k’a fo o kosɔn. Sanni an k’o tigi jati an jugu ye, an k’a jati an teri ye.—Talenw 27:5, 6 kalan; Gal. 4:16.

13. Ni nɛɛma baaraw kalifara mɔgɔ wɛrɛw ma, an be se k’a yira cogo di ko an majiginin lo?

¹³ Ni nɛɛma baaraw kalifara mɔgɔ wɛrɛw ma. Jason ye diinan mɔgɔkɔrɔ ye. A ko: “Ni nɛɛma baaraw kalifara mɔgɔ wɛrɛw ma, tuma dɔw la, n’ be n’ yɛrɛ ɲininga fɛɛn min kama u ma ne lo sugandi.” Yala i delila ka kɛ n’o miiriya ɲɔgɔn ye wa? Koo jugu tɛ k’a ɲini ka nɛɛma baaraw sɔrɔ (1 Tim. 3:1). Nka, an ka ɲi k’an ka miiriyaw kɔrɔsi. N’an m’an janto, an be se k’a to kuncɛbaya  ka barika sɔrɔ an kɔnɔ. Ɲɛyirali fɛ, balimacɛ dɔ be se k’a daminɛ k’a miiri ko ale lo be se ka baara tigitigi dɔ kɛ kafo kɔnɔ ka tɛmɛ tɔɔw kan. Balimamuso dɔ fana be se k’a miiri ko: “N’ cɛɛ be se k’o baara kɛ koɲuman ka tɛmɛ balimacɛ nin kan!” Nka n’an majiginin lo sɔbɛ la, an tɛna kɛ n’o miiriya ɲɔgɔn ye.

14. Musa ye koow ta cogo min na tuma min na nɛɛma baaraw kalifara mɔgɔ wɛrɛw ma, an be se ka kalan juman lo sɔrɔ o la?

¹⁴ Musa ye koow ta cogo min na tuma min na nɛɛma baaraw kalifara mɔgɔ wɛrɛw ma, an be se ka kalan sɔrɔ o la. A ka baara tun ye ka Israɛldenw ɲɛminɛ ani o tun ka di a ye kosɔbɛ. Tuma min na Jehova ye Musa ka baara dɔw kalifa mɔgɔ wɛrɛw ma, Musa ye koow ta cogo di? A ma ɲangoya kɛ (Nɔnb. 11:24-29). A tun majiginin lo ani a y’a to dɔw y’a dɛmɛ ka jama ka kitikow ɲɛnabɔ (Ɛkiz. 18:13-24). O ye Israɛldenw nafa kosɔbɛ. U tun tɛna kɔnɔnin kɛ wagatijan kɔnɔ walisa u ka kitikow ka ɲɛnabɔ. O cogo la, Musa y’a yira ko ka mɔgɔw dɛmɛ, o kɔrɔtanin lo a fɛ ka tɛmɛ a ka nɛɛma baaraw kan. O ye ɲɛyirali ɲuman ye dɛ! N’an b’a fɛ nafa ka kɛ an na kosɔbɛ Jehova ɲɛɛ kɔrɔ, an ka ɲi ka mun lo kɛ do? An ka ɲi k’a to an hakili la ko an ka yɛrɛmajigilenya ka kan ka tɛmɛ an ka setigiya kan. Jehova “be sanfɛ, nga [a] ɲaa be yɛrɛmajigilenw na.”—Zab. 138:6.

15. Yɛlɛmani jumanw lo kɛra dɔw ka ɲɛnamaya kɔnɔ?

¹⁵ N’an ka koow cogoya yɛlɛmana. Saan tɛmɛninw na, balima minw ye baara kɛ Jehova ye saan caaman kɔnɔ, baara wɛrɛ kalifara u caaman ma. Ɲɛyirali fɛ, saan 2014, ɔriganisasiyɔn ko distriki kɔrɔsibagaw tɛna kɛ yen tugun. O kama, baara wɛrɛ kalifara olu n’u musow ma. O saan kelen na, a fɔra ko ni balimacɛ dɔ ye saan 70 sɔrɔ, a tɛ se ka kɛ kafokulu  kɔrɔsibaga ye tugun. Ka fara o kan, ni balimacɛ dɔ ye saan 80 wala 80 ni kɔ sɔrɔ, a tɛ se ka kɛ diinan mɔgɔkɔrɔw jɛnkulu ka koow labɛnbaga ye tugun. Saan tɛmɛninw na fana, u ye betɛliden caaman ci ka kɛ piyɔniyew ye. Baara min tun kalifara dɔw ma fana, u y’o to yen koo nunu dɔ kosɔn: kɛnɛyako, kunkanbaaraw denbaya kɔnɔ wala koo wɛrɛw.

16. Balima dɔw y’u majigi ka sɔn yɛlɛmaniw ma ani ka koow kɛ ka kɛɲɛ n’u ye cogo di?

¹⁶ A tun man nɔgɔ o balimaw fɛ k’o yɛlɛmaniw kɛ. U tun be baara min kɛ fɔlɔ la, siga t’a la, o tun ka di u ye yɛrɛ le! U caaman y’o baara kɛ saan caaman kɔnɔ. O kama, tuma dɔw la u dɔw dusu tun be kasi kosɔbɛ. Nka, u tora k’u yɛrɛ degi u ka baara kura la, dɔɔni dɔɔni u sɔnna o yɛlɛmaniw ma ani u ye koow kɛ ka kɛɲɛ n’u ye. Fɛɛn fɔlɔ min y’u dɛmɛ, o ye k’u be Jehova kanu. U tun b’a lɔn ko u y’u yɛrɛkun di Jehova lo ma. U m’o kɛ baara wala lɔyɔrɔ dɔ kosɔn (Kɔlɔs. 3:23). Jehova tun mana baara o baara kalifa u ma, u dusu tun ka di k’o kɛ ni yɛrɛmajigilenya ye. U y’u ka “haminakow bɛɛ to a bolo” sabu u b’a lɔn ko a be janto u la.—1 Piyɛri 5:6, 7.

17. Jehova b’an jija a ka Kuma kɔnɔ ko an ka kɛ ni yɛrɛmajigilenya ye. Mun na an b’a waleɲuman lɔn o kosɔn?

¹⁷ An be Jehova waleɲuman lɔn sabu a b’an jija a ka Kuma kɔnɔ ko an ka kɛ ni majigilenya ye. N’an b’a ɲini ka kɛ n’o jogo ɲuman ye, o b’an ni tɔɔw nafa. O b’an dɛmɛ fana ka gwɛlɛyaw muɲu. Min yɛrɛ kɔrɔtanin lo ka tɛmɛ, o ye ko o b’an dɛmɛ an k’an magwɛrɛ kosɔbɛ an sankolola Faa la. An dusu ka di kosɔbɛ k’a lɔn ko hali n’a “siginin be fɔɔ sanfɛ, fɛɛn bɛɛ sanfɛ,” a sagokɛla majigininw koo ka gwɛlɛ a ma!—Ezayi 57:15.